Matìyò 25

Zə̀zə̌ fə awa iyəŋi àvəm

1Yesù ə dzày fəli tsə zə̀zə̌ fə̀liy fiy nə̀, yəə Zə̀kìy saʼa nəniy aghee we yiy ate a də yəə à də̀ àyiə yə̀ a kə fyi nəniy nə ntsukə tə̀liy tiy. Awa iyəŋi ivəm kə nìy kə kaʼì tə̀ ghu kwe mwi ate zù anə lòʼo kə niy kə iwè kiy, ani zù kway yə̀ wìŋəmə̀ wə̀ ù dziy nîy wìyəŋi. 2Àtà ate kə də̀ iyəŋi à lyiʼa yiy, àtà ə də̀ iyəŋi à twabə yiy. 3A yuu àtà ghu kə lyiʼà nəniy ghu nìy kə kaʼì tə ghu nə̀ ghu kə̀ nîy gbaʼa mwi mə̀lìy mìy. 4À liy yə̀ àtà ghu kə twabə nəniy, ghu nìy kə mwi mə̀ lìy mìy anə təsòʼ kyìŋə̀ yə̀ iwee ate. 5Wìŋəmə̀ wə̀ ù dziy nîy wìyəŋi kə kə̀ kwu bû nəway, iyəŋi yə kaʼ yə̀ ani dzək bwuni.

6Wù lìy ə ŋwò bwoʼ fyi kə kəbôŋ nə̀ fòŋə̀ ntsukə tiy dzìy nə̀, “Wìŋəmə̀ wə̀ ù dziy nîy wiyəŋi ù mə bù, ghà bû kpe nîy we.” 7Awa iyəŋi yə àvəm ə ŋwò kaʼ ani kwiʼi kwoʼ kə kàʼì tə mwi tə ghu, 8À lyiʼa yə àtà ə dzìy awò àwizə̂ yìy a ghu nə, “Fày nənìy ghəd nə̀ mwi mə̀ tə̀kàʼì mìy, kaʼì tələ tiy dziy nəmə.” 9À twabə yə̀ mee a ghu nə, “mwi mə̀ tə̀kàʼì mələ miy dziy swây soʼò, ìŋ kə̀ kpe dzə̂ yə ghè ni nyiə̀ ghà. Ghà zû anə lòʼo tə ghà də ani zwe ate.” 10Yəə iyəŋi à lyiʼa yə̀ ŋwò yə̂ nəniy ani zù zwe mwi mə̀ tə̀kàʼì, wìŋəmə̀ wə̀ ù dziy nîy wiy ə bù. À yuu àtà ghu kə twabə nəniy ghu dà nyi yə̀ kàʼì tə ghu, zù nyi yə̀ a ndàw inyi ì niiy iwè yìy, ghu fè na yə̀ kə̀bàʼ.

11Iyəŋi à lyiʼa yə lə̀lə̀ dzwoŋi bə̀ bù kaʼ ani bvuʼi məmbòŋ nə̀, “A mwe, a mwe! Dzwòə tsə bâʼ kìy tə̀ ghe ə tsîy nyi bə̂.” 12Wìŋəmə̀ wə̀ ù dziy nîy wìyəŋi mee a ghu nə, “Mə ndzəmə̀ dzìy bə̀ ŋwò â ghà, ŋwò nəniy mə kwu way gha.”

13Yesù dzày kəd tsə nə̀, “Yèmì nənìy, aŋwòə ghà kwu dzə̀ way ntsuk fə ghà fə̀, moo soŋə fə ghà fə̀ Wà wù nì bè dzwəŋə bə̂ nəniy ate.”

Zə̀zə̌ fə aghě kə̀fàʼ àti

(Lukâs 19.11-27)

14Yesù ə dzày fəli tsə zə̀zə̌ fə̀ liy fiy a ghu nə, “Yəə Zə̀kìy saʼa aghee we yiy ate i də yəə wù lìy ù kə fyiə̀ yə̂ ìbwîy yìy u twoŋə tsə aghee kəfàʼ a we, nyə̀ na tsə ufyiə awò ghu. 15Ù səsə wə u nyə̀ tsə we nə̀ kaam tiy ità, ù wə̀ ù dzwùmì yə̂ nəniy, U nyə̀ tsə we nə̀ kaam tiy ibè, U nyə̀ gwùŋì tsə ù bàm wə̀ nə̀ kaam. Ù kə nyə̀ tsə kə anə yiə yə daʼa kə wû kìy kwoʼ kwûm nəniy. U ŋwò yə̀ ìbwìy. 16Wù wə̀ ù nyiə̀ nəniy we nə̀ kaam tiy ità, ù kaʼ yə̀ ani zwe fè ùfyiə. U zəŋi kə ghii kəli tsə təkaam ità ate idoŋ. 17Wù wə̀ ghu kə nyiə̀ nəniy we nə̀ kam tiy ibè, u kaʼ yə̀ sòʼò ani zwe fè ùfyiə kəli kə sòʼò tə̀kaam ibè ate idoŋ. 18Wù wə̀ ghu kə nyiə̀ nəniy we nə̀ kam, u kwuni zù təm gə̀mə̀ na tsə kàm ə̀ mwe ə̀ kə̀fàʼ we a mbvə̀dintsə.

19Mwe ə̀ kə̀fàʼ ə̀ ghu dòʼò kə ghii zù bù dzwoŋi nə̀ ghab kiy mə fyi. U twoŋə bə̀ ghu, bəbə ayiə yə ghu fâʼ nə̀ ùkhi wə ù kə nyiə̀ na awò ghu. 20Wù wə̀ ù kə nîy kə nəniy kaam tiy ità u zù bù, nə̀ ù mə kwe fwuli kaam tiy ità ate, dzìy a we nə, ‘A mwe, wò kə nyə̀ mìə̀ nə̀ kaam tiy ità kòʼo Mə mə kəli fwuli kaam tiy ità ate idoŋ.’ 21Mwe ə̀ kə̀fàʼ ə̀ we mee a we nə, ‘Iyiə ìdzoŋì, wò twòʼò də wù kə̀fàʼ ùdzòŋə̀ wìy, wò fàʼà fàʼ kə tsitsi kiy. Anə yə wò fàʼ dzwâb nəniy anə nyoŋə fə ukhiy fə, mə kî nyə̀ ŋwò wô nə̀ ndə̀mə̀ ùkhiy. Bu dòʼo anə lòʼo kə inyi kə̀ mə byay na nəniy tə̀ wò si səaŋə nə̀ mìə̀.’

22Wù wə̀ ù kə nîy yə̂ nəniy kaam tiy ibè ə̀ zù bù sòʼò, dzày yə̀ a we nə, ‘A mwe, wò kə nyə̀ mìə̀ nə̀ kaam tiy ibè Mə mə kəli fwuli kaam tiy ibè ate idoŋ.’ 23Mwe ə̀ kə̀fàʼ ə̀ we mee a we nə̀, ‘Iyiə ìdzoŋì, wò twòʼò də wù kə̀fàʼ ùdzòŋə̀ wìy, wò fàʼà fàʼ kə tsitsi kiy. Anə yə wò fàʼ dzwâb dzə̂ nəniy anə nyoŋə fə ukhiy fə, mə kî nyə̀ ŋwò wô nə̀ ndə̀mə̀ ùkhiy. Bu dòʼo anə lòʼo kə inyi kə mə byay na nəniy tə̀ wò ki səaŋə nə̀ mìə̀.’

24Ù wə̀ ù kə nyiə̀ nəniy we nə̀ kaam, u zù bù dzày yə̀ a we nə, ‘A mwe, mə kə kwu təŋ ŋwô nə̀ wò də wù wə̀ ù taw nə̀ àwo yìy. Wò liə ani nyiə fyiə kiy nə̀ à wày kə kiə̀ kìy, wò liə tsə̀ sòʼo ani nìy kə̀fyiə nə̀ à wò kə̂ na nəway. 25Mə kə tsəŋə ŋwò wô à yù də̀ ighe mə kə zû təm kə bwôʼ kìy a mbvə̀dintsə nùw na yə̀ kam yiə̀ yə̀ ate, nyoʼo niy ŋwô yə̀ ùkhiy yiə̀ wìy.’

26Mwe ə̀ kə̀fàʼ wə̀ mee a we nə, ‘Wù ù bɛbə̀ wìy tê wô, wò lay sòʼò ŋwò! Abu wò kə kwu nə̀ mə də wù wə̀ ù taw nəniy nə̀ àwo yiy, mə liə ani nyiə fyiə kiy nə̀ à wày kə kam kiy, mə liə tsə̀ sòʼo ani nìy kə̀fyiə nə̀ à kə̀ na nəway miə, 27Wǒ kə nîy kə ukhiy wə zù kwe na yə̀ a ndàw ùkhiy tə̀ u mə lyɛbi fâʼ kə ntuw. 28Ghà nîy ŋwô kam yə anə awo we tə̀ ghà nyiə̀ yə̂ awò wè kə̀fàʼ wə̀ ù bù nəniy nə̀ kaam tiy ivəm. 29Aŋwòə wù wə̀ ù kəli dzə̂ ndə̀m, ghu kwu ani nyə̀ fwuli yə̂ we nə̀ ùfyiə wiy, wù wə̀ u də̀ kwu way fyiə kə̀ liy kiy, ghu kwu ani nìy ŋwò mà kə nyoŋə fə ù kwu nəniy. 30Abû wù kə̀ŋkpə̂mkpə̀m wə̀ ù dziy ghe də wù kə̀fàʼ, màʼa fyi yə̀ nə we abee a təŋə kələm tə̀ ù si diy yə fələ àsoŋ awote.’ ”

Ayiə yə ani fyiə anə ntsuk fə isaʼ

31“Ani bu Wà Wù nì bù nəniy anə uwe u kədòŋ nə̀ daʼa kə we kə̀ soŋə̀ kìy, tsə̀təndii t-a-zə̀ tìy ni də a kə̀lə̀ we, ù ni də anə kwe k-a-dòŋ. 32Aghee nàʼà tə mbyi tə̀ tə̀dzə̀m ni lwe bə̂ anə səkə we, u nî dyaŋi dzàw na fyi yə̀ ghu təlòʼo ibè yəə àbàʼàtə̀ndzù nə̀ dzù fyiə yə̂ nəniy ndzù tìy nə̀ byi tiy. 33Ù nì na yə̀ aghù yə̀ ghu kpe doʼò anə sə k-a-zə̀ anə ukwe u we ù nyiə wiy, ù na yə̀ aghè liy yə̀ anə ùkwe ù kwuə̀ wìy. 34Dòŋ kìy ni dyaŋi dzây yə̂ awò aghù yə̀ ghu nî də anə ukwe uwe ù nyiə wiy a ghu nə, ‘Bù nənìy, gha yə Təli wam lwîy dzə̂. Ghà bû nîy lwì kə̀ Zə̀kìy kə byay na zî bə̂ â we ani bwam mbyi. 35I də nə̀, dzoŋ kə zabə miə ghà ə nyə̀ mìə̀ nə̀ ùfànyiə wiy, fòŋ ə swəə miə ghà ə nyə̀ mìə̀ mwi ani mu, yəə mə kə bwîy bû a kə̀lə̀ ghà, ghà ə ŋgwam na miə, 36mə kə làʼà tə̀ndzwu ghà ə nyə̀ mìə̀ nə̀ ndzwu tə̀ dzəŋə tiy, mə kə dzàŋə̀ ŋwò də sòʼo a ndàw ntsaʼ ghà ə bù toŋə zuw miə awote.’

37Aghû yə̀ ghu də nəniy tsitsi anə sə k-a-zə̀ ghu ni bəbə a we nə, ‘A Mwe ə̀ mbyi, ghè kə kòʼ zəŋi wô nə̀ dzoŋ zabə wò ghè ə nyə̀ wò nə̀ ùfànyiə wiy ə? Moo ghè kə kòʼ yə̀ wô fòŋ swəə nəniy wô ghè ə nyə̀ wò nə̀ mwi wò ə mu ə? 38Ghè kə kòʼ yə̀ wô nə̀ wò bwìy bə̀ ŋwò ghè ə ŋgwam na wô, moo ghè kə kòʼ yə̀ wô wò làʼa ndzwu tiy ghè ə nyə̀ wò nə̀ ndzwu tiy ə? 39Ghè kə kòʼ sòʼò yə̀ wô wò dzàŋə̀ nəniy ghě bù yèmì azoŋə̀ wò ə? Moo wò kə də̀ yiə ndàw ntsaʼ ghè ə bù toŋə zuw wô ə?’ 40Dòŋ kìy ni dziy a ghu nə, ‘Mə ndzəmə̀ dzìy bə̀ ŋwò â ghà nə̀, ayiə yə ghà kə zəŋə nəniy azòŋə̀ àghù yə̀ ghu kə dzwumə̀ nəniy miə, bəə ghu kə də bòʼ wày kə aghê sòŋə̀ yìy, ghà kə ghî zəŋə azòŋə̀ mìə.’ ”

41“U nî dyaŋi dzày yə̀ awò aghù yə̀ ghu də nə̀ ukwe ù kwuə̀ wìy a ghu nə, ‘Ŋwò nənìy a kə̀lə̀ mìə̀, Zə̀kìy mə dzày nə̀ ghà zû anə uvə̀lə̀ wə̀ u də nimə kòʼò wày, mə kə byay na awò Satàn nə̀ tsə̀təndii tə we tiy.’ 42I də nə̀, ‘Dzoŋ kə zabə miə ghà ə twe ani nyə̀ mìə̀ nə̀ ùfànyiə wiy, fòŋ ə swəə sòʼò mìə̀, ghà ə twe ani nyə̀ mìə̀ nə̀ mwi tə̀ mə̀ mu. 43Mə bwìy bù sòʼò a kə̀lə̀ ghà, ghà ə kə̀ ŋgwam na nəway miə, mə kə làʼà tə̀ndzwu ani dzə̀ŋì ghà ə kə̀ nyiə̀ mìə̀ nə̀ ndzwu tiy, mə dzàŋə̀ ghà ə kə̀ yemì nəway azoŋə̀ mìə̀, mə kə də̌ a ndàw ntsaʼ ghà ə twe ani bù toŋə zuw miə awote.’

44Aghû yə̀ ni bəbə soʼo a we nə, ‘A Mwe ə̀ mbyi, ghè kə kòʼ zəŋi wô nə̀ dzoŋ zabə wò ə, moo fòŋ swəə nəniy wô, moo ghè kə kòʼ yə̀ wô nə̀ wò bwìy bə̀ ŋwò, moo wò làʼà nəniy ndzwu tiy, moo wò dzàŋə̀ nəniy, də̀ sòʼo a ndàw ntsaʼ, ghè ə tàʼà kə fây wò ə?’ 45Dòŋ kìy ni dziy a ghu nə, ‘Mə ndzəmə̀ dzìy bə̀ ŋwò â ghà nə̀, sòŋə mə ghà kə twe ani fày wù ùmòʼ anə aghù yam yə, yəə ù də wày kə wù ùsoŋə̀ wìy, ghà kə ghî twe ani fày mìə.’ 46Ghu ni dyaŋi ŋwô zû ani zù fii anə mfəm yə ì dòʼò təŋ nəniy, aghû yə̀ ghu zəŋə nəniy ayiə yə a də nəniy tsitsi anə sə k-a-zə̀ ghu ni kwuni zû kəli imuə̀ itsà.”

Currently Selected:

Matìyò 25: isu

Highlight

Copy