Markwas 12
12
Ndah maŋga ley ta ndana masa suwe hay
(Mat 21.33-46; Luk 20.9-19)
1Ava dəɓa ana, Yesu ke gweɗec ava ma maɗəva.
Ndana ɓa ke ŋgey wudez te rezeŋ hay de ley tata, ka cəra ley ana teleleŋ. Dapa ley ana faŋga sə, ka zlal slam ta maɗac wut te wudez ana hay. Ka ŋgay balak kad nda ma ta ɓəla ley ana. Ava dəɓa ana, ke gərecen ley ana pa ha ta ndah maŋga mezlər dapa, ka data a maŋgway dəreŋ.
2Masa kiya ta maŋgal wut te wudez ana ka husakata cay, ka zlar nda maŋga mezlər tata amta kad vara ndah maŋga mezlər de ley ana, aca ra ŋgəlana meven ta ma tata. 3Amaa ndah maŋga mezlər de ley sə, ac ka təhaza nda ana avəda, ac ka kəlapa ava laway, ac ka vahda ava ha dahəŋga. 4Nda te ley sə, a zlar nda maŋga mezlər tata mekele kad e ley ana saya. Ndah maŋga mezlər de ley sə, ac ka kəɗaw pə yaŋ, ac ka lafaw. 5Ava dəɓa ana, nda te ley sə, ka zlar nda maŋga mezlər tata mekele saya. Tata sə, ndah maŋga mezlər de ley sə, ac ka kəɗa avəda cukw cukw. Nda te ley sə, ka zlar ndah maŋga mezlər tata hay mekele mekele kad e ley ana, amaa ndah maŋga mezlər dapa sə, ac ke kəlepec ndah leŋgeɗey, dərziya hay ac ke kəɗec avəda cukw cukw. 6«Nda te ley sə, aŋga ava nda maŋga mezlər tata mekele ɓasabay, magəra sə, wudiya pal amta masa a waya elehey. Mamaɗ yaŋ ana, ka zlar wudiya sə, kad e ley ana. Ka wulakaw, gege: “Gəla ac ta nahan yaŋ kwa!” 7Amaa masa wudiya ana a husa mbala zef ava ley ana sə, ndah maŋga mezlər de ley sə, ac ka wala, ec ke gweɗ dapa taɓa teceŋ, gege: “Amcakwa ma ta kəɗakwaɗ nda ma ta cama ley ana na avəda. Ara nesey, andə da camakwa ley ana kad andakwa”. 8Dapa ŋgesey ana, ec ke dey, ac ka təhaz wat ana, ac ka kəɗa avəda cukw cukw, ac fazəda macəhwandaw ana kad dəɓa te mecər te ley ana.»
9Yesu ke nəkefec, gege: «Ara nesey sə, nda te ley ana e de ŋgə gwagumaw?» Nda ana e te dekey, a ta kəɗa ndah maŋga mezlər de ley sə, avəda, e te vecen ley ana, kad ndah mekele. 10Akwar ka jaŋgə ma nesey dapa ma ta Zlavay biba? Ma ana e gweɗ, gege:
«Kekeŋ ta malam way masa masamahəzla hay
ta kazlda ava zlalav sə,
ava dəɓa ana, ka tərata ke kekeŋ mambəla ana ta malam way.
11Maŋgana jeŋ ana ŋgesey sə, Bay Zlavay,
jeŋ ana mambəla ana fa yam te ndey tandakwa.»
12Bay te Zuwef hay sə, ac ka yah cəv ka ta matəhaz Yesu, afa aca səniya ma maɗəva hay masa a gwaɗiya nesey sə, da yaŋ eceŋ. Amaa ec ke ŋgə zidaw fa miya, ac ka gərda faŋga, ac ka data.
Budaw va Sizar
(Mat 22.15-22; Luk 20.20-26)
13Ava dəɓa ana, mazlakava hay te Zuwef hay ac ka zlar Farisa hay dərziya va gəva ta ndah ta Herawt kad vara Yesu ka ta cakiya ava manək ma hay. 14Ec ke dey, ac ka gwaɗa, gege: «Bay taciya, anda səniya kaa sə, ke gweɗ eve metehwe ana, ke lel fa ndana aabay. Ke pec ndana hay fakwanay amta fa yam te ndey takaa. Ke sesərekec ndana hay aca ra njah ara masa Zlav ta waya. Gwaɗandaw: “Ma tandakwa majawa ka vandakwa cəv ta mapal budaw kad gwevernel geyey, aabay?”»
15Amaa Yesu a səniya ndah ana nesey sə, ac ava neneŋ dapa ma ecew ecew. Mafay ana, gege: «Akwa wal mecekiyey ara nesey sə, mafay ta mey? Meviyey səlay ana amta, ya wuzaɗa hwa.»
16Ac ka vana səlay ana amta. Yesu ke nəkefec, gege: «Fa səlay ana nesey sə, yaŋ va mezel ta wa?»
Ac ka vahan, gege: «Ta bay ta Rawma hay.»
17Yesu gege: «Ara nesey, meven ta ma te gwevernel sə, mavan kad gwevernel ana. Meven ta ma ta Zlavay sə, mavan kad Zlavay ana may.»
Ara nesey, ndah ana ac ke rəzlec mabay fa ma te Yesu ana.
Mepərek ta ndana hay dapa maməcay
(Mat 22.23-33; Luk 20.27-40)
18Ava dəɓa ana, medek ta Saaduki hay dərziya may. [Ndah ana hay ŋgesey sə, ndah megweɗ, nda masa ka məcata sə, e te pərekek dapa maməc ɓasabay.] Ec ke dey ava mawulak yaŋ teceŋ kad vara Yesu, ac ka nəkafa, gege: 19«Bay taciya, zleezle Muyiz ka vindandakwa ma majawa, gege: “Daha ndana ka məcata, ŋgwa macəhwandaw ana ŋgesey ka hayana wat aabay, malamaŋ masa aŋga ɓa eve ndey heley sə, a da kəs ŋgwa macəhwandaw ana, a da hayana wat pa slam ta malamaŋ masa ka məcata”. 20Yaw, ndah ava malamaŋ hay tasəla ɓa. Malamaŋ tec mazlakava kəs a kəs ŋgwaz. Ava dəɓa ana, nda ana ɓərem, a məcata, ka ŋgat wat aabay. 21Mambiyaŋ tata kəs a kəs ŋgwa macəhwandaw ana, aŋga may, ka məcata, ka ŋgat wat ava ŋgwaz ana aabay saya may. Ava dəɓa ana, wat macəpiya mamahkar ana kəs a kəs ŋgwa macəhwandaw ana may, ɓərem a məcata saya ka ŋgat wat ava ŋgwaz ana aabay suwar. 22Ara nesey, ac tasəla ana fakwanay teceŋ ac ka kəs ŋgwaz ana, ac ke məceceŋ fakwanay ac ka ŋgat wat ava ŋgwaz ana aabay. Ava dəɓa ta maməc ta ndah ava malamaŋ hay sə, ŋgwaz ana ɓərem a məcata may. 23Ara nesey, pas masa ndah maməca ac ta pərakata dapa maməcay sə, ŋgwaz ana a ta njah ka ŋgwaz ta wa la wa? Afa ac tasəla ana fakwanay ac ka kəsaw ka ŋgwaz teceŋ.»
24Yesu ke vehecen, gege: «Akwar ka zlaktakwar sə, akwa sən mavda ana geyey? Akwa zlek sə, afa akwa sən Ɗelewer mavəna va gədaŋ mazlakava ta Zlav bay. 25Yaw, ava dəɓa te mepərekek ta ndah maməca dapa maməcay sə, mawula hay ac ta kəs ŋgwazah ɓasabay, ŋgwaza hay ac te dey a way ta mawulah ɓasabay, amaa ac ta njah ara maskəla hay ta Zlavay da baymaləvaŋ. 26Mafay te mepərekek ta ndana hay dapa maməcay sə, akwar ka jaŋgaw dapa ɗelewer masa Muyiz ta vindiya e gweɗ da yaŋ kwakwaw masa e geɗ fa gamslak, ke fə aabay sə, aabay geyey? A faŋga sə, Zlav ka gwaɗa Muyiz, gege: “Yey sə, ya Zlav masa Abəraham, Izak va Zakwab papaŋ ta papaŋ takwar zleezle ta nahda yaŋ teceŋ kad aŋga.”» 27Yesu ke gweɗec saya, gege: «Zlavay ana sə, aŋga Zlav ta ndah eve ndey, bəna Zlav ta ndah maməca bay. Akwar Saaduki hay, akwar ka zləɓata elehey.»
Ma majawa ta Zlavay mazlakava sə, wula?
(Mat 22.34-40; Luk 10.25-28)
28Masa Saaduki hay aca tə yaw ava Yesu sə, ndana ɓa deveŋ ndah mesesərekecen ma majawa kad ndana hay, aŋga faŋga, ka cəna ma da yaŋ matə yaw teceŋ. A wala sə, Yesu ke vehecen ma ana mambəla ana. Mafay ana, ka nəkafa Yesu, gege: «Ma majawa ta Zlavay mazlakava mafəna dərziya hay sə, wula?» 29Yesu ka vahan, gege: «Ma majawa ta Zlavay mafəna dərziya hay sə, ma ana ke gweɗ, gege:
“Macak zləmay, akwar Isreyel hay,
Bay Zlav masa anda nahakwa yaŋ kad aŋga sə,
aŋga pal aŋga amta,
aŋga Bay tandakwa Mazlakava.
30Mawal Bay Zlavay ava rav takwar fakwanay,
ava gədaŋ takwar fakwanay,
eve mesfen takwar fakwanay.
Asaya, eve leŋgesl takwar fakwanay.
31Meecew ana sə, a kana saya,
Wal maslavda takaa
ara ka ta wal yaŋ takaa.”
Ma hay majawa mazlakava sə, ac na hay sey, ma majawa mafəna ecew na hay sə, ɓasabay.»
32Nda mesesərekecen ma majawa kad ndana hay sə, ka gwaɗa, gege: «Ma takaa mambəla ana nda masasəraka nda. Ma masa ke te gweɗek nesey sə, metehwe ana, Zlavay sə, aŋga pal amta bəna, mekele ɓasabay. 33A lada kwa waawa da wal Zlavay ava rav tata pal amta, eve leŋgesl tata fakwanay, ava gədaŋ tata fakwanay. Asaya, da wal maslavda tata ara masa aŋga ta wal yaŋ tata. Nda macəpa ma majawa ana hay nesey sə, a wafa Zlavay ka fəna ndana ta fakana gənaw hay va maŋgana kwakwas.»
34Masa Yesu a wala ke vehek ma ana eve leŋgesl te mesen jene sə, ka gwaɗa, gege: «Ke dəreŋ ava Wunam ta bay ta Zlav aabay.» Ava dəɓa ana, kwa waawa ka ŋgə zidaw ta manəkafa ma Yesu.
Kəristi va Deevet
(Mat 22.41-46; Luk 20.41-44)
35Masa Yesu e sesərekec ndana hay dapa Way ta kwakwas sə, ke nəkefec, gege: Ndah mesesərekecen ma majawa kad ndana hay ece gweɗ, gege: Kəristi sə, aŋga wut ta gwalay bay Deevet sə, a ŋgana gwagumaw? 36Bay Deevet, ava gədaŋ te Mesfen Mavəna ke gweɗ, gege:
«Bay Zlavay ke gweɗ kad Bay Mazlakava aɗaw, gege:
“Dekey, njah da cak ta ha ta zam aɗaw,
afa ya da paɗakaa, ka Bay da yaŋ ndana hay,
kasl pa pas masa ye te peɗec maslagəra takaa hay
a hwaɗ ta ha takaa.”
37Bay Deevet ava yaŋ tata ana, ka zala Kəristi sə, Bay Mazlakava, naa Kəristi ana a da njah ka wut ta gwalay bay Deevet sə, a ŋgana gwagumaw?»
Ndana hay gaa aca cak zləmay fe mesesərek te Yesu eve mewesley.
Yesu e təɗec ma yaŋ ndah masasərak ndana hay
(Mat 23.1-12; Luk 20.45-47)
38Yesu, dapa mesesərek tata, ke gweɗec fakwan, gege: «Mep leŋgesl fa ndah mesesərekecen ma majawa kad ndana hay masa aca wal maŋgway ava dawrawal mazlakava ana hay fa vaw. Aca wal ndana hay aca ra gweɗefeceŋ ava manahda yaŋ kad fa vara dapa slam ta makwas vaw hay. 39Dapa ta Way ta macə mbahw te Zuwef hay sə, aca yah slam ta manjah hay fəma ta ndana hay, afa aca re welec mambəla ana. Dapa pas ta macunam hay, aca yah slam ta manjah masa aŋga ava mehehəmey fəma ta ndana hay. 40Asaya, ece pəreslecen jene hay ta ŋgwa macəhwandaw hay avəda. Daha aca cə mbahw sə, aca njahda gaa, afa ndana hay aca ra səna sə, ac ndah mambəla ana, masəna Zlav eve metehwe ana. Mafay ana, ya gwaɗakwar, Zlav e te təɗec ma yaŋ ka fəna ndah dərziya hay!»
Mavə jene ta ŋgwa macəhwandaw
(Luk 21.1-4)
41Pas leŋgeɗey, Yesu aŋga dapa Way ta kwakwas, aŋga manjaha da cak ta slam te mecəkel jene kad Zlavay. Ke pefec ndey ndah mavana səlay kad pa jeŋ ta macəkal səlay dapa way ana faŋga. Ndah eve zleley hay ece kwi səlay teceŋ kad pa suŋgwaf suŋgwaf. 42A ta wala ŋgwa macəhwandaw maslamarga mahwalhwala ana ɓa a və səlay tata kweskweske ecew kad pa may, aŋga ava səlay mekele kwa da wunam ɓasabay. 43Mafay ana, Yesu ke gweɗec ndah masasəraka jene tata, gege: «Ya gwaɗakwar eve metehwe ana, ŋgwa macəhwandaw maslamarga mahwalhwala ana nesey sə, ka və səlay tata ka fəna ndah dərziya fakwanay kad pe jeŋ ta macəkal səlay ana. 44Ya gwaɗakwar ara nesey sə, afa ndah dərziya hay aca və səlay teceŋ kusetke dapa zleley teceŋ hay magaa ana da wunam. Amaa ta ŋgwa macəhwandaw maslamarga mahwalhwala ana nesey sə, ava maslamarga tata ana fakwanay, ka van zleley tata fakwanay masa a da yahaɓa jene ta manday ava aŋga sə, kad Zlavay.»
Currently Selected:
Markwas 12: CUVnt
Highlight
Share
Copy
Want to have your highlights saved across all your devices? Sign up or sign in
© 2022 CABTAL
