Gênesis 43
43
Egito Tshijne Nwaka Hyamxyawaka Hiyrunukotnaka Piranapni
1Natshi pnute yamta psoluchaka.
2Rali niklexinixkana Jacó hiwhenene koxa honantshi Egito tshijne rawapinrina waneya wla htshinna tsru:
— Wanetshi hsatkapanu psoji hanjitanu hixa wniklerupa.
3Seyni Judá wla tshina hihretlu:
— Seyni jeji honra hipokananu wan-tshinwu: “Hepuru hmanikkanuklunupa hi hetanru nohoji.”
4Pyokanaxiniplu wepuru hixayma waneya wserpikanu honantshi wanjitapanu pixa tshinanu.
5Seyni pma yokanatkanuklunuplu hi wserpikanu. Klu tshinanu wla htshinwu jeji: “Hepuru hma manikkanuklunupa, hi hetanru nohoji.”
6Waneya Israel wla tshina:
— Haklu tshinanhe himtukatkano hinkajyawaklu jeji kamole hixyawaka hepurtshi?
7Waneya ruhitluna wla htshinna:
— Jeji honra hepomhayehitwu hiyrun-koxa wimolene pirana repomhayehitatka wla htshinwu: “Riwekawhe puru? Kamolhihe satu?” Hiyáhoni repomhale wuhichatatka hanu xawakhe wumukata himatletlu wimole raluka haniklekjixyawaka?
8Judá wla tshinru ruru Israel:
— Makluji pyokanatanu hitayma waneya wpalnanu wyanu wma mupniywakanupa seyni wiwekanu hixa hiyrun-koxa pixa hiwekanu, wiwhenene koxa hiwekanu.
9Hitapni ruslahjerno. Pmunanhanno hiyáhoni nma misatkapkanuklunuplu pixa nwaka waneya hitako ntshinanupni wane nixahohnekanatanu.
10Klu tshinanu wma mimalethohnekanatkonumka hepi katamka wumukata satkapletatka.
11Waneya wla htshinna rurna Israel:
— Wane hixini wla hixanu. Hanikanru xye tshiji halujikalur-potu h-saco-neya, hanikanru henekachatanru wale jeji bálsamo psoji, wrolha psoji, arômatas, mirra, pistache hanaji, amêndoas koxa henekanru.
12Tiyiro koxa hwinro pnute hepi kata hanikanu hiyrunu tiyiro saco hwakanatatshro hsatkakanu pa katako hyokwijexnawana.
13Hixa mole hepurtshi koxa hanikanu, hchiretanu, hsatkapanwakatanru jeji.
14Hoyakalu Tsru Himukatatshri henekanhi hetwamonrewlu wale jeji hojiya, hsatkajyawakaplu hixa mole satu hiyrunu ritshixyawakaplu Benjamim hsatkapyawakapa. Seyni hita, namtakawhenexinipa mwuhenetpatkano.
15Waneya ranikluna jejine renekachalna, tiyiro hwenru pnute hepi kata hiyrun-koxa Benjamim. Hpalnana Egito tshijne hserpikna, ruphujewnana José yehiya.
16José hexinixkalu Benjamim wannayma waneya wane htshinru pantshi hislahatshri:
— Nyi jejine nopji panikanu, boi whene puylatanu, palpokotanru ptowruka klu tshinanu nyi jejine hanikaj-hohne hitayma hnikanna.
17Waneya José towreru José-pji ranikamtna htowuxyawaklu pixka.
18Hpikna ranikkoklunutkana José-pji nwaka. Waneya wla rixahchinikanutna: “Wapokamtkawaka wtiyrote wsatkaklero w-saco-ne wukchijinrotka tshinanu hetkokni wkata wanikkatka. Wane rixa mitshi rukolukanuwnakajyawakapwu hkachixyawakapwu towrertshine wixikowakapa hiyrun-koxa wiprane jumento-ne hkonyawakapwu tshinanupa.”
19Waneya José-pji suslahaklerustsi rapokatkana riynumsatluna pantshi jihlokkawakle hinapleya.
20Wla htshinruna:
— Nutsrukate, wehapokle mitshi wkata wuna honantshi wanjitapyawakapa.
21Seyni wipji nwaka wyamxinixka wutukyetshnoxyawaka wkotpuka-saco-nexya satkakwu hixa wukchiklu wtiyirote psoluka saco hrukoya. Wale tshinanukni wanikamtatkalu wsatkajyawakaplu.
22Hiyrun-koxa pimri tiyiro wimapokatka honantshi wanjixyawakapa. Hi wimata katukta hitakatkalu wtiyirote w-saco-ne hruko.
23Waneya wale wla tshinna:
— Seyni kihle hchinikanuphi hi hpikanu. Hixa Hoyakalute, hiru Hoyakaluteko pohirewnalu renekatkahi h-saco-ne rutajyahi klu tshinanu hita yoptotlu hixa tiyirote hwenuxyano. Waneya Simeão hkochpaka wanna nwaka raniklu.
24Waneya suslahakleru hanikatkana jejine José-pji hitokote. Honha rutakyehitna rerokajixixyawakna. Hiyrun-koxa hiprane jumento-ne rohlutatka.
25Waneya henekachaluru ranikanruna José tshinanupa ralpokohnaputatkalu rapojinipa hanikaj-hohneya. Klu tshinanu hjemna waneko hnijinna.
26Waneya pantshi rapojiniklunupa José henekachalu ranikanwakatluna himyoyna ranijyaluna pantshi hitokote. Hyonohiyehitluna, hihojna rutspaktshijitna.
27Waneya repomhatkana wanna pirana hanu rixna, wla htshinna:
— Hiru, jeji tsrutsoleji hixa kochtshekleru mitshi, pomtalhe? Riwekawhe?
28Waneya ruhitluna:
— Wuru, ptowreru pomtatka, riwekawa. Waneya hyonohyehitluna, rimalwutluna.
29Waneya hyotunotatka repuru Benjamim, runroni whene retatka, waneya wla htshinatka:
— Xyeklahe hixa mole hepurtshi hinkaklexyano mitshi?
Waneya pnuteko wla htshinru repuru:
— Hoyakalu hetwamonutanyi noturu.
30Waneya José repuru wamontakle tshinanu rujhatkalu htshiyahaxyawakapa hiyáhoni hchiretatka wanna hetanu rasujyawakapa. Hiyáhoni waleko hruklu hjihlokatka waneya waneko htshiyahaxyatka.
31Waneya rerokahojixnawa waneya ruchpakatnaka mtshiyahatkatutka waneya wla htshina:
— Nijittshi hitakanu.
32Waneya nijittshi rutakna José tshinanupa hkotspalatluna hiyrun-koxa nijittshi hitakka kahnete José molene tshinanupa hiyrun-koxa nijittshi hitakka kahnete waleyma nikatshinemkapa egito-nerune tshinanu. Klu tshinanu egito-nerune hi himukata himinkaletna hebreu-nerune. Klu tshinanu egito-nerune kahwaklu hebreu-neruneyma hnijyawakna hektutni.
33Htuplakakatkana mitshikananu matutatshri haté hapkatmatletatshri potuko wale hetanuya. Hiyáhoni retjeyhalkakna.
34Waneya nijittshi wale mesa-te hwatshri rutakyehitna. Seyni Benjamim nijitu wale yehi hitakkaluru cinco kata tsruylu nijittshi pimrine hitakyehitkaluru. Waneya hnikna, rurna hpoyikowatna waleyma.
Currently Selected:
Gênesis 43: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
