Zaŋ 19

1Ara nesey, Pilatu ke gweɗec kafaraŋ tata hay, ece re kəsek Yesu, aca ra kəlapa ava laway. 2Kafaraŋ hay ac ka slaslap mətak hay, ac ka pan pa yaŋ, ara aŋga bay. Asaya, ac ka pana rəkwat ta bay hay gagaza ana fa vaw. 3Ac ka ŋgucafa vaw, ac ka sasarafa, gege: «Anda gwaɗafakaa, bay te Zuwef hay!» Ava dəɓa ana, ac ka cakana ha a darzləmay. 4Pilatu ke dek kad a vəda saya, ke gweɗec mazlakava te Zuwef hay, gege: «Mawala, ya ta vakwaɗ nda ana kad a vəda, afa akwar da səna kwa ya ka ŋgat ma masa təɗe ta makəɗiya masa akwa cafa lalaw fətiya sə, aabay.» 5Yesu ke dek kad a vəda, aŋga ava mətak maslasləpa dapa yaŋ va rəkwat ta bay gagaza ana fa vaw. Pilatu sə, gege: «Maha nda ana aŋga ke!» 6Amaa masa mazlakava hay ta ndaakwas hay va ndah teceŋ, aca wala Yesu sə, aca cə lalaw ava gədaŋ, gege: «Daraɗ fa hap mazləlawa! Daraɗ fa hap mazləlawa!» Pilatu ke gweɗec saya, gege: «Maha makəs nda ana, akwar ava yaŋ takwar ana ma ta zləlawaw. Yey sə, ya ka ŋgat ma masa təɗe ta makəɗiya masa akwa cafa lalaw fətiya sə, aabay.»

7Mazlakava te Zuwef hay ac ka gwaɗa, gege: «Andaw ava ma majawa taciya ɓa. Ara masa ma majawa ana te gweɗey sə, say makəɗa avəda cukw cukw macəhwandaw, afa ka paɗ yaŋ tata ka Wut ta Zlavay.» 8Masa Pilatu a cəna ara nesey sə, zidaw ka kəɗa mafəna ana saya. 9Ka də way saya, ka nəkafa Yesu, gege: «Kaa ana sə, ke dek da ma?» Amaa kwa Yesu ka vahan aabay. 10Ara nesey, Pilatu ka gwaɗa, gege: «Ke gweɗ bay ara nesey sə, kad yey, biba? Ka sən masa yey sə, ya ava gədaŋ ɓa ta magərdakaa, daha aabay ta madaraɗakaa fa hap mazləlawa bay geyey?» 11Amaa Yesu ka vahan, gege: «Ka ava gədaŋ kwa kusetke da yaŋ yey, aabay, say nda masa Zlav ta vakaɗay. Wala mafay te mey, nda mepeɗiyey pa ha takaa nesey sə, aŋga eve mebər tata hay aca fənakaa.» 12Dapa masa Pilatu a cəna ma ana ara nesey sə, ka yah cəvey ta mapəla Yesu. Amaa Zuwef hay ac ka cə lalaw ava gədaŋ, ec ke gweɗ, gege: «Daha ka gərda nda nesey, ŋgesey ka guula ta bay ta Rawma hay sabay. Kwa waawa mapana yaŋ tata ka bay sə, aŋga maslagəra ta bay ta Rawma hay.»

13Masa Pilatu a cəna ma ana ara nesey sə, ke hwedek Yesu kad a vəda saya. Ka njah fa gwadadakw tata, fa slam macacala eve kekeŋ masa aca zaliya ava ma ta Ebəre «Gabata.» 14Ta pəsaŋga ana, pas ta maləmad vaw ta macunam ta Pak te Zuwef hay. Ta yaŋ pas ana ŋgesey, Pilatu ke gweɗec Zuwef hay sə, gege: «Maha bay takwar.» 15Amaa aca cə lalaw ava gədaŋ, ece gweɗ, gege: «Kəɗa vəda cukw cukw! Kəɗa vəda cukw cukw! Daraɗ fa hap mazləlawa.» Pilatu e vehecen, gege: «Bay takwar war sə, akwa wal ya daraɗ fa hap mazləlawa geyey?» Mazlakava hay ta ndaakwas hay sə, aca vahan, gege: «Bay taciya mekele aabay, say bay ta Rawma hay.» 16Ara nesey, ke vecen Yesu aca ra daraɗ fa hap mazləlawa.

Aca dar Yesu fa hap mazləlawa

(Mat 27.32-44; Mar 15.21-32; Luk 23.26-43)

Ac ka data ava Yesu ana. 17Yesu sə, ka zaɓ hap mazləlawa tata, ke də kad a vəda dapa berne, a husa pa slam mezel taɓa ta yaŋ ava ma te Ebəre sə, Gwalgata. 18A faŋga ana, kafaraŋ hay ac ka daraɗ fa hap mazləlawa ava ndana hay ecew a cak tata, nda amta aŋga jaka ha ta zam, nda leŋgeɗey jaka ha ta gula, Yesu aŋga dapa taɓa teceŋ. 19Pilatu ka və cəv ta mavində ma ɓa fa karkaslah, aca ra daraɗ fa hap ana. Ma ana mavinda dapa Ɗelewer mavəna, gege: «Yesu wut ta wunam te Nezeret, bay te Zuwef hay.» 20Zuwef hay gaa aca jaŋgə ma masa mavinda fa karkaslah ana, afa slam ana masa ac ta daraɗ Yesu dapa sə, aŋga zef eve berne ana. Ma ana mavinda sə, ava ma te Ebəre hay, ava ma ta Laateŋ hay va ma te Gərek hay. 21Ara nesey, mazlakava hay ta ndah maŋga kwakwas te Zuwef hay aca gwaɗa Pilatu, gege: «Ka vindaɗ “bay te Zuwef hay” bay», amaa: «Nda ana te gweɗ, gege: “Ya bay te Zuwef hay.”» 22Pilatu e vehecen, gege: «Jə masa ya ka vinda sə, da njah ara aŋga ana.»

23Masa kafaraŋ hay ac ka daraɗ Yesu fa hap mazləlawa cay sə, ac ka kəs rəkwat tata hay, ac ka vəna faɗ. Amta sə, kad kafaraŋ amta may. Ac ka kəs rəkwat tata mazambəla masa a piya a yaŋ rəkwat, rəkwat ana sə, maca maacay, madaka aabay dəga da wudam kasl a bəlam. 24Kafaraŋ hay ec ke gweɗ dapa taɓa tec, gege: «Anda ŋgarakwaɗ rəkwat ana bay, amaa makazlakwa siyakw, andə da sənakwaɗ rəkwat ana sə, kad wa.» Jeŋ ana e ŋgə nesey sə, ara masa mavinda zleezle ke gweɗ, gege:

«Ac ka vən rəkwat aɗaw hay,

ac ka kazlə siyakw da yaŋ rəkwat aɗaw#Jab 22.19..»

Wala masa kafaraŋ hay ta ŋgiya.

25Da cak ta hap mazləlawa masa Yesu madara fətiya sə, mamaŋ, dəmaŋ ta mamaŋ, Maaray ŋgwaz ta Kəlawpas va Maaray dəm ta wunam ta Magədala, ac mazlaca. 26Masa Yesu a wala mamaŋ va nda masasəraka jene masa a waya elehey da cak tata sə, a gwaɗa mamaŋ, gege: «Mma, wala wudiyak kana.» 27Ava dəɓa ana, a gwaɗa nda masasəraka jene, gege: «Wala mmakw kana.» Dəga ta pəsaŋga ana, nda masasəraka jene sə, ka kəsaw kad way tata.

(Mat 27.45-56; Mar 15.33-41; Luk 23.44-49)

28Ava dəɓa ana, Yesu a səniya, jene hay fakwanay mandəva cay. Ke gweɗ, gege: «Yam e kəɗiyey.» Ara nesey, afa jə masa mavinda sə, da ŋgata. 29A faŋga ana, yes manəha ava wuzam kwakwiyaŋ ɓa, kafaraŋ hay ac ka kəs jene ɓa ara gagəmay, ac ka tərvaɗaɗ fəma ta gada ta izawp, ac ka cəhwaɓaɗ pa wuzam ana, aca talan zef kad pa ma te Yesu. 30Masa Yesu a caka wuzam ana kwakwiyaŋ sə, ke gweɗ, gege: «Jene hay fakwan mandəva cay.» Ava dəɓa ana, ka jəkwaɗ yaŋ kad fa vara, ka məcata.

Bembez va yam

31Ta pəsaŋga ana, pas ta maləmad vaw kad pa macunam ta Pak te Zuwef hay. Mazlakava hay te Zuwef hay, aca wal macəhwandə hay ac da njah fa hap mazləlawa kasl pas ta masasak vaw bay, afa pas ta masasak vaw sə, aŋga ava mehehəm fəna pas hay dərziya. Mafay ana, ac ka nəkafa Pilatu e de peslecen sek ta ndah fa hap mazləlawa sə, avəda, aca ra bəreŋgekec avəda kad fa vara. 32Ara nesey, kafaraŋ hay sə, ec ke dekey, ac ka paslan sek ta nda macaaca ana va ta nda meecew ana mazləlawa fa hap da cak te Yesu. 33Mahusa tec fa Yesu sə, aca ŋgatafa ka məcata cay, ac ka paslan sek hay ɓasabay. 34Amaa nda amta deveŋ kafaraŋ hay, ndap! A zləliya ava zekw pa ŋgalak. A faŋga a faŋga ana, bembez va yam ke ceceɗek dapa vaw tata kad a vəda. 35Nda masa ka wala jeŋ ana masa e ŋgey eve ndey tata sə, ka tə yaw da yaŋ ana, matə yaw tata ana sə, aŋga tehwe. Nda ana ŋgesey, a səniya, e gweɗek sə, metehwe ana, a tə yaw da yaŋ ana ara nesey sə, afa akwar may, akwar da kəs ma ana. 36Yaw, jeŋ ana e dek fakwan ara nesey sə, afa a da ŋgata ara Ma mavinda dapa ɗelewer mavəna zleezle te gweɗ, gege: «Kwa slaslar amta deveŋ slaslar tata hay sə, ac ta paslan aabay.» 37Mavinda dapa slam mekele saya, ke gweɗ, gege: «Ac ta wala nda masa ac ta zləliya ana#Zar 12.10; Mjz 1.7..»

Aca paɗ Yesu pa jəvay

(Mat 27.57-61; Mar 15.42-47; Luk 23.50-56)

38Ava dəɓa ana, nda ɓa, mezel Zezef, aŋga wut ta berne ta Arimatey, aŋga nda masasəraka jene te Yesu, amaa ke ŋguzdek yaŋ tata aabay, afa a ŋgə zidaw fa mazlakava hay te Zuwef hay. Ke dey vara Pilatu ka ta nəkafa cəv te mebəreŋgek macəhwandə te Yesu kad fa vara. Pilatu ka vana cəvey, Zezef ke dey, ke bəreŋgek macəhwandə te Yesu. 39Nikwedem, nda masa ke dey vara Yesu ta vaɗ sə, ke dek may. Ke kəsek menjev mezel mir magaɓa ava bizɗekw pa ha daha. Təbekw ana sə, e ŋgə kilew kwakwar mahkar. 40Ec cuweeney, ac ka zaɓ macəhwandaw ana, ac ka kulaɓafa mal, ac ka paɗa ava rəkwat, ara kwakwas ta map macəhwandaw pa jəvay masa Zuwef hay aca ŋgiya cəɗem cəɗem. 41Dapa slam masa ac ta dər Yesu faŋga sə, zerdeŋ ɓa. Dapa zerdeŋ ana ŋgesey jav waya ɓa, masa kwa ac ka pə macəhwandaw pa aabay heley. 42Aca paɗ macəhwandə te Yesu pa jəvay ana faŋga sə, afa pas ta masasak vaw aŋga hwak cay. Asaya, jəvay ana aŋga zef faŋga.

Currently Selected:

Zaŋ 19: CUVnt

Highlight

Copy