Lucas 6
6
Jesus Hapnanuxikalur-hohne Yohnik-hijhakalurni
1Waneya wane rixa. Hsana hyapakanata Jesus hapnanuxikalur-hohne. Waneya Jesus hasruklene jimlakahawamtlu hitakluhawa. Himyoyna hjijpekamtluna. Hnikamtluna.
2Waneya pimrine fariseu-ne wan-tshinna:
— Haklu tshinanhe wan-hixa hapnanuxikalur-hohne hinanchitkalur-hohne?
3Waneya Jesus hihitna, wane htshinna:
— Hikeklu hohnehe het-yonhatlu Davi-ni pirana, hnatshixinni waleni hiyrun-koxa waleymalune?
4Hanu rixa jihlokletlu mitshi Hoyakalupji waneya Davi-ni niklu pão-kaka Hoyakalu henekachalurupa hiyrunu rimotsatjene koxa reneklu hnijyawakapluna? Wale hinanchitkaluru hnikni. Sacerdote-ne tsonu himukata nikletanru hnikni.
5Jesus wan-tshin-koxa:
— Hiyáhoni Jeji Whene hapnanuxikalur-hohne yohnik-himukatatshrini.
Jesus Hitskalajinri Hiprihamyotatshri Piranapni
6Waneya wane rixa satu hapnanuxikalur-hohnepatnaka hanjihohnewakapji hjihlokatnaka. Wane rasruklewakanaxya. Wane rawakanata satu jeji hiprihamyotatshri hpotuklemyo.
7Waneya satkaka wane hwakanatatshine koxa fariseu-ne hiyrun-koxa pimrine kasruklewaklerune hinanchitkaluru pirana hasruklewatatshine ruslahpotukanatluna Jesus ho hapnanuxikalur-hohnerhe rutskalaklewatanu ho hike.
8Seyni rimatatka Jesus klu ruchinikanretna. Hiyáhoni wale tshinanu wla htshinatkalu jeji hiprihamyotatshri:
— Pyopkakanutshi, hewi hixa hanikajiteya potuko pyotunoxini, — htshinru.
Waneya hpalnatka jeji, hyotunotatka.
9Waneya Jesus hepomhatkana yine, wane htshin-hepomhaletna:
— Hanu phuthe htshina yonawahlo hapnanuxikalur-hohne hiykole pirana? Kluhe kamhako hapnanuxikalur-hohne? Kihleru ho hektutu? Ho renek-hiweklerewatanu ho hkamaklewatanu hapnanuxikalur-hohne?
10Waneya Jesus heknojtayehitmakna wanna ptowruneka. Waneya wane pnutetka wla htshinatkalu jeji:
— Pyosurukkanotanu. Waneya hyosurukkanotatka, ruhlewamyotatka.
11Waneya hjihekanuwpotutatkana. Hiyáhoni rujhahchinikanutatkana wannakakluko hanu rixa himukata hikolukletluna Jesus.
Jesus Nurexyawakna Rasruklenepa Piranapni
12Waneya waneklu papko Jesus himriji hkankatka ranjihohnexyawakapa. Waneya psol-yetshnoko waneko ranjixyalu Hoyakalu.
13Waneya rumrejinixka hohi htomhana rasruklene hixolune. Waneya doze hnuretatka hixolune tskalaya. Nyi doze jejine rutakhiwakatkana ‘nuretkalune’.
14Hhiwaknina: Simão, wale rutakhiwakata Pedro; André, Pedro mole; Tiago, João, Filipe, Bartolomeu;
15Mateus, Tomé, Tiago, Alfeu tshinkaluru whene; Simão honukla Israel tshijne haluka mixkowkakletatshri;
16Judas, Tiago tshinkaluru whene; Judas Iscariotes tshinkaluru, Jesus kamnitjerupa.
Jesus Hinkaklewjeta Hiyrun-koxa Rutskalaklewjexyawaka Piranapni
17Waneya Jesus himriji hserpikatka rasrukleneyma waneya rutukamta kihlemta tshijiwaka pimrine hixolune rasrukleneyma. Hixolune yine hwakanata. Wannani Judeia tshijne hajene, Jerusalém poktshi hajen-koxa, hiyrun-koxa Tiro poktshi hajene hiyrun-koxa Sidom poktshi hajene mar powhastsi poktshikaka hwatshrikaka.
18Runna rutskalajikowakapna ptowru hyeyixleyna hiyrun-koxa Jesus tokanu hjemyawakapna. Run-koxna kkamtshiterune. Rutskalakanna wanna ptowruneka.
19Ptowruneka haluka yotnekletmaklu Jesus klu tshinanu pixkontshi hichpaka wale yehiya. Ptowrunek-yine Jesus yotnekatshri hitskalhatka.
Poyikowlu Piranapni
20Waneya Jesus yopukhatna rasruklene waneya wla htshinatka:
— Hixa hike mwikanhi seyni poyikpotukhi. Klu tshinanu Hoyakalu pohirewaxyawaka hixanutkani.
21— Poyikowatatshinhi yahmaklu xye papko natshitatshinmakhi klu tshinanu jinan-potpákohi. — Poyikowatatshinhi yahmaklu xye papko tshiyahatatshinephi klu tshinanu hitsolhiwatatshinephi.
22— Poyikowatatshinhi yahmaklu xye papko hahnanutkalunhi, malukkonhi heyikkalunhi hiyrun-koxa ptowru hektutu tshinanwakatkalunhi klu tshinanu homkahitlu Cristo, Jeji Whene tshinikatshriwa.
23Ppoyikowpotutanu, puptetanu poyikowluyma rakanhinipa xyekaka pejnu klu tshinanu tsru pumlujikolu pimretahnaputka tenhohneya. Klu tshinanu wane mitshi rixkana Hoyakalu tokanu hinkakletatshine rutsrukatenniyna.
Wamonuwlu Piranapni
24— Seyni wamonuwatatshinenapni hixa phurunephi xye papko hajenepni klu tshinanu xawakni tsonu kihle hiweklenhi!
25— Ha hixa ptowruka himwatshinhi, hnatshitanuna. — Kwamonurunhi hixa xawakni hitsolhiwatatshine klu tshinanu xekoyaka hwamonuwatanu, htshiyahatanu!
26— Kwamonurunpotukni kihle piranyehiru htshinanwakatanune klu tshinanu waneko pixka htshinanwakjekanatkana Hoyakalu tokanu yahole hinkakletatshine, rutsrukatenniyna!
Hi Hahnanutanna Hmukchikhihlenutjene Piranapni
27— Seyni wla ntshinhi hixa njemjenhi: Hi hahnanutanru hahnanutjeru. Kihlewaka hkamhinna hahnanutjene.
28Kihlewaka hanjiyehitanna hipuktshi hanjiyehitjene. Hiyrun-koxa hanjihohneyehitanna hyotnetjene.
29Satu yineru himpakhojixinipyi, pa sreta hoji koxa pumpakjixachatanu. Capa pkonjeru pimkal-koxa hi ptshipexinri.
30Peneklewatanu klunerukta panjitka, katuktako hanjixinri. Hiyrun-koxa pimwaleru konkoklunu hi psatkakjixanru.
31Hanukta paluk-hixletko yine tshinanuya, waneko pixka pixanna wanna.
Pimrine Hichinijyawaka Piranapni
32— Puchinikjene tsonu pamoxinipa, ha pixa kluneru kihlerhe pkamhajeta kihleru pkahwaka yoptolexnawakwa Hoyakalu yehiya? Hi he waneko pixka rix-koxna hektune?
33Hiyrun-koxa kihleru hixinipna kihleru hkamhayehitjene tsonu, ha hixa, kluneru kihlerhe hkamhajeta kihleru hkahwaka yoptolexnawakwa Hoyakalu yehiya? Hi he waneko pixka rix-koxna hektune?
34Hiyrun-koxa ksatkaka tiyirotlewaklerune tsonu penektiyirotexinipa klu hikoluklehe pimalwutko? Klu tshinanu hektunkakluko koxa tiyiro renekkakjetna hpoyaho satkaklexyawakna pso.
35Seyni hichinikanna hmukchikhihlenutjene. Kihleru hkamhinna, henekan-koxna wanna mwenutaklene. Waneya peneklewaxya hapnutpatka tsru potpako. Tsru Potuko Tenhohne hajeru whenenephi. Klu tshinanu kchinikanurni Hoyakalu poyahnu mtshinaklene tshinanu hiyrun-koxa hektutu kamhatshine tshinanu.
36Kchinikanurunephi, Hirtshi Hoyakalu pixka kchinikanurni hixa tshinanu.
Hma Jihyehixyawakanuplu Satu Yineru Piranapni
37— Hi hjihyehirewatanu waneya Hoyakalu koxa hi hikolukanuwnakakanhi hixa. Hi hikolukanuwjixanru satu waneya hix-koxa hi hikolukanuwnakakko. Hi hichinikanru rektunna waneya hix-koxa hi hichinikanret-hektunutko.
38Heneklewachaxya psoko wane hix-koxa henekachatko wane pso. Waneya wan-hixatshinephi tsru potuko yoptotatshinephi, tsru potuko. Hakot-haniklexyawak-pso henekko. Klu tshinanu yahotapi hixa hyahotapre, walako hyahoxika.
Mayhaletu Satu Mayhaletu Kosemxyawaka Piranapni
39Waneya satu yapkaklu runkakatkana:
— Rumukathe mayhaletu kosekletlu mayhaletu? Hi he xawaka wanna hepi mayhalene kapna rujrukanna?
40Hasrukkaluru hi rasrukjeru yohnik-hijhakalurni seyni rasrujikolu ptowruko riknohinixka, rasrukjeru pixkako rixanutka.
41— Haklu tshinanhe petlu kapopejiru mtserutu pimole yhale hwatshri seyni piyhale hwatshri kaknalu psolutu hi pimatheta?
42Hanhe pumukata wan-tshinretlu pimole: “Nomole, hitatshi pitshitanu kapopejiru piyhale hwatshri nkochpajyawakapa”, pma mimathetkanuklunru piyhale hwakanatatshri? Hixachatatshrini wan-hixatshri! Mitshikananhapka puknokanrutshi kaknalu piyhale hajeru. Waneyapa petpotutanutkalu pkochpajyaplu pimole yhale hwatshri kapopejiru.
Hahmuna Hiyrunu Hisahi Hyapkakleta Jesus
43— Hahmuna kihleru hi hektu sahiplu. Hiyrun-koxa hahmuna hektutu hi kihle sahiplu.
44Klu tshinanu ptowru hixatshri hahmuna pejnu rimathetka hisahi tshinanu, ho kihle sahruhe ho hektutra. Klu tshinanu hi kawchipiri chehi hjijrujiko figo sahi. Hiyrun-koxa hi kawchipiri chehi hjijrujiko uva-ji.
45Waneko pixka rixa yineru. Yineru kihleru raj-koxa rimrexyalu kihleru, kihlekakalu kochpakjexikowakaya. Yineru hektutu hichinikanretatshri, rimretawakle hektutu, hektutkaka wane hkochpakjexya. Namtshi yanumaxyalu hix-potu raji hajeru.
Sotlu Hoho ho Ksatu Hohowaka Panawaxikatshri Piranapni
46— Klu tshinanhe hixa wan-tshinno Nutsrukate, Nutsrukate, seyni hi hkamhajetlu ntokanu, ntshinyawakhi?
47Hita nwaka hinatshri, hita ntokanu yijnakotatshri, nuykole kamhatshri nekhitanhi hanu rixanu wan-hixatshri.
48Wan-hixatshri honra jeji kamhapjitatshri pixkalutni. Tshiji hjitota. Teno rixlu. Waneya sotlumta hoho potuko ripxakkaklu pantshi. Rapohamxinixka wenu, hyochkihamta. Seyni hi rumukata kowchiretlu klu tshinanu sotlu hoho hkamhika pantshi.
49Seyni ntokanu yijnakochatatshri, hektuwaka kamhatshri, katuktako mchiko wakan-tshiji panawaxikatshri pixkalutu, mpoyehitkotupji kamhatshrini. Hyochkihamta honha. Waneyakni hyawnamtanatka pantshini. Tsru yawnalu rixana walepjini.
Currently Selected:
Lucas 6: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
Lucas 6
6
Jesus Hapnanuxikalur-hohne Yohnik-hijhakalurni
1Waneya wane rixa. Hsana hyapakanata Jesus hapnanuxikalur-hohne. Waneya Jesus hasruklene jimlakahawamtlu hitakluhawa. Himyoyna hjijpekamtluna. Hnikamtluna.
2Waneya pimrine fariseu-ne wan-tshinna:
— Haklu tshinanhe wan-hixa hapnanuxikalur-hohne hinanchitkalur-hohne?
3Waneya Jesus hihitna, wane htshinna:
— Hikeklu hohnehe het-yonhatlu Davi-ni pirana, hnatshixinni waleni hiyrun-koxa waleymalune?
4Hanu rixa jihlokletlu mitshi Hoyakalupji waneya Davi-ni niklu pão-kaka Hoyakalu henekachalurupa hiyrunu rimotsatjene koxa reneklu hnijyawakapluna? Wale hinanchitkaluru hnikni. Sacerdote-ne tsonu himukata nikletanru hnikni.
5Jesus wan-tshin-koxa:
— Hiyáhoni Jeji Whene hapnanuxikalur-hohne yohnik-himukatatshrini.
Jesus Hitskalajinri Hiprihamyotatshri Piranapni
6Waneya wane rixa satu hapnanuxikalur-hohnepatnaka hanjihohnewakapji hjihlokatnaka. Wane rasruklewakanaxya. Wane rawakanata satu jeji hiprihamyotatshri hpotuklemyo.
7Waneya satkaka wane hwakanatatshine koxa fariseu-ne hiyrun-koxa pimrine kasruklewaklerune hinanchitkaluru pirana hasruklewatatshine ruslahpotukanatluna Jesus ho hapnanuxikalur-hohnerhe rutskalaklewatanu ho hike.
8Seyni rimatatka Jesus klu ruchinikanretna. Hiyáhoni wale tshinanu wla htshinatkalu jeji hiprihamyotatshri:
— Pyopkakanutshi, hewi hixa hanikajiteya potuko pyotunoxini, — htshinru.
Waneya hpalnatka jeji, hyotunotatka.
9Waneya Jesus hepomhatkana yine, wane htshin-hepomhaletna:
— Hanu phuthe htshina yonawahlo hapnanuxikalur-hohne hiykole pirana? Kluhe kamhako hapnanuxikalur-hohne? Kihleru ho hektutu? Ho renek-hiweklerewatanu ho hkamaklewatanu hapnanuxikalur-hohne?
10Waneya Jesus heknojtayehitmakna wanna ptowruneka. Waneya wane pnutetka wla htshinatkalu jeji:
— Pyosurukkanotanu. Waneya hyosurukkanotatka, ruhlewamyotatka.
11Waneya hjihekanuwpotutatkana. Hiyáhoni rujhahchinikanutatkana wannakakluko hanu rixa himukata hikolukletluna Jesus.
Jesus Nurexyawakna Rasruklenepa Piranapni
12Waneya waneklu papko Jesus himriji hkankatka ranjihohnexyawakapa. Waneya psol-yetshnoko waneko ranjixyalu Hoyakalu.
13Waneya rumrejinixka hohi htomhana rasruklene hixolune. Waneya doze hnuretatka hixolune tskalaya. Nyi doze jejine rutakhiwakatkana ‘nuretkalune’.
14Hhiwaknina: Simão, wale rutakhiwakata Pedro; André, Pedro mole; Tiago, João, Filipe, Bartolomeu;
15Mateus, Tomé, Tiago, Alfeu tshinkaluru whene; Simão honukla Israel tshijne haluka mixkowkakletatshri;
16Judas, Tiago tshinkaluru whene; Judas Iscariotes tshinkaluru, Jesus kamnitjerupa.
Jesus Hinkaklewjeta Hiyrun-koxa Rutskalaklewjexyawaka Piranapni
17Waneya Jesus himriji hserpikatka rasrukleneyma waneya rutukamta kihlemta tshijiwaka pimrine hixolune rasrukleneyma. Hixolune yine hwakanata. Wannani Judeia tshijne hajene, Jerusalém poktshi hajen-koxa, hiyrun-koxa Tiro poktshi hajene hiyrun-koxa Sidom poktshi hajene mar powhastsi poktshikaka hwatshrikaka.
18Runna rutskalajikowakapna ptowru hyeyixleyna hiyrun-koxa Jesus tokanu hjemyawakapna. Run-koxna kkamtshiterune. Rutskalakanna wanna ptowruneka.
19Ptowruneka haluka yotnekletmaklu Jesus klu tshinanu pixkontshi hichpaka wale yehiya. Ptowrunek-yine Jesus yotnekatshri hitskalhatka.
Poyikowlu Piranapni
20Waneya Jesus yopukhatna rasruklene waneya wla htshinatka:
— Hixa hike mwikanhi seyni poyikpotukhi. Klu tshinanu Hoyakalu pohirewaxyawaka hixanutkani.
21— Poyikowatatshinhi yahmaklu xye papko natshitatshinmakhi klu tshinanu jinan-potpákohi. — Poyikowatatshinhi yahmaklu xye papko tshiyahatatshinephi klu tshinanu hitsolhiwatatshinephi.
22— Poyikowatatshinhi yahmaklu xye papko hahnanutkalunhi, malukkonhi heyikkalunhi hiyrun-koxa ptowru hektutu tshinanwakatkalunhi klu tshinanu homkahitlu Cristo, Jeji Whene tshinikatshriwa.
23Ppoyikowpotutanu, puptetanu poyikowluyma rakanhinipa xyekaka pejnu klu tshinanu tsru pumlujikolu pimretahnaputka tenhohneya. Klu tshinanu wane mitshi rixkana Hoyakalu tokanu hinkakletatshine rutsrukatenniyna.
Wamonuwlu Piranapni
24— Seyni wamonuwatatshinenapni hixa phurunephi xye papko hajenepni klu tshinanu xawakni tsonu kihle hiweklenhi!
25— Ha hixa ptowruka himwatshinhi, hnatshitanuna. — Kwamonurunhi hixa xawakni hitsolhiwatatshine klu tshinanu xekoyaka hwamonuwatanu, htshiyahatanu!
26— Kwamonurunpotukni kihle piranyehiru htshinanwakatanune klu tshinanu waneko pixka htshinanwakjekanatkana Hoyakalu tokanu yahole hinkakletatshine, rutsrukatenniyna!
Hi Hahnanutanna Hmukchikhihlenutjene Piranapni
27— Seyni wla ntshinhi hixa njemjenhi: Hi hahnanutanru hahnanutjeru. Kihlewaka hkamhinna hahnanutjene.
28Kihlewaka hanjiyehitanna hipuktshi hanjiyehitjene. Hiyrun-koxa hanjihohneyehitanna hyotnetjene.
29Satu yineru himpakhojixinipyi, pa sreta hoji koxa pumpakjixachatanu. Capa pkonjeru pimkal-koxa hi ptshipexinri.
30Peneklewatanu klunerukta panjitka, katuktako hanjixinri. Hiyrun-koxa pimwaleru konkoklunu hi psatkakjixanru.
31Hanukta paluk-hixletko yine tshinanuya, waneko pixka pixanna wanna.
Pimrine Hichinijyawaka Piranapni
32— Puchinikjene tsonu pamoxinipa, ha pixa kluneru kihlerhe pkamhajeta kihleru pkahwaka yoptolexnawakwa Hoyakalu yehiya? Hi he waneko pixka rix-koxna hektune?
33Hiyrun-koxa kihleru hixinipna kihleru hkamhayehitjene tsonu, ha hixa, kluneru kihlerhe hkamhajeta kihleru hkahwaka yoptolexnawakwa Hoyakalu yehiya? Hi he waneko pixka rix-koxna hektune?
34Hiyrun-koxa ksatkaka tiyirotlewaklerune tsonu penektiyirotexinipa klu hikoluklehe pimalwutko? Klu tshinanu hektunkakluko koxa tiyiro renekkakjetna hpoyaho satkaklexyawakna pso.
35Seyni hichinikanna hmukchikhihlenutjene. Kihleru hkamhinna, henekan-koxna wanna mwenutaklene. Waneya peneklewaxya hapnutpatka tsru potpako. Tsru Potuko Tenhohne hajeru whenenephi. Klu tshinanu kchinikanurni Hoyakalu poyahnu mtshinaklene tshinanu hiyrun-koxa hektutu kamhatshine tshinanu.
36Kchinikanurunephi, Hirtshi Hoyakalu pixka kchinikanurni hixa tshinanu.
Hma Jihyehixyawakanuplu Satu Yineru Piranapni
37— Hi hjihyehirewatanu waneya Hoyakalu koxa hi hikolukanuwnakakanhi hixa. Hi hikolukanuwjixanru satu waneya hix-koxa hi hikolukanuwnakakko. Hi hichinikanru rektunna waneya hix-koxa hi hichinikanret-hektunutko.
38Heneklewachaxya psoko wane hix-koxa henekachatko wane pso. Waneya wan-hixatshinephi tsru potuko yoptotatshinephi, tsru potuko. Hakot-haniklexyawak-pso henekko. Klu tshinanu yahotapi hixa hyahotapre, walako hyahoxika.
Mayhaletu Satu Mayhaletu Kosemxyawaka Piranapni
39Waneya satu yapkaklu runkakatkana:
— Rumukathe mayhaletu kosekletlu mayhaletu? Hi he xawaka wanna hepi mayhalene kapna rujrukanna?
40Hasrukkaluru hi rasrukjeru yohnik-hijhakalurni seyni rasrujikolu ptowruko riknohinixka, rasrukjeru pixkako rixanutka.
41— Haklu tshinanhe petlu kapopejiru mtserutu pimole yhale hwatshri seyni piyhale hwatshri kaknalu psolutu hi pimatheta?
42Hanhe pumukata wan-tshinretlu pimole: “Nomole, hitatshi pitshitanu kapopejiru piyhale hwatshri nkochpajyawakapa”, pma mimathetkanuklunru piyhale hwakanatatshri? Hixachatatshrini wan-hixatshri! Mitshikananhapka puknokanrutshi kaknalu piyhale hajeru. Waneyapa petpotutanutkalu pkochpajyaplu pimole yhale hwatshri kapopejiru.
Hahmuna Hiyrunu Hisahi Hyapkakleta Jesus
43— Hahmuna kihleru hi hektu sahiplu. Hiyrun-koxa hahmuna hektutu hi kihle sahiplu.
44Klu tshinanu ptowru hixatshri hahmuna pejnu rimathetka hisahi tshinanu, ho kihle sahruhe ho hektutra. Klu tshinanu hi kawchipiri chehi hjijrujiko figo sahi. Hiyrun-koxa hi kawchipiri chehi hjijrujiko uva-ji.
45Waneko pixka rixa yineru. Yineru kihleru raj-koxa rimrexyalu kihleru, kihlekakalu kochpakjexikowakaya. Yineru hektutu hichinikanretatshri, rimretawakle hektutu, hektutkaka wane hkochpakjexya. Namtshi yanumaxyalu hix-potu raji hajeru.
Sotlu Hoho ho Ksatu Hohowaka Panawaxikatshri Piranapni
46— Klu tshinanhe hixa wan-tshinno Nutsrukate, Nutsrukate, seyni hi hkamhajetlu ntokanu, ntshinyawakhi?
47Hita nwaka hinatshri, hita ntokanu yijnakotatshri, nuykole kamhatshri nekhitanhi hanu rixanu wan-hixatshri.
48Wan-hixatshri honra jeji kamhapjitatshri pixkalutni. Tshiji hjitota. Teno rixlu. Waneya sotlumta hoho potuko ripxakkaklu pantshi. Rapohamxinixka wenu, hyochkihamta. Seyni hi rumukata kowchiretlu klu tshinanu sotlu hoho hkamhika pantshi.
49Seyni ntokanu yijnakochatatshri, hektuwaka kamhatshri, katuktako mchiko wakan-tshiji panawaxikatshri pixkalutu, mpoyehitkotupji kamhatshrini. Hyochkihamta honha. Waneyakni hyawnamtanatka pantshini. Tsru yawnalu rixana walepjini.
Currently Selected:
:
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil