Lucas 21
21
Hipnahnurutatshro Hike Mwikato Henekachle Piranapni
1Waneya Jesus hislahakanatna phurune henekachal-paji hitak-tiyirotetatshine.
2Hiyrun-koxa retlo sato hipnahnurutatshro hike mwikato, tutaklo tiyiro seyojiji hepi proji.
3Waneya Jesus wla tshina:
— Halikaka wane ntshinhi, twu hipnahnurutatshro hike mwikato pimrine yohnik-tutaka wala.
4Klu tshinanu nyi pimrine hixetatshro tsonu rutakna henekachawaka Hoyakalunupa. Seyni wala, hike mwikato, teneklu psoluka timwakanatanru, tyoptojetanru tenekatka.
Jesus Himatahnaputlu Hoyakalupji Kopalaxikowakapa Piranapni
5Waneya satkaka Hoyakalupji pirana htshinakanatna. Hi pa hihlenukananru pantshi sotlukaka kwenur-koxa hewi, hiyrunu henekachlukaka Hoyakalupji henekkaluru. Waneya Jesus wla tshina:
6— Rapokpapkoluxinipa xyekaka ptowruka hetleru hkoptalhako hi satukna sotlu hwahohokakanu.
Salewaktshi, Kojwaklewatatshri Piranapni
7Waneya repomhatkaluna Jesus, wla htshinna:
— Kasruklewakleru, hikluhe wan-rixanu? Klunerhe rakaxrikletanu rekhixyawakaplu xye ptowru potuko hakanhapiraxinpatka?
8Waneya Jesus hihitna, wla htshina:
— Xakoka hike yokwijetanhi. Klu tshinanu hixo hiphujewnanu hita hiwakaya wla tshinatshripa, “Hita Cristo-no”, ho, “rapokpapkolutatka”. Seyni wan-tshinatshri hi homkahitanru xako.
9Hjeminiplu hiylakaklu ho pa tshijnekaka yahotkakle pirana hi hpikanu. Klu tshinanu xye ptowruko hakanhanu seyni hi hnikawnalepnitshi.
10Waneya xye koxa htshinatkana:
— Pa neruymako hyahotkakanu satu neruko. Pa tshijneko yahotanru satupni.
11Hix-poktshi hiyolikanu. Natshipni. Yeyixlukakapni. Hetkalurkaka himyekaklewatatshripni, tsru hetkalurkakapni tenhohneya.
12— Seyni xye ptowruka hnapu, preso hitakko, hsalewnakakko. Hanjihohnewakapjikaka hajene henekko, hjemahchinikanyehitko waneya preso hiknokko. Tsru hixikatshinwa hiyrunu tsrukakalune nwaka hanikko hita hiwaka tshinanu.
13Wan-hixatshinhi hinkaklewatanu kihler-pirana Cristo pirana.
14Hiyáhoni hi hkojwakahchinikanutanu himat-hihitanna hjihyehitjen-yehi hapojinipa.
15Klu tshinanu hita henektokanutanhi hiyrunu himatkalewlu. Hma mumukata hihretanutna hkamnitjene, hma mumukata yoptoletanutna tokantshi.
16Hixako hirune preso hitakanhi. Hiyrunu himolene pirana haté himolene potuk-koxa hiyrunu himatletanune preso hitakjixanhi. Satkaka hixa hiylajixko.
17Ptowru yineru hahnanutanhi hixa, hita tshinanu.
18Seyni hi pa jiwutsakna hamhini.
19Hpoyehitahchinikanuxinwa hiyáhoni wan-hixatshinhi hiwekanu.
Tsru Salewaktshi Piranapni
20Jesus pnute hya hinkakleta:
— Hexinpatkalu soldado-ne Jerusalém poktshi sajrukatshine hkamnixyawakaplu, himatanutkalu hi howukatkalu hyotkajikowakanpatka poktshipni.
21Waneyakni katukta Judeia hwanu, rasukanu, hipjita hyanu. Katukta poktshi hwanu, ruchpakhapkatanu. Katukta campo hwanu, hi hjihlokanru poktshi.
22Klu tshinanu waneklu papkopa hapnokatlu hohnepatkani, rakanhiywakapa ptowru potuka yonatkaluru Hoyakalu piranaya.
23Hi pa himtukalutu retanna suxone kamchirone waneklu hohnepa, hiyrun-koxa hachiwhenetatshinepni! Klu tshinanu tshiji rawanu salewaktshi tsrupotpákolu. Hoyakalu hapnokatanna nyi yinepni.
24Hixolunepni hiylatkona yohlolewapiya, pimrinepni hanikkona ptowru tshijne ranikkona preso rutakkona. Hiyrun-koxa judeu mixkane Jerusalém poktshi hkapnikapahitanna haté rapokpapkoluxinpatka ruchoxikolna papko.
Jeji Whene Hininri Piranapni
25Waneya Jesus wan-tshina:
— Waneplu hetkalurkaka tkatshiya, ksuruya, katahirin-koxa. Hiyrun-koxa tshijiya ptowru tshijne hajene tsru kaheknanuwlu retanna, mar powha hiyrunu tenoplojhalu honha sejire hamlenu tshinanu.
26Psol-tshijne hajenepniko hitshpokhojitanuna hpiklena tshinanu, hkahwaklu retlerna tshinanu, salewnalu xye psol-tshijneko hinatshripa tshinanu. Klu tshinanu poyehirkaka tenhohne hajeru kowchitkotka.
27Waneya Jeji Whene tshinkaluru hiphujewnanu, hserpikanu hohimkohiya tsru hpixkonu ratnuyma.
28Hyinuwaka hakanhalexini xyekaka, poyehi yopkaklephi. Teno hyihatanu klu tshinanu chinpotukawa hiwekkakkotka.
Figueira Piranapni
29Waneya Jesus satu yapkaklu pirana runkakna, wla htshina:
— Hetanru figueira muna hiyrunu ptowru hahmuna hanu rixna.
30Hyinuwaka hiptsheklesurexinixka, himatlu hi howukatkalu mhalu.
31Wane koxa rixanu, hexinpatkalu xyekaka himatanutka hi howukatkalu rakanhiywakapa Hoyakalu pohirewaxyawaka.
32Halikaka wane ntshinhi, xyekaka wan-hixa hiphujewnaletanu hmupnaknuhnapukawna xawakni mupnakanewa.
33Tenhohne, tshij-koxa nikawnanu seyni ntokanu hikeklu nikawnanu.
Hiyokanu, Hanjihohnetanu Piranapni
34Jesus wan-tshina:
— Hislahinwa! Hi hyokwixinwa tsru nikluyma ho himriya ho xye hiwejinri kojwakle tshinanuya. Hma mimyejyawakanupa himnanhakanatatshine pixka rakanhinpatka xyekaka.
35Klu tshinanu ptowrunek-yine xye tshijne hajene hkachitanu hitseklu pixkalutu.
36Hiyáhoni hi himnanhinri, hanjihohnejetanu, hi hituk-hanjihohneretanu, himukata hasuklexyawakaplu ptowruka xyekaka hinatshripa. Hpaklu poyehiwlehchinikanuta Jeji Whene tshinkaluru hetanuya.
37Jesus Hoyakalupjiya hasruklewjekanaxya, ptowru hohneko. Halikaka hoyetshno himriji Oliveiras tshinikowaka hyajekanata. Wane rawjekanata.
38Ptowru prikaka, yetshpotukawa ptowrunek-yine yanwakjetlu Jesus Hoyakalupjiya hjemyawakapluna htokanu.
Currently Selected:
Lucas 21: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
