Mateus 19
19
Jesus Kopruhaxyawaklu Jordão Wenne Piranapni
1Waneya xyekaka rali tshinrexinixka Jesus, Galileia tshijne ruchpajya, pa sreta Jordão wenne Judeia tshijnestsi hyatka.
2Hixolune yine homkahitlu waneya wane satkaka yeyixatshri rutskalajya.
Hiknokahnunrolu Piranapni
3Waneya satkaka fariseu-ne yanwakatlu Jesus hepomhalu retumhiyluna. Repomhaluna:
— Moisés hiykole pirana yonatkalurlahe hi tshipetlu jeji hhanunro ruknojyawakapa klunerujiji tshinanuktako?
4Waneya Jesus wan-tshinna:
— Hi he het-yonhatlu xye pirana? Hyinuwajikolu yineru hiyakotatshri hixkajyawaklu jeji suxo rixyawakna,
5Waneya wla htshina: “Wale tshinanu jeji hichotlu ruru, runro, rimwiywakaplo hhanunro hiyáhoni satu manepkalu hhanunroyma.”
6Hiyáhoni hi hepitkana seyni pa manepkana. Hiyáhoni hike yineru xako hitspalkakanru Hoyakalu hapatjetanune.
7Waneya wla htshinna fariseu-ne:
— Seyni Moisés hiykole yonatkaluru wan-tshina jeji ruchohnunroxinipa ruchoxyalo pirana yonaxikolu renekanro, hhanunro tmixyawakanpatka waneya hyokanatatkalo. Haklu tshinanhe wane htshina yonatkaluru?
8Waneya Jesus hihitna:
— Hixa chiko hchinikanu hixyawaka tshinanu Moisés hetachatna yine hhanunrone ruknojyawakapna. Seyni xye tshijne yinuwajikolu klu papko hi wan-rixa.
9Wale tshinanu wane ntshinhi: Ruchohnunroxini jeji hapoklewlu minje tshinanu, satoko hhanunroxini rimopatatkalo.
10Waneya rasruklene wan-tshinru Jesus:
— Seyni wan-rixini jeji hhanunro tshinanu, kihle potlu hma hnunrowaxyawakanu.
11Waneya Jesus wla tshina:
— Hi ptowru yineru himatjemlu xye ntshinyawaka seyni yine Hoyakalu himatjemkaklene tsonu himukata himatjemletanru.
12Rawa satkaka jeji mumukata hnunrowletkatu runro nanwaka ruchpajinikawa. Raw-koxa satkaka mumukata hnunrowletkatu yineko wan-hixkakleruna. Hiyrun-koxa satkaka nuretlu hma hnunrowaxyawakanu tenhohne pohirewaxyawaka tshinanu. Katukta himukata himatjemletanru, rimatjemanutkalu.
Jesus Hiyrunu Mturune Piranapni
13Waneya mturunemka ranikanwakatka Jesus, hijiwna rutakamyoxyawakapa ruhlewahchinikanuxyawakna, ranjihohneyehixyawakapna. Seyni rasruklene hiykotna mturune hanikjene wane hmixyawakanupna.
14Seyni Jesus wla tshinna:
— Hetachatanna mturune hyanwakaxyawaknona. Hi himaletanna. Klu tshinanu tenhohne pohirewaxyawaka hayinetene mturune pixkalune koxni wanna.
15Waneya Jesus mturune jiwu rali hitakamyolexinixka ruhlewahchinikanyehixyawakna, hyatka.
Jeji Phuru Piranapni
16Waneya satu jeji hapyehitlu Jesus repomhalu, wla htshinru:
— Kasruklewakleru kihleru, klunerhe kihleru nkamhanu niwejinri hikeklu hohne nma nikawniywakanupa?
17Waneya Jesus wla tshinru:
— Klu tshinanhe pepomhayehitlu kihleru? Hoyakalu tsonu kihleru hikeni hiyrunu. Moisés hiykole pirana pkamhini, piwekkakko.
18Waneya repomhalu Jesus:
— Hanuru pirana nomkahitanu?
Waneya Jesus wan-tshinru:
— Hi puylalewatanu, hi hapoklewatanu, hi ptshowhuwatanu, hi pimrine pweyatanu,
19pkahwakpiratanru puru, punro hiyrun-koxa pimwastsireru pamotanu pamoxnawakwa pixka.
20Seyni jeji wla tshinru:
— Xye hiykolu ptowruka nomkahita, kluneru tsonu nmaha kamhaletawa?
21Waneya Jesus wan-tshinru:
— Potukalumka pixinipa, puchankanru ptowruka pimwanru, penekanna ptowruka mahaxikatshine. Wane pixa pohirewnaletanu tenhohneya. Waneya punanu, pomkahitanno hita.
22Waneya wale pirana hyijnakoxinixka phuru, hyatka hwamonuwnapotuta klu tshinanu phurupotukni.
Pohirewnalu Hma Mepixyawakanru Yineru Hoyakalu Pohirewaxyawaka Hjihlojyawaka Piranapni
23Waneya Jesus wan-tshinna rasruklene:
— Halikaka ntshinhi, hi pa yaprenukananru phuru tenhohne pohirewaxyawaka hjihlojyawakapa!
24Hiyrunuko xye ntshinhi, kyapreru camelo tsapujripna hjihlojyawaka seyni yohnik-yapren-potlu phuru Hoyakalu pohirewaxyawaka hjihlojyawaka.
25Waneya xye hjeminixkana rasruklene, rimyekahchinikanpotuthonukna hiyáhoni repomhaluna:
— Ha han-hixatshrihe xawaka hiwekkakko?
26Waneya Jesus yopukhatna, wla htshinna:
— Yine mumukatanutu, wale rumukata Hoyakalu.
27Waneya Pedro wla tshina:
— Petanu, ptowruka wuchota, pixa womkahixyawakatka. Kluhe xawaka wyoptotanu hixa?
28Waneya Jesus wla tshina:
— Halikaka ntshinhi, ptowruka herotetkoklunuklu papko hyinuwajiniklunupa Jeji Whene towuwle royaknuyma, wale towuwlu pixkalutu nenekanhi hixa nomkahitjenhi hiyrun-koxa phuru tuplawakle htuplatanu hikolukanuwnakakanna israel-nerune doze ptohkakapni.
29Ptowru yineru hipji hichotatshri, ho runro, ho ruru, ho himolene ho himolerone [ho hhanunro,] ho hiwhenene hichotatshri ho hsana hichotatshri Hita tshinanu hyoptotanru cem kata pnute hiyrunu riwejinri hikeklu hohne mnikawnakatupa.
30Hiyrun-koxa hixolune kosekakanatatshine hapkatatanutka. Waneya hixolune rapkatle hwatshine kosekanutka.
Currently Selected:
Mateus 19: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
