Markwas 8
8
Yesu e ndec ɗaf kad ndah bakatar faɗ
(Mat 15.32-39)
1Dapa pas ana hay ŋgesey, ndana hay gaa ec ke dey kad vara vaw saya, ac ka ɓəcafa vaw. Jene hay ta manday de vereceŋ ɓasabay. Yesu ke zelec ndah masasəraka jene tata gege: 2«Metekwen a ŋgiyey fa ndah maɓəca nesey, afa aŋga na manah mahkar ec vereyey fana, təlam nesey jə ta manday de vereceŋ ɓasabay. 3Daha ye gərdeceŋ, aca ra daɓa kad a wunam ava may ara nesey sə, ac ta ŋgat gədaŋ dapa cəv aabay, afa ndana hay gaa deveŋ eceŋ ece dek dəreŋ.»
4Ndah masasəraka jene tata ac ka nəkafa, gege: «Me te ŋgetek jə ta manday kad ndah ana fakwan dapa səɓak fana masa aca ra mbəney sə, dama?»
5Yesu ke nəkefec, gege: «Da varakwar fana sə, peŋ ecuwey?»
Ac ka vahan, gege: «Da varandaw fana sə, peŋ tasəla.»
6Yesu ke gweɗec ndah maɓəca faŋga sə, aca ra njah maanjahay fa vara. Ava dəɓa ana, ka kəs peŋ tasəla sə, ka ŋgana wasay Zlavay. Ka waca peŋ ana, ke vecen ndah masasəraka jene tata, ece re vənecen kad ndana hay faŋga fakwanay. Ndah masasəraka jene sə, ec ke vəneceney. 7De vereceŋ faŋga ana sə, kəlef hay kweskweske ecew ɓa. Yesu ka ŋgana wasay Zlavay mafay te kəlef ana, ke gweɗec ndah masasəraka jene tata ece re vəneceney saya. 8Kwa waawa ka ŋgat jə ta manday, ka ndaw mban. Ndah masasəraka jene ac ke ɓəcek mezek te peŋ ana hay waŋ hay manəha tasəla. 9Ndah mandana peŋ ana faŋga sə, ece ŋgə bakatar faɗ. Ava dəɓa ana, Yesu ke gweɗec ndah ana, aca ra daɓa kad a wunam. 10Faŋga faŋga ana, Yesu va ndah masasəraka jene tata ec ke tepey pa kaslkaslah, ec ke dey kad pa vavara ta Dalmanuta.
Farisa hay aca nək cah hay da vara Yesu
(Mat 16.1-4)
11Ava dəɓa ana, Farisa hay ec ke dey vara Yesu, ac ka tə yaw ava aŋga ka ta cakiya. Ac ka nəkafa de ŋgə cah hay masa e de ŋguzdek aŋga sə, e dek da vara Zlavay. 12Yesu ke jerey, ke gweɗ, gege: «Ndah ta pəsna nesey sə, ece nəkefiyey cah hay masa e de ŋguzdek Zlav te zlərekiyey sə, mafay te mey? Ya gwaɗakwar, kwa cah amta masa ya ta ŋgiya kad ndana hay ta pəsna sə, aabay.» 13Yesu ke gərdec Farisa ana hay faŋga, ka data pa kaslkaslah te mezleŋ kad ma te təker mazlakava te Gelile jaka luwa leŋgeɗey.
Ma maɗəva da yaŋ mesesərek ta Farisa hay
(Mat 16.5-12)
14Ndah masasəraka jene ac ka sənafa makəs peŋ daha bay, ac ava aŋga pal amta dapa kaslkaslah ana war. 15Yesu ke kəteceŋ, gege: «Mep leŋgesl fe is#8.15 is Jə masa andaw haɗakwa kəfa ta makala ava aŋga. Is e ŋguzdek mesesərek ta Farisa hay. Ndah masa aca ɗəva nda ava ma elehey. ta Farisa hay va is ta Herawt.»
16Ndah masasəraka jene tata sə, ac ka tə yaw dapa taɓa teceŋ, ac ka wulakaw, gege: «E gweɗ ara nesey sə, afa andakwa eve peŋ aabay sə, geyey gwagumaw?»
17Yesu ka səna mawulak yaŋ tec sə, avəda. Mafay ana, ke nəkefec, gege: «Akwa wulakiya ara nesey, afa masa akwar eve peŋ aabay sə, mafay te mey? Akwar ka cəna aabay geyey? Akwar ka səna ma da yaŋ ana aabay suwar geyey? Hay! Yaŋ takwar masasala elehey. 18Akwar eve ndey ɓa, amaa akwa wala ndey bay geyey? Akwar ava zləmay ɓa, amaa akwa cəna zləmay bay geyey? Akwa sənafa sabay geyey? 19Masa ye vənec peŋ zlam kad ndah bakatar zlam sə, akwar ke ɓəcek mepepəsey ana hay waŋ manəha ecuwey?»
Ac ka vahan, gege: «Andaw ke ɓəcek waŋ hay manəha kuraw dapa yaŋ ana ecew.»
20Yesu ke gweɗec saya, gege: «Masa ye vənec peŋ tasəla kad ndah bakatar faɗ sə, akwar ke ɓəcek mepepəsey ana hay waŋ manəha ecuwey?»
Ac ka vahan, gege: «Waŋ hay tasəla.»
21Ke gweɗec saya, gege: «Naa akwar ka cəna aabay suwar sə, geyey?»
Yesu a wunan ndey ta nda mahazlaw
22Mahusa te Yesu va ndah masasəraka jene tata a Baytisayda, ndah dərziya faŋga ac ka hwadana nda mahazlaw ana ɓa. Ac ka ŋgana mbahw Yesu a da pafa ha. 23Dapa ŋgesey ana, Yesu ka təhaz nda mahazlaw ana, ava ha ec ke dey ava aŋga ana dəreŋ dapa wunam ana kad a vəda. Yesu ka ŋgə slesleɓ fa ha, ka kwalɓafa fe ndey ta nda mahazlaw ana, ka nəkafa, gege: «Ka wala ndey la geyey?»
24Nda mahazlaw sə, baŋgaɗana ndey, a gwaɗa, gege: «Ya wala ndana hay ara wudez, amaa ece dey.»
25Yesu ka pafa ha fe ndey ana saya. Nda mahazlaw sə, ndey tata pəlac a wunata, a wala ndey mambəla ana cay. 26Yesu ka gwaɗa a da daɓa kad a wunam ava magwaɗa, gege: «Daɗ derre kad a wunam ɗagay bəna, ka te veh kad Baytisayda bay.»
Piyer e ŋguzdek Yesu sə, aŋga Kəristi
(Mat 16.13-20; Luk 9.18-21)
27Ava dəɓa ana, Yesu va ndah masasəraka jene tata ec ke dey kad pa wunam hay ɓa zef eve berne ta Sezarey te Fəlep. Ke nəkefec dapa cəv, gege: «Ndana hay ece piyey sə, ka wa?»
28Ndah masasəraka jene tata ac ka vahan, gege: «Leŋgeɗ hay ece gweɗ, gege: “Ka Zaŋ Baatis”, mekele hay, gege: “Kaa sə, ka Eli”. Dərziya hay saya, gege: “Kaa sə, ka nda amta deveŋ ndah mehwedek ma ta Zlav zleezle.”»
29Yesu ke nəkefec saya, gege: «Akwar may, akwa gwaɗa yey sə, ya wa?»
Piyer ka vahan, gege: «Kaa sə, ka Kəristi.»
30Yesu ke kətec ndah masasəraka jene tata, gege: «Akwar ta ŋguzdan ma ana nesey kad ndana mekele bay.»
Yesu e gweɗey da yaŋ maməcay va mepərek tata dapa maməcay
(Mat 16.21-28; Luk 9.22-27)
31Ava dəɓa ana, Yesu ke sesərekec ndah masasəraka jene tata, gege: «Cama Wut ta nda a ta sə marga gaa ɗagay. Mesnendə te Zuwef hay, bay hay ta ndaakwas hay va ndah mesesərekecen ma majawa kad ndana hay, ac ta kəsiya ara Zlav te zlərek aabay, ac ta kəɗa avəda cukw cukw. Amaa dapa manah mamahkar ana sə, a ta pərakata dapa maməcay.»
32E gweɗecen ma ana nesey sə, mapana mambəla ana, bəna ka raɓda kwa kusetke aabay. Mafay ana, Piyer ka zala aŋga amta tata ava zlalav, ka payafa. 33Amaa Yesu pəla! E ŋgwedefec ma ndah masasəraka jene tata dərziya, e ndendezleceŋ. Ka payafa Piyer, a gwaɗa, gege: «Kaa, Saadan, ŋgəliyey vaw dəreŋ da cak taaɗaw, afa mawulak yaŋ ana nesey sə, e dek dapa mawulak yaŋ takaa bəna, da vara Zlav bay.»
34Yesu ke zelec miya fakwanay va ndah masasəraka jene tata gege: «Daha nda masa a wal mecəpiyey sə, a ta wulak yaŋ fə yaŋ tata bay, da ɓəs marga hay masa a ta ŋgatafa cəɗem cəɗem mafay taaɗaw, de dek cəpiyey ava rav pal amta. 35Masəna, kwa waawa masa a wal membəl mesfen tata sə, ŋgesey a ta zana avəda. Amaa kwa waawa masa a zə mesfen tata mafay ta masa aŋga te cəpiyey va mafay ta mabəzad Labara mambəla ana kad ndana hay sə, ŋgesey, ka mbəla mesfen tata ana avəda cay. 36Daha ndana ka ŋgat jene hay fakwanay masa aŋga ta waya dapa vavara nesey, amaa ka zana mesfen tata avəda sə, jeŋ ana hay ac ta jəniya eve mey? 37Jene mekele masa ndana a zlafa meyembeɗek mesfen tata avəda ava aŋga sə, ɓa geyey? 38Daha nda masa a ŋgə hwaray fe yey, daha aabay a ŋgə hwaray ta makəs ma aɗaw fəma ta ndah maŋga mebər hay pəsna, ndah magərda Zlavay sə, ara nesey, Wut ta nda may, a ta ŋgafa hwaray pas masa e te vehek ava maskəla hay ta Papaŋ dapa mehehəm mazlakava.»
Currently Selected:
Markwas 8: CUVnt
Highlight
Share
Copy
Want to have your highlights saved across all your devices? Sign up or sign in
© 2022 CABTAL
