Mateus 7
7
Hma Jihyehixyawakanuplu Satu Yineru Piranapni
1— Hi hjihyehirewatanu waneya Hoyakalu koxa hi hikolukanuwnakakanhi hixa.
2Klu tshinanu hanu hix-jihyehirewlexyawakna pimrine waneko pixka rixanhi Hoyakalu. Hiyrun-koxa yahotapi hixa hyahotapre pimrine tshinanu, walako hyahoxika Hoyakaluya.
3Haklu tshinanhe petlu kapopejiru mtserutu pimole yhale hwatshri seyni piyhale hwatshri kaknalu psolutu hi pimatheta?
4Hanhe pumukata wan-tshinretlu pimole: “Nomole, hitatshi pitshitanu kapopejiru piyhale hwatshri nkochpajyawakapa,” pma mimathetkanuklunru piyhale hwakanatatshri?
5Hixachatatshrini wan-hixatshri! Mitshikananhapka puknokanrutshi kaknalu piyhale hajeru. Waneyapa petpotutanutkalu pkochpajyawakaplu pimole yhale hwatshri kapopejiru.
Kluneruktako Hoyakalunu Wma Menejyawakanupna Kawene Pixkalune Piranapni
6— Kluneruktapni Hoyakalunu hi penekanna kawene pixkalune. Klu tshinanu wane pixini, kawene hiprotakanwakatanyi, rachkaxyawakapyina. Tuwutu kwenuru pérola tshinkaluru hi puknokanu porco-ne pixkalune yehi klu tshinanu wane pixini, porco-ne pixkalune katsrehohochatanru.
Hoyakalu Chinikannu Piranapni
7— Hanjitanro henekko; hijhanu hikchikanu; hitpehiphaptotetanu, hkotpukko hiphapto.
8Klu tshinanu ptowru hanjitatshri yoptotanru. Hiyrun-koxa ptowru hijhatshri hikchikanru. Ptowru yineru hiphapto hitpetatshri hkotpukyehitko hiphapto.
9Hixlahe hirtshinhi, hituru pão ranjixinhi, sotluhe henekanru hituru?
10Ho chima ranjixinhi, himnurhe henekanru?
11Hixa hektutu kkamhaklerunhi himata kihleru henekawheneta hiyáhoni wane yohnik-rixa heneklewleta Hirtshi tenhohne hajeru ranjitjeru.
12— Hiyáhoni hanukta paluk-hixletko yine tshinanuya, waneko pixka pixanna wanna ptowru potuko tshinanu. Klu tshinanu walekni Moisés yonreru pirana hiyrun-koxa Hoyakalu tokanu hinkakletatshinni yonatkaluru pirana tshinyawaka potuko.
Mtseruswa Hiphaptotetu Piranapni
13— Pjihlokanru mtseruswa hiphaptotetu. Klu tshinanu tsru hiphaptoteru tsru hapolu hamhikowaka hapni hiyrun-koxa hi heppikna yine tsru hiphaptoteru jihlokatshinena.
14Seyni mtseruswa hiphaptotetu hiyrunu kyapre hapolu hiweklu mnikawnakatu haniklewatatshri! Hi hixo yineru hikchiklu.
Hahmuna Hiyrunu Hisahi Hyapkakleta Jesus
15— Xako Hoyakalu tokanu hinkakletatshine yahole! Runyehithina carneiro hike mixlewatkatu pixka seyni halikaka hocha hajeru lobo tshinkaluru kmatsyiru pixkalunetkani.
16Rimathetkana hkamrurna tshinanu. Kawchipiri chehirahe hjijrujiko uva sahi? Ho kawchipiri chehirahe hjijrujiko figo sahi?
17Ptowru hahmuna kihleru, kihle sahiplu hiyrun-koxa hahmuna hektutu, hektu sahiplu.
18Hahmuna kihleru hi hektu sahiplu hiyrun-koxa hahmuna hektutu hi kihle sahiplu.
19Ptowru hixatshri hahmuna hektu sahiwleru hkayika, tshitshmero ruknokka.
20Hiyáhoni waneko pixka rixna Hoyakalu tokanu hinkakletatshine yahole, hkamrurna tshinanu rimathetkana.
21— Hi ptowru yineru “Nutsrukate, Nutsrukate” ntshinjene jihlokanru tenhohne pohirewaxyawaka. Seyni tenhohne pohirewaxyawaka jihlokatshri tsonu Nuru tenhohne hajeru halujyawaka kamhatshriko.
22Hapnokaxikolu hohnepa hixo yine wla htshinanno: “Wutsrukate, Wutsrukate, hi he Hoyakalu tokanu wunkakletatka pixa hiwakaya? Hi he kamtshi wuknokatka pixa hiwaka tshinanu? Hi he hixo hetkalurkaka wkamhatka?”
23Hiyáhoni nunkakpotutanna: “Hikeklu hohne nimathethi. Hyachatanutka, hektuwaka kkamhaklerunhi!”
Sotlu Hoho ho Ksatu Hohowak-Panawaxikatshri Piranapni
24— Hiyáhoni ptowru yineru ntokanu jematshri hiyrunu ntokanu homkahitatshri, satu jeji jimatkaleru sotlumta hoho panawaxikatshri pixkalutni wale.
25Waneya hinatkani, rapohamxinixka wenu, kanniphalu koxa herutpiratlu. Seyni hi hyawnapjita klu tshinanu sotlu hoho hkamhika pantshi.
26— Seyni katukta ntokanu hjema seyni hi hkamhalu ntokanu wale satu jeji jipukaleru mchiko wakan-tshiji panawaxikatshri pixkalutni wale.
27Hinatkani, rapohamta wenu, kanniphalu koxa herutpiratlu pantshi. Waneyakni hyawnamtanatka pantshini. Tsru yawnalu rixana walepjini.”
Jesus Tsru Hitakkaluruyma Rasrukjetna Yine PIranapni
28Waneya Jesus hali tshinrexinixkalu xyekaka pirana, hixolune yine himyekahchinikanpotutatka rasrukle tshinanu.
29Klu tshinanu hi rasrukjenna kasruklewaklerune hinanchitkaluru pirana hasruklewatatshine pixka rix-hasrukleta seyni tsru hitakkaluruyma rix-hasrukleta.
Currently Selected:
Mateus 7: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
