Zâŋ 8

Zezú rá̧ wûny niŋ dala

1Dáy Zezú he sé tûl kɔ̂l a dii Oliviyéri. 2Típélé a féké rím, Zezú regí vûn a Gáŋvbôn, dáy njukuri mára̧ gí gé lé. Ké kaw tísiri, a tí tɔ́ʼɔhɛ̧ hí̧ kuriri. 3Gáŋnjuku tɔ́ʼɔ sáŋnari̧ rá̧ Fariziyɛ̧́ri̧, ɗa wûny há̧na a kú ŋgbá nɛ́ a gel niŋ dala gí gé lé. Kú ɓá nɛ́ ew mbɛl a njukuri too, 4a vbí Zezú ɓá: «Gáŋnjuku, wûny nɛ́, rú ŋgbá nɛ́ a gel niŋ dala. 5Sáŋna a Mɔyíze sa ɓá, mára̧ wûnynjukuri nǎŋ, kú vbú kuriri ka saw a í kuriri. Dáy a mɔ̌, mɔ́ sa ɓá hí̧ lé?»

6Kú sa nǎŋnɔ́ ɓay kú ma lélawɛ́, a ŋgbá nɛ́ ka ɓay. Dáy Zezú ɗíŋ tûlé, a kaw ɗé hɛ̧ ka gun ndɔ̂ʼɛ ka tísiri. 7Nǎŋnɔ́, a kú pɔŋ vbí nɛ́ ɓay yáy, Zezú gbaŋ tûlé a sa hí̧ kuriri ɓá: «Njuku a bazeŋ a wǎyri ka zi niŋ ɓéké bɔʼɔ mbêw yáy, ké mbí saw ka tí vbú nɛ́ ɗambɛl.» 8Dáy a reɗíŋ tûlé, a rekaw ɗé hɛ̧ ka tísiri. 9Gelka njuku nɔ́rí̧ láɓay nɔ́y, kú kála mbêw mbêw too, tí ka tûl a gáŋnjukuri sé ka̧ tûl gun a léléri. A pɔŋ ɓá wûny rá̧y hɛʼɛ kuu Zezú. 10Dáy Zezú gbaŋ tûlé a vbí nɛ́ ɓá: «Kú e a sí̧ lé? Njuku a há̧na ka walɓay ŋgbá mɔ́ zi tí yá lé?» 11Wûny rá̧y sa: «Gáŋnjuku, njuku a há̧na zi tí yá.» Zezú resa hí̧ nɛ́ ɓá: «Mǐ kɔ́, mi tí walɓay ŋgbá mɔ́ nyá. Mɔ́ sé, a mɔ́ zi ná niŋ ɓéké ɓáy.»]

Zezú ɓá geltáŋa a tísiri

12Zezú mbí ɓay a sa hí̧ Fariziyɛ̧́ri̧ ɓá: «Mi kaw ɓá geltáŋa a tísiri. Njuku ka tɔ́ŋ mí, tí séséna a ɓil tirí̧ma mbaa, dáy ké e ziŋ geltáŋa a ndísɛ̌ʼɛ.» 13A goló Fariziyɛ̧́ri̧ sa hí̧ nɛ́ ɓá: «Mɔ́ saɓay a mɔ̌ ka tûló, dáy ɓay a mɔ̌ké zi tí ka nɛ́rɛ̧ nyá.» 14Zezú sa hí̧ kuriri ɓá: «Mǐ, mí saɓay a mǐ ka mûn ní kɔ́y, ɓay a mǐ erú ka nɛ́rɛ̧, ɓayhí̧lé mi tu gel ka mi gírúy, a tu gel ka mi kaw serúy. Dáy a wǎyri, i zi tu gel gína a mǐ, rá̧ gel ka mi kaw serú yá. 15Walɓay a wǎyri gí ka ŋgboro a kɛrɛ a njukuri, mǐ, mi zi walɓay ka̧n tûl a njuku a há̧na nyá. 16Dáy, mí walɓay lé, walɓay a mí erú ka nɛ́rɛ̧, ɓayhí̧lé mi zi kaw hɛʼɛ ní nyá, Bâa a mǐ ka pé mí, e kuu mǐ. 17Kú ɗé ka̧n ɓil mbété sáŋna a wǎyri ɓá: Njukuri sére, mí gí saɓay a hɛ̧ a kú kó ka láy, ɓayké erú ka nɛ́rɛ̧. 18Mǐ, mi saɓay a mǐ ka mûn ní, rá̧ Bâa a mǐ ka pé mí gíy, saɓay a mǐ kɔ́.» 19Dáy kú vbí nɛ́ ɓá: «Bâa a mɔ̌ e a sí̧ lé?» Zezú sa: «I zi tu mí nyá, a zi tu Bâa a mǐ nyá, Wǎyri mí tu mí, i e tu Bâa a mǐ kɔ́.»

20Zezú saɓay nɔ́rí̧ a ké kaw tɔ́ʼɔhɛ̧ a ɓil vûn a Gáŋvbôn, a gel a kú kaw ɓá lari hɛ̧ hí̧na ka̧nrú̧. Njuku a há̧na zi ŋgbá nɛ́ nyá, ɓayhí̧lé nâm a mɛ̌ pa̧n ka̧ nyá ɓáy.

I zi ma sé gel ka mi e serú yá

21Dáy Zezú sa: «Mi e kála, i e ɛ́ mí dáy, i e hú a ɓil ɓéké a wǎyri. I zi ma sé gel ka mi e serú yá.» 22Ka tûl ɓayké nɔ́, mbây a Juyífri sa a bazeŋ a kuriri ɓá: «Ké e í mûn nɛ́ ka mûn nɛ́ malé, a̧hí̧ rá̧ ké sa ɓá: “I zi ma sé gel ka mi e serú yáy lé?”» 23Zezú sa hí̧ kuriri ɓá: «I kaw ɓá njuku a taa, dáy mǐ, mi kaw ɓá njuku a sâa. I kaw ɓá njuku a tísiri, dáy mǐ, mi zi tí ɓá njuku a tísiri nɛ́ nyá. 24Ɓaykénɔ́ pé mi sa hí̧ wǎyri ɓá, i e hú a ɓil ɓéké a wǎyri. Ɓayhí̧lé wǎyri mí zi láɓulaw sé tûl káwa a mǐ nyáy, i hú a ɓil ɓéké a wǎyri.» 25Dáy kú sa: «Mɔ̌, mɔ́ ɓá gé lé?» Zezú sa hí̧ kuriri ɓá: «Njuku ka mi tí sa hí̧ wǎyri a títáʼaké. 26Mi erú ka ɓay sána ɓá ŋgɛ̧́náké rá̧ walɓay ɓá ŋgɛ̧́náké sé tûl a wǎyri. Dáy njuku ka pé mí gíy, ɓá gbát njuku, dáy hɛ̧ ka mi lá a gé léy, mi sa hí̧ njuku a tísiriri.»

27Kú zi lá ɓil ɓayké ɓá, Zezú kaw saɓay a Bâa a mɛ̌ nyá. 28Dáy Zezú sa: «Gelka wǎyri mí gbaŋ Gun a njuku sé sâay, a goló i e tu káwa a mǐ, i e tu ɓá mi zi niŋ hɛ̧ri̧ ka tûl ní nyá, dáy mi saɓay sé tûl hɛ̧ ka Bâa a mǐ tɔ́ʼɔ hí̧ mí. 29Njuku ka pé mí gíy, e kuu mǐ, ké zi pɔŋ mí hɛʼɛ ní nyá, ɓayhí̧lé mi niŋ hɛ̧ a ké ziy dát.» 30Gelka Zezú kaw saɓay nɔ́y, njukuri ɓá ŋgɛ̧́náké láɓulaw hí̧ nɛ́.

Njuku a baakéri rá̧ koyri

31Dáy Zezú sa hí̧ Juyífri ka láɓulaw hí̧ nɛ́ ɓá: «Wǎyri mí ŋgbá ɓay a mǐri̧ ka law mbêw, i kaw ɓá gbát gunbɔʼɔ níri̧; 32Nǎŋnɔ́ í tu gbátɓay, dáy gbátɓay e ten wǎyri a ɓil koy.» 33Dáy kú sa hí̧ nɛ́ ɓá: «Rú kaw ɓá sɛl î̧n a Abarahamri̧, rú zi kaw koy a njuku bɔʼɔ mbêw yá. A̧ní rá̧ mɔ́ e sa ɓá: “Rú e tɛ̧́ a ɓil koy lé?”» 34Zezú sa hí̧ kuriri ɓá: «Katína mi sa gbátɓay hí̧ wǎyri: Njuku too ka niŋ ɓéké, kaw ɓá koy a ɓéké. 35Koy zi kaw a ɓil î̧n dát yá, dáy gun, ɓá njuku ka kaw ɓil î̧n dát. 36Dáy Gun mí ten wǎyri a ɓil koy, i tí kaw ɓá koy mbaa wɔm. 37Mi tu ɓá, i kaw ɓá sɛl î̧n a Abaraham. Dáy, i ɛ́ ŋgboro ɓay a í mí, ɓayhí̧lé i sáŋ ɓay a mǐ. 38Mǐ, mi saɓay a hɛ̧ ka Bâa a mǐ tɔ́ʼɔ hí̧ mí, dáy a wǎyri, i niŋ hɛ̧ ka bâa wǎyri sa hí̧ wǎyri.» 39Kú fere a sa hí̧ Zezú ɓá: «Bâa ɓurú ɓá Abaraham.» Dáy Zezú sa hí̧ kuriri ɓá: «Wǎyri mí kaw ɓá gbát gun a Abaraham, i e niŋ péna niŋa a Abaraham. 40Dáy a ŋgɛŋnɛ́, i ɛ́ ŋgboro í mí, ɓay ka mi sa gbátɓay, ka mi lá a gel a Gáŋvbôn hí̧ wǎyri. Abaraham zi niŋ mára̧ hɛ̧ nǎŋnɔ́ nyá. 41I niŋ nzáʼapéna a bâa a wǎyri.» Kú rerú hí̧ nɛ́ a sa: «Rú zi tí ɓá gun dala yá, rú erú a Bâa mbêw, ka ɓá Gáŋvbôn.» 42Zezú sa hí̧ kuriri ɓá: «Gáŋvbôn mí kaw ɓá gbát Bâa a wǎyri, i e zi mí, ɓayhí̧lé mi gí a gel a Gáŋvbôn, ka ŋgboro a mɛ̌, pé mi e a gelé. Mi zi gí ka tûl ní nyá, ɓá mɛ̌ pé, pé mí gíy. 43Ɓayhí̧rá̧ i zi láɓay ka mí sa hí̧ wǎyri yáy lé? Ɓayhí̧lé i zi ma ɓay a láɓay a mǐ nyá. 44Bâa wǎyri ɓá Sata̧n, dáy i zi ɓay niŋ hɛ̧ a ké ziy. Ké tí kaw ɓá njuku í hûl tí ka títáʼaké. Ké zi tí ka gbátɓay yá, ɓayhí̧lé gbátɓay zi tí ka gé lé yá. Gelka ké kúŋɓay, ké niŋ hɛ̧ ka ɓá péna niŋa a mɛ̌ dát, ɓayhí̧lé ké kaw ɓá njuku kúŋɓay, a kaw ɓá bâa a kúŋɓay. 45Dáy mǐ, mi sa gbátɓay, ɓaykénɔ́ pé i láɓulaw hí̧ mí nyáy. 46A gé a bazeŋ a wǎyri e tɔ́ʼɔ ɓéké ka mí niŋ lé? Dáy mǐ, mi sa gbátɓay, ɓayhí̧ i zi láɓulaw hí̧ mí nyáy lé? 47Njuku ka ɓá njuku a Gáŋvbôn, láɓay a Gáŋvbôn. Dáy a wǎyri, i zi láɓay yá, ɓayhí̧lé, i zi tí ɓá njuku a Gáŋvbônri̧ nyá.»

Zezú rá̧ Abaraham

48Juyífri sa hí̧ Zezú ɓá: «Tá ɓá gbátɓay, pé rú sa hí̧ mɔ́, ɓá mɔ kaw ɓá njuku Samarí#8:48 Sa ɓá Zezú ɓá njuku a Samarí, ɓá hɛ̧ fára, ɓayhí̧lé njuku a Samaríri, kú kó kuriri ɓá ɓéké njukuri., a erú ka têm ɓéké ka mûn nɔ́ nyá lé?» 49«Dáy Zezú sa hí̧ kuriri ɓá: Mi zi tí ka têm ɓéké yá, mi hí̧ hɔ̧́na hí̧ Bâa a mǐ dáy wǎyri, i hɛʼɛ mi nyá. 50Mi zi ɛ́ ɓay a njukuri kú hí̧ mí hɔ̧́na nyá. Njuku a há̧na mbêw erú, a kaw ɛ́ hɔ̧́na ɓay a mǐ, a walɓay a mǐ kɔ́y. 51Katína mi sa hí̧ wǎyri, njuku ka koro ɓay a mǐ, tí ziŋ hûl bɔʼɔ mbêw yá.»

52Juyífri sa hí̧ nɛ́: «Ŋgɛŋnɛ́ rú tu ɓá táŋáké, ɓá mɔ́ erú ka têm ɓéké! Abaraham ziŋ hûl, porofɛ́tri too ziŋ hûl, dáy mɔ̌ mɔ́ sa: “Njuku ka koro ɓay a mí lé, tí ziŋ hûl bɔʼɔ mbêw yá.” 53Mɔ kɛrɛ ɓá mɔ́ ndé zîi a ɓurú Abaraham ka ziŋ hûl lé? Porofɛ́tri kɔ́ ziŋ hûl. Dáy mɔ̌, mɔ kó mûn nɔ́, ɓá gé lé?» 54Dáy Zezú sa hí̧ kuriri ɓá: «Mǐ, mí hɔ̧́ mûn ní, ka mûn níy, hɔ̧́na a mǐ ná ɓá hɛ̧ a ɓǎŋké.» Njuku ka hɔ̧́ mí, ɓá Bâa a mǐ, ka i sa ɓá: «Ké ɓá Gáŋvbôn a wǎyri, 55a tu ɓá i zi tu nɛ́ nyá. Mǐ, mi tu nɛ́. Mǐ, mí sa ɓá, mi zi tu nɛ́ nyáy, mi kaw ɓá njuku kúŋɓay ɓá báŋa wǎyri. Dáy mi tu nɛ́, a koro ɓay a mɛ̌. 56Abaraham bâa wǎyri, rí mûn nɛ́ ɓay hɛ̧ a ké kaw kɛrɛ kó nâm a mǐ, dáy ké kó, a mbá a lawrína.» 57Juyífri sa hí̧ nɛ́: «Mɔ ka̧ mbimbɔ̂m bon ndíɓí yá ɓáy, a sa mɔ kó Abaraham?» 58Zezú sa hí̧ kuriri ɓá: «Katína mi sa hí̧ wǎyri, ɓá gbátɓay: Ɗambɛl rá kú mbuŋ Abaraham: “Mi tí erú dá.”» 59Dáy kú fá̧ saw ɓay a vbú nɛ́rú̧. Dáy Zezú mú, ka tɛ̧́ a ɓil vûn a Gáŋvbôn.

Currently Selected:

Zâŋ 8: pnz

Highlight

Copy