Markwas 14
14
Mesnendə te Zuwef hay aca cə mamənak ta makəɗ Yesu
(Mat 26.1-5; Luk 22.1-2; Zaŋ 11.45-53)
1Magəra manah ecew kad fa macunam ta Pak te Zuwef hay va macunam te peŋ masa is dapa aabay. Bay hay ta ndaakwas hay va ndah mesesərekecen ma majawa kad ndana hay ac ka yah cəv ta matəhaz Yesu ava makar, aca ra kəɗa avəda cukw cukw. 2Aca yah cəvey ana ava makar sə, afa ndah mazlakava ana hay ec ke gweɗ, gege: «Andaw ta təhazakwa dapa macunam na bay, afa ndana hay ac ta yahafandakwa ma.»
Macəhafa mal te meŋgeŋgəzey fa Yesu
(Mat 26.6-13; Zaŋ 12.1-8)
3Yesu aŋga da Betani, da way ta Simaŋw nda masa aŋga ta mbəliya dapa meskwelme. Dapa masa aca ndə ɗaf sə, ŋgwaz ɓa ka ŋgatafa kad way ana, ava kwalaba te kekeŋ mahwahurkwa ana mezel «Albaatəra.» Kwalaba ana manəha ava mal te meŋgeŋgəzey, masa e husem bay mezel «Nar.» Ŋgwaz ana, ka wuna ma ta kwalaba ana, ka cəhan mal sə, fə yaŋ te Yesu. 4Ndah mazala hay dərziya faŋga ec ke wesl da yaŋ jə masa ŋgwaz ana ta ŋgiya sə, aabay. Mafay ana, ec ke gweɗ dapa taɓa tec, gege: «A nas mal ana taambəla ara nesey sə, mafay te mey? 5Efes na ka husamda sə, a ŋgat səlay temere mahkar#Mar 6.37. fətiya. Ava dəɓa ana, e vənecen səlay ana kad maslamarga hay sə, mambəla ana da yaŋ masa aŋga ta nasiya kad fə yaŋ ta ndana aabay geyey?» Ara nesey, ac ka zam rav fa ŋgwaz ana.
6Amaa Yesu gege: «Magərda! Akwa ŋgada hahar mafay te mey? Jə masa aŋga ta ŋgiya kad yey nesey sə, jə mambəla ana. 7Maslamarga hay sə, cəɗem cəɗem akwar eve eceŋ fa slam ana. Kwa pas wula wula masa akwar wal ma te jəneceŋ sə, akwa jəneceŋ. Amaa yey sə, akwar ta ŋgat manjah ava yey cəɗem cəɗem ɓasabay. 8Ŋgwaz nesey sə, ka ŋgə jene mambəla ana masa a zlafa maŋgiya kad yey. Kwa ya ka məc aabay heley sə, ke təkweɗefiyey mal mambəla ana fa vaw aɗaw ka ta ləmediyey kad pa jəvay. 9Ya gwaɗakwar, kwa a fəla fəla dapa vavara fakwanay, ndah ma ta bəzad Labara mambəla ana ta Zlavay, ac te bəzedecen jə masa ŋgwaz nesey ta ŋgiya, afa ndana hay aca ra sənafa ŋgwaz ana.»
Zudas a və Yesu kad pa ha ta maslagəra tata hay
(Mat 26.14-16; Luk 22.3-6)
10Zudas Iskariyawt, nda amta deveŋ ndah masasəraka jene kuraw dapa yaŋ ana ecew, ke dey kad vara bay hay ta ndaakwas hay. Ke gweɗeceŋ, a wal me te vecen Yesu pa ha teceŋ. 11Masa aca cəna ma ana ara nesey sə, ec ke wesl mabay. Mafay ana, ac ka gwaɗa, daha ke te vecen Yesu ana sə, ac ta vana səlay. Ara nesey, Zudas Iskariyawt ka yah wewer hay mekele mekele te mevecen Yesu.
Ɗaf ta macunam ta Pak
(Mat 26.17-25; Luk 22.7-14, 21-23; Zaŋ 13.21-30)
12Pas macaaca ana ta macunam te peŋ masa is dapa aabay sə, pəsaŋga ana ŋgesey, Zuwef hay aca zlah wut ta təmak hay ta macunam ta Pak. Ndah masasəraka jene kuraw dapa yaŋ ana ecew, ac ka nəkafa Yesu ana, gege: «Ka wal anda ra ta ləmadandakwa slam ta mandə ɗaf ta macunam ta Pak sə, dama?»
13Dapa ŋgesey ana, Yesu ka zal ndah masasəraka jene tata ecew, ke zlerdeceŋ, gege: «Madaɗay pe berne te Zeruzelem. Dapa faŋga sə, akwar ta cə yaŋ ava ndana ɓa, e dey ava yam dapa yes fə yaŋ, macəpaw. 14Way masa e te sehw kad pa sə, manəkafa bay ta way ana, magwaɗa, Bay taciya e gweɗ, gege: “Slam masa maləmada kad andaw ava ndah masasəraka jene taaɗaw ka ta ndə ɗaf ta macunam ta Pak sə, fəla?” 15Ava dəɓa ana, bay ta way ana a ta ŋguzdakwaɗ slam ɓa da yaŋ way da wudam. Way ana maləmada mambəla ana ava jə ta macunam hay fakwanay dapa. Akwar da ləmadandakwaɗ jə ta mandə ta macunam ana dapa faŋga.»
16Ndah masasəraka jene sə, ec ke dey, ac ka husa pe berne. Dərŋga sə, ac ka ŋgat jene hay fakwanay ara masa Yesu te gweɗeceŋ. Ac ka ləmada jə ta mandə hay ta macunam ta Pak ana.
Nda ma ta husamda Yesu
(Mat 26.20-25; Luk 22.14; Zaŋ 13.21-30)
17Ta fakwaɗ ana ŋgesey, Yesu va ndah masasəraka jene tata ac ka husa pə way ta mandə ɗaf ta macunam ana. 18Dapa masa ac manjaha aca ndə ɗaf sə, Yesu gege: «Ya gwaɗakwar eve metehwe ana, nda amta deveŋ akwar mandana ɗaf eve yey fa slam ana təlam nesey a ta vana yey avəda pa ha ta ndana hay, ke te kəɗiyey ka macəhwandaw.» 19Ma ana nesey sə, ke məcecen vaw ta ndah masasəraka jene tata avəda kusaf! Mafay ana, kwa waawa ka nəkafa Yesu, gege: «Ma ta vanakaa pa ha ta maslagəra takaa hay ana sə, yey geyey?»
20Yesu ke vehecen, gege: «Nda amta deveŋ akwar kuraw dapa yaŋ ana ecew, nda masa anda ndə ɗaf ava aŋga fa slam ana dapa perentey amta nesey. 21Eve metehwe ana, cama Wut ta Nda sə, a ta məcata ara mavinda dapa ma ta Zlavay te gweɗey. Amaa wabaw kad nda ma ta viya pa ha ta ndah ma ta kəɗiya. Kad aŋga sə, zuwan aŋga te heyek bay.»
Ɗaf Mavəna metekweɗ ana
(Mat 26.26-30; Luk 22.14-20; 1Kw 11.23-25)
22Dapa masa aca ndə ɗaf sə, Yesu ka kəs peŋ ana, ka ŋgana wasay Zlavay. Ava dəɓa ta maŋgana wasay Zlavay, ka waca peŋ ana. Ke vecen kad ndah masasəraka jene tata, gege: «Maha makəsaw, nesey sə, slaw ta vaw aɗaw.» 23Ava dəɓa ana, ka kəs kwap, ka ŋgana wasay Zlavay, ke vecen ndah masasəraka jene tata. Ac fakwanay ac ka saw.
24Yesu gege: «Nesey ana sə, bembez aɗaw, bembez ta majaw ma. Zlav a jaw ma ava ndana hay mabay sə, jaka pe bembez ana nesey. 25Ya gwaɗakwar, ya ta sə yam te rezeŋ nesey ava akwar ɓasabay, kasl pa pas masa ya ta siya saya dapa Wunam ta bay ta Zlavay.»
Maslaf macə ma te Piyer
(Mat 26.30-35; Luk 22.33-34; Zaŋ 13.37-38)
26Ac ka slə law ta mahahəm Zlavay dapa Jaabura, ec ke dey kad fa ŋguɗa ta Awliviyey hay.
27Yesu gege: Pas masa ac te təheziyey ka ta kəɗey sə, akwar fakwanay, akwar te gərdeyey. Ara masa mavinda dapa Ɗelewer mavəna, gege:
«“Ya ta kəɗa gwala jene avəda,
Təmak tata hay ac ta vəna yaŋ amta amta.”
28Amaa daha ya ka ta pərakata dapa maməcay ana cay sə,
ya ta ŋgəlakwaɗ ma kad pa vavara te Gelile,
akwar te weleyey dərŋga.»
29Piyer ka gwaɗa, gege: «Kwa daha ndah dərziya ac ta gərdaka sə, taaɗaw ya ta gərdaka aabay.»
30Dapa ŋgesey ana, Yesu ka vahan, gege: «Cak zləmay! Ya gwaɗakaa eve metehwe ana, ta pəsna ta vaɗ nesey, wagaa balaŋgwaz a ta ŋgal uway ke ecew sə, ka ke cefiyey ma cay dəɓa mahkar.»
31Amaa Piyer ka təkafa ha ma tata ana, ka gwaɗa ava gədaŋ, gege: «Away! Kwa ac ta kəɗandaw cuweeney, ya ta cafakaa ma aabay.» Ndah masasəraka jene dərziya, ec ke gweɗ ara aŋga ana may.
Yesu a cə mbahw de Gecemeney
(Mat 26.36-46; Luk 22.39-46)
32Yesu va ndah masasəraka jene tata aca husa pa slam ɓa mezel Gecemeney. Ke gweɗec ndah masasəraka jene tata, gege: «Manjahay fana dapa masa ye dey pe mecek mbahw fatay.»
33Ec ke dey ava Piyer, Zak va Zaŋ. Dapa ŋgesey ana, rav ka bəzlawana, zidaw ka kəɗa. 34Ke gweɗec ndah masasəraka jene tata mahkar sə, gege: «Mawulak yaŋ ta rav aɗaw e fəniyey fa gədaŋ, a wal mekəɗiyey avəda. Akwar sə, manjah fana, akwar ta njawaŋ bay.» 35Ka ŋguca vaw kusetke kad fəma, ke kekəred kad fa vara, ka cə mbahw kad Zlavay. Dapa macə mbahw tata ana, ka nəkafa Zlavay daha e ŋgey sə, a lada pas ana da ŋgəla vaw dəreŋ ava aŋga. 36Ke gweɗ, gege: «Awa Papa, Papaŋ taaɗaw da baymaləvaŋ, jene masa ka zlafa bay sə, aabay. Ŋgucawa kwap ana na avəda dəreŋ eve yey. Ava aŋga ana fakwanay sə, ŋgaw ara masa ka ta waya bəna, ara masa ya ta waya bay.» 37Ke veh kad vara ndah masasəraka jene tata mahkar, e te ŋgetefec sə, aca njawaŋ. Ka gwaɗa Piyer, gege: «Simaŋw, ka njawaŋ geyey? Ka ava gədaŋ te metef kwa da hwaɗ ta manjah kusetke aabay war geyey? 38Manjah eve ndey, macə mbahw, afa akwar de teɗ pa gədaŋ te jə mafəca bay. Mesfeney sə, aŋga ava gədaŋ te meŋgə jə mambəla ana, amaa slaw ta vaw takwar sə, aŋga bəle.»
39Yesu ka ŋgəla vaw saya ka ta cə mbahw, ka gwaɗ ma hay ara macaaca ana. 40Ava dəɓa ana, ke veh kad vara ndah masasəraka jene tata mahkar sə, saya, e ŋgetefeceŋ sə, aca njawaŋ suwar, afa waŋ ke fənec fa gədaŋ, aca sən ma masa aca ra gwaɗa Yesu sabay.
41Mevehek tata dapa macə mbahw mamahkar ana sə, gege: «Manjaɓa waŋ, masasak vaw! Tewtew, pas ana ka husakata cay. Wut ta nda sə, aŋga mava pa ha ta ndah te mebərey. 42Mezleftek! Amcakwa! Nda me te veneyey pa ha ta ndana hay ke te kəɗey sə, aŋga katay e dekey.»
Metəhez te Yesu
(Mat 26.47-56; Luk 22.47-53; Zaŋ 18.3-12)
43Dapa masa Yesu e gweɗ heley sə, faŋga faŋga ana, Zudas, nda amta deveŋ ndah masasəraka jene kuraw dapa yaŋ ana ecew ke dek kad vara vaw. Zudas ana ece dek ava miya ta ndana hay gaa, ac ava kafaya va gada hay fa ha fa ha. Mezlərekec bay hay ta ndaakwas hay, ndah mesesərekecen ma majawa kad ndana hay va mesnendə hay te Zuwef hay. 44Masa Zudas, nda ma ta vana Yesu pa ha ta ndana hay ka husa vara Yesu bay heley sə, ke gweɗec miya macəpiya sə, gege: «Nda masa ya ta gwaɗafa ava mahumbat waw sə, ŋgesey aŋga ana. Matəhazaw, mahwadaw, mepefe ndey mambəla ana.» 45Mahusa ta Zudas zef vara Yesu sə, ka ŋgucafa vaw, ka gwaɗafa, gege: «Raabi!» Ka humbataw.
46Ndah medek ava Zudas sə, ac ka pafa ha, ac ka təhazaw. 47Amaa nda amta deveŋ ndah masasəraka jene faŋga, kwar! E seɗek kafaya tata, cəp! A kəɗ madərlam ta mazlakava ta ndaakwas hay, ka cərahan zləmay avəda. 48Yesu gege: «Akwa dek ke te təheziyey ava kafaya va gada hay fa ha fa ha ara ya makar mapərasla nda sə, mafay te mey? 49Cəɗem cəɗem ye deveŋ akwar dapa Way ta kwakwas ta masasərakakwar, akwar ka təheziyey aabay. Amaa afa ara ma hay masa ac mavinda dapa Ɗelewer mavəna te gweɗey sə, ac da ŋgata.»
50Ndah masasəraka jene tata fakwanay ac ka gərda, ec ke hweyeceŋ.
51Wat gawla ɓa ka cəp Yesu ana fa dar fa dar. Aŋga eve gwedurey fa vaw, ac ka təhazaw may. 52Amaa wat sə, kweretecen gwedurey ana, mahway meetersey.
Yesu aŋga fəma ta ndah maca mamənak te Zuwef hay
(Mat 26.57-68; Luk 22.54-55, 63-71; Zaŋ 18.13-14, 19-24)
53Ndah matəhaza Yesu sə, ac ka hwadaɗ a way ta bay ta ndaakwas hay. Mazlakava hay ta ndaakwas hay, mesnendə te Zuwef hay va ndah mesesərekecen ma majawa kad ndana hay ac ka cama yaŋ fakwanay. 54Piyer sə, ka cəp Yesu ana, aŋga dəreŋ. Ke sehw kad pa zaŋ ta way ta mazlakava ta ndaakwas hay ana may. Dapa faŋga sə, ac ka njah ava ndah maɓəla way ana, ac ka daz kwakwaw.
55Anjəkar mazlakava hay ta ndaakwas hay va Ndah maca mamənak te Zuwef hay fakwanay ac ka yah ma hay masa mambəla ana aabay da yaŋ Yesu ka ta təɗana ma yaŋ te mekəɗ ka macəhwandaw. Amaa ac ka ŋgataw aabay. 56Ndana hay gaa ec ke dekey ka ta ŋgəlafa Yesu, amaa maŋgal teceŋ ana hay wal wal. 57Mafay ana, ndah dərziya deveŋ eceŋ ec ke zleftek ava maŋgəlafa ma hay, gege: 58«Andaw ka cəna nda ana nesey, ke gweɗ, gege: “Ya ta mbəɗa Way ta macə mbahw te Zuwef hay masa ndana hay ta lamiya na avəda, ya da lamiya mekele da hwaɗ ta manah mahkar, masa ndana mekele a ta pafa ha ta malamiya aabay.”» 59Amaa, kwa ava maŋgal ma teceŋ ana nesey sə, ma teceŋ ana hay wal wal jaŋgata.
60Dapa ŋgesey ana, mazlakava ta ndaakwas hay sə, ke zlec fəma ta ndana hay fakwanay, ka nəkafa Yesu, gege: «Ke vehecen ma ana kad pa ma ta ndah megweɗ da yaŋ kaa na aabay war geyey?»
61Amaa Yesu ke vehecen ma ana aabay, ka njahata teete. Mazlakava ta ndaakwas hay sə, ka nəkafa Yesu ana saya, gege: «Kaa sə, ke Kəristi, Wut ta Zlav masa aŋga ava mapəsma sə, geyey?»
62Yesu ka vahan, gege: «Aŋga! Yey ana. Akwar fakwanay nesey akwar ta wala Wut ta nda manjaha da ha ta zam ta Zlav masa aŋga ava gədaŋ mazlakava, e dek dapa zlav ta yam da baymaləvaŋ.»
63Dapa faŋga sə, mazlakava ta ndaakwas hay sə, kəzar! A ŋgara rəkwat tata avəda, ke gweɗec ndah makwasa faŋga sə, gege: «Anda walakwa ndana mekele de dek tə yaw da yaŋ ana sə, ɓasabay! 64Təlam nesey andə ka cənakwaɗ dapa ma tata cay, ka paɗ yaŋ tata sə, ka Zlavay. Na təlam nesey sə, akwa wulakiya gwagumaw?» Ac fakwanay, ac ka gwaɗa, gege: «Aŋga mak te mekəɗ ka macəhwandaw.»
65Ndah dərziya deveŋ eceŋ ac ka cəɓafa slesleɓ Yesu, ac ka səratan ndey ava rəkwat, ec ke dev makəɗiya, ac ka nəkafa, gege: «Ŋguzdandanay, makəɗakaa nesey sə, wa?» Ava dəɓa ana, ac ka paɗ Yesu pa ha ta ndah maɓəliya aca ra cakana ha a dər zləmay.
Piyer a cə ma fa Yesu
(Mat 26.69-75; Luk 22.56-62; Zaŋ 18.15-18, 25-27)
66Piyer aŋga dapa zaŋ ta way da bəlam hel ɗagay, dem ɓa deveŋ dehw maŋga mezlər da way ta mazlakava ta ndaakwas hay, ke dekey, 67a ta wala Piyer a daz kwakwaw. A ndandazliya! A ndandazliya sə, a gwaɗa, gege: «Kaa sə, akwar ava Yesu, nda Nezeret ana na biba!»
68Amaa Piyer ka cafa ma, ka gwaɗa, gege: «Jə masa ka wal megweɗ da yaŋ ana nesey sə, ya səniya bay!»
Piyer ke zleftek, ke dey kad fəma ta way jaka a vəda. [Dapa ŋgesey ana, balaŋgwaz a ŋgal uway#14.68 Dapa ɗelewer leŋgeɗ hay sə, ma ana matulaka nesey sə, aabay. ] 69Dem dahəla sə, a ta wala Piyer sə, saya, ka gwaɗa ndah makwasa faŋga sə, gege: «Nda nesey sə, aŋga deveŋ ndah masasəraka jene ana!»
70Amaa Piyer ka cafa ma saya. Manjah kusetke, ndah faŋga sə, ac ka gwaɗa Piyer, gege: «Eve metehwe ana, ka deveŋ ndah masasəraka jene ana, afa ka nda Gelile ana.»
71Dapa ŋgesey ana, Piyer gege: «Ye mbeɗ eve metehwe ana, nda masa akwa gweɗ da yaŋ ana ŋgesey sə, ya səniya bay. Daha ya ŋgal ma sə, Zlav de vəresiyey ma a yaŋ!»
72Faŋga faŋga ana, balaŋgwaz ka ŋgal uway ke ecew ana. Dapa ŋgesey ana, Piyer ka wulak ma masa Yesu ta gwaɗa zleezle, «Wagaa balaŋgwaz a ta ŋgal uway ke ecew sə, ke ke cefiyey ma ka mahkar.» Ka data kad a vəda, ka kuɗa ava mazal marava.
Currently Selected:
Markwas 14: CUVnt
Highlight
Share
Copy
Want to have your highlights saved across all your devices? Sign up or sign in
© 2022 CABTAL
Markwas 14
14
Mesnendə te Zuwef hay aca cə mamənak ta makəɗ Yesu
(Mat 26.1-5; Luk 22.1-2; Zaŋ 11.45-53)
1Magəra manah ecew kad fa macunam ta Pak te Zuwef hay va macunam te peŋ masa is dapa aabay. Bay hay ta ndaakwas hay va ndah mesesərekecen ma majawa kad ndana hay ac ka yah cəv ta matəhaz Yesu ava makar, aca ra kəɗa avəda cukw cukw. 2Aca yah cəvey ana ava makar sə, afa ndah mazlakava ana hay ec ke gweɗ, gege: «Andaw ta təhazakwa dapa macunam na bay, afa ndana hay ac ta yahafandakwa ma.»
Macəhafa mal te meŋgeŋgəzey fa Yesu
(Mat 26.6-13; Zaŋ 12.1-8)
3Yesu aŋga da Betani, da way ta Simaŋw nda masa aŋga ta mbəliya dapa meskwelme. Dapa masa aca ndə ɗaf sə, ŋgwaz ɓa ka ŋgatafa kad way ana, ava kwalaba te kekeŋ mahwahurkwa ana mezel «Albaatəra.» Kwalaba ana manəha ava mal te meŋgeŋgəzey, masa e husem bay mezel «Nar.» Ŋgwaz ana, ka wuna ma ta kwalaba ana, ka cəhan mal sə, fə yaŋ te Yesu. 4Ndah mazala hay dərziya faŋga ec ke wesl da yaŋ jə masa ŋgwaz ana ta ŋgiya sə, aabay. Mafay ana, ec ke gweɗ dapa taɓa tec, gege: «A nas mal ana taambəla ara nesey sə, mafay te mey? 5Efes na ka husamda sə, a ŋgat səlay temere mahkar#Mar 6.37. fətiya. Ava dəɓa ana, e vənecen səlay ana kad maslamarga hay sə, mambəla ana da yaŋ masa aŋga ta nasiya kad fə yaŋ ta ndana aabay geyey?» Ara nesey, ac ka zam rav fa ŋgwaz ana.
6Amaa Yesu gege: «Magərda! Akwa ŋgada hahar mafay te mey? Jə masa aŋga ta ŋgiya kad yey nesey sə, jə mambəla ana. 7Maslamarga hay sə, cəɗem cəɗem akwar eve eceŋ fa slam ana. Kwa pas wula wula masa akwar wal ma te jəneceŋ sə, akwa jəneceŋ. Amaa yey sə, akwar ta ŋgat manjah ava yey cəɗem cəɗem ɓasabay. 8Ŋgwaz nesey sə, ka ŋgə jene mambəla ana masa a zlafa maŋgiya kad yey. Kwa ya ka məc aabay heley sə, ke təkweɗefiyey mal mambəla ana fa vaw aɗaw ka ta ləmediyey kad pa jəvay. 9Ya gwaɗakwar, kwa a fəla fəla dapa vavara fakwanay, ndah ma ta bəzad Labara mambəla ana ta Zlavay, ac te bəzedecen jə masa ŋgwaz nesey ta ŋgiya, afa ndana hay aca ra sənafa ŋgwaz ana.»
Zudas a və Yesu kad pa ha ta maslagəra tata hay
(Mat 26.14-16; Luk 22.3-6)
10Zudas Iskariyawt, nda amta deveŋ ndah masasəraka jene kuraw dapa yaŋ ana ecew, ke dey kad vara bay hay ta ndaakwas hay. Ke gweɗeceŋ, a wal me te vecen Yesu pa ha teceŋ. 11Masa aca cəna ma ana ara nesey sə, ec ke wesl mabay. Mafay ana, ac ka gwaɗa, daha ke te vecen Yesu ana sə, ac ta vana səlay. Ara nesey, Zudas Iskariyawt ka yah wewer hay mekele mekele te mevecen Yesu.
Ɗaf ta macunam ta Pak
(Mat 26.17-25; Luk 22.7-14, 21-23; Zaŋ 13.21-30)
12Pas macaaca ana ta macunam te peŋ masa is dapa aabay sə, pəsaŋga ana ŋgesey, Zuwef hay aca zlah wut ta təmak hay ta macunam ta Pak. Ndah masasəraka jene kuraw dapa yaŋ ana ecew, ac ka nəkafa Yesu ana, gege: «Ka wal anda ra ta ləmadandakwa slam ta mandə ɗaf ta macunam ta Pak sə, dama?»
13Dapa ŋgesey ana, Yesu ka zal ndah masasəraka jene tata ecew, ke zlerdeceŋ, gege: «Madaɗay pe berne te Zeruzelem. Dapa faŋga sə, akwar ta cə yaŋ ava ndana ɓa, e dey ava yam dapa yes fə yaŋ, macəpaw. 14Way masa e te sehw kad pa sə, manəkafa bay ta way ana, magwaɗa, Bay taciya e gweɗ, gege: “Slam masa maləmada kad andaw ava ndah masasəraka jene taaɗaw ka ta ndə ɗaf ta macunam ta Pak sə, fəla?” 15Ava dəɓa ana, bay ta way ana a ta ŋguzdakwaɗ slam ɓa da yaŋ way da wudam. Way ana maləmada mambəla ana ava jə ta macunam hay fakwanay dapa. Akwar da ləmadandakwaɗ jə ta mandə ta macunam ana dapa faŋga.»
16Ndah masasəraka jene sə, ec ke dey, ac ka husa pe berne. Dərŋga sə, ac ka ŋgat jene hay fakwanay ara masa Yesu te gweɗeceŋ. Ac ka ləmada jə ta mandə hay ta macunam ta Pak ana.
Nda ma ta husamda Yesu
(Mat 26.20-25; Luk 22.14; Zaŋ 13.21-30)
17Ta fakwaɗ ana ŋgesey, Yesu va ndah masasəraka jene tata ac ka husa pə way ta mandə ɗaf ta macunam ana. 18Dapa masa ac manjaha aca ndə ɗaf sə, Yesu gege: «Ya gwaɗakwar eve metehwe ana, nda amta deveŋ akwar mandana ɗaf eve yey fa slam ana təlam nesey a ta vana yey avəda pa ha ta ndana hay, ke te kəɗiyey ka macəhwandaw.» 19Ma ana nesey sə, ke məcecen vaw ta ndah masasəraka jene tata avəda kusaf! Mafay ana, kwa waawa ka nəkafa Yesu, gege: «Ma ta vanakaa pa ha ta maslagəra takaa hay ana sə, yey geyey?»
20Yesu ke vehecen, gege: «Nda amta deveŋ akwar kuraw dapa yaŋ ana ecew, nda masa anda ndə ɗaf ava aŋga fa slam ana dapa perentey amta nesey. 21Eve metehwe ana, cama Wut ta Nda sə, a ta məcata ara mavinda dapa ma ta Zlavay te gweɗey. Amaa wabaw kad nda ma ta viya pa ha ta ndah ma ta kəɗiya. Kad aŋga sə, zuwan aŋga te heyek bay.»
Ɗaf Mavəna metekweɗ ana
(Mat 26.26-30; Luk 22.14-20; 1Kw 11.23-25)
22Dapa masa aca ndə ɗaf sə, Yesu ka kəs peŋ ana, ka ŋgana wasay Zlavay. Ava dəɓa ta maŋgana wasay Zlavay, ka waca peŋ ana. Ke vecen kad ndah masasəraka jene tata, gege: «Maha makəsaw, nesey sə, slaw ta vaw aɗaw.» 23Ava dəɓa ana, ka kəs kwap, ka ŋgana wasay Zlavay, ke vecen ndah masasəraka jene tata. Ac fakwanay ac ka saw.
24Yesu gege: «Nesey ana sə, bembez aɗaw, bembez ta majaw ma. Zlav a jaw ma ava ndana hay mabay sə, jaka pe bembez ana nesey. 25Ya gwaɗakwar, ya ta sə yam te rezeŋ nesey ava akwar ɓasabay, kasl pa pas masa ya ta siya saya dapa Wunam ta bay ta Zlavay.»
Maslaf macə ma te Piyer
(Mat 26.30-35; Luk 22.33-34; Zaŋ 13.37-38)
26Ac ka slə law ta mahahəm Zlavay dapa Jaabura, ec ke dey kad fa ŋguɗa ta Awliviyey hay.
27Yesu gege: Pas masa ac te təheziyey ka ta kəɗey sə, akwar fakwanay, akwar te gərdeyey. Ara masa mavinda dapa Ɗelewer mavəna, gege:
«“Ya ta kəɗa gwala jene avəda,
Təmak tata hay ac ta vəna yaŋ amta amta.”
28Amaa daha ya ka ta pərakata dapa maməcay ana cay sə,
ya ta ŋgəlakwaɗ ma kad pa vavara te Gelile,
akwar te weleyey dərŋga.»
29Piyer ka gwaɗa, gege: «Kwa daha ndah dərziya ac ta gərdaka sə, taaɗaw ya ta gərdaka aabay.»
30Dapa ŋgesey ana, Yesu ka vahan, gege: «Cak zləmay! Ya gwaɗakaa eve metehwe ana, ta pəsna ta vaɗ nesey, wagaa balaŋgwaz a ta ŋgal uway ke ecew sə, ka ke cefiyey ma cay dəɓa mahkar.»
31Amaa Piyer ka təkafa ha ma tata ana, ka gwaɗa ava gədaŋ, gege: «Away! Kwa ac ta kəɗandaw cuweeney, ya ta cafakaa ma aabay.» Ndah masasəraka jene dərziya, ec ke gweɗ ara aŋga ana may.
Yesu a cə mbahw de Gecemeney
(Mat 26.36-46; Luk 22.39-46)
32Yesu va ndah masasəraka jene tata aca husa pa slam ɓa mezel Gecemeney. Ke gweɗec ndah masasəraka jene tata, gege: «Manjahay fana dapa masa ye dey pe mecek mbahw fatay.»
33Ec ke dey ava Piyer, Zak va Zaŋ. Dapa ŋgesey ana, rav ka bəzlawana, zidaw ka kəɗa. 34Ke gweɗec ndah masasəraka jene tata mahkar sə, gege: «Mawulak yaŋ ta rav aɗaw e fəniyey fa gədaŋ, a wal mekəɗiyey avəda. Akwar sə, manjah fana, akwar ta njawaŋ bay.» 35Ka ŋguca vaw kusetke kad fəma, ke kekəred kad fa vara, ka cə mbahw kad Zlavay. Dapa macə mbahw tata ana, ka nəkafa Zlavay daha e ŋgey sə, a lada pas ana da ŋgəla vaw dəreŋ ava aŋga. 36Ke gweɗ, gege: «Awa Papa, Papaŋ taaɗaw da baymaləvaŋ, jene masa ka zlafa bay sə, aabay. Ŋgucawa kwap ana na avəda dəreŋ eve yey. Ava aŋga ana fakwanay sə, ŋgaw ara masa ka ta waya bəna, ara masa ya ta waya bay.» 37Ke veh kad vara ndah masasəraka jene tata mahkar, e te ŋgetefec sə, aca njawaŋ. Ka gwaɗa Piyer, gege: «Simaŋw, ka njawaŋ geyey? Ka ava gədaŋ te metef kwa da hwaɗ ta manjah kusetke aabay war geyey? 38Manjah eve ndey, macə mbahw, afa akwar de teɗ pa gədaŋ te jə mafəca bay. Mesfeney sə, aŋga ava gədaŋ te meŋgə jə mambəla ana, amaa slaw ta vaw takwar sə, aŋga bəle.»
39Yesu ka ŋgəla vaw saya ka ta cə mbahw, ka gwaɗ ma hay ara macaaca ana. 40Ava dəɓa ana, ke veh kad vara ndah masasəraka jene tata mahkar sə, saya, e ŋgetefeceŋ sə, aca njawaŋ suwar, afa waŋ ke fənec fa gədaŋ, aca sən ma masa aca ra gwaɗa Yesu sabay.
41Mevehek tata dapa macə mbahw mamahkar ana sə, gege: «Manjaɓa waŋ, masasak vaw! Tewtew, pas ana ka husakata cay. Wut ta nda sə, aŋga mava pa ha ta ndah te mebərey. 42Mezleftek! Amcakwa! Nda me te veneyey pa ha ta ndana hay ke te kəɗey sə, aŋga katay e dekey.»
Metəhez te Yesu
(Mat 26.47-56; Luk 22.47-53; Zaŋ 18.3-12)
43Dapa masa Yesu e gweɗ heley sə, faŋga faŋga ana, Zudas, nda amta deveŋ ndah masasəraka jene kuraw dapa yaŋ ana ecew ke dek kad vara vaw. Zudas ana ece dek ava miya ta ndana hay gaa, ac ava kafaya va gada hay fa ha fa ha. Mezlərekec bay hay ta ndaakwas hay, ndah mesesərekecen ma majawa kad ndana hay va mesnendə hay te Zuwef hay. 44Masa Zudas, nda ma ta vana Yesu pa ha ta ndana hay ka husa vara Yesu bay heley sə, ke gweɗec miya macəpiya sə, gege: «Nda masa ya ta gwaɗafa ava mahumbat waw sə, ŋgesey aŋga ana. Matəhazaw, mahwadaw, mepefe ndey mambəla ana.» 45Mahusa ta Zudas zef vara Yesu sə, ka ŋgucafa vaw, ka gwaɗafa, gege: «Raabi!» Ka humbataw.
46Ndah medek ava Zudas sə, ac ka pafa ha, ac ka təhazaw. 47Amaa nda amta deveŋ ndah masasəraka jene faŋga, kwar! E seɗek kafaya tata, cəp! A kəɗ madərlam ta mazlakava ta ndaakwas hay, ka cərahan zləmay avəda. 48Yesu gege: «Akwa dek ke te təheziyey ava kafaya va gada hay fa ha fa ha ara ya makar mapərasla nda sə, mafay te mey? 49Cəɗem cəɗem ye deveŋ akwar dapa Way ta kwakwas ta masasərakakwar, akwar ka təheziyey aabay. Amaa afa ara ma hay masa ac mavinda dapa Ɗelewer mavəna te gweɗey sə, ac da ŋgata.»
50Ndah masasəraka jene tata fakwanay ac ka gərda, ec ke hweyeceŋ.
51Wat gawla ɓa ka cəp Yesu ana fa dar fa dar. Aŋga eve gwedurey fa vaw, ac ka təhazaw may. 52Amaa wat sə, kweretecen gwedurey ana, mahway meetersey.
Yesu aŋga fəma ta ndah maca mamənak te Zuwef hay
(Mat 26.57-68; Luk 22.54-55, 63-71; Zaŋ 18.13-14, 19-24)
53Ndah matəhaza Yesu sə, ac ka hwadaɗ a way ta bay ta ndaakwas hay. Mazlakava hay ta ndaakwas hay, mesnendə te Zuwef hay va ndah mesesərekecen ma majawa kad ndana hay ac ka cama yaŋ fakwanay. 54Piyer sə, ka cəp Yesu ana, aŋga dəreŋ. Ke sehw kad pa zaŋ ta way ta mazlakava ta ndaakwas hay ana may. Dapa faŋga sə, ac ka njah ava ndah maɓəla way ana, ac ka daz kwakwaw.
55Anjəkar mazlakava hay ta ndaakwas hay va Ndah maca mamənak te Zuwef hay fakwanay ac ka yah ma hay masa mambəla ana aabay da yaŋ Yesu ka ta təɗana ma yaŋ te mekəɗ ka macəhwandaw. Amaa ac ka ŋgataw aabay. 56Ndana hay gaa ec ke dekey ka ta ŋgəlafa Yesu, amaa maŋgal teceŋ ana hay wal wal. 57Mafay ana, ndah dərziya deveŋ eceŋ ec ke zleftek ava maŋgəlafa ma hay, gege: 58«Andaw ka cəna nda ana nesey, ke gweɗ, gege: “Ya ta mbəɗa Way ta macə mbahw te Zuwef hay masa ndana hay ta lamiya na avəda, ya da lamiya mekele da hwaɗ ta manah mahkar, masa ndana mekele a ta pafa ha ta malamiya aabay.”» 59Amaa, kwa ava maŋgal ma teceŋ ana nesey sə, ma teceŋ ana hay wal wal jaŋgata.
60Dapa ŋgesey ana, mazlakava ta ndaakwas hay sə, ke zlec fəma ta ndana hay fakwanay, ka nəkafa Yesu, gege: «Ke vehecen ma ana kad pa ma ta ndah megweɗ da yaŋ kaa na aabay war geyey?»
61Amaa Yesu ke vehecen ma ana aabay, ka njahata teete. Mazlakava ta ndaakwas hay sə, ka nəkafa Yesu ana saya, gege: «Kaa sə, ke Kəristi, Wut ta Zlav masa aŋga ava mapəsma sə, geyey?»
62Yesu ka vahan, gege: «Aŋga! Yey ana. Akwar fakwanay nesey akwar ta wala Wut ta nda manjaha da ha ta zam ta Zlav masa aŋga ava gədaŋ mazlakava, e dek dapa zlav ta yam da baymaləvaŋ.»
63Dapa faŋga sə, mazlakava ta ndaakwas hay sə, kəzar! A ŋgara rəkwat tata avəda, ke gweɗec ndah makwasa faŋga sə, gege: «Anda walakwa ndana mekele de dek tə yaw da yaŋ ana sə, ɓasabay! 64Təlam nesey andə ka cənakwaɗ dapa ma tata cay, ka paɗ yaŋ tata sə, ka Zlavay. Na təlam nesey sə, akwa wulakiya gwagumaw?» Ac fakwanay, ac ka gwaɗa, gege: «Aŋga mak te mekəɗ ka macəhwandaw.»
65Ndah dərziya deveŋ eceŋ ac ka cəɓafa slesleɓ Yesu, ac ka səratan ndey ava rəkwat, ec ke dev makəɗiya, ac ka nəkafa, gege: «Ŋguzdandanay, makəɗakaa nesey sə, wa?» Ava dəɓa ana, ac ka paɗ Yesu pa ha ta ndah maɓəliya aca ra cakana ha a dər zləmay.
Piyer a cə ma fa Yesu
(Mat 26.69-75; Luk 22.56-62; Zaŋ 18.15-18, 25-27)
66Piyer aŋga dapa zaŋ ta way da bəlam hel ɗagay, dem ɓa deveŋ dehw maŋga mezlər da way ta mazlakava ta ndaakwas hay, ke dekey, 67a ta wala Piyer a daz kwakwaw. A ndandazliya! A ndandazliya sə, a gwaɗa, gege: «Kaa sə, akwar ava Yesu, nda Nezeret ana na biba!»
68Amaa Piyer ka cafa ma, ka gwaɗa, gege: «Jə masa ka wal megweɗ da yaŋ ana nesey sə, ya səniya bay!»
Piyer ke zleftek, ke dey kad fəma ta way jaka a vəda. [Dapa ŋgesey ana, balaŋgwaz a ŋgal uway#14.68 Dapa ɗelewer leŋgeɗ hay sə, ma ana matulaka nesey sə, aabay. ] 69Dem dahəla sə, a ta wala Piyer sə, saya, ka gwaɗa ndah makwasa faŋga sə, gege: «Nda nesey sə, aŋga deveŋ ndah masasəraka jene ana!»
70Amaa Piyer ka cafa ma saya. Manjah kusetke, ndah faŋga sə, ac ka gwaɗa Piyer, gege: «Eve metehwe ana, ka deveŋ ndah masasəraka jene ana, afa ka nda Gelile ana.»
71Dapa ŋgesey ana, Piyer gege: «Ye mbeɗ eve metehwe ana, nda masa akwa gweɗ da yaŋ ana ŋgesey sə, ya səniya bay. Daha ya ŋgal ma sə, Zlav de vəresiyey ma a yaŋ!»
72Faŋga faŋga ana, balaŋgwaz ka ŋgal uway ke ecew ana. Dapa ŋgesey ana, Piyer ka wulak ma masa Yesu ta gwaɗa zleezle, «Wagaa balaŋgwaz a ta ŋgal uway ke ecew sə, ke ke cefiyey ma ka mahkar.» Ka data kad a vəda, ka kuɗa ava mazal marava.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 CABTAL