Gênesis 7
7
Noé Koxa Tsro Kanawa Jihlojyawaka Piranapni
1Waneya Hoyakalu wan-tshinru Noé:
— Pjihlokanro tsro kanawa pixa hiyrun-koxa payinetene klu tshinanu netyi pixa potukyi hita hetanuya xye papko.
2Ptowru nikalu Hoyakalu hitshi nikkotanru sete pa nerkaka ppokoxini pixayma, sete jeji, sete suxo; seyni ptowru pejnu nikalu mnikkotu hepkaka ppokotanu sat-jeji, sato suxo.
3Kamejirun-koxa teno yapatshine pejnu setekaka, jeji suxo; hma nikawniywakanupna tshijiya.
4Waneya sete hohne hiknohinpatka nkamhanru rinnewaxyawakapa tshij-hoho quarenta hohne quarenta yetshno koxa; hiyáhoni nnikatpotutanhonuklu ptowru pejnu hiwekatshri nkamhalene xye tshij-hoho hma wiywakpatkana.
5Waneya Noé wane potuko hixa ptowru Hoyakalu towuxyalu rixa.
6Hiyáhoni Noé seiscentos mhaletkalu honha hahyekachalu hapokatka tshij-hoho ruchyahatatka.
7Hiyáhoni Noé, hiwhenene, hhanunro hiyrunu hiwhenene hanunrokaka hjihlokna tsro kanawa hahyekachalu tshinanu.
8Nikalu hitshinikletkaluru, nikalu mnikole, kamejirune hiyrunu ptowru hixatshri tshij-hoho yosrolotatshri hpokota.
9Nikalune jihlokyehitlu Noé hepkaka, jeji, suxo hanukta rixa towutletlu Hoyakalu Noé.
10Wane rixa hiphujewnaleta sete hohne pnutetka, tshiji ruchpakhaxya honha rinnewat-koxa.
11Seiscentos mhale hiyrunu pa ksuru hiyrunu dezessete hohne rixinixka Noé. Waneklu hohne potukotkani rupcheka honha tshijiya hitokha hwatshri hiyrun-koxa tenhohne kohpukkatka. Rujruka tsru hina.
12Hiyáhoni hinatkani tsru nek-potuko quarenta hohne quarenta yetshno tshij-hoho rapokhaxyatka.
13Wale hohneko tsro kanawa hjihlokna Noé hiwhenene Sem, Cão, Jafé hiyrun-koxa Noé hnunro, Noé whenene hnunron-koxa.
14Wanna hiyrunu ptowru nikalu satkaka neru, ptowru hixatshri campo hajeru, wale nerkaka mkoje, ptowru hixatshri tshij-hoho yosrolotatshri wale nerkaka; ptowru hixatshri kamejiru nerkaka; ptowru kochitshin-koxa.
15Ptowru nikalu hinniphatatshri jihlokyehitlu Noé hepkaka tsro kanawatlo hya.
16Ptowru nikalu jeji, suxo jihloka hanukta rix-towutletlu Hoyakalu wane rixa. Waneya Tsru Hixikatshriwa Hoyakalu wanna hatjini hichyatlu tsro kanawa hiphaptote.
Hahyekachalu Piranapni
17Quarenta hohne pejnu rawhata hahyekachalu tshij-hoho. Rapohamta honha hiyáhoni timlikatka tsro kanawa tshij-hoho tmawyawakanupa.
18Rapohamta honha, tsruh-potuko rixa tshij-hoho. Hiyáhoni tsro kanawa honra honha hoho twatka. Waneya tusurokamta.
19Rapohamta honha tshij-hoho tsruh-potuko haté ruchyatlu ptowru hipjitkaka tenolu ptowruchaka.
20Teno pjitalu haté sete metros pnute ruchyata hiyáhoni hipjitkaka hahyekatka.
21Ptowru hiyolikatshri nikalu tshij-hoho hwatshri hipnanatka; kamejiru hiyrun-koxa campo hajeru, hocha hajer-koxa hiyrunu ptowru hixatshri tshij-hoho yosrolotatshri hiyrunu ptowru yineru hipnanatka.
22Ptowru hixatshri hinnipha hiwejikatshri hijripnaya, tshiji popriwaka yapjekanatatshrini hipnanatka.
23Hiyahokni wane rixa nikawnaletna ptowru hiwekatshri tshij-hoho hwakanatatshri, yineru, nikalu, tshij-hoho yosrolotatshri, kamejirune tenhohne yapatshine koxa nikawna tshij-hoho rawyawakna; rutukatka Noé tsonu hiyrunu tsro kanawatlo yatshine.
24Hiyáhoni honha hichyatlu tshiji cento e cinquenta hohne.
Currently Selected:
Gênesis 7: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
