Lucas 15
15
Ovelha Pupjetatshro Piranapni
1Waneyatnaka rapokastsitluna Jesus hixo jijhawenruklerune hiyrun-koxa hektutu kkamhaklerune hyijnakoxyawakapluna.
2Waneya fariseu-ne hiyrun-koxa kasruklewaklerune hinanchitkaluru pirana hasruklewatatshine jiheklu Jesus. Wla htshinanwakatluna:
— Xye jeji hiyanna hektutu kamhatshine. Hiyrun-koxa wannayma hnika.
3Hiyáhoni Jesus yapkaklu pirana runkakna. Wla htshinna:
4— Hanurutkanhe jeji cem ovelha rimwini seyni sato ramtajini, hi he pimri hiprane noventa e nove, ruknokamtanu kahnete poktshi rujhapyawakaplo pupjetatshro haté rukchijini potuklo?
5Waneya rukchijiniplo ovelha hamhakanatatshro, hpoyikowpotuta. Rutjitanro
6haté hipji yehi. Htomhana rimatletanune rimwastsitanune. Waneya wla htshinna: “Himuwatanu hitayma klu tshinanu nopra ovelha hamhakanatatshro nukchikatka.”
7— Hiyáhoni wane ntshinhi tenhohney-koxa rawanu tsru poyikowlu potuko satupka hektuwaka kamhatshri hehchinikanuxiklu tshinanupa noventa e nove-pna yine potuka hchinikanurune, hehchinikanru mujhakanetka.
Tiyiro Proji Hamhatshro Piranapni
8— Suxo dez proji prata kamhikolu himwatshro, pa projipka tamhini, hi he tujhanru? Tumukata hikchiklexyawakaplo lamparina tnikotanu, pantshi t-satolotanu, tujhapotutanro haté tukchikanro.
9Waneya tukchijiniklunuplo ttshanixanna timatletanune, timwastsitanune wla ttshinna: “Himuwatanu hitayma klu tshinanu nukchiklo ntiyirote proji hamhakanatatshro.”
10— Wane ntshinhi halikaka, waneko pixka rixa himuwletna hiwejikalune Hoyakalu towrene tenhohne hajene, rehchinikanuxini satu yineru hektuwaka kamhatshri.
Whentshi Pupjetatshri Piranapni
11Jesus wla tshinatnaka:
— Hepi whenru satu jeji.
12Waneya hepurtshi wan-tshinru ruru: “Papa, xawakni penekanutkano psoji hitanupakotka.”
— Hiyáhoni tsru kanipretatkalu wanna hepi hiwhenene himlujikolu.
13Waneya hi hix-hohne potuwani hepurtshi ptowruka rihnanutamtatka. Howuk-tshijne nwaka hyatka. Waneya wane hsalechaxyalo ptowruka rimwakanatanru, ptowru hixatshri poyikowluyma.
14— Waneya ptowruniko hsalexinixka, tsru natshi hakanhatka rawyawaka tshijneya. Hyinuwaka yijnako mahlerewatanatka.
15Waneya hyinuwaka yanretatka. Kamrurtshi rujhapyawakatka rawatshijnetanru yehiya. Waneya rukchik-kamruretka hiyáhoni campo porco-ne yehi hyokanatka porco-ne rohluxyawakapa.
16Raluk-hinanutlexnamkawa porco-ne nijitumka raluka nikleta. Seyni waleni hike rohlutna.
17Ruchinikanuwpotutatka waneya wla htshina: “Ha hi pejnukananna kamrurewatatshine nuru yehi kihleru nikatshine haté rixetluna nikkaluru seyni hitni hewi natshi kamakpiraxyanno.
18Nsatkaphetkotanu nurupji nwaka. Wla hetko ntshinanru: ‘Papa, nektuwyehitatkalu Hoyakalu hiyrunu pix-yehi koxa.
19Hiyáhoni hi numukatatka pituru ntshinikolpatka. Satu ptowreru pixka pixkakanno.’ ”
20Hiyáhoni hpalnamta. Hsatokatka rurupji nwaka. Seyni ruru howukako rexyalu. Retwamonutlu. Rasukanwakatlu, hsapriklu, ramlutlu.
21Waneya hituru wan-tshinru: “Papa, nektuwatatka Hoyakalu hetanu, pixa hetan-koxa. Hi numukata pituru tshinretkotka. Satu ptowreru pixka pixkakanutkano.”
22— Seyni ruru towutna htowrene, wla htshinna: “Wuya, hchiretanu, mkatshri hopowalu kihleru hwapanu. Hyochmakanru. Hiyrun-koxa anel putakamyojitanru, sandalha hyochmakjixitanru.
23Boi whene hixownakakaluru hwapanu. Hiylatanru. Tsru niklu wkamhanu. Wpoyikowatanu.
24Klu tshinanu xye noturu nupnaholerutka hiwekhonukatnaka, hamhakanatatshri hiphujewnatka.”
— Waneya hyinuwaka poyikowletna.
25— Wane pchinika hituru tsrujru hsana hwakanata. Waneya pantshistsi rapojinixka hjemlu tokluru, hahsalu.
26Hiyáhoni satu towrertshi htomha. Repomhalu klunerni.
27— Waneya wale wla tshinru: “Pepuru hapokatka. Pantshitkalu kihle hapokle rixa. Hiyáhoni puru boi whenni hixownakakaluru ruylakjixa.”
28— Seyni whentshi tsrujru jihekanuwata. Hi hjihlokpirata. Hiyáhoni ruru hichpakanwakatlu. Hjihlokjixlu.
29Seyni whentshi tsrujru wla tshinru tsru: “Ha, hi pejnu mhalekananu nepixyi, towutachatkaluru pixka. Hikeklu ptokanu nmajnakowaxya. Wanepnawaka hikeklu penekno carneiro whene nimatletanuneyma npoyikowaxyawakapa.
30Seyni xye pituru pnikat-hejnunkatetjeru, suxone jejiheroneya, runatka pumuylatlu boi whene hixownakakaluru.”
31— Waneya tsru wan-tshinru whentshi tsrujru: “Noturu, pixa ptowru hohneka himwanno. Ptowru potuko nimwaleru pixanni.
32Seyni wujhatkalu xye poyikowlu wkamhiywaka, wpoyikowaxyawaka. Klu tshinanu xye pepuru hipnatshrikananni hiwekatka. Hamhakanatatshrini seyni hikchikalurutkani.”
Currently Selected:
Lucas 15: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
