Lucas 11
11
Jesus Hasrukna Ranjihohnexyawakna Piranapni
1Waneyatnaka Jesus hanjihohnekanata. Rali hanjihohnerexini satu rasrukleru wla tshinru:
— Tsru Hixikatshriwa Jesus, pasrukanwu wanjihohnexyawaka, hanu wtshinanu, João hasrujyawakna rasruklene pixka.
2Waneya Jesus wla tshina:
— Wla htshina hanjihohneretanu: “Nuru, wanjityi pohitkalurupa pixa phiwaka potukalu. Runanutka pixa ppohirewaxyawaka.
3Wniklerupa xye hohne tshinanupa penekanwu.
4Pamtakahchinikanyehixinwu wektunu pimrine hektunu wamtakahchinikanyehixyawaka pixka. Hi yahtalexikowaka putakanwu.”
Hapokatshri Hnapu Piranapni
5Xye koxa htshinatkana Jesus rasruklene:
— Hanurhe hixa satkakhi, hanikaj-yetshno himatletlerupji nwaka yatshripa wla tshinatshripa: “Nimatletleru, mapatshi pão penekanunno.
6Klu tshinanu satu nimatletleru yanamtatshri hapyehitno. Seyni hike nimwa nohluxyaplu.”
7— Ho hitokoklahe ruhjechaxini. Wla htshinanu: “Hi pkojwakanno. Hiphapto hichyatka. Nojeko nwa nowheneneyma. Hiyáhoni hi numukata hiptekleta pão nenejyawakapyi,” — hi wane htshinanu.
8Wane ntshinhi, yáholu himka raluk-hiptekleta rimatletleru rixyawaka tshinanu, seyni ruptekanu renekanru ptowruka ralukanru hma mapaxyawakanuplu.
Jesus Hanjihohnekjixyawaka Piranapni
9Hiyáhoni wane ntshinhi: Hanjitanu henekko. Hijhanu hikchikanu. Hitpehiphaptotetanu, hkotpukko hiphapto.
10Klu tshinanu ptowru hanjitatshri yoptotanru. Hiyrun-koxa ptowru hijhatshri hikchikanru. Ptowru yineru hiphapto hitpetatshri hkotpukyehitko hiphapto.
11Hixlahe hirtshinhi, hituru chima ranjixinhi, himnurhe henekanru?
12Ho tonaji ranjixini, heklolhe henekanru?
13Hixa hektutu kkamhaklerunhi himata kihleru henekawheneta hiyáhoni wane yohnik-rixa heneklewleta Hirtshi tenhohne hajeru, Hoyakalu Hiwejikaluru ranjitjeru.
Jesus Hiyrunu Belzebu Tshinkaluru Piranapni
14Waneyatnaka Jesus kkamtshiteru kamtshite maleka ruknokamta. Myanumatkatni. Seyni ruchpajinixka kamtshi myanumakanatkatu yanumatatka. Hiyáhoni rimyekahchinikanutna.
15Seyni pimrine wan-tshinyehitlu Jesus:
— Kamtshi pohire Belzebu tshinkaluru himukatleyma tshinanu hetko maleka ruknokna kamtshine.
16Pimrinetnaka haluka yahtaletletlu Jesus hiyáhoni hetkaluru tenhohne hichpajikatshrimka ranjitluna.
17Seyni Jesus himathetahchinikanutna hiyáhoni wane htshinna:
— Ptowru tshijne rawa nikawnatshripa, pa hchinikanurutu hmixlenu tshinanna wane tshijne hajene. Hiyrun-koxa pantshi hajene wannakakluko pnu pejnu rixahchinikanutna hi rumukata hwachaletna wanna.
18Hiyrun-koxa Satanás kamtshi hkamnixiniklunwa hanhe rumukata pnute yaletanu htowuwle? Klu tshinanu hixa wan-tshinno Belzebu himukatleyma maleka nuknokna kamtshine.
19Hiyrun-koxa Belzebu himukatleyma maleka nuknokamkana kamtshine ha hixa hiwhenene katu hiwakaymahe kamtshine maleka ruknokjekanatna, kat-mixkonu tshinanu wan-rixna? Hiyáhoni hixako hiwheneneko hikolukanunhi.
20Seyni Hoyakalu towre tshinanuko kamtshine maleka nuknoka, hiyahokni himatanu Hoyakalu pohirewaxyawaka hix-yehi rapokatka halikaka.
21— Satu Jeji kmatsyiru, ptowru rimwaleruyma ruslahapjixinwa, ptowru rimwaleru hihle hislahletkaluru.
22Seyni satu wale yohnik-mixkonurutu yanwakaxiniplu, ramtakakkanunru. Waneya hkonanru kachri hmunanhalerukananu. Waneya hkaniprejetlu rejnunkate.
23— Hiyáhoni hita nmepixjetu, waleni nkamnitjeru. Hitayma mapatjetkatu, hkotspallewata.
Kamtshi Satojyawakatnaka Piranapni
24Waneya Jesus wan-tshinatnaka:
— Kamtshi yineru mane ruchpakamxini, hyanachata, popriwaka hyapachata. Rujhalu rapnanuxyawaka. Seyni hi rukchiklu. Hiyáhoni wla htshina: “Nopjitapyawaka nsatokanutnak-honuka.”
25Rapoka. Rukchiklu satolotkaluru, hihlepokoluru.
26Hiyáhoni wla rixa. Hya waneya ranikna pimrine waleyma sete-ne kamtshine wale yohnik-hektunu kamhatshine. Hjihlokna, wane rawna. Ralipretka rallikanatatka xye jeji rekamtshitewle pnute.
Hihlewahchinikanyehitkalun-potu Piranapni
27Waneya wan-rixatnaka, xye pirana htshinakanaxiniwa Jesus, sato suxo wan-tshinru Jesus, tsru tokantshiya:
— Hihlewahchinikanyehitkalúroni suxo pmatnanwakaxinro hiyrun-koxa pachitnurero.
28Seyni Jesus wan-tshina:
— Hehe, seyni hihlewahchinikanyehitkalun-potu ptowruneka Hoyakalu tokanu jematshine hiyrun-koxa romkah-tokanutjene.
Yine Hanjixyawaklu Hetkaluru Piranapni
29Rapatjestsitluna Jesus hixolune yine. Psal-potúkona. Waneya Jesus yinuwaka hinkaklewleta. Wla htshinatkana:
— Nyi himiwekkakhohnekanatatshine hektutu kamhatshine potu. Hetkalurkakamka ranjitna. Seyni hi satukna hetkaluru rekhitkona seyni Jonas tshinkalurni hetkalurutepka rekhitkona pa hohne.
30Jonas pixka hetkaluru rixnawa Nínive poktshi hajenni tshinanu. Waneko pixka rixanu Jeji Whene tshinkaluru xawakni hohne hiwekatshinewa hetanuya.
31Tsro phúroni sul sreta tshijne hajéroni howuk-tshijne tuchpajyani phuru Salomão-ni hasruklewle himatkalnu tjemyawakapa. Hiyáhoni jemahchinikanrewlu hohnepa tukolukanuna xye papko hiwekatshinepni. Haha hetanu, hewiru satu Salomão-ni yohnika kpohiru.
32Hikolukanuwnalu hohnepa jejinni Nínive poktshi hajenni hikolukanna xyeklu papko hiwekatshinepni klu tshinanu Jonas-ni hinkakle tshinanu rehchinikanutatkana. Haha himatanu, hewiru Jonas-ni tshinkaluru yohnik-hijhakalurni.
Mantshi Katalute Piranapni
33Wane koxa htshina Jesus:
— Hike nikotlu lamparina tkatshpokachaxikowakapa tomero ho hachhaji hpuko tutajikowakapa. Hi wane tixko seyni phujewak-potuko tutakko rapkathojixyawakapna hihruko jihlokatshinepa.
34Wimane katalute waleni wiyhale. Kihleru yhale pixini piman-koxa kat-yehi potpako. Seyni hektu yhale pixinipa waneya piman-koxa mapchah-yehipa.
35Hiyáhoni hislahinwa katalu himane hwatshri hma mapchahawaxyawakanupa.
36Himane psoluka katawaka hixinipa, hi psojikna mapchahalu hwa, waneya katawaka potukni hatatjewa lamparina nikoxyawakni.
Jesus, Fariseu-ne Hiyrunu Hinanchitkaluru Tokantshi Hasruklewatatshine Piranapni
37Waneya rali yanumlexinixka Jesus, satu fariseu-ne tshanixlu Jesus hipji hnikapyawakapa. Waneya Jesus wan-ya. Mesa htuplata.
38Waneya fariseu-ne rexinixkalu Jesus merojikatukwa tuplachaxyawaka mes-yehi rimyeka.
39Waneya Tsru Hixikatshriwa Jesus wan-tshinru:
— Hixa fariseu-ne-nhi, herokalu copa stono prat-koxa maleka sreta tsonuya. Seyni hitoko hixa hinanwaka katsephi hahnanuwlu, hektuntshi koxa.
40Mahchinikanunhi! Maleka sreta kamhatshri hi he hitoko nanwaka kamhatshri koxni wale?
41Hiyáhoni xawakni psoji himwaleru xako henekanna hike mwikane. Waneyakni wan-hixinipa ptowruko powrapatka hixa tshinanu.
42— Hapnokatkalunephi hixa fariseu-ne-nhi! Klu tshinanu hixamka ptowrukmaka himwaleru Hoyakalu psoji henekjeta. Haté phamlu sureru phuta psoji arruda sure hapikjetlu hiyrun-koxa ptowru hejnuj-sure psojite Hoyakalu penekaphutjeta. Seyni Hoyakalu chinikannu hiyrunu ruchiniklewle hixa hiknokachata. Xyekaka himukata kamhaleta hiyrunu hi pimrikaka hiknohachatanu.
43— Hapnokatkalunephi hixa fariseu-ne-nhi! Klu tshinanu hixa haluklu tsru hitakkaluru tuplawakle tsonu htuplawaxyawaka, hanjihohnewakapjikakaya. Hiyrun-koxa hixa halukpotutlu hpotuklexikolu halijikoluyma yine hixolune tshinanu.
44— Hapnokatkalunephi! Kapnatkalunenatka pixkalunhi. Metapnatkotuya. Yine wale hoho hyapmakna seyni hi rimathetluna.
45Waneya satu Moisés yonreru pirana himatpotutatshri wan-tshinru:
— Kasruklewakleru, wane ptshinini hix-koxa papata.
Hinanchitkaluru Tokantshi Hasruklewatatshine Rujreta Jesus
46Waneya Jesus wan-tshina:
— Hapnokatkalunephi hix-koxa Moisés yonreru pirana himatpotutatshinhi! Klu tshinanu kyapre hanikkolu pixkalutu hitjikakna yine. Seyni hixa hi himyojiknako hyotnejyalu yinni hwunutleru hinolu hepixyawakanna yinni.
47Hapnokatkalunephi. Klu tshinanu Hoyakalu tokanu hinkakletatshinni yomlekaka hihleyehijechatatshinhi. Hixa hitsrukatenni hiylalenni.
48Hiyáhoni wan-hixa hiphujetlexnawa hitsrukatenni kamrure hikchikhihlenutatshinhi. Klu tshinanu wanna hiylatanna hixa hihle yomletanna.
49Hiyah-koxni Hoyakalu rimatkalnuyma wla htshina: “Nyokananwakatmakna, hinamtatshri pirana hinkakletatshine, nnuretanun-koxa. Satkakapni ruylatanna. Pimrinepni hsalewnakakanna.”
50Hiyáhoni xawakni nyi himiwekkakhohnekanatatshine hapnokatko ptowruneka Hoyakalu tokanu hinkakletatshinni, hiylatkalunni tshinanu. Wanna hiylajetkalunni xye tshijne yinuwaklekananuko haté xawakni.
51Abel-ni hiylaxikolu klu haté Zacarias tshinkalurni klu papko Zacarias honira Hoyakalupji altar yehi hwatshri altar hanikajiteswa ruylaxikana. Hehe, halikakni nyi himiwekkakhohnekanatatshine rapnokatkona xyekaka hiylalewlu tshinanupa.
52— Hapnokatkalunephi hixa hinanchitkaluru tokantshi hasruklewatatshinhi! Klu tshinanu hixa konru chave himatkalewaxikaluru chave-ne waneya himretlu. Hi hixako jihloklu. Hiyrun-koxa wane jihlokpiratatshine himaleta.
Rutsekletmakluna Jesus Hkachixyawakapluna Piranapni
53— Waneya wane ruchpakamxinixka Jesus, kasruklewaklerune hinanchitkaluru pirana hasruklewatatshine hiyrun-koxa fariseu-ne yinuwaka tsru jhekantshi kamhaleta. Hixo pirana repomsatluna Jesus.
54Rutsekletmakluna, hkachtokanuxyawakapluna hjihyehixyamkapluna.
Currently Selected:
Lucas 11: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
