Mateus 4
4
Jesus Yohnixikolu Piranapni
1Waneyakni Hoyakalu Hiwejikaluru haniklu Jesus kahnete poktshiri tsru kamtshi Satanás yahotalexyawakaplu Jesus.
2Waneya riknohinixka quarenta hohne, quarenta yetshno hi hnikawa Jesus, hnatshita.
3Waneya tsru kamtshi Satanás Jesus-stsi hapoka wane htshinru:
— Hoyakalu whene pixinipakni, ptowutanru xye sotlukaka pão rixinwa.
4Seyni Jesus hihitlu:
— Klu tshinanu Hoyakalu tokanu potukalu yonatkaluru wan-tshina: “Yine hi pão mixkonu tsonu hiwejya seyni wale ptowruka htshintokanuxyawaka Hoyakalu riwejya yineru.”
5Waneya wane pnutetka tsru kamtshi Satanás haniklu Jesus haté Jerusalém poktshi, Hoyakalu nurreru poktshi waneya Jesus Hoyakalupji tenonwaka rutaklu tsru kamtshi Satanás.
6Waneya tsru kamtshi Satanás wan-tshina:
— Hoyakalu whene pixinipakni hewi puknojinwa teno wakaya klu tshinanu Hoyakalu tokanu potukalu yonatkaluru wan-tshina: “Hoyakalu towutanna htowrene hiwejikalune tenhohne hajene hinoxyawakapyi. Himyoymana ruchatkapanyina, pma mutshlixyawakanupa sotlu pijixiya.”
7Seyni Jesus wan-tshinru:
— Seyni Hoyakalu tokanu yonatkaluru koxa wan-tshina: “Hi pyahtaletanru Tsru Hixikatshriwa Hoyakalu Poyakalute.”
8Waneya tsru kamtshi Satanás haniklu Jesus satu mriji tenolu hyiywakapa, rekhitlu Jesus ptowru tshijnekaka pohirewaxyawaka hiyrun-koxa ruhlenkaka.
9Waneya tsru kamtshi Satanás wan-tshina:
— Xyekaka ptowruko nenekanyi pyoptsojityehixinipno, pimalwuxinipno.
10Waneya Jesus wan-tshinru:
— Pyanutka Satanás! Wane htshina hinkakleta Hoyakalu tokanu potukalu yonatkaluru: “Tsru Hixikatshriwa Hoyakalu Poyakalute tsonu pimalwutanu hiyrun-koxa wale tsonu pomkahitanu.”
11Hiyáhoni tsru kamtshi Satanás hichomtlu Jesus waneya hiwejikalune Hoyakalu towrerune tenhohne hajene hapokyehitlu Jesus. Rinotatkaluna Jesus.
Jesus Yinuwaka Kamrurewlexyawaka Piranapni
12Waneya Jesus jempiranyehixinri preso-tkalu João, Galileia tshijne hsatkapa.
13Waneya Nazaré poktshi ruchpajinixka Jesus, Cafarnaum poktshi hya waneya wane rawatka. Cafarnaum poktshi hipowhastsi rawa, Zebulom hiyrunu Naftali tshijnestsi rawa.
14Hpoyahokajyawakapa Hoyakalu tokanu hinkakletatshri Isaías-ni tokanu htshinyawaka mitshi wla tshinatshri:
15“Zebulom hiyrun-koxa Naftali tshinikowaka tshijne hajene, Jordão wenne mar powha nwaka sreta hajenhi, judeu mixkane Galileia tshinikowaka tshijne hajenhi,
16mapchahawaka hwatshine tsru katalu hetatshinhi; mapchahawaka hwatshine hipuktshi yehi pixkalutu hwatshinhi Hoyakalu hiwekkakle nikotyehitatkahi hohi himrekle pixka.”
17Waneya wane pnute Jesus yinuwaka hinkaklewleta, wla htshinamta:
— Hehchinikanutanu hektunu tshinanu klu tshinanu hi howukatkalu tenhohne pohirewaxyawaka!
Jesus Nuretna Satkaka Rikamrurewatjenepa Piranapni
18Waneya Galileia powha wnaha hyapamxini Jesus, retlu Simão tshinkaluru repuruyma André. Ruknokamtatkaluna h-tarrafa-tna hipowhaya klu tshinanu wanna mariskatatshine kchimahaklerune.
19Waneya wane htshinna Jesus:
— Hinanu hwahatjinitanno, yine kmariskahohoklerune nixkakanhi.
20Waneya waneklukawa potuko ruknokamtatkaluna h-tarrafa-tna, romkahitatkaluna.
21Wane pnutejiji hyapamtatnaka, retlu Tiago tshinkaluru, Zebedeu whene repuruyma João. Wanna koxa kanawa hwakanata rurnayma, ripxatluna tarraf-kaka. Waneya Jesus tomhana.
22Waneya waneklukawa potuko ruknokamtluna rurna Zebedeu kanawaya, romkahitatkaluna Jesus.
Jesus Hinkaklewjeta Hiyrun-koxa Rutskalaklewjexyawaka Piranapni
23Waneya Jesus Galileia tshijne psoluka hyapamta, rasruklewjeta hanjihohnewakapjikakaya, kihle piranalu potuko Hoyakalu pohirewaxyawaka pirana runkaklewjeta. Yeyixatshine hiyrun-koxa hahijewnalkaka rutskalaka.
24Jesus pirana Síria tshijne psoluka rupalpiranyehita. Ranikanwakatluna ptowru hixatshri yeyixatshri, satkaka tsru tshino jematshri, kkamtshiterukaka, satkaka hipukalewatatshine, hiyrun-koxa satkaka hiktehatshri waneya Jesus hitskalakna.
25Hixolune yine homkahitatkalu Jesus, Galileia tshijne hichpajikatshine, Dez Cidades hajene, Jerusalém poktshi hajene, Judeia hajene hiyrun-koxa Jordão wenne pa sreta wnahlu hajene homkahitlu.
Currently Selected:
Mateus 4: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
