Lucas 13
13
Mehchinikanutkatu Hiylaxikowakapa Piranapni
1Waneklu hohne koxa satkaka yine hinkaklu Jesus Galileia hajene pirana. Phuru Pilatos hima hiylakjixanna satkakni Galileia hajenni henekachalu hiylatkaluru Hoyakalu renekakanaxiniwa.
2Waneya Jesus wan-tshina:
— Hixlahe kahwaklu nyi Galileia hajenni pimrine Galileia hajene yohnik-hektunu rixyawaknina tshinanu wan-rixa salewnaletna?
3Seyni hita wane ntshinhi, hike. Hma mehchinikanutkanuklunupa hixa ptowrunekhi, waneko pixka hixa hiylaletkona.
4Ha hiyrun-koxa dezoito yinni tenopjiru yawnahohotanunni. Ruylatkanna. Hixlahe kahwaklu wannani pimrine ptowruneka Jerusalém poktshi hajene yohnik-majnakowatatshinnixkani?
5Seyni wane ntshinhi, hike. Hma mehchinikanutkanuklunu hixa, ptowrunekhi waneko pixka hixa hiylatkotanu.
Figueira Muna Masahito Piranapni
6Waneya Jesus yapkaklu pirana rutaka:
— Satu yineru pa kata figueira muna rutaka rusanate uva-cha yehi. Waneya wane hya hisahi rujhapyawakmaka. Seyni hikta rawa.
7Waneya wla htshinru uva-cha hislahatshri: “Haha hetanu! Mapa mhale pchinika nujhasahtaplu xye muna seyni haté xawakni hi kasahpirlu. Hiyáhoni xawakni pkayikanutkalu. Klu rimimaletachatlu tshiji?”
8Seyni uva-cha hislahatshri wan-tshinru: “Nutsrukate, xye mhaleyakatshi wetanru. Njitoskotanrutshi waneya tshkipahitshi nutakaskotanru.
9Hsahiwaxinipa kihleplu. Seyni wane hmixkanuklunupa pkayikajixanru halikaka.”
Jesus Hitskalajyawaklo Suxo Hapnanuxikalur-hohne Piranapni
10Satu hapnanuxikalur-hohnetnaka Jesus hasruklewakanata satu hanjihohnewakapjiya.
11Waneya sato suxo satu kamtshi yeyixkaklewatatshri twiya. Dezoito mhale pchinika hyeyixkaklo wala suxo. T-satkokanatka. Hi tumukata potukawleta hi psotsonujijiko.
12Waneya rexiniklunutkalo Jesus, htomhalo. Waneya wane htshinatkalo suxo:
— Suxo, pyeyixale hichotanropyi.
13Himyo wala hoho rutaka, waneya chinpotukawa tpotukawamtatka. Waneya timalwutatkalu Hoyakalu.
14Seyni hanjihohnewakapji kosekatshri himtuwnahchinikanuta klu tshinanu Jesus pinrewata hapnanuxikalur-hohne waneya wla htshinna yine wane hapatjekanaxikatshine:
— Waneru seis hohne rumukata kamrurewlexyawaka yineru. Hiyáhoni kamrurtshi hohnekaka hinanu hpinixikowaka hijhiywakapa seyni hapnanuxikalur-hohne hike.
15Seyni Tsru Hixikatshriwa Jesus wla tshinru:
— Hixachatatshinhi, hi he hixa ptowrunekhi hipra boi ho burro hkochpiroka hapnanuxikalur-hohne hiyrunu hanikna maleka sreta honha rurapyawakapna pratshine?
16Hiyrunu xawakni twu suxo Abraão-ni klopicha. Satanás kachitanro dezoito mhale pchinika. Hiyáhoni kluneru tshinanhe hi tumukata hichotkota xye tkachikanaxikolu hapnanuxikalur-hohne?
17Waneya Jesus kamnitjene ptowrunniko patewatana Jesus wan-tshinyawakna tshinanu. Seyni pimrine yine hixolune hpoyikowatna himyekaklewatatshrikaka Jesus kamhaleru tshinanu.
Mostarda-tataji Piranapni
18Waneya Jesus wan-tshina:
— Kluneru pixka rixa Hoyakalu pohirewaxyawaka? Kluneru nyapkakletanru?
19Mostarda-tataji pixka rixa. Satu jeji haniklo. Rusanate rutaklo. Ttseruwna, hahmuna tixnawa. Waneya kochitshine teno yapatshine hina, hkamhachaletna hiplu hohoya.
Chitshponatshri Piranapni
20Hiyrunukotnaka wla htshina Jesus:
— Kluneru nyapkakletanru Hoyakalu pohirewaxyawaka?
21Tserutatshri pixka rixa. Sato suxo hwalu. Mapa chiwatupso trigo pahi tyapjetlu haté psolujpako chitshponatka.
Mtseruswa Hiphaptotetu Piranapni
22Waneya pa poktshikaka, tsru poktshikaka, mtserutu poktshikak-koxa hyapamtatka Jesus. Rasruklewakananumta. Jerusalém poktshi nwaka hyamta.
23Waneya satu yineru hepomhalu, wla htshinru:
— Tsru Hixikatshriwa, mixon-koxlahe yine hiwekkakko?
Waneya Jesus wan-tshinna:
24— Hyahot-jihlokletanu mtseruswa hiphaptotetu. Klu tshinanu halikaka ntshinhi. Hixolunemka haluka jihlokletanu seyni hi rumukatanruna.
25— Kapjiru palnanu, hiphapto ruchyatanu. Waneya hixa hiphapto maleka sreta hwanu, hiphaptomka hitpetanu wla htshinreyma: “Tsru Hixikatshriwa, pjihlokkakanwu.” Seyni wale hihitanhi, wla htshinanhi: “Hi nimathi hanu sretakta hichpajikatshinhi.”
26Waneya hixa wla tshinanu: “Hixa pixayma mitshi nikatshinwu. Wipoktshi mitshi pasruklewaxya.”
27Seyni wale wla tshinanhi hiyrunuko: “Hi nimathi hanu sreta hichpajikatshinhi. Hasujinri nosta sreta hixa ptowrunekhi hektutu kkamhaklerunhi.”
28Hexiniklunpatkana Abraão-ni, Isaque-ni, Jacó-ni, hiyrun-koxa pimrinni Hoyakalu tokanu hinkakletatshinni ptowrunnika Hoyakalu pohirewaxyawaka rawyawakna seyni hixapni maleka sreta hwininapa waneya rawanu tsru tshiyahlu haskiyhiru koxa.
29Hixolune yine hinanu, tkatshi hichpajyawaka sreta, rimxijyawaka sreta, pa sta sreta hpotukle sreta ruchpajinna. Nikjexikowaka yehi Hoyakalu pohirewaxyawaka hwatshri htuplatanna.
30Himatanru xye. Rapkatle hwatshri kosekanutka. Hiyrun-koxa kosekakanatatshri hapkatatanutka.
Jesus Jerusalém Poktshi Ruchinijyawaka Piranapni
31Waneya waneklu satkaka fariseu-ne yanwakatlu Jesus. Wla htshinruna:
— Hewi pasujinixka klu tshinanu phuru Herodes haluk-hiylaletyi.
32Waneya Jesus wla tshina:
— Hajewa. Wale kaweretshi pixkalutu nwaka hyanu. “Kamtshine nuchpakkaka hiyrunu yeyixatshine nutskalakjeta xawakni hohne, yetshikawa koxa wane nixanu. Halikaka map-hohne rixinripa nali kamruretanutka.” Xye xako hinkakanru.
33Klu tshinanu nujhalu natnu hapote nomkahixyawaka xawakni, yetshikawa wale pnut-hohne. Klu tshinanu halikakni Hoyakalu tokanu hinkakletatshri hi rumukata hipnaleta Jerusalém poktshi minjeya.
34— Jerusalém, ha Jerusalém! Puylajetna Hoyakalu tokanu hinkakletatshine hiyrunu pimrinni pixa nwaka hyokanatanunni Hoyakalu psotlujeta! Hixo katmaka naluka kapolethi ho sapriklethi patlapa tapatjewhenexini pixka! Tomeji hpuko tutajinna pixka. Seyni pixa hi hitshitno.
35Himatanru xye. Xawakni hipji hichotkalurutka. Halikaka ntshinyi. Hi hiyrunu petanutkano haté wla ptshininipa: “Hoyakalu hihlehchinikanutlu Tsru Hixikatshriwa Hoyakalu hiwaka hinikatshri.”
Currently Selected:
Lucas 13: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
