Marcos 3
3
Jesus Hitskalajyawaklu Hiprihamyotatshri Piranapni
1Waneya pa hohnepatnaka hjihloklu hanjihohnewakapji. Wane rawakanata satu jeji hiprihamyotatshri.
2Ruslahpotukanatluna Jesus ho hapnanuxikalur-hohnerhe rutskalaklewatanu ho hike hjihyehixyamkapluna.
3Waneya Jesus wan-tshinru jeji hiprihamyotatshri:
— Yine hanikajite pyotunoxini.
4Waneya wla htshinna Jesus:
— Hanu phuthe htshina yonawahlo hapnanuxikalur-hohne hiykole pirana? Kluhe kamhako hapnanuxikalur-hohne? Kihleru ho hektutu? Ho renek-hiweklerewatanu ho hkamaklewatanu hapnanuxikalur-hohne?
Seyni wanna hike tshina.
5Waneya Jesus heknojtayehitmakna. Hjihekanuwata hwamonuwata chik-haji rixyawaka tshinanna. Waneya wla htshinru jeji:
— Pyosurukkanotanu.
Waneya hyosurukkanotatka, ruhlewamyotatka.
6Waneya wane ruchpakamxyana fariseu-ne. Waneya Herodes-neyma rujhahchinikanutatkana wannakakluko hanu rixa himukata hiylaletluna Jesus.
Jesus Htokanu Tsonu Hihlexyana Katshinomtalune Piranapni
7Waneya Jesus wane hichpajyatka. Galileia powha hya rasrukleneyma. Romkahimtluna hixolune yine Galileia hajene Judeia hajen-koxa,
8Jerusalém hajene, Idumeia hajene, pa sreta Jordão hajene, Tiro-stsi hwatshine, Sidom-stsi hwatshine koxa, Wanna ptowruneka yanwakatlu Jesus klu tshinanu hjempiranyehitluna ptowru Jesus kamhaleru.
9Waneya Jesus hixolune yine hma mipxajyawakanupluna tshinanu ranjitna rasruklene sato kanawa rawapyawakapluna.
10Klu tshinanu yine hi heppika rutskalaka hiyáhoni hkatsholikluna yeyixatshine mkojekananu hyotnejyawakapluna.
11Waneya kamtshine hexiniklunru Jesus hyoptsojityehitluna. Hsaplewatna wla htshinna:
— Pixni Hoyakalu Whenyi!
12Waneya Jesus hipokananu hijretna hike hmunkajyawakanupna katni wale.
Jesus Nurexyawakna Doze Rasruklene Piranapni
13Waneya himriji hkankatka Jesus. Htomhana wale ruchinikanune. Waneya hyanwakatluna wale.
14Jesus hitakna doze waleyma hwatshinepa. Hyokanatanunepa hinkaklewatatshinepa,
15rutakko henejikolupa ruchpakjixyawakapna kamtshine.
16Xyeni Jesus nuretanune doze-na: Simão, wale rutakhiwakata Pedro;
17Tiago, Zebedeu whene, João, Tiago hepuru; (Hiwakatna Boanerges, waleni rutlohle pixkalune);
18André, Filipe, Bartolomeu, Mateus, Tomé, Tiago Alfeu whene, Tadeu, Simão honukla Israel tshijne haluka mixkowkakletatshri,
19Judas Iscariotes tshinkaluru, Jesus kamnitjerupa.
Yine Kahwaklu Jesus Kamtshi Rixyawaka Piranapni
20Waneya pantshi rapokatka Jesus, yine hixolune hapatjeyehitatnaklu. Hiyáhoni Jesus hiyrunu rasruklene hi himukata nikleta.
21Waneya xye pirana hjeminna Jesus molene runna rawapyawakapluna Jesus klu tshinanu pimrine wan-tshinna jipukalerhetkoni.
22Waneya Jerusalém poktshi hyopijyana kasruklewaklerune hinanchitkaluru pirana hasruklewatatshine. Wanna wla tshinyehitlu Jesus:
— Waneylu Belzebu tshinkaluru kamtshi pohire. Belzebu himukatleyma tshinanu hetko maleka ruknokna kamtshine.
23Waneya htomhinixkana Jesus, wla htshina yapkakluya:
— Hanhe rumukata Satanás maleka hiknoklexnawa Satanás?
24Ptowru tshijne rawa nikawnatshripa, pa hchinikanurutu hmixlenu tshinanna wane tshijne hajene.
25Hiyrun-koxa pantshi hajene wannakakluko pnu pejnu rixahchinikanutna hi rumukata hwachaletna.
26Hiyrun-koxa Satanás kamtshi hkamnixiniklunwa pnuko rixahchinikanuxinwana Satanás hayinetene. Hi rumukata pnute yaletanu htowuwle.
27Yineru hi himukata jihlokletlu satu jeji hixkolupji htshowhuxyaplu rimwaleru hma mostuhapkatkanuklunru hixkolu. Waneklu tsonu rumukata tshowhuretlu hipji hajeru.
28Halikaka ntshinhi ptowru hixatshri hektuwaka Hoyakalu mukchikhihlenreru hkamhini yineru, ptowru hixatshri hektutu htshinanwakaxiniplu Hoyakalu, ramtakahchinikanuxiko rektunu.
29Seyni katukta hektutu tshinanwakaxiniplu Hoyakalu Hiwejikaluru hikeklu hohne ramtakahchinikanyehitkona rektunu seyni rektunu hikolukanuwnatshri hikeklu hohne mnikawnakatupni.
30Jesus wan-tshina klu tshinanu pimrine wan-tshinru, waneylu kamtshi.
Jesus Hinro Himolen-koxa Piranapni
31Waneya Jesus hinro, himolen-koxa Jesus yehi hapokatka. Maleka rawna. Htomhakjixluna.
32Waneya hixolune yine rixiplatjene wane htshinruna:
— Petanu, punro pepurun-koxa maleka rawna. Rujhayina.
33Waneya Jesus hepomhana, wla htshinna:
— Katnihe nunro hiyrunu nomolene?
34Waneya reknojtayehitna rixiplatanune. Wla htshina:
— Hewitkana nunro hiyrunu nomolene.
35Hoyakalu halujyawaka kamhatshine wannani nepuru, nepuro, nunro.
Currently Selected:
Marcos 3: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
