João 6
6
Jesus Pão Hixolewkajyawaka Piranapni
1Waneya wane pnute Jesus kopruhatlu Galileia powha tujra wnahlu Tiberíades tshinikowaka.
2Hixolune yine homkahikanatlu Jesus klu tshinanu retluna himyekaklewatatshri Jesus yeyixatshine rutskalajyawaka.
3Waneya Jesus satu himriji hkankatka wane htuplata rasrukleneyma.
4 Páscoa hohne (waleni ruchinikanretluna Egito tshijne ruchpajinrina papko), tsru himretkaluru hohne, judeu-ne hasruha himretletanru hohne hi howukatka.
5Waneya Jesus heknojtata retna hixolune yine romkahitjene. Waneya Jesus wan-tshinru Filipe:
— Hanhe wanjixinri nijittshi nyi hixolune yine niklerupa?
6Jesus himatlu hkamhanrupa seyni wane htshina Jesus, Filipe retumhiywakapa.
7Waneya Filipe hihitlu:
— Satkaka yineru yoptoxyawakaplu psotsonujiji nikluru wujhalu duzentos prata proji ho pnute.
8Waneya André, Simão Pedro tshinkaluru mole, Jesus hasrukleru koxni wale, wan-tshina:
9— Hewiru satu mturu rawya cinco pão cevada kamhikolu hiyrun-koxa hepi chima whene. Seyni hanhe rixa hinanuwletanna nyi yine hixolune?
10Waneya Jesus wan-tshina:
— Punkakanna yine tshij-hoho htuplaxyawakapna.
Wale peklo yehi waneya peklo hwiywaka potuko htuplatna. Pakat-hetkoko cinco mil jejine wane hwakanata.
11Waneya Jesus pão hkochtsheka, hpoyahnutlu Hoyakalu waneya Jesus hapsatna pão ptowruneko. Waneko pixka rixlo Jesus chim-koxa. Waneya ptowruneka hi psokta raluka nikletna wane pso hnikna.
12Waneya rinanuwaxinixkana yine Jesus wan-tshinna rasruklene:
— Hapatjetanru hixetatshri hike hma salewniywakanupa.
13Waneya rasruklene hapatjetatkalu hixetatshristsiji cinco pão tshinanu hiyáhoni htsepotatkana doze chiwatu.
14Waneya Jesus hiyákole hetakanatatshine wan-tshina:
— Xyekni halikaka Hoyakalu tokanu hinkakletatshri xye tshijne hinatshripa.
15Waneya rimaxinipa Jesus yine haluk-hipokananu kachrexyawaklu wanna pohire rutajyawakluna hsatkapanwakatlu himriji hiyrunupatnaka. Walepka wan-ya.
Jesus Honha Hoho Hyanamxyawaka Piranapni
16Waneya kayi rixinixka Jesus hasruklene yanwakatlu hipowha.
17Waneya kanawa hpokownatkana Jesus hasruklene waneya hyinuwaka kopruhaletatkaluna hipowha, hyanwakamtluna Cafarnaum poktshi nwaka. Waneya rutshpokatka hiyrun-koxa Jesus hi hapokawa wanna hyoptoxyawakapa.
18Waneya waneklukawa potuko rakanhatka tsru kanniphalu. Waneya kanniphalu tenoplojha hixkaklu honha.
19Waneya cinco ho seis quilômetros pchini ruchpajyatkana Jesus hasruklene retluna Jesus honha hoho hyanamxyawaka. Kanawastsi rapokatka. Jesus hasruklene pikpotuthonuka.
20Seyni Jesus wan-tshina:
— Hi hpikanu, Hitni!
21Hiyáhoni hpoyikonuymana kanawa hpokotatkaluna Jesus. Waneya waneklukawa rapokna ruchinijyawakna tshiji.
Pão Hiwekkaklewatatshri Rixyawaka Jesus Piranapni
22Waneya wale prika yine hixolune pa sreta wnahlu hitukatshinetka hetlu pa kanawapka mtseroto tsonu wane hwa. Hixolune yine himatlu Jesus hi pokownalo kanawa rasrukleneyma klu tshinanu yine hixolune hetna Jesus hasruklene wannapka yatka.
23Waneya wane pchinika pimro kanawkaka Tiberíades poktshi hichpajikatshrokaka hapokastsitlu hixolune mitshi nijyawaklu pão Jesus hali poyahnutlexinixkalu, Hoyakalu mitshi.
24Waneya rexinixkaluna Jesus hiyrunu Jesus hasruklene hi wane rawna, kanawkaka hpokownatkana waneya Cafarnaum poktshi sreta hyana Jesus rujhapyawakapna.
25Waneya hixolune yine yoptotlu Jesus hipowha pa sreta wnahluya. Waneya repomhaluna:
— Kasruklewakleru, hikluhe hewi papokatka?
26Waneya Jesus hihitna:
— Hixa hi hijhajetno hiyakolukaka hexyawaka tshinanu seyni halikakni hixa hijhajetno klu tshinanu hixa nikatkalu pão, hinanuwatatka.
27Xako hi hkamrurewatanu nikkaluru himat-nikawnatshri tshinanu. Seyni hkamrurewatanu nikkaluru hikeklu hohne mnikawnakatupa tshinanu. Yineru Whene tshinkalurno xye nikluru hikeklu hohne mnikawnakatupa nenekanhi klu tshinanu Nuru Hoyakalu henekno xye tsru hitakkaluru.
28Waneya repomhaluna:
— Klunerhe xawaka wkamhanu? Hoyakalu kamrure wkamhiywakapa?
29Waneya Jesus hihitna:
— Xyekni Hoyakalu kamrure yine halixyawaklu Hoyakalu yokanrerni.
30Waneya wane htshinna wanna:
— Klu himyekaklewatatshri pkamhanu wexyawakaplu walixyawakapyi? Klunerhe pumukata kamhaletanu?
31Wutsrukatene maná hnikna popriwakaya wane htshina yonawahlo potukalu: “Reneklu pão tenhohne hichpajikatshri yine niklerupa.”
32Waneya hyanumata Jesus:
— Halikakni Moisés hi henekna pão tenhohne hichpajikatshri klu tshinanu pão tenhohne hichpajikatshri halikakalutni walekni Nuru heneklewjeta.
33Klu tshinanu pão Nuru heneklewaxya walekni yineru tenhohne serpijikatshri xye tshijne Hiwekkaklewaxikatshrini.
34Waneya wanna wan-tshinru Jesus:
— Hiyáhoni penekjetanunwu xye pão.
35Waneya ruhita Jesus:
— Pão hiwekkaklewatatshri Hitni. Katukta yanwakaxinno hikeklu hohne hnatshitanu hiyrun-koxa nalixjeru hikeklu hohne ronunnahatewatanu.
36Seyni ntshinyawakhi mitshi, hetmakno seyni hi halixno.
37Ptowru pejnu Nuru Hoyakalu henejyano, hinanwakatno. Hiyrun-koxa ptowru pejnu hita nwaka hapokatshri hikeklu maleka nuknokanru.
38Klu tshinanu tenhohne nunya tshiji hi hita nalujyawakako nkamhiywakapa seyni nyokanatjeru halujyawaka nkamhiywakapa halikaka.
39Xyekni Nuru Hoyakalu, nyokanatjeru halujyawaka. Hi satukna hma mamhiywakanupa renejyano pejnu, ralipre hohnepatka riwekkakkona hipuktshi yehiya.
40Hiyrunu xyekni Nuru Hoyakalu halujyawaka, Whentshi tshinkalurno hetatshine, hita halixatshine pejnu, hiweklu hike rixiniko mnikawnakatu hkayaxyawakapna. Waneya ralipre hohnepatka niwekkakanna hipuktshi yehiya.
Jesus Tokanu Hmukchikhihlenuxyawakna Judeu Piranapni
41Waneya judeu-ne hihjekaka klu tshinanu Jesus wan-tshinna pão tenhohne hichpajikatshrini wale.
42Waneya wla htshinna:
— Hi he Jesus tshinkalurni xye, José tshinkaluru whenni, ruru hiyrunu runro wimathetanunni, xye? Hiyáhoni hanhe xawaka rumukata wan-tshinrexnawa tenhohne hichpajikatshrini wale?
43Jesus hihitna, wla htshinatkana:
— Hi hihjekakanu hixkakluko.
44Hike yineru himukata yanwakletno Nuru Hoyakalu, nyokanatjeru mkosekkanuklunuplu hita nwaka. Waneyapa ralipre hohnepatka hipuktshi yehi niwekkajinri.
45Hoyakalu tokanu hinkakletatshine yonawahle, wla htshina: “Wanna ptowruneka Hoyakalu hasrukanunepni.” Hiyahokni ptowru yineru Nuru Hoyakalu jematshri, Nuru Hoyakalu himatkalewaxikatshri, yanwakatanno hita.
46Halikaka hi satukna yineru hetjejetlu Nuru Hoyakalu. Halikaka satupkalu, Hoyakalu yehi hichpajikatshri tsonu hetjejetlu.
47Halikakni, halikakni ntshinhi, Hita halixatshri himwalu hiweklu hike rixiniko mnikawnakatu.
48Hitni pão-no hiweklu heneklewatatshrino.
49Hixa hitsrukatenni maná nikjekanatni popriwakaya. Seyni rupnanna.
50Xyekni pão tenhohne hichpajikatshri. Ptowru yineru wale nikatshri hmupniywakanupa tshinanu.
51Pão hiwekkaklewatatshri, tenhohne hichpajikatshri, hitni. Hiyrun-koxa yineru wale nikatshri pejnu hiwekanu hike rixiniko mnikawnakatupni. Xye pão xye tshijne hiwekle neneklerupa, waleni nohitu.
52Waneya ruhjekakpotuthonukna wannakakluko judeu-ne, wla htshinna:
— Xye jeji, hanhe rumukata waleko himane henekletwu wnijyawakaplu?
53Waneya Jesus hihitna, wla htshina:
— Halikakni, halikakni ntshinhi, Jeji Whene tshinkaluru hitu hma mnijyawakanu hiyrunu hihraha hmuryawakanu hi hiwekanu halikaka.
54Nohitu nikatshri hiyrunu nohraha hiratshri hiwekanu, hike rixiniko mnikawnakatupni. Hiyrun-koxa ralipre hohnepatka hipuktshi niwekkajinri.
55Klu tshinanu nohitu halikakni nikkaluru hiyrunu nohraha halikakni hirkaluru.
56Nohitu nikatshri hiyrunu nohraha hiratshri, hita riwejya. Hiyrun-koxa wale niwejya hita.
57Nuru Hoyakalu hiwekatshri yokanaxyawakno pixka hiyrunu Nuru Hoyakalu himukatle tshinanu niwejyawaka pixka, waneko pixka rixa ptowru yineru hita nikatshri pejnu. Hita tshinanuko riwekanu.
58Xyekni pão tenhohne hichpajikatshri. Hi maná, hitsrukatenni nikjekanatanru pixka rixa. Hnikluna seyni rupnanna wanepnawaka. Seyni xye pão nikatshri pejnu hiwekanu hike rixiniko mnikawnakatupa.
59Cafarnaum poktshi rawakanaxini Jesus, hanjihohnewakapji rasruklewjekanaxini xye tokantshikaka htshinatka Jesus.
Satkaka Jesus Homkahiphutatatshri Hma Mukchikhihlenuxyawakluna Jesus Tokanu Piranapni
60Waneya hixolune rasruklene xyekaka tokantshi hjeminna wla htshinna:
— Kyapreru xyekaka tokantshi. Kathe hakot-yoptoletlu xye?
61Seyni Jesus himatatkalu waleko hihchinikanuya ruhjekakna htokanu tshinanu hiyáhoni wla htshinna:
— Hixlahe himtukahchinikanuta xyekaka tokantshi tshinanu?
62Ha hexiniplu Jeji Whene tshinkaluru tenhohne nwaka hsatojinipa rawakanaxyawaka yehi, hanhe hixahchinikanutanu?
63Hoyakalu Hiwejikaluru waleni henek-hiweklerewatatshri. Wimane hike kochpakatshrini. Tokantshi ntshinyahi waleni Hoyakalu Hiwejikaluru, hiweklu reneklewata.
64Seyni satkakhi hi halixno. Jesus wla tshina klu tshinanu hyinuwaklekananuko Jesus himathetatkana wanna malixlene hiyrunu rimathetlu katupni hkamnitjerupa, rekhitjerupa.
65Waneya wane pnute htshina hinkakleta, wla htshina:
— Wale tshinanu wane ntshinhi: Hi satuknako yineru himukata yanwakletno hita, Nuru Hoyakalu mitshitkanuklunru.
Hixolune Jesus Homkahiphutatatshine Hicho Homkahrexyawakanru Piranapni
66Waneya waneklukawa hixolune Jesus hasruklene hiknokatkalu hiyáhoni Jesus rucho hiyanretna.
67Waneya Jesus hepomhatkana rasruklene doze, wla htshinatkana:
— Ha hixa, hix-koxlahe hichotanno?
68Waneya Simão Pedro tshinkaluru wla tshinru:
— Tsru Hixikatshriwa, wane wixini hanhe wyanu? Klu tshinanu pix-honra himwalu tokantshi hiweklu hike rixiniko mnikawnakatu heneklewatatshri.
69Hixa halixyi, wmunanhayi Pixni Cristo-yi, Hoyakalu hichpajikatshriyi Potukalyi!
70Waneya Jesus wla tshinna:
— Hi he hitakni nurethi hixa doze-runhi seyni satu hixaymalutu kamtshi pixkalutni?
71Judas tshinkaluru, Simão Iscariotes whene pirana hkochtsheka Jesus. Klu tshinanu walekananukni satu wanna doze rixinri, Jesus kamnitjerupa, rekhitjerupa.
Currently Selected:
João 6: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
