Gênesis 14
14
Quatro Phurune Yahoxyawakna Cinco Phurune Piranapni
1Wane rixa hakanhaleta waneklu papko Anrafel Sinear poktshi pohire, Arioque, Elasar poktshi pohire, Quedorlaomer, Elão poktshi pohire hiyrunu Tidal, Goim poktshi pohire.
2Hyahotkakna Bera, Sodoma poktshi pohire, Birsa, Gomorra poktshi, Sinabe, Admá poktshi pohire, Semeber, Zeboim poktshi pohire hiyrunu Belá poktshi pohire koxa (xyekni Zoar).
3Nyi phurune hapatjekakyehita hyahotkajyawakapna kihlemta tshijiwaka Sidim tshinikowaka xyekni, mar powha ktuwreru tshinkaluru.
4Doze mhale Quedorlaomer towutna nyi cinco phurune seyni doze mhale nikawnini wane hapkatatatshri mhale hmajnakowayehitluna nyi cinco phurune.
5Waneya treze mhale nikawnini wale hapkatatatshri mhale, rapoka Quedorlaomer waleymalune phurune koxa hallitanna refains-ne, Asterote-Carnaim poktshi hajene, rallitanna zuzin-ne, Hã poktshi hajene koxa, rallitanna emin-nerune Savé-Quiriataim poktshi hajene koxa,
6rallitanna horeuso-nerune hipjita Seir hajene koxa haté El-Parã, popriwakastsi hajeru poktshini.
7Waneya hsatokamtna En-Mispate tshinikowaka riknohamtna (Cades koxa tshinikowaka) waneya rallitanna psoltshiji hajenniko amalequita-nerune, amorreu-nerune koxa Hazazom-Tamar tshinikowaka hwatshinni.
8Hiyáhoni hyana Sodoma pohire, Gomorra pohire, Admá pohire, Zeboim pohire, Bel pohire (xyekni Zoar tshinikowaka) nyi halpokotatkalu hyahotkajyawakna wanna kihle tshijiwaka Sidim tshinikowaka.
9Hyahotkajyawakapna Quedorlaomer-yma, Elão poktshi pohire, Tidal-yma, Goim poktshi pohire, Anrafel-yma, Sinear poktshi pohire, Arioque-yma, Elasar poktshi pohire; quatro phurune yahotna cinco phurune.
10Hetanu Sidim kihle tshijiwaka rawapa hixlu (betu-ne knaha); waneya Sodoma pohire Gomorra pohire koxa hasukatka, satkaka yineru tshijipna hijruka, pimrine hixetatshine hipjita hya hasukletna.
11Waneya hkonna psoluka Sodoma, Gomorra hejnunkate, psoluka nikkaluru waneya hyatkana.
Ló Kachixikolu Piranapni
12Hkachitkoxluna Ló, Abrão hepuru whene, Sodoma poktshi rawajekanaxini. Rejnunkate koxa ranikna. Waneya hyatkana.
13Waneya satu hasukamta Abrão hebreu-neru nwaka runkajyawakaplu xye pirana. Walekni tsru hahmunastsi hwajekanatatshri Manre, amorreu-neru yehi, Escol, Aner tshinkalune mole, nyi Abrão hepirenni wanna yehi.
14Waneya hyijnakoxinixka Abrão hituru himole whene hkachixikowakatka, htomhana trezentos e dezoito jejine walestsi matuxikatshine, nyiyma romkahitna Ló kachimtatshine haté Dã tshinikowaka.
15Hoyetshnotkani Abrão kanipretna pa ptohkaka waleymalune waneya Abrão wannayma yahotkaka rakakna, romkahitna haté Hobá tshinikowaka, Damasco-stsi hajeru poktshi.
16Hsatkaklu rejnunkatna psoluka, Ló Abrão turu koxa ptowruka rejnunkate, suxone koxa hiyrunu ptowruneka Ló-yma kachitkalune satkapatka.
17Waneya yahotkaklu ruchpajinixka Abrão, Quedorlaomer-ni hkayaxya hiyrunu phurune waleymalunni, hkayaxya Abrão hiyáhoni hyamtatka Abrão Sodoma poktshi, kihlemta tshijiwaka Savé tshinikowaka pohire yanwakatlu Abrão. Phuru kihlemta tshijiwakate hyoptokajyana.
Melquisedeque Kihlewaka Htshinyawaklu Abrão Piranapni
18Waneya Melquisedeque, Salém poktshi pohire, haniklu pão, vinho-ha koxa; xyekni Tsru Hixikatshriwa Hoyakalu sacerdote-te.
19Kihlewaka htshinru Abrão, wla htshinru: “Kihle hchinikanuplu Abrão, htshinyi Tsru Hixikatshriwa Hoyakalu, tenhohne, tshij-koxa towutatshri;
20Himalwutkalurni Tsru Hixikatshriwa Hoyakalu pkamnitjene hamtakkakatshri.” Waneya Abrão ptowru rimwaleru psojitkaka reneklu Melquisedeque.
21Waneya wane htshinru Abrão Sodoma poktshi pohire:
— Penekanno xako nayinetene seyni pixa himutukanru ptowruka rejnunkatna.
22Seyni Abrão hihitlu:
— Nyotukamyoyehitanru Tsru Hixikatshriwa Hoyakalu tenhohne potu hajeru, tenhohne tshiji koxa kamhatshri;
23hiyáhoni hikeklu hohne nalukanru pixa himwaleru, hi satuknako tsapu, hi sandalha-tsako hiyáhokni hi wane ptshinanno: “Abrão pohirewata hita tshinanu.”
24Hike naluka hita seyni nmaklutene nikanru tsonu naluka. Halikaka nimotsane jejine Aner, Escol, Manre, wanna halikaka ranikamtanruna rumukata himutukletna.
Currently Selected:
Gênesis 14: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
