Marcos 1
1
1Kihle piranalu potuko hiwekkaklewatatshri pirana yinuwajikolu Jesus Cristo, Hoyakalu Whene pirana.
João Batista Piranapni
2Wan-rixa yonretatkalu Isaías-ni Hoyakalu tokanu hinkakletatshrini: Wla htshina yonatkaluru mitshi:
“Hita yokanatlu ntowreru pixa hnapu. Wale halpokotanru patnu hapote.
3Kahnete poktshiri saplewaxikatshri tokanu wla tshinatshri: Halpokotanru Tsru Hixikatshriwa hatnu hapote. Hpotukatanru hatnu hapotkaka.”
4João Batista kahnete poktshiri hiphujewniyatka. Runkakletluna yine h-batiza-xikolupna rehchinikanuxyawakna pirana, wla htshina:
— Hehchinikanutanu hektunu tshinanu. Wan-hixko h-batiza-xikolupa hiyrunu hektuntshi hiknojiko Hoyakaluya.
5Waneya hyanwakatluna ptowruneko Judeia sreta hajene Jerusalém hajen-koxa João hyijnakoxyawakapna. Waneya ruphujetluna rektunna waneya João batiza-tatkana wanna Jordão wenneya.
6João mkalu camelo pixi kamhikolni, kpixnuru h-cinturão-te couro-mta kamhikolu. Hnijitni tsetseru, wrolha hocha hajeru.
João Hiphujtaxyawaklu Jesus Piranapni
7Runkaklewata. Waneya wla htshina:
— Xekoyaka runanu hita yohnik-himukatkalutu. Hita hi Tsru Hixikatshrino nkochpirojyaplu h-sandalha-tetslu.
8Hita halikakni n-batiza-thi honhaya seyni wale batiza-tanhi Hoyakalu Hiwejikaluruya.
Jesus Batiza-xikolu Piranapni
9Waneklu papko Nazaré, Galileia tshijne hajeru poktshi ruchpajya Jesus waneya João Batista batiza-tlu Jordão wenneya.
10Waneya honha ruchpajyatka waneklukawa retlu hitpukatshri tenhohne. Retlu Hoyakalu Hiwejikaluru motkokoji pixka rixa hijruklemta, wale hohowaka rapoka.
11Waneya waneylu tokantshi tenhohneyalutu wan-tshinatshri:
— Pixni Noturyi nalukanruyi, wale poyikowkakno.
Jesus Yohnixikolu Piranapni
12Waneklukawa potuko Hoyakalu Hiwejikaluru yokanatlu Jesus kahnete poktshiri hyiywakapa.
13Waneya quarenta hohne pchinika kahnete poktshiri rawakanata. Wane Satanás yohnixyalu Jesus. Hocha hajene kmatsyirune tskalaya rawakanata. Hiwejikalune Hoyakalu towrene tenhohne hajene hepixlu Jesus.
Jesus Yinuwaka Kamrurewlexyawaka Galileia Tshijneya Piranapni
14Waneya hkachitkoklunutka João, Jesus Galileia hya. Runkaklewata kihle piranalu potuko Hoyakalu pohirewaxyawaka pirana.
15Waneya wla htshina:
— Rapokpapkolutatka, Hoyakalu pohirewaxyawaka hi howukchinpatkalu. Hehchinikanutanu, halixanru kihle piranalu potuko hiwekkaklewatatshri pirana.
Jesus Nurexyawakna Satkaka Rikamrurewatjenepa Piranapni
16Waneya Galileia powha wnaha hyapamxini Jesus retlu Simão repuruyma André. Ruknokamtatkaluna h-tarrafa-tna hipowhaya klu tshinanu wanna mariskatatshine kchimahaklerune.
17Waneya wane htshinna Jesus:
— Hinanu hwahatjinitanno, yine kmariskahohoklerune nixkakanhi.
18Waneya waneklukawa potuko ruknokamtatkaluna h-tarrafa-tna, romkahitatkaluna.
19Wane pnutejiji hyapamtatnaka retlu Tiago, Zebedeu whene repuruyma João. Wanna koxa kanawa hwakanata, ripxatluna tarraf-kaka.
20Waneya Jesus tomhana. Ruknokamtluna rurna Zebedeu kanawaya kkamrurewakleruneyma. Wane hyana, rawhatjinitluna.
Kkamtshiteru Piranapni
21Waneya hjihlokamtatkaluna Cafarnaum poktshi. Waneya hapnanuxikalur-hohne rixinixka hjihlokluna hanjihohnewakapji rasruklewaxyawakapa Jesus.
22Waneya rimyekna yine rasruklewle tshinanu. Klu tshinanu Jesus tsru towutatshri pixka rixa hasrukletna, hi kasruklewaklerune hinanchitkaluru pirana hasruklewatatshine pixka rixa hasrukletna.
23Waneya hi howukchiniyaka satu jeji kkamtshiteru hanjihohnewakapji hwakanatatshri saplewata. Waneya wla htshina:
24— Ya! Kluhe pixannatkawu Jesus Nazaré hajeru? Puna pumtukapyawakapwuhe? Nimatyi katyi pixa Potukalyi Hoyakalyi.
25Seyni Jesus hi hinanchitlu. Waneya wane htshina:
— Potshkepyi. Puchpakanutka wale maneya.
26Waneya kamtshi kowchoklu jejni hipokananu, hsaplewata waneya ruchpakamtatka kamtshi.
27Waneya ptowrunek-yine himyeka. Hiyáhoni repomhakakna, wane htshinna:
— Klunerni xye? Klu herotu hasruklewlutkani xye? Tsru hitakkaluruyma kamtshi ruchpakjixa. Hiyrunu kamtshine jemlu htshinyawakna.
28Waneya psol-tshijne potuko hpohiwhapkata Jesus pirana Galileia sretaya.
Pedro Himajiro Rutskalajyawaka Jesus Piranapni
29Waneya hajeyri ruchpakamxinixkana hanjihohnewakapji, wanna Tiago hiyrunu João-yma Simão Pedro hiyrunu himole André-pji nwaka hyatkana.
30Simão himajiro hikóluha tyeyixa. Waneya runkaksatluna Jesus wala pirana.
31Waneya Jesus yanwakatlo. Waneya hkosemyotlo, hyotunkaklo. Tutuk-patshwalemtatka. Waneya tyomhatna.
Jesus Hitskalajyawakna Katshinomtalune Piranapni
32Waneya kayi rixinixka rimxijinixka tkatshi ranikyehitluna ptowruneko yeyixatshine hiyrun-koxa kkamtshiterune.
33Ptowruneko tsru poktshi hajene pantshi hiphaptote rapatjexyana.
34Waneya Jesus hitskalakna hixo yeyixatshine ptowru hixatshri hahijewaktshi hwatshine. Maleka hyokanatna hixo kamtshine. Hi ritshi yanumsaletna kamtshine klu tshinanu rimathetluna.
Jesus Galileia Tshijne Yiywaka Piranapni
35Waneya yetshpotukawa hma mumrerekkanuklunuwa hyotunomta ruchpakamta Jesus. Waneya potshkewaka nwaka hya. Wane ranjihohnexya.
36Waneya Simão Pedro hiyrun-koxa waleymalune hijhaplu.
37Rukchijinixkaluna wla htshinruna:
— Ptowruneko hijhayi.
38Waneya wla htshinna Jesus:
— Hayewa pimri poktshikaka hwastsitanune yehi wyanu, wane koxa nunkaklewaxyawakapa. Wale tshinanukni nuna.
39Waneya Galileia tshijne psoluka hyapamtatka. Runkaklewakananumta wanna hanjihohnewakapjikakaya. Maleka hyokanatna kamtshine.
Jesus Hitskalajyawaklu Hijirohitutatshri Piranapni
40Waneya satu jeji hijirohitutatshri yanwakatlu Jesus. Hyoptsojityehitlu waneya ranjipotutlu wla htshinru:
— Palujiniplu pumukata hitskalakletno.
41Jesus hetwamonutlu waneya romyokanwakatlu. Hyotneklu. Waneya wla htshinru:
— Hehe, naluka. Putskalakkatka.
42Waneklukawa potuko rujirhitle ramhiyatka. Rutskalhatka.
43-44Waneya Jesus hijretlu wla htshinru:
— Petanu. Hike punkakanu seyni pyanutka. Sacerdote pekhimantapinwa putskalhinrixka. Waneya panikanru henekachalu henekawaka nwaka Moisés-ni yonreru tshinyawaka pixka pimrine himaxyawakaplu putskalhiywakatka.
45Seyni jeji hichpakamtatka hyinuwaka kopalpiranretlu hixo pirana potuko. Hiyáhoni wale tshinanu Jesus hi himukata phujewaka tsru poktshikaka jihloklexyawaka seyni kahnete yine mwiywakanu yehi rawjekanatatka Jesus. Wanepnawaka ptowru sretako hichpajikatshine yanwakjekanatlu.
Currently Selected:
Marcos 1: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
