Mata 26

Maləmad vaw ta matəhaz Yesu

(Mar 14.1-2; Luk 22.1-2; Zaŋ 11.47-49, 53)

1Masa Yesu ka ndəvda mesesərekey ana hay fakwanay cay, ke gweɗec ndah masasəraka jene tata, gege: «Akwa səniya, manah ecew fana sə, macunam ta Pak cay. 2Ac ta vana Wut ta nda avəda ke te der fa hap mazləlawa.» 3Mazlakava ta ndaakwas hay va mesnendə hay te Zuwef hay ac ka kwas vaw da way ta Kayfas, mazlakava ta ndaakwas hay. 4Ac ka cacala ma dapa taɓa teceŋ ta matəhaz Yesu eve wewer ke te kəɗey. 5Ec ke gweɗ, gege: «Anda ta təhazakwa dapa macunam na bay, afa ndana hay ac ta ŋgə baazlam hay.»

Macah mal fə yaŋ te Yesu da Betani

(Mar 14.3-9; Zaŋ 12.1-8)

6Yesu aŋga da Betani da way ta Simaŋw, nda meskwelme. 7Ŋgwaz ɓa ka ŋgucafa vaw ava kwalaba ta albaatəra#26.7 albaatəra Kwalaba te kekeŋ mahwahurkwa. aŋga manəha ava mal te meŋgeŋgəzey masa e husem bay. Ka cəhan fə yaŋ te Yesu dapa masa a ndə ɗaf. 8Ndah masasəraka jene tata aca wala ara nesey sə, ke zəmec fa rav, ec ke gweɗ, gege: «Manas jeŋ ana ara nesey sə, mafay te mey? 9Anda zlafakwaɗ mahusamda səlay gaa, mevecen səlay ana kad maslamarga hay!» 10Yesu ka səna mawulak yaŋ tec avəda, gege: «Akwa ŋgada hahar kad ŋgwaz ana mafay te mey? Mezlər masa aŋga ta ŋgiya kad yey nesey sə, mezlər mambəla ana, 11afa maslamarga hay sə, ac ta njah ava akwar cəɗem cəɗem, amaa yey sə, ya ta njah ava akwar cəɗem cəɗem aabay. 12Ava macah mal te meŋgeŋgəzey ana nesey kad fa vaw aɗaw sə, e ŋgə a ləmadawa mepəsehey aɗaw. 13Eve metehwe ana ya gwaɗakwar, kwa vəla vəla masa ac ta bəzad Labara mambəla ana dapa vavara fakwanay sə, ac ta kar maɗay ta masənafa ŋgwaz ana da yaŋ jə masa aŋga ta ŋgiya nesey.»

Zudas a və Yesu kad maslagəra tata hay

(Mar 14.10-11; Luk 22.3-6)

14Ara nesey, nda amta deveŋ ndah masasəraka jene kuraw dapa yaŋ ecew, mezel Zudas Iskariyawt, ke dey vara bay hay ta ndaakwas hay. 15Ke gweɗ, gege: «Akwa wal meviyey sə, mey, masa ya ra ta vakwaɗ Yesu ana?» Ac ka ŋgəfana yam ta səlay kwakwar mahkar. 16E zler pəsaŋga ana ŋgesey, Zudas ka yah pas mambəla ana te mevecen Yesu.

Maləmad ɗaf ta macunam ta Pak

(Mar 14.12-16; Luk 22.7-13)

17Manah macaaca ana ta macunam te peŋ masa is dapa aabay sə, ndah masasəraka jene ec ke dey, ka ta gwaɗa Yesu, gege: «Ka wal anda ra ta ləmadakaɗ ɗaf ta macunam ta Pak sə, dama?» 18Yesu gege: «Madaɗ pe berne vara vəre sə, ma ta gwaɗa Nda masasəraka nda ke gweɗ, gege: “Pas aɗaw aŋga hukw cay. Ya ta ŋgə macunam ta Pak ava ndah masasəraka jene aɗaw sə, da way takaa.”» 19Ndah masasəraka jene tata sə, ac ka ŋgaw ara masa aŋga te gweɗeceŋ, ac ka ləmada ɗaf ta macunam ta Pak ana.

Yesu a ŋguzad nda ma ta husamda

(Mar 14.17-21; Luk 22.14; Zaŋ 13.21-30)

20Mehusek ta fakwaɗ, Yesu ka njah ava ndah masasəraka jene tata kuraw dapa yaŋ ana ecew ka ta ndə ɗaf. 21Dapa masa aca ndə ɗaf, ke gweɗ, gege: «Eve metehwe ana, ya gwaɗakwar nda amta deveŋ akwar e te veneyey avəda pa ha ta ndana hay.» 22Ma ana nesey ke məcecen vaw ta ndah masasəraka jene avəda, kwa waawa ka gwaɗa, gege: «Bay Mazlakava, yey geyey?» 23Ke vehecen, gege: «Me te veneyey pa ha ta ndana hay sə, nda masa anda tal ha pe perentey amta ava aŋga nesey. 24Wut ta nda sə, cama a ta məcata ara masa mavinda da yaŋ aŋga. Amaa marga a ta ŋgatafa nda ma ta viya pa ha ta ndana hay nesey. Nda ana ŋgesey sə, zuwan aŋga te heyek bay.» 25Zudas, nda ma ta vana Yesu pa ha ta ndana hay sə, ka nəkafa may, gege: «Raabi, ma ta vanakaa pa ha ta ndana hay sə, yey geyey?» Yesu ka vahan, gege: «Kaa ana, ke te gweɗey.»

Ɗaf Mavəna metekweɗ ana

(Mar 14.22-25; Luk 22.15-20; 1Kw 11.23-26)

26Dapa masa aca ndə jene, Yesu ka kəs peŋ, ava dəɓa ta maŋgana wasay Zlavay, ka ŋgəla, ke vecen ndah masasəraka jene tata, ke gweɗ, gege: «Makəsaw, mandaw, nesey sə, vaw aɗaw.» 27Ka kəs kwap, ava dəɓa ta maŋgana wasay Zlavay, ke veceney eve megweɗ, gege: «Masaw akwar fakwanay, 28afa nesey ana sə, bembez aɗaw. Bembez ta madərazl ma, masa aŋga macəha mafay ta ndana hay gaa, mafay ta mapal mebər hay. 29Eve metehwe ana ya gwaɗakwar, kwa ya ta sə yam te rezeŋ nesey ɓasabay kasl pa pas masa ya ta siya ava akwar saya dapa Wunam ta bay ta Papa.»

Maslaf macə ma te Piyer

(Mar 14.26-31; Luk 22.33-34, 39; Zaŋ 13.37-38)

30Ava dəɓa ta maslə law hay dapa Jaabura, ec ke tep fa ŋguɗa ta Awliviyey hay. 31Ara nesey, Yesu gege: «Ta vaɗ nesey, akwar fakwanay, akwar te gərdeyey, afa mavinda dapa Ɗelewer mavəna, gege: “Ya ta kəɗa gwala jene avəda, bakw ta təmak ana hay ec te kwekwececeŋ. 32Amaa daha ya ka ta pərakata dapa maməcay cay sə, ya ta ŋgəlakwaɗ ma kad Gelile.” 33Piyer ka kəs ma, ka gwaɗa, gege: “Kwa daha ndah dərziya fakwan aca gərdakaa, taaɗaw sə, kwa ya ta gərdakaa aabay.” 34Yesu ka gwaɗa, gege: “Eve metehwe ana ya gwaɗakaa, ta vaɗ ana nesey, wagaa balaŋgwaz a ta ŋgal uway sə, ke ke cefiyey ma cay dəɓa mahkar.” 35Piyer ka gwaɗa saya, gege: “Kwa daha mapa andə da məc ava kaa sə, ya ta cafakaa ma aabay.” Ndah masasəraka jene dərziya ece gweɗ ara aŋga ana.»

Yesu a cə mbahw de Gecemeney

(Mar 14.32-42; Luk 22.40-46)

36Ara nesey, Yesu va ndah masasəraka jene tata aca husa pa slam ɓa mezel Gecemeney, gege: «Manjah fana dapa masa ye te dey pe mecek mbahw fatay.» 37Ka kəs Piyer va wedeh te Zebede cuweeney. Faŋga faŋga ana, vaw tata ka zlar maməcay va rav ke bəzlewey. 38Ara nesey, gege: «Vaw aɗaw ka məcata kusaf, ya wala ara ya ta maməcay. Manjaha fana va manjah eve ndey eve yey.» 39Ka ŋgəla vaw kusetke, ke kekəredey, dəŋgaɗ dac fa vara, ka cə mbahw eve megweɗ, gege: «Papa, daha efes e ŋgey sə, a lada kwap ta marga nesey da ŋgəla vaw dəreŋ eve yey. Amaa ŋgaw ara masa ka ta waya, bəna ara masa ya ta waya bay!» 40Kem veh kad vara ndah masasəraka jene mahkar sə, e ŋgetefec ac dapa waŋ. Ka gwaɗa Piyer, gege: «Akwar ka ŋgat gədaŋ ta manjah eve ndey kwa da hwaɗ te ler amta eve yey aabay war geyey! 41Manjah eve ndey va macə mbahw, afa akwar de təɗ kad pa matimaazlaɓ te jə mafəca nda bay. Rav sə, a hwar meŋgə jə mambəla ana, amaa vaw sə, aŋga eve bəle.» 42Ke veh ke ecew ana saya, ka ŋgəla vaw zəŋgaɗa, ka cə mbahw, eve megweɗ, gege: «Papa, daha kwap ana a zlafa maŋgəla vaw bay cama ya da siya sə, a lada jə masa ka waya sə, da ŋgata.» 43Ava dəɓa ana, ke veh saya, ke ŋgetefec ac dapa waŋ jaŋgata, afa waŋ ke fənec fa gədaŋ. 44Ke gərdeceŋ, ka ŋgəla vaw zəŋgaɗa saya mamahkar ana ka ta cə mbahw, a ciya ara macaaca ana jaŋgata. 45Ke veh kad vara ndah masasəraka jene, gege: Təlam nesey, manjaɓa waŋ, masasakaɓa vaw! Mawala, ler masa ac ta paɗ Wut ta nda pa ha ta ndah te mebərey sə, ka husakata cay. 46Mezleftek, amcakwa! Nda me te veneyey pa ha ta ndana hay sə, ka husakata cay.

Metəhez te Yesu

(Mar 14.43-52; Luk 22.47-53; Zaŋ 18.2-11)

47Masa Yesu aŋga dapa megweɗ heley sə, Zudas, nda amta deveŋ ndah masasəraka jene kuraw dapa yaŋ ana ecew e husekey, ac ava ndana hay gaa, ece dekey ava kafaya va gada fa ha fa ha. Mezlərekec mazlakava hay ta ndaakwas hay va mesnendə hay ta tərsam te Zuwef hay. 48Zudas, nda ma ta vana Yesu pa ha ta ndana hay sə, ke vec meɗel jene, gege: «Nda masa ya ta gwaɗafa ava mahumbat vaw sə, ŋgesey, aŋga ana, matəhazaw.» 49Mahusa tata a cak te Yesu sə, ka gwaɗafa, gege: «Raabi, ya gwaɗafakaa!» Ka humbataw. 50Yesu ka vahan, gege: «Guula aɗaw, jə masa ka wal maŋgiya sə, ŋgaw ke zef!» Ara nesey, ndah dərziya, ac ka ŋgucafa vaw Yesu, ac ka təhazaw. 51Nda amta deveŋ ndah masasəraka jene faŋga, pat e seɗek kafaya tata kad a vəda, cərahan zləmay ta nda maŋga mezlər ta mazlakava ta ndaakwas hay. 52Amaa Yesu ka gwaɗa, gege: «Vahaɗ kafaya takaa pə way ana, afa ndah maŋga vəram ava kafaya sə, me te kəɗec kafaya ana. 53Ka wulakiya sə, ya zlafa manəkafa Papa e de zləriyey macam yaŋ ta maskəla hay maŋga vəram kuraw dapa yaŋ ana ecew#26.53 macam yaŋ ta maskəla hay maŋga vəram kuraw dapa yaŋ ana ecew Miya ta maskəla hay maŋga vəram bakatar makwa dəɓa kuraw dapa yaŋ ana ecew. təlam təlam nesey ke te jəniyey aabay geyey? 54Daha ara nesey, ma hay masa ac mavinda dapa Ɗelewer mavəna sə, ac de ŋgə gwagumaw? Ma ana, ke gweɗ, gege: “A lada de ŋgə ara aŋga ana.”» 55Dapa ŋgesey ana, Yesu ke gweɗec kad miya, gege: «Akwa dek kad vereyey ava kafaya va gada fa ha fa ha ke te təheziyey ara ya makar mapərasla nda sə, mafay te mey? Cəɗem cəɗem ya manjaha dapa Way ta kwakwas ke te sesərekec ndana hay, akwar ke təheziyey aabay. 56Amaa jeŋ ana fakwanay e ŋgə ara nesey sə, afa ara masa mavinda dapa ɗelewer ta ndah mehwedek ma sə, da ŋgata.» Ara nesey, ndah masasəraka jene fakwanay ac ka gərda, ec ke hweyeceŋ.

Yesu aŋga fəma ta mazlakava hay te Zuwef hay

(Mar 14.53-65; Luk 22.54-55, 63-71; Zaŋ 18.12-18)

57Ndah matəhaza Yesu sə, ac ka hwadaɗ a way ta Kayfas, mazlakava ta ndaakwas hay. Da way masa ndah mesesərekecen ma majawa kad ndana hay va mesnendə hay te Zuwef hay aca makwasa dapa. 58Te Piyer sə, ka cəp Yesu ana dəreŋ kasl pa zaŋ ta way ta mazlakava ta ndaakwas hay. Ke sehw a way ana, ka njah da cak ta ndah maŋga mezlər da way ana faŋga, a wal a da wala memeɗ te jə masa ac ta ŋgana kad Yesu. 59Anjəkar mazlakava hay ta ndaakwas hay va ndah maca mamənak te Zuwef hay fakwanay aca yah matə yaw ava maŋgal ma da yaŋ Yesu ta majawiya ke te kəɗey. 60Amaa ndah mata yaw hay gaa ec ke ŋguzdek yaŋ ta maŋgəlafa ma sə, ac ka ŋgataw aabay. Mamaɗ yaŋ ana sə, say ndah ecew ɓa te ŋguzdek yaŋ, 61ec ke gweɗ, gege: «Nda ana nesey ke gweɗ, gege: “Ya zlafa mambəɗa Way ta kwakwas ta Zlav avəda, ya lama avəda dapa manah mahkar.”» 62Mazlakava ta ndaakwas hay ke zleftek ka gwaɗa Yesu, gege: «Kaa sə, ka ava ma te megweɗ aabay war geyey? Ndah ana nesey, aca cafakaa lalaw sə, da yaŋ mey?» 63Amaa Yesu manjaha teete. Mazlakava ta ndaakwas hay sə, ka gwaɗa saya, gege: «Ya kəɗakaa ha eve mezel ta Zlav masa aŋga eve ndey, gwaɗandaw eve membəɗey daha kaa sə, ka Kəristi, Wut ta Zlavay.» 64Yesu ka vahan, gege: «Ka ka gwaɗa cay. Amaa, ya gwaɗakwar, maayaŋ kad fəma kusetke sə, akwar ta wala Wut ta nda manjaha da ha ta zam ta Zlav masa aŋga ava gədaŋ mazlakava va masa e dek da yaŋ zlav ta yam hay da baymaləvaŋ.» 65Dapa ŋgesey ana, mazlakava ta ndaakwas hay sə, kəzar! A ŋgar rəkwat tata hay, e gweɗec ndah faŋga sə, gege: «Ka lafa Zlav avəda. Anda walakwa nda mata yaw mekele sə, ɓasabay. Naa akwar ka cəna masa a laf Zlav sə, biba! 66Təlam na mawulak yaŋ takwar gwagumaw?» Ac ka vahan, gege: «Aŋga mak te mekəɗey ka macəhwandaw.» 67Ac ka cəɓafa slesleɓ fe ndey, ac ka kəɗaw. Ŋgeɗ hay, ac ka darana ha darzləmay. 68Ac ka gwaɗa, gege: «Ŋguzdandanay, daha kaa sə, ka Kəristi, gwaɗandaw, makəɗakaa na wa?»

Piyer a cə ma fa Yesu

(Mar 14.66-72; Luk 22.56-62; Zaŋ 18.17, 25-27)

69Anjəkar Piyer aŋga manjaha dapa zaŋ ta ma ta way da vəda. Dəm maŋga mezlər da way ana faŋga ɓa, ka ŋgucafa vaw Piyer, ka gwaɗa, gege: «Kaa may, naa ka ka njah ava Yesu nda Gelile antisey!» 70Amaa Piyer ka cə ma fa yam te ndey ta ndana hay fakwanay, gege: «Ya san jə masa ka wal megweɗ na bay.» 71Ara masa e dey kad fəma ta way mazlakava, dəm maŋga mezlər mekele ɓa saya ka wala, ke gweɗec ndah faŋga, gege: «Nda nesey sə, ka njah ava Yesu nda Nezeret antisey.» 72Piyer ka cə ma saya eve membeɗey, gege: «Ya san nda ana anti bay.» 73Ava dəɓa ana kusetke saya. Ndah faŋga sə, ac ka ŋgucafa vaw, ac ka gwaɗa Piyer, gege: «Metehwe ana, kaa sə, ka nda amta deveŋ eceŋ, afa ɗaf ta ma takaa e ŋguzdek sə, ka deveŋ eceŋ.» 74Ara nesey, Piyer dəɗa! E mbeɗ, gege: «Ya san nda ana bay, daha ya ŋgal ma sə, Zlav de gwederiyey avəda!» Dapa ŋgesey ana, balaŋgwaz ka zlar maŋgal uway. 75Ma masa Yesu ka gwaɗa Piyer sə, ka hwana pə yaŋ, afa Yesu ana ka gwaɗa, gege: «Wagaa balaŋgwaz a ta ŋgal uway sə, ke ke cefiyey ma cay dəɓa mahkar.» Piyer ndal, a daɓa kad a vəda, ka kuɗa macəkuma bay ava mazal marava.

Currently Selected:

Mata 26: CUVnt

Highlight

Copy