Marcos 14
14
Hjemahchinikankakyehitluna Jesus Ruylaxyawakapluna Piranapni
1Waneya hepi hohne mahatatka Páscoa hohne tshinkaluru rexyawakapa. Waleni pão myapjetu nijikolu hohne. Hiyáhoni tsru hixikatshinwa sacerdote-ne hiyrunu kasruklewaklerune hinanchitkaluru pirana hasruklewatatshine hijhahchinikanuta hanu rixa himukata preso hitakletluna Jesus yokwiruyma ruylaxyawakapluna.
2Waneya wla htshinatkana:
— Seyni xye hi wkamhanu tsru hohne pchinika hmakanhiywakanupa yin-sejire.
Jesus Betânia Hapkapyawaka Piranapni
3Waneya Jesus Betânia poktshi hwakanata, Simão-pji hijirohitutatshripji. Waneya hnikka pchinikna tunamta sato suxo waneylo pa stonha sotlu kamhikolo phamluhalo katsephal-potuko nardo-ha, myapjetkoto kwenur-potukni. Tupokhatanro waneya Jesus jiwu tuyokhatanro.
4Waneya satkaka yineru wane hwakanatatshine hahkalo. Hi rukchikhihlenutlona wane tixyawaka hiyáhoni wane htshinkakna:
— Haklu tshinanu t-saletachatlo?
5Trezentos hohne kamrurtshi wenru pso yohnikamka tumukata hichankaletmaklo wala phamluhalo. Wale tiyirotemka tumukata henekletna hike mwikane.
Hiyáhoni hyanhaklona wala suxo.
6Seyni Jesus wan-tshina:
— Hetachatanro. Haklu hikojwaklo twu suxo? Kihler-potuko tkamhiyno.
7Hike mwikane ptowru hohneruka himwanu hixa tskalaya. Hikluktako haluk-hepixletna himukata hepixletna seyni hi ptowru hohneruka pimwanno hita.
8Ptowru tumukatleru tkamhatka. Nmupnaknuhnapukawa phamluhalo tutakmanexinno, talpokomanetno nkapnaxikolupa.
9Hichinikanru xyekaka: Psol-tshijneko kihle piranalu potuko hiwekkaklewatatshri pirana hinkaklexiko, tkamhaleru koxa hinkakletko, tuchinijikolupa wala.
Judas Kamnixyawaklu Jesus Piranapni
10Waneya satu doze rixinri Jesus hasrukleru, Judas Iscariotes tshinkaluru yanwakatna tsru hixikatshinwa sacerdote-ne riynumsaxyawakapna hanu potu rixa hiphujetletanru Jesus wanna yehiya.
11Wale hjeminixkana poyikpotukna. Waneya tiyiro renekpiratluna Judas. Hiyáhoni rujhalu hiklukta hpoyaho hekhiretanna.
Jesus Páscoa Hohne Hichinijyawaka Piranapni
12Waneya mitshikanan-hohne pão myapjetu nijikolu hohne, carneiro-ne ruylajexinrina judeu-ne Páscoa hohne ruchinikjexinrina hohne, rasruklene hepomhalu Jesus:
— Hanurhe walpokotanru Páscoa hohne nikle wnijyawakapa tshinanu.
13Waneya Jesus wla tshina yokanretna hepi rasruklene:
— Tsru poktshi hyanu. Waneya wane hyoptoxinri satu jeji hachhaji katsephalu hanikamtatshri. Homkahitanru.
14Waneya hanupjiktako hjihlokamxinri jeji wane htshinanru kapjiru kasruklewakleru hepomhakjixhi: “Hanhe rawa hihruko hita, nasrukleneyma himukata niklexyawakapa Páscoa hohne tshinanupa?
15Hiyáhoni wale hekhitanhi tsru hihruko pantshi hohwaka hwatshri, ralpokotka ptowruka hwiywaka. Wane halpokoxini.
16Waneya hepi rasruklene tsru poktshi hyana. Waneya rukchikluna Jesus tshinyawaka pixka potuko. Waneya ralpokotluna hniklerupna Páscoa hohne kayno hnijyawakapna.
Jesus Hekhixyawaklu Hkamnitjeru Piranapni
17Waneya rutshpojinixka Jesus rasrukleneyma hapokatka.
18Hnikka pchinikna mesa yehi, Jesus wla tshina:
— Halikaka ntshinhi, satu hewi hwatshri niminkaleru nkamnitjerupa.
19Waneya wanna wamonuwpotuta waneya satkaka yinuwaka hepomhaletlu:
— Hitlahe?
20Waneya Jesus hihitatka, wla htshina:
— Nkamnitjerukni satu hixa doze-hi hitayma pão yotshmota prato-ya.
21Klu tshinanu Jeji Whene tshinkaluru halikaka hipnanu Hoyakalu tokanu tshinyawaka pixka. Seyni hektu potlu wale jeji, Jeji Whene tshinkaluru kamnitatshri. Kihle potlu wale jeji hma matuxyawakanutka.
Jesus Hipninri Yapkakle Piranapni
22Waneya hnikka pchinikna Jesus pão hkochtsheka. Waneya hpoyahnutlu Hoyakalu. Hjiknajrotlu pão waneya rasruklene reneklu. Waneya wla htshina:
— Pão hyoptotanu. Xyeni hatatjewa nomane.
23Waneya copa stono hkochtsheka. Hpoyahnutlu Hoyakalu, rasruklene reneklu. Ptowruneka wale stono hirya.
24Waneya wla htshina:
— Xyeni hatatjewa nohraha hmunanhalerni Hoyakalu yineruyma hixolune yine tshinanu hiyokkalurupa.
25Halikaka ntshinhi hikeklu hohne nuranutnaklu xye vinho-ha haté nurinri vinho-ha herotu Hoyakalu pohirewaxyawakaya hohnepa.
26Waneya satu chikale hchikaletna, ralimtna, himriji Monte Oliveiras tshinikowaka hyatkana.
Jesus Hinkaklu Pedro Wkatakluyakawa Piranapni
27Waneya Jesus wan-tshinna rasruklene:
— Ptowrunekhi hiknokanno klu tshinanu Hoyakalu tokanu wan-tshina: “Nuylatanru carneiro-ne hinotatshri, waneya hiprane hipalatanu.”
28Seyni niwejinpatnaka, hita kosekanhi hixa Galileia tshijne nwaka.
29Waneya Pedro hihitlu, wla htshinru:
— Hikeklu hohne nuknokanyi pixa yáholu pimrine ptowruneka hiknokanyi seyni hita hike.
30Waneya Jesus wan-tshinru Pedro:
— Puchinikanru xye: Xye yetshno hepi kata hma yanumatkanuklunuwa patlapa, pixa map-kata pma mimatletanutu ptshinanno.
31Seyni Pedro hipokananu wan-tshinatnaka:
— Hike! Hikeklu hohne nma mimatletanutu ntshinanyi yáholu pixayma nupnanu.
Waneya pimrine rasruklene ptowruneka koxa wane potuko htshinna.
Jesus Getsêmani Tshinikowaka Hyiywaka Piranapni
32Waneya Jesus rasrukleneyma Getsêmani tshinikowaka hya. Waneya rapojinixkana Jesus wla tshinna:
— Hixa hewitshi htuplatanu, nanjihohnetka pchinika.
33Waneya ranikna Pedro, Tiago, João koxa. Jesus yinuwaka wamonuwnalepotuta, hiyrun-koxa hsalewnahchinikanuta.
34Waneya wla htshina:
— Niwejinri wamonuwpotuthonuka, hatatjewa nupnakastsitkani. Hewiphitshi, hislahanu.
35Waneya wane pnutejiji hya. Hyospaka tshiji rutspakhojita. Waneya ranjitlu Hoyakalu hpoyahoxinipa hkochpajyawakaplu wale papko salewaktshi.
36Waneya wane htshina hanjihohnereta:
— Hirtshi! Nuru! Pixa ptowruko himukatatshriyi. Pkochripaxinno twu copa salewaktshi yehiya. Seyni hi hitako nalujyawaka pkamhanu seyni pixako palujyawaka pkamhanu halikaka.
37Waneya Jesus satokanwakatna rasruklene, retamtna himkatshine, waneya repomhalu Pedro:
— Simão, pumkawhe? Hi he pa hora-kna himukata hislahleta hitayma?
38Hislahanru, hanjihohnetanu hmallixikowakanupa. Klu tshinanu jmeremkahi seyni mantshicha mmixkotni.
39Hiyrunuko pnute hya ranjihohnexyawakapa waneya htshinakanaxyawaka pixka hanjihohneruya htshinatnaka.
40Waneya hsatokatnaka rasruklene nwaka, retamtna himkatshine hi rumukata himrekhayhaletna. Hi rimatna hanu rixa hihretanruna Jesus.
41Waneya map-kata rixinri rapkapinixka wla htshina:
— Himkawhe hapnanuthe? Seyokatkani. Rapokpapkolutatka! Jeji Whene tshinkaluru hektuwaka kamhatshinemyo rutakkatka.
42Hpalnanu, hayewa. Hetanu, tujrapa nkamnitjeru!
Jesus Kachixikowaka Piranapni
43Jesus yanumakanaxiniwa, satu doze rixinri rasruklene Judas tshinkaluru hapokatka. Waleymalune hixolune tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine hiyrun-koxa tsrukakalune judeu-ne yokanatanune. Yohlolewapi hiyrunu hahaje ranikna.
44Kamnitatshri satu rimaxikole runkakna, wla htshina:
— Katukta namlutanu, walekatkani. Hkachitanru wale. Kihle kachre hixanru. Wan-hixatshri hanikanu.
45Waneya hajeyri rapokastsixinixkalu Jesus waneya wane htshina Judas:
— Kasruklewakleru!
Waneya ramlutlu.
46Waneya wan-rixa kachretluna Jesus. Hkachpotuthonukluna.
47Seyni satu wane hwakanatatshri kochpaklu hyohlolewapre. Waneya hkastakjepitlu tsru sacerdote towrer-jepi.
48Waneya Jesus wan-tshinna yine:
— Ha hixa wkata hina yohlolewapikakayma, hahajekakayma koxa hkachixyawakapno? Hatatjewa katshowhurlanohe?
49Hixayma nwakanata ptowru hohneruka. Ptowru hohneruka Hoyakalupji nasrukjekanaxyahi. Seyni hi hkachitno. Seyni xye ptowruka hakanha Hoyakalu tokanu tshinyawaka hpoyahokajyawakapa tshinanu.
50Waneya rasruklene ptowruneka hichotatkalu, rasukatkana.
51Waneya satu makluji mkatshri sama tsonu poyixikatshriwa homkahitlu Jesus. Waneya satkaka yineru yahot-kachretmaklu.
52Seyni hkaspukamkalutlu. Rasuka malechkopiru.
Tsrukakalune Jemahchinikankakyehixyawaklu Jesus Piranapni
53Waneya ranikluna Jesus tsru sacerdote-pji nwaka. Wanepji rapatjexyana tsru hixikatshinwa sacerdote-ne, tsrukakalune judeu-ne, kasruklewaklerune hinanchitkaluru pirana hasruklewatatshin-koxa.
54Seyni Pedro hohatjini romkahyehixyalu Jesus. Waneya tsru sacerdote hiputre hjihloka. Tshitshmerostsi htuplata soldado-neyma roljiywakapa.
55Waneya tsru hixikatshinwa sacerdote-ne hiyrunu tsrukakalune jemahchinikankakatshine hijhamkalu satu rukolukanuwninri yáhole rumukata hiylalexyawakapluna. Seyni hike rukchikna.
56Hixolune yine weyawjechayehitlu Jesus seyni satkaka yineru pnuk-tshina. Seyni hi psokaklu pirana htshinna.
57Satkaka yineru yotunota hweyawyehitluna Jesus malechawaka htshinyehitluna, wla htshinna:
58— Wjemlu wla htshinyawaka: “Numukata nikatletanru xye Hoyakalupji yine kamhalerupji seyni map-hohne pnute, nkamhanutnaklu satu pantshi hi yinemyo kamhapjitanrupni.”
59Seyni wanepnawaka hi pixkakaklu htshinna.
60Waneya tsru sacerdote hixolune hanikajite yotunoxya waneya Jesus repomha:
— Hi he puhitanru hjihyehixyayina?
61Seyni Jesus hi hihita. Hike htshina. Waneyatnaka tsru sacerdote hepomhatnaklu:
— Pixlahe Messias-yi, Hoyakalu himalwutkaluru whenyi?
62Waneya Jesus hihitlu:
— Hitakni. Hiyrunu hixa ptowrunekhi hetanru Jeji Whene, hohimkohi hoho hapokatshripa, Ptowru Himukatatshri Hoyakalu potukle sreta tuplatatshripni.
63Waneya tsru sacerdote hjihekannu tshinanu hsuskamkaluxnawa waneya wla htshina:
— Hi wujhana pimrine hiphujtatatshine.
64Hjemluhe hektuwaka htshinanwakaxyawaklu Hoyakalu? Hiyáhoni kluhe hkahwaka hixa?
Waneya ptowru yineru wan-tshina rujhalu rupniywaka.
65Waneya satkaka yineru yinuwaka hitskahjeretlu. Ruchyahojitluna. Rutsojtakluna waneya wla htshinruna:
— Pmetanutu punkakletanu kathe hiylakyi.
Hiyrunu rinotjen-koxa kachitlu, rutsojtakluna.
Pedro Wan-Tshina Hi Rimathetlu Jesus Piranapni
66Pedro honra tsru hixikatshriwa sacerdote hiputre rawakanata waneya sato tsru sacerdote towrero hapokatka.
67Tetlu Pedro tshitshmero rolkakanata. Tyopukhatlu waneya wla ttshinru:
— Pix-koxa Jesus Nazaré hajeruymalutyi.
68Seyni wale weyawata wla htshina:
— Hi nimathetlu. Hi nimata klukta ptshina.
Hiyáhoni hiputu hichpajyawakle hya waneyatka hyanumatatka patlapa.
69Waneya towretshro hexinitnaklu Pedro tyinuwaka hinkakletna wanestsi hwakanatatshine:
— Xye jeji wannaymalutni.
70Seyni Pedro weyawatatnaka hiyrunuko hi wannaymalutno htshina. Waneya xekoyaka wane hwakanatatshine wan-tshinatnaklu:
— Ha hi wkahekyi, wimatyi pixa satu wannaymalutyi klu tshinanu pixa Galileia hajer-koxyi.
71Waneya Pedro yinuwaka hektuwaka tshinrexnawa waneya wla htshina:
— Halikaka hi nimathetlu jeji katu pirana punkakno.
72Waneklukawa patlapa yanumatatnaka. Waneya Pedro hichinikaplu Jesus tokanu htshinakanaxyawaklu: “Hepi kata hma yanumatkanuklunuwa patlapa, pixa map-kata hi pimathetno ptshinanu.” Hiyáhoni Pedro kaheknanuwahchinikanutatka waneya hyinuwaka tshiyahlepotuta.
Currently Selected:
Marcos 14: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
