Gênesis 19
19
Sodoma Poktshi Nikaxikolupa Piranapni
1Rutshpojinixka rapokna anjo-ne hepi Sodoma poktshi. Ló tsru poktshi hiphaptote tuplakanata. Waneya Ló hexinixkana hyanwakamtna, hyotómiha haté tshiji rutspakhojita.
2Waneya Ló wan-tshina:
— Nutsrukatene, hinamtanu nopjitshi wyanu, wane himjini, herojixitanu waneya yetshikawa yetshpotukawa hyanutka.
Seyni wanna wan-tshinru:
— Hike seyni tsru poktshi hanikajiteko phujewaka wumjini.
3Seyni Ló hipokananu htshanixna hiyáhoni rimotsatluna hjihlokapjitluna Ló-pji. Ló kamhalu tsru nijittshi hnikanrupna, hkamhalu pão myapjetu. Waneya hnikna.
4Hma mukoluhkanuklunuwana ptowruneka jejine Sodoma poktshi hajene ptowru poktshi sretako hichpajikatshine, maklujine, tsrutsolejin-koxa, sajrukatkalu pantshi.
5Htomhaluna Ló:
— Hanhe hyana wanna jejine xye yetshno papyehitjene? Panikanna maleka wperepnatanna.
6Waneya Ló hichpakamta hyoptoxyawakapna, ruchyamtlu hiphapto ratjini.
7Wane htshinna:
— Hike nomolene, hi hkamhanru wale hektutu;
8seyni hetanu, hita himwana nowhenene maklojine hepi, hike jeji hapokmanetawana. Haluknohe maleka nanijyawakna nowhenerone? Hanukta haluk-hixletna wane hixanna. Seyni nyi jejine hi hyotnekanu klu tshinanu hitapji hapokatshinni hiyáhoni hita hislahna.
9Seyni wanna wan-tshinru:
— Wista sreta pasujinixka.
Waneya wane pnuteko htshinna:
— Ha, xye jeji mnukawa paneru hixa hanikajite hapoka seyni xawakni raluk-towutletwu. Pix-potu hektutu wkamhini. Waneya rerutluna Ló hyanwakatluna hiphapto hyotpujyawakapluna hiphapto.
10Seyni anjo-ne pantshi hitokote hwakanatatshine hyosurukakanotna hkosetluna Ló pantshi hruko hya waneya ruchyatatkaluna hiphapto.
11Waneya hkamhaluna hiphapto maleka hwatshine jejine, maklujine, tsrutsolejin-koxa, hmexyawakanpatkana hiyáhoni hi rumukata hikchikletluna pantshi hiphaptote.
12Waneya hepi jejin-honra wan-tshinru Ló:
— Waneyyihe pimrine pimekanurune, hiwhenene jejine ho suxone, ho satu yineru hewi poktshiya pixa payinetene? Pkochpakanru hewi poktshiya.
13Klu tshinanu wnikatanru xye poktshi. Xye poktshi hajene hektunu sejire tsru potuko hapokyehitlu Tsru Hixikatshriwa Hoyakalu hiyáhoni hyokanatatkawu wnikaxyawakaplu xye poktshi.
14Waneya Ló yatka, riynumsatatkana himekanurunepiramka, Ló whenene suxone hnunrotatshinepamka. Ló wan-tshina:
— Chinipotuphi, hewi poktshi hichpajinixka klu tshinanu Tsru Hixikatshriwa Hoyakalu xekoyaka hnikatanru xye poktshi. Seyni himekanurunepiramka kahwaklu Ló kajrukna.
15Rumrerekpiraxinixka anjo-ne haluk-chiretletlu Ló wane htshinruna:
— Wuya ppalnanu, panikanna phanunro, piwhenene suxone hepi, klu tshinanukta hewikowana hma mupniywakanupna tsru poktshi hapnokaxikolupni.
16Seyni Ló hi chireta hiyáhoni anjo-ne kachimyotna Ló myo, Ló hnunro myo, wanna hepi hwuhenene suxone myo klu tshinanu Tsru Hixikatshriwa Hoyakalu hetwamonre tshinanu hkochpakna tsru poktshi kahnete rutakna.
17Kahnete ranikkatkana waneya satu anjo wan-tshina:
— Hasukanu hiwekkajinwa, hi heknokanu hi hituk-hasuklemtanu campo-ya. Seyni hasukanu teno mrijiwaka hyanu hma mupniywakanupa.
18Seyni Ló wla tshinatkana:
— Ha hike nutsrukatene!
19Hita hixa towrerno hikchiklu wamontshi hixa yhaleya hiyrun-koxa pekhitno hi pa hamotlu pixno klu tshinanu piwekkakatkano seyni hi numukata teno mrijiwaka nwaka nasukamxyawaka klu tshinanu xye hapnokatlu himukata hapkakletanno waneypakni nupnanuna.
20Seyni hawla poktshi hi howukatka wane pchini numukata hasuklexya hiyrun-koxa hi tsru poktshini. Hiyáhoni xawakni pitshitannotshi wale nwaka nasujyawakapa klu tshinanu honra hi tsru poktshini wale. Wane hi nupnini.
21Waneya wla htshinru Ló:
— Haté hehe hiyrun-koxa panjixyawaka nixanyi poktshi ptshinreru hi nnikatanu.
22Hiyáhoni xawakni pchiretanu wane pya hasukletanu klu tshinanu hike numukata kamhaleta wane hmapokkanu pchinika. Wale tshinanu wale poktshi hiwakatka Zoar.
23Ló hali jihloklexinixkalu Zoar poktshi rali honotletatka tkatshi tshij-hoho.
24Waneya Tsru Hixikatshriwa Hoyakalu hixkajyawaklu teno tuchpajyawaka enxofre, tshitshmeroyma. Tsru Hixikatshriwa Hoyakalu yokanatlu tenhohneya Sodoma, Gomorra poktshine hohwaka rapojyawaka.
25Wane rixa nikatletna wanna poktshini hiyrunu campo kihlemta tshijiwaka psoluka hnikatatka hiyrun-koxa poktshini hwakanatatshinni ptowruneka hipnanatka. Kchan-koxa psoluka hnikatatka.
26Seyni Ló hnunro tatjini teknokana hiyáhoni tuktehmanetanatka tuwu stsihi tixnanatkawa.
27Waneya Abraão yetshpotukawa ruptekatka. Tsru Hixikatshriwa Hoyakaluyma hyopkakakanaxyawaka nwaka hyatnaka. Wane hyopkakatnaka.
28Sodoma, Gomorra poktshine nwaka hyihata hiyrun-koxa kihlemta tshijiwaka nwaka hyihata. Retlu tshitshipha tshiji hpalniya forno nikotle pixka rixa wale meropha.
29Hiyáhoni wane rixa hakanhaleta Hoyakalu nikaxyawaklu poktshini kihlemta tshijiwaka hwakanatatshrini pejnu mitshi. Abraão ruchinikatka. Hiyrun-koxa rasukkakatkalu Ló rawakanaxyawaka poktshiniya hnikatkoklununatka.
Ló Himtujikolu Piranapni
30Waneya Ló Zoar tshinikowaka ruchpajya. Teno mrijiwaka rawatka hiwheneroneyma hepi. Wane rixa klu tshinanu hpika Zoar poktshi rawyawakapa. Hiyáhoni satu kapna hipjita hwatshri rawjetatka wale hiwhenerone hepiyma.
31Waneya tsrojro wla tshinro tepuro:
— Tsrutsolejitkani wuru hiyrun-koxa hi rawa satu jeji xye tshij-hohoya hmichiwkajyawakapwu rixje yine pixka.
32Hiyáhoni xawakni vinho-ha katsh-halu wutanru wuru waneya wumumkanru wuru wepixyawakaplu hiklopicha hma nikawniywakanupa.
33Hiyáhoni wale yetshno katsh-halu rutluna rurna. Tsrojro jihlokyehitatkalu tumumkalu turu. Seyni tsru hi himatlu tumumjiywaklu waneya wale yehi tpalnahapkaxyatka hi rimatatka.
34Waneya wale prika tsrojro wla tshinro tepuro:
— Ha hetanu kapet-yetshnoni nuru numumkatka. Hiyáhoni xawakni katsh-halu wutanru xye yetshno tshinanu koxa. Waneya pixa jihlokyehitanru, pumumkanru wuru hiyáhoni wepixanru hiklopicha hma nikawniywakanupa.
35Waneya wale yetshno koxa katsh-halu rututluna rurna. Waneya hepúrotshi palnatka tumumkalu. Seyni tsru hi himatlu tumumjiywaklu waneya wale yehi tpalniya hi rimatatka.
36Hiyáhoni hiwhenerone hepi michiwatatka rurnako Ló michitna.
37Waneya tsrojro wuhenetlu jeji. Moabe tutakhiwakatlu. Xyekatkani Moabe neru hirupatka haté xawakni.
38Waneya hepúrotshi koxa matuwheneta jeji. Ben-Ami tutakhiwakatlu. Xyekni Ben-Ami nerune hirupatka haté xawakni.
Currently Selected:
Gênesis 19: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
