João 8
8
Himopatlewatatshro Piranapni
1Waneya Jesus himriji Oliveiras tshinikowaka hya.
2Waneya yetshpotukawa Hoyakalupji hyatnaka. Wane hjihloka. Waneya ptowrunek-yine hapokastsitlu. Waneya Jesus tuplatatka waneya rasrukna yine.
3Waneya kasruklewaklerune hinanchitkaluru pirana hasruklewatatshine hiyrunu fariseu-ne hanikanwakatlu Jesus sato suxo, timopatlewakanaxyawaka yehi hkachixinrona. Waneya wanna hapatjetatshine hanikajite rutaklona suxo.
4Waneya wla htshinruna:
— Hasruklewatatshri, twu suxo kachitka timopatlewakanaxyawaka potuko tshinanu.
5Moisés towutwu yonruru piranaya sotluji tunokajexikowakapa wane pixkalone. Ha pixa, hanu ptshina pixa xye pirana tshinanu?
6Wane htshinna rutseklexyawakluna Jesus, rumukata jihyehrexyawakapluna. Waneya Jesus yonohita. Tshiji hyonata himyojiya.
7Pnuteko hya hepomsaletluna hyotunota. Waneya wla htshinna:
— Katukta hektuntshi mwikanhi, wale hapka hinokanro sotluya.
8Waneya hyonohitatnaka. Tshiji hyonatatnaka.
9Waneya xye hjeminixkana, hyatkana. Satkaka yatka. Tsrutsolejinkaka hapka yatka. Waneya Jesus-pka hiknokamtkatka hiyrunu suxo hanikaji hwakanatatshro.
10Waneya Jesus hituka yonohletatka. Hi satukna yineru retatka. Suxo tsonupka hitukatka. Waneya Jesus wla tshinro suxo:
— Suxo hanutkanhe pukolukanuwnakakjene? Hikehe hikolukanuwnayehjixatkayi?
11Waneya wala wla tshina:
— Hiketkani, Hasruklewatatshri.
Waneya Jesus wla tshinro:
— Hi hitako hikolukanuwnayehkakyi hiyáhoni pyanutka hi pektuwatanutka hiyrunu.
Jesus Xye Tshijne Nikotatshri Rixyawaka Piranapni
12Jesus pnute hya tshinretatnaka, wla htshinna fariseu-ne:
— Hitni katalno xye tshijne hajene ptowruneka tshinanu. Hita homkahitatshri hi mapchahawaka yanatshripni seyni rawanu katalu hiweklu heneklewatatshri.
13Hiyáhoni fariseu-ne wla tshinru:
— Pix-nanuko hiphujtaxnawakwa tshinanu hi kmixkonru ptshinyawaka.
14Waneya Jesus hihitatkana, wla htshina:
—Yáholu hita nanwaka hiphujtaxnawa wanepnawaka halikaka piranni ntshinyawaka. Klu tshinanu nimatlu nuchpajyawaka sreta hiyrun-koxa nimatlu nyiywakapa sreta hanu nyanu. Seyni hixa hi himatlu nuchpajyawaka sreta hiyrun-koxa nyiywakapa sreta hi himata.
15Hix-yinhi hikolukanuwnakaklewata yine hixannu tshinanu tsonu. Hita hi satukna yineru nukolukanuwnakaka.
16Seyni nukolukanuwnajixlewaxinmaka halikakapni wale nukolukanuwnajixlemka. Klu tshinanu hi hita tsonu hikolukanuwnajixlewata seyni Nuru, nyokanatjeruyma nukolukanuwnajixlewata.
17Hiyrun-koxa yonruru pirana homkahle wla tshina, Hepi yineru hiphujtale tshinanu ralixka ruphujtalerna.
18Satu nopirana hiphujtatatshri hitni hiyrunu hepi rixinri nopirana hiphujtatatshri waleni Nuru nyokanatjeru.
19Waneya wla htshinatkaluna:
— Hanutkalhe Puru ptshinreru?
Waneya Jesus hihitna, wla htshinna:
— Hi himathetno hita hiyrun-koxa Nuru hi himatheta. Hita himathetkamka Nuru koxamka himathetanu.
20Xyekaka tokantshi htshinatka Jesus, tiyiro hapatjexikowaka hruko Hoyakalupji hwatshri hruko, rasruklewakanaxini Jesus. Hiyrunu hi satukna yineru yahot-kachretlu klu tshinanu Jesus papkolu hi hapokawa.
Jesus Hinkaklexyawaklu Waleko Hipirana Piranapni
21Waneya Jesus wla tshinna hiyrunuko:
— Nyanutka. Hitamka hijhanu seyni hixannu hektunuko hipninina. Nyiywaka sreta hi himukata yaletanu.
22Waneya judeu-ne wla tshina:
— Walenanuklahe hiylaxinwa? Klu tshinanu wale wan-tshina, Nyiywakapa sreta hi himukata yaletanu.
23Waneya Jesus wla tshinatkana:
— Hixni xye tshiji hwatshinhi. Seyni hitni teno hajerno. Hixni xye tshijne hajenhi seyni hitni hi xye tshijne hajerno.
24Hiyáhoni wane ntshinatkahi, hixannu hektunuko hipnanutka. Klu tshinanu halikakni hmalixkanuklunno hixannu hektunuko hipnanutka.
25Waneya wanna wla tshinru:
— Katyihe pixa?
Waneya Jesus wla tshinna:
— Ptowru papkoko ntshinyawakatkahi walekno hita.
26Hixo piranamka numukata tshinrenwakathi hiyrunu hixo pirana tshinanu naluk-himlukantalethi. Seyni halikakalutni nyokanatjeru. Nyanumaxyalu nyokanatjeru tshinyawaka tsonu nunkakjetna xye tshijne hajene.
27Seyni wanna hi himatjemlu ruru Hoyakalu pirana runkajyatkana.
28Waneya Jesus wla tshinna:
— Hixa teno hitajinpatkalu Jeji Whene tshinkaluru, waneya halikaka himatanu waleno, hita. Hiyrun-koxa himatanu hike nkamha hitako nohchinikanu halukanru. Seyni Nuru Hoyakalu hasrujyano pirana tsonu nyanumaxya.
29Hiyrun-koxa hitaymalu nyokanatjeru. Nuru Hoyakalu hikeklu hiknokanno. Klu tshinanu rukchikhihlenreru tsonu nkamhajeta.
30Xyekaka tokantshi hyanumaxini hixolune yine halixatkalu.
31Waneya Jesus hiynumatna judeu-ne ralixjene, wla htshinna:
— Ntokanu hpaklu homkahrexini waneya nasruklenepotpakhi halikaka.
32Hiyrun-koxa halikakalutu pirana himatanu hiyrunu hichotkalunpatkahi halikakalutu pirana tshinanu.
33Waneya ruhitluna, wla htshinruna:
— Hix-honra Abraão-ni klopichwu. Hikeklu hohne satu yineru towrertshi hixkakwu. Hiyáhoni hanhe pumukata wan-tshinretwu, hichotkalune wixyawakapa?
34Waneya Jesus wla tshinna:
— Halikakni, halikakni, wla ntshinhi, Yineru hanuruktako hektuwaka kamhatshri, hektuntshi towrerni wale.
35Hiyrun-koxa towrertshi hi ptowru hohneruka himolene yehi rawa. Seyni wanepnawaka whentshi himolene sreta hajerukni.
36Hiyáhoni Whentshi tshinkaluru hichokajiniphi waneya hichotkalunpotpakotkahi.
37Nimata hixni Abraão-ni klopichanhi. Seyni haluk-hiylaletno klu tshinanu ntokanu hi kwawakleru hix-yehiya.
38Netleru, wale ptowruka Nuru Hoyakalu hekhixyano nunkakleta. Hiyrun-koxa hixa hkamhajetanru wale ptowruka hixako hirune hasrujyatkahi.
39Waneya ruhitatkaluna Jesus, wla htshinruna:
— Abraão-ni honra wurni.
Waneya Jesus, wla htshinna:
— Abraão-ni whenene hixkamka, Abraão-ni hixjekanaxyawaka pixka hixanumka hixa.
40Seyni xawakni haluk-hiylaletno hita. Hit-honra hinkakatkahi halikakalutu pirana Hoyakalu hinkajyano pirana. Abraão-ni hi wane pixka hixatka mitshi.
41Hixa kamhajetlu hiru kamrure. Waneya wla htshinruna:
— Hixni whentshine potwu, hi kahnete hakanhikatshinwu hixa. Wuru satupkalutni, waleni Hoyakalu.
42Jesus wla tshinna:
— Hoyakalu hirutkamka, hixamka halukanno hita. Klu tshinanu Hoyakalusko hichpajikatshrino hita hiyrunu hewitkano. Hiyrun-koxa hi nyokanaxnawa seyni Nuru yokanatno.
43Haklu tshinanhe hixa hi himatjemlu ntokanu? Hi himatjemlu klu tshinanu hixa hi himukata yijnakoletlu nunkakle.
44Hixa hirni, Tsru Kamtshi, hichpajikatshinhi. Hiyrunu hiru hikchikhihlenreru hektutu hkamhanu. Waleni jiylalewakleru hyinuwaklekananukawa. Halikakalutu pirana mimwakatni wale. Klu tshinanu hikeklu rimwatkalu halikakalutu pirana. Hweyawaxini, waleko hihchinikanu tshinanu wan-rixa. Klu tshinanu kayloklerni wale hiyrun-koxa ruyakotlu weyawlu.
45Halikakalutu pirana nunkakjexyawakhi tshinanu hixa hi halixtokanutno.
46Hanurhe hixa satkakhi himukata hetlepotutno hektuwaka kamhakleru nixyawaka? Hiyáhoni halikakalutu tokantshi ntshininhi haklu tshinanhe hi halixtokanutno?
47Hoyakalu yehi hichpajikatshri yijnakotlu Hoyakalu tokanu. Hiyáhoni hixa hi hyijnakotlu klu tshinanu hixni hi Hoyakalu yehi hichpajikatshinhi.
48Waneya judeu-ne hihitlu, wla htshinruna:
— Hi he halikaka pirana wtshina, wla wtshinanwakaxinyi, Samaria hajeru wtshininyi, hiyrunu wla wtshininyi kkamtshityi?
49Waneya Jesus wla tshinna:
— Hi kkamtshitno. Seyni halikaka Nuru Hoyakalu hiwaka npohita. Seyni hixa hektuwaka htshinanwakatno hita.
50Hi nujhalu hita nanwaka pohixnawakwa. Seyni rawa satu nimalwutjerupa hiyrunu waleni hetamayxaklerewatatshri potuko.
51Halikakni, halikakni ntshinhi, hita ntokanu homkahpotutatshri, hikeklu hipuktshi kachitanru wale.
52Waneya judeu-ne wla tshinru:
— Ha, xawakni wimatyi kkamtshityi halikaka. Abraão-ni hipnana hiyrunu Hoyakalu tokanu hinkakletatshine mitshikawlunni hipnana. Seyni pixa wan-tshina katukta homkahpotutlu ptokanu, hipuktshi hikeklu kachitanru wan-hixatshri, ptshina.
53Pixlahe kahwajnawa hipnatshrini wurni Abraão-ni yohnika tsru pixyawaka? Hiyrun-koxa Hoyakalu tokanu hinkaklewatatshine mitshikawlunni ptowrunekni hipnana. Hiyáhoni kathe pikahwajnawa?
54Jesus wla tshina:
— Hita nanwaka npohixiniklunwa, npohixnawakwa hike kochpaka. Npohitjeru waleni Nuru Hoyakalu. Hixa Hoyakalute htshinreru.
55Hixa hi himathetlu wale seyni hita himathetlu. Hitamka wla ntshininipa, hi nimathetlu, waneyamka kaweyalno hita hixa pixka. Seyni nimathetlu hiyrun-koxa nomkahitlu htokanu.
56Hirni Abraão-ni rumuwatni ret-hapoklexinno. Retlu hiyrunu rumuwatni.
57Waneya judeu-ne wla tshinru:
— Pix-hetko hi cinquenta mhaletkayi seyni Abraão hima peta?
58Waneya Jesus wla tshinna:
— Halikakni, halikakni wane ntshinhi, Abraão-ni mmatutkanuklunuwa, nwakotka.
59Waneya sotluji hkochtshekna hsotlujexyawakapmakluna seyni hi retkatka Jesus. Hoyakalupji ruchpajya.
Currently Selected:
João 8: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
