Mateus 11
11
Jesus Hinkaklewaxyawakapa Pa Poktshikakaya Piranapni
1Jesus hali towutlexinixkana rasruklene, wane ruchpajya rasruklewaxyawakapa, runkaklewaxyawakapa pa poktshikakaya.
João Batista Yokanaxyawakna Rasruklene Jesus Nwaka Piranapni
2Waneya preso rawinixka João jempiranyehixinri Cristo tshinkaluru kamrure, rasruklene hyokananwakatlu wale,
3repomhiywakapluna, wla htshin-hepomhaletluna:
— Pixakatkalhe hinatshripyi tshinkaluryi ho satuklatshi wkahwakanu?
4Waneya Jesus wla tshinna:
— Hajewa. Hinkakapanru João xye hetanrukaka hiyrun-koxa hyijnakotanrukaka.
5Mayhalenekananu hetatka. Myankanekananu yanatka. Hijirhitukanatatshine hitskalhatka. Majnakonekananu jema. Hipnatshine hiwekkakka. Kihle piranalu potuko hiwekkaklewatatshri pirana runkakkatkana hike mwikane.
6Poyikowatatshine hita nma mohweyatjene.
Jesus Hinkaklexyawaklu João Batista Pirana
7João hasruklene hichpajinitka, Jesus João pirana hyinuwaka hinkakletna hixolune yine wane hajene, wla htshinna:
— Ha hixa, kluhe haluk-hetletapa kahnete poktshiriya? Kotshkawale kanniphalu kowchiklerlahe hetapa?
8Ha klunerhe hetapa? Satu Jeji kihleru mkatshri hitakatshrirhe hetapa? Hike, kihleru mkatshri hitakjetatshine, honra phurupjikaka rawna wan-hixatshine.
9Seyni klunerhe mitshi haluk-hetletpatka? Satu Hoyakalu tokanu hinkakletatshrihe hetapa? Hehe, wane ntshinhi, Hoyakalu tokanu hinkakletatshinni yohnik-hijhakaluru hetpatka.
10Klu tshinanu João yonpiranyehitkalurni xye: “Hetanu, nyokanreru nyokanatanu pixa hnapu, ralpokohnapuxyawakaplu patnu hapote.”
11Klu tshinanu wane ntshinhi João Batista ptowru matutatshri yohnik-hijhakalurumkani. Wanepnawaka mujhakon-potu tenhohne pohirewaxyawaka hwatshine, João yohnik-hijhakalunetkani wanna.
12João Batista yinuwaka hinkaklexinri papko haté xawakni, tenhohne pohirewaxyawaka kamnitka hiyrun-koxa jejine mixkowatatshine haluka yotkakletlu.
13Hma munkaklewatkanuklunuwa João, Moisés yonreru pirana hiyrun-koxa Hoyakalu tokanu hinkakletatshinni pirana yonatkaluru hinkakletlu Hoyakalu pohirewaxyawaka pirana.
14Waneya haluka yoptolexiniplu walekni Elias tshinkalurni hinatshripa.
15Katukta kajnakopnapa hyijnakoxyawaka, hyijnakotanru.
16— Kluneru pirana nyapkakletanna xyeklu papko hwatshine? Wanna hetko mturune niktshi hanjijexikowaka tuplajetatshine pixka rixna. Pa sreta tuplatatshine wan-tshinna pa sreta tuplatatshine:
17“Wtumlejyehithi poyikowlu hima seyni hi hahsat-hixa. Kwamonuru himamka wchikaletatka seyni hi htshiyahatatka.”
18Hetanu. João Batista hohajirewata, hi vinho-ha rura seyni hixa wan-tshinru: “Waneylu kamtshi.”
19Runa Jeji Whene tshinkaluru. Hnika, rura. Seyni hixa wan-tshina: “Haha hetanu, xye jeji tsru nikalu, vinho-ha jirakleru. Jijhawenruklerune hiyrun-koxa hektune rimatleta.” Hiyáhoni yine hetanru Hoyakalu himatkalewle potukalu rixyawaka, Hoyakalu himatkalewle himwatshri kamrure tshinanu.
Malixkane Poktshikaka Hapnokaxikowaka Piranapni
20Waneya Jesus yinuwaka jihyehiretlu poktshikaka himyekaklewatatshrikaka hix-potuko hkamhajexyawaka klu tshinanu hi rehchinikanutatkana. Wla htshinna:
21— Hapnokatkalur-potupyi pixa Corazim poktshi hiyrunu Betsaida poktshi! Klu tshinanu himyekaklewatatshrikaka nkamhakmaka hita Tiro poktshiya hiyrunu Sidom poktshi hix-yehi hakanhikatshri pixkalutu, waneyamka mitshikawako rehchinikanutanutkana wane poktshikak-hajene, waneyamka mkatshri saco mapa kamhikolu hmakatanutkana hiyrunu tshitshi pahi koxamka hpolojiwuxinwana rimathexikowakna rehchinikanutatkana.
22Seyni halikaka ntshinhi rapnokaxikolu hohnepa Tiro hiyrun-koxa Sidom poktshi hi hsaletpotukanatkona hixa salexikowaka pso.
23Hiyrunu pixa Cafarnaum poktshi. Pkahwakhe patskoxyawakapa haté tenhohne? Seyni pixa halikaka puknokko tshiji hitokote hamhikowak-yehi. Klu tshinanu himyekaklewatatshrikaka nkamhakmaka hita Sodoma poktshi hix-yehi hakanhikatshri pixkalutu, haté xawakni hohnekananumka rawawa Sodoma poktshi.
24Seyni halikaka ntshinhi rapnokaxikolu hohnepa Sodoma poktshi hi hsaletpotukanatkona hixa salexikowaka pso.
Hapnanuxikowaka Jesus Tshinanu Piranapni
25Waneya waneklu papko Jesus wan-tshina:
— Nimalwutyi, Nuru, tenhohne tshij-koxa Towutatshriyi. Klu tshinanu pyohimatlu xye pirankaka jimatkaleruneya hiyrunu kahchinikanuruneya. Seyni puphujetlu hike mimatkane hetanuya.
26Hehe, Nuru, xye pixa palujyawakni.
27— Nuru, ptowru potuko renekno. Hike himathetlu Whentshi seyni Hirtshipka himathetlu. Hike himathetlu Hirtshi seyni Whentshipka himathetlu hiyrun-koxa katukta raluk-himatyehkakletlu Hirtshi.
Jesus Wla Htshinyawaka Punanwakatanno Piranapni
28— Runanwakatanno ptowru hamanu kamrurewletatshri tsru wunru hitjitatshri waneya hita hapnanukakanhi.
29Hitshitanno nkosejyawakaphi, nasruklenephi klu tshinanu mayohotno hita, kihle hchinikanurno waneya hit-yehi hapnanuhchinikanrewlu hikchikanu.
30Klu tshinanu hitjitpre nutajinhi myapretni hiyrunu wuntshiri minotni.
Currently Selected:
Mateus 11: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
