Mateus 9
9
Jesus Hitskalajyawaklu Jeji Hiktehatshri Piranapni
1Waneya Jesus kanawa pokownatka. Hkopruhatatka, hipoktshi hyatka.
2Waneya yine hanikanwakatlu satu jeji hiktehatshri, hijeko hikoluhatshri. Jesus hexinri wanna halixle, wane htshinru hiktehatshri:
— Kihle hichinikanupyi. Mturu, pektunu puknojikatka.
3Hiyáhoni satkaka kasruklewaklerune hinanchitkaluru pirana hasruklewatatshine wan-tshinahchinikanuta:
— Hektuwaka htshinanwakatlu Hoyakalu.
4Jesus himathetahchinikanutna waneya wane htshinna:
— Klu tshinanhe wan-hixahchinikanuta xyekaka hektutu hichinikanrethajixyawaka?
5Hanupothe kihle tshinko? Wla htshinikowaka hiktehatshri: “Pektunu puknojikatka”, ho wla htshinikowaka: “Pyotunotanu pkochtshekjekotanu pyanutka”?
6Seyni himatjempotuxyawakaplu Jeji Whene tshinkaluru hitakkalurutkani xye tshijiya ruknokhektunuxyawakapna yine” — hiyáhoni Jesus wan-tshinru hiktehatshri:
— Pyotunotanu, pkochtshekjekomtanu, pyanutka pipji.
7Waneya hiktehatshri yotunomtatka, hkochtshekjekomtatka hipji nwaka hyatka.
8Hixo yine hetakanatatshine pikatka. Rimalwutluna Hoyakalu klu tshinanu xye pixkalutu towuwlu renejyawakna yine.
Jesus Homkahjixlu Mateus Tshinkaluru Piranapni
9Waneya Jesus pnute hyamxinixka retlu Levi tshinkaluru. Htuplakanata tuplawaka hwenuxikolu hyoptoxyawakapa. Waneya Jesus wan-tshinru:
— Pomkahitanno.
Waneya Levi palnamtatka, romkahitatkalu Jesus.
Jesus Hektune Himinjiywaka Piranapni
10Waneya Jesus Levi-pji nijiniklunu, hixolune jijhawenruklerune, pimrin-koxa hektune Jesus hiyrunu rasrukleneyma tuplakanatatshine nikawakakwa yehi.
11Waneya fariseu-ne hetlu waneya repomhatkana rasruklene wla htshinna:
— Kluneru tshinanhe wannayma hnika, rura wanna jijhawenruklerune, hektuneyma?
12Xye hjemini Jesus, wla htshinna:
— Pomtalune hi haluklu kpinrewakleru seyni katshinomtalu haluklu.
13Seyni hijha himatletanu hanu haluka tshinreta xye hima Hoyakalu piranaya: “Naluklu hetwamonrewlu. Hi henekachlu hiylatkaluru naluka.” Klu tshinanu hi nuna ntshanixyawakapna kihlerune seyni hektune ntshanixyawaka rehchinikanuxyawakapna.
Hohajirewlu Piranapni
14Waneya João Batista hasruklene yanwakatlu Jesus waneya repomhaluna wane htshinruna:
— Haklu tshinanhe hixa João hasruklenwu, fariseu-ne hasruklen-koxa hohajirewata seyni pasruklene nika?
15Waneya Jesus hihitna, wane htshinna:
— Rumukata natshretnahe hnunrowlu hetatshine hnunrowatatshriymalune? Hike. Seyni rapokhohnexinpatka hnunrowpiratatshri hixolune yehi hkochpajikoklunpatka. Waneklu papko halikaka rohajirewatanutkana wanna.
16— Hi kihle hipxatkolu mkatshri hitsruka herotu samayma. Klu tshinanu herotu sama himutskirhanunru waneya herotu sama hiskakkakanunru htseruwaswapotutanuna.
17Hi kihle tsrutsoleji mapa hitakhatkolo vinho-ha hekamhakolha. Wan-rixkoklunutka vinho-ha hipchekkakanunru sac-kakapni. Tuyokhatanuna vinho-hapni waneya sac-kaka koxapni salewnanuna. Seyni vinho-ha herotu, saco herotu tutakhatka. Waneya hi satukna salewnanu hi vinho-hako hi saco-ko.
Tsru Hitakkaluru Hanjireru Piranapni
18Waneya hyanumsakanaxiniwa Jesus, runa satu tsru hitakkaluru hanjihohnewakapji hajeru. Hyoptsojityehitlu Jesus waneya wla htshinru:
— Xawakni potuko tupnanatka nchítshoni. Punanu wala hoho putakamyotanu tutskalhiywakapa tiwejyawakapa.
Mpomtato Rutskalajyawaka Jesus Piranapni
19Jesus hiyrun-koxa rasruklene waleyma wane hya.
20Waneya waneklukawa sato suxo doze hwalapu hihrahawatatshro Jesus tjimne sretako tunya waneya tkamrukamkatlu.
21Wala wla tshinnawa: “Nkamrukamkachaxiniplu, nutskalhanutka.”
22Waneya Jesus heknojtata, retatkalo. Waneya wane htshinatkalo:
— Chrima, kihlehchinikanupyi. Palixle hitskalakyi.
Waneya waneklukawhapka potuko tutskalhatka.
Jairo Hchitsho Riwekkajyawaka Jesus Piranapni
23Waneya Jesus jihlokapjixiniklunru Jairo-pji, retlu sejirtshi, saplewjepotutatshine hiyrun-koxa kowi tokaxikatshine,
24wane htshinatkana:
— Hyanutka. Mturo hi hipna seyni tumkachata. Seyni rutsolhitatluna Jesus.
25Waneya ptowru yineru maleka hyinixkana, Jesus pantshi jihloka. Waneya Jesus kosemyoxininatkalo mtúroni, tyotunotatka.
26Wale pirana pohiwatatka wale sreta psoluyaka.
Jesus Hitskalajyawakna Hepi Jejine Mtsawa Piranapni
27Waneya Jesus wane hichpajinixka, hepi jejine mtsawane wale hatjini hyana waneya wla htshin-sapletna:
— Petwamonutanunwu, Davi-ni klopicha!
28Pantshi hjihlojini Jesus, mtsawane yanwakatlu waneya Jesus hepomhatkana, wla htshinna:
— Halixluhe numukata hitskalaklexyawakhi?
Waneya ruhitluna:
— Hehe walixlu, Tsru Hixikatshriwa.
29Waneya Jesus kamrukayhaletna, wla htshinna:
— Halixyawaka tshinanu, hkamhako.
30Waneya retatkana. Waneya Jesus hijretpotutna, wla htshinna:
— Hike hinkakanu.
31Seyni ruchpakatkana, hkopalpiranatatkaluna wale tshijne psoluka.
Jesus Hitskalajyawaklu Myanumatkatu Piranapni
32Waneya hyinixkana jejine, satu kkamtshiteru myanumatkatu ranikyehitluna Jesus.
33Waneya Jesus hali hiknoklexinixkalu kamtshi, myanumatkatu yanumatatnaka. Waneya hixolune yine wane hajene himyekahchinikanutatka. Wla htshinna:
— Hikeklu hohne wane pixkalutu rexika Israel tshijneya.
34Seyni fariseu-ne wla tshina:
— Tsru kamtshi himukatleyma tshinanu hetko maleka ruknokna kamtshine.
Jesus Hetwamonuxyawakna Yine Piranapni
35Waneya Jesus ptowru poktshikaka hyapa, hanjihohnewakapjikaka rasruklewaxya, kihle piranalu potuko Hoyakalu pohirewaxyawaka pirana runkakletna. Ptowru hixatshri yeyixlu hiyrunu hahijewnalkaka rutskalaka.
36Waneya hixolune yine rexiniklunu, retwamonutatkana klu tshinanu hkaheknanuwatna, hiknokkalune carneiro-ne ruslahjerna mwikane pixkalunni.
37Waneya wla htshinatkana rasruklene:
— Hamkaluru halikaka hix-potuko. Seyni kamrurewatatshine hi hixo.
38Hiyáhoni hanjitanru Tsru Hixikatshriwa hamkaluru towutatshri, kamrurewatatshine hyokanaxyawakapa ramyawakapluna.
Currently Selected:
Mateus 9: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
