Lukas 21

Ŋgwa macəhwandaw maslamarga mahwalhwala ana

(Mar 12.41-44)

1Yesu aŋga dapa Way ta kwakwas. Ke pə ndey ava zlalav ke welec ndah eve zleley hay aca və səlay teceŋ kad pa jeŋ ta macəkal səlay dapa way ana. 2Ka wala ŋgwa macəhwandaw maslamarga mahwalhwala ana ɓa, a pə kuba#21.2 Kuba Kuba sə, səlay masa a husa sisi bay. tata ecew kad pa jeŋ ana may. 3Mafay ana, Yesu gege: «Eve metehwe ana ya gwaɗakwar, ŋgwa macəhwandaw maslamarga mahwalhwala ana nesey sə, ka və səlay tata ka fəna ndah dərziya fakwanay. 4Ye gweɗ ara nesey sə, afa ndah dərziya aca və səlay tec kusetke deveŋ zleley tec hay magaa ana da wunam. Amaa ta ŋgwa macəhwandə nesey sə, kwa aŋga maslamarga ana, ka vana səlay tata masa a ta ndə jene ava aŋga sə, avəda fakwanay kad Zlavay.»

Mendəv ta vavara

(Mat 24.1-2; Mar 13.1-2)

5Ava dəɓa ana, ndah dərziya ec ke gweɗ da yaŋ Way ta kwakwas, gege: «Way nesey sə, maləmada mambəla ana eve kekeŋ hay. Asaya, maləmada ava jene hay mambəla ana masa ece husem bay ndana hay ta viya kad Zlavay.» Yesu gege: 6«Pas ana ɓa e te dekey, jene hay masa akwar ta wala nesey, ec te mbəɗeceŋ fakwanay, kwa kekeŋ amta e te zek da yaŋ kekeŋ caliya aabay.»

Jene hay te meɗeley masa ece ŋgə dəreŋ va zef

(Mat 24.3-8; Mar 13.3-8)

7Ndah ana faŋga sə, ac ka nəkafa Yesu, gege: «Nda masasəraka nda, jeŋ ana hay ara nesey sə, ec te ŋgə ewey? Andə da sən pas ana ka husakata cay sə, fe mey?» 8Yesu ke vehecen, gege: «Mep leŋgesl, akwar te vec cəvey kad ndana hay aca ra fəcakwar bay. Ya gwaɗakwar ara nesey sə, afa ndana hay gaa ac te dekey eve mezeley aɗaw, kwa waawa e te gweɗ, gege: “Zlav te peɗiyey ka ta mbəlakwar dapa marga hay”. Asaya, ec te gweɗ, gege: “Pas masa Zlav e te ndəv vavara sə, ka husakata cay”. Akwar te cəp ma ta ndah ana hay bay! 9Amaa daha pas masa akwar ta cəna labara ta vəram hay va labara ta ndah mayaha ma fa bay tec hay sə, akwar ta ŋgə zidaw bay, a lada jeŋ ana hay ŋgesey, ece ŋgec ɗagay. Amaa vavara ana e te ndəv faŋga faŋga aabay heley.»

10Ava dəɓa ana, Yesu ke gweɗec saya, gege: «Wunam leŋgeɗey a ta ŋgə vəram ava wunam ŋgeɗey. Bay ŋgeɗey a ta ŋgafa suwe bay leŋgeɗey. 11Vavara a ta ɓəla vaw mabay. Mayə e te ŋgə dapa vavara hay mekele mekele. Asaya, mehecey hay ac ta kəɗaɓa ndana hay mabay. Jene hay gaa ec te ŋgec zidaw kad ndana hay. Asaya, jene hay marəzla ndana hay ec te ŋguzdek vaw da baymaləvaŋ.»

Pas ta maɓəs marga hay va matə yaw hay

(Mat 10.17-22; Mar 13.9-13)

12«Amaa wagaa jeŋ ana hay ec te ŋgey sə, ac ta təhazakwar avəda, ac ta ŋgadakwar hahar, ac ta hwadaɗakwar pə Way ta macə mbahw te Zuwef hay, aca ra təɗakwar ma yaŋ. Ac ta kazlaɗakwar pa daŋgay, ac ta hwadakwar fəma ta bay hay va mazlakava hay ta vavara mafay te mezeley aaɗaw. 13Marga ana hay masa akwar ta ɓəsiya ŋgesey sə, a ta vakwar cəv ta matə yaw da yaŋ yey. 14Mafay ana, masəna mambəla ana, akwar ta ŋgə zidaw mafay ta ma hay masa akwar ta gwaɗiya bay, 15afa ya ta vakwar leŋgesl va ma te megweɗ ma mambəla ana. Ara nesey, kwa maslagəra takwar hay ac ta təɗdakwar ava ma hay aabay. 16Kwa papaŋ takwar hay, kwa mamaŋ takwar hay, kwa malamaŋ takwar hay, kwa tərsam takwar hay va guula takwar hay ac ta cafakwar lalaw da way ta bay. Ndah dərziya deveŋ akwar, ac te kəɗec avəda cukw cukw ka macəhwandaw. 17Ndana hay fakwanay ac ta ŋgafakwar suwe mafay taaɗaw. 18Amaa kwa ŋgwec ta yaŋ takwar amta a ta zə aabay. 19Maɓəs marga ana hay, ara nesey, akwar ta ŋgat manjah katar ka midakw.»

Membeɗ te berne te Zeruzelem

(Mat 24.15-21; Mar 13.14-19)

20«Daha akwar ta wala kafaraŋ hay makwasa da dəɓa te meɗəzl te berne te Zeruzelem ka ta ŋgə vəram sə, ŋgesey, masəna berne ana a ta pəlahata cay. 21Ara nesey, ndah dapa vavara te Zudey aca ra hwaɓa ke te reɓ pa wudam. Ndah dapa berne te Zeruzelem aca ra hwaɓa dəreŋ. Asaya, ndah masa ac dapa wunam hay jaka pa səɓak sə, ac te sehw kad pe berne bay. 22Dapa ŋgesey ana, Zlav e te ŋgedec marga kad ndah dapa vavara ana, afa jə masa ndah mehwedek ma ta vindiya zleezle dapa Ma mavinda Mavəna sə, a ŋgata eve metehwe ana. 23Wabaw kad ŋgwazah ava hwaɗ va ŋgwazah masa wedeh tec hay aca sə wa heley dapa pas ana ŋgesey, afa marga mazlakava ana e te ŋgey dapa vavara va Zlav e te ŋguzdek mezem ta rav tata kad a yaŋ ndah dapa vavara ana. 24Ec te bezlec avəda ava kafaya, ec te hwedec kad pe ɓeley pa vavara hay fakwanay. Ndah masa aca sən Zlav bay sə, ac ta ŋgə bay da yaŋ berne te Zeruzelem kasl pa pas te mendəv ta maŋgə bay tec da yaŋ eceŋ.»

Mevehek ta Wut ta nda

(Mat 24.29-31; Mar 13.24-27)

25Jene hay te meɗel hay ɓa ec te ŋgey dapa pas, dapa kiya va dapa menjewzle hay. Dapa vavara sə, ndana hay ac ta ŋgə zidaw, ac ta wulak yaŋ mabay mafay ta masa ac ta cəna maɓəsl ma ta yam va meŋgeŋgel ta yam dapa yam mafayakfayak ana. 26Ndana hay ac ta məc mabay mafay ta mawulak yaŋ da yaŋ jene hay masa ec te ŋgə dapa vavara, afa gədaŋ hay mazlakava fakwanay da baymaləvaŋ ac ta ɓəla vaw. 27Ara nesey, ac ta wala Wut ta nda, e bəreŋgek dapa zlav ta yam ava gədaŋ mazlakava va membeɗ tata.

Meŋgucek vaw te Meŋgə bay ta Zlavay

(Mat 24.32-35; Mar 13.28-31)

28Yaw, daha masa jeŋ ana hay ac ka zlara meŋgə ara na cay sə, mezlec mambəla ana, mep ndey kad a wudam, afa pas te mepəlek takwar dapa mebərey sə, aŋga hukw cay.

29Ava dəɓa ana saya, Yesu ke gweɗec ndah masasəraka jene tata ava ma maɗəva, gege: «Mep ndey fa maftay va wudez hay dərziya. 30Daha akwa wala gamslak ana hay aca zlar maɗay sə, ŋgesey akwa sən kiya te medə kad e ley hukw cay. 31Ara aŋga ana, akwar may, daha akwa wala jeŋ ana hay ece ŋgey, masəna sə, Meŋgə bay ta Zlavay aŋga hukw cay. 32Ya gwaɗakwar, jeŋ ana hay fakwanay nesey ec te ŋgec fakwan ɗagay, wagaa ndah deveŋ akwar masa ec eve ndey təlam nesey ac ta məcay. 33Slam da baymaləvaŋ va slam fa vara a ta ndəvata, amaa ma taaɗaw sə, e te ndəv aabay.»

Manjah eve ndey

34«Mep leŋgesl fa manjah takwar. Mep leŋgesl, akwar ta paɗ yaŋ takwar eleh pa masə jə makwa nda bay. Akwar ta yah jə ta manday va jə ta masə hay makwa nda bay. Asaya, akwar ta gərda leŋgesl takwar da wulak yaŋ elehey da yaŋ manjah dapa vavara bay. Daha aabay sə, pas masa ye te vehekey sə, akwa sən pas ana bay. Ya ta ŋgatafakwar hwaf, 35ara ndana ta təhaz jene dapa gadaŋ. Pəsaŋga ana ŋgesey, ye te hufec ndana hay dapa vavara fakwanay. 36Ya gwaɗakwar, mep leŋgesl mambəla ana, macə mbahw cəɗem cəɗem kad Zlavay a da vakwar gədaŋ te membəl fe jeŋ ana hay masa ec te ŋgə fakwanay. Asaya, akwar da ŋgat mezlecey fəma ta Wut ta nda, ava zidaw bay.»

Pas hay mamaɗ yaŋ ana te Yesu

37Cəɗem cəɗem Yesu e vərendə dapa Way ta kwakwas, a sasərak ndana hay, amaa ta vaɗ sə, e dey ka ta nah fa ŋguɗa ta Awliviyey hay. 38Cəɗem cəɗem, fe pərek ana fe pərek ana, ndana hay gaa ece dey kad vara vaw pə Way ta kwakwas ka ta cəkafa zləmay.

Currently Selected:

Lukas 21: CUVnt

Highlight

Copy