Mâk 1

Ntwum yə Dzwan wə ù kə nyiə̀ mwi m-à-zə̀ miy kə niʼà

(Matìyò 3.1-12; Lukâs 3.1-18; Dzwan 1.19-28)

1À yù də̌ ntwùm ìdzòŋə̀ yə̀ ì kwùmə̀ yə̀ nə̀ Yesù Kə̀litò, Wà Kə̀zə̀. 2Ì kə kaʼ bə̀ anə yiə yə Wè ntwùm ə̀ Kə̀zə̀ Ìzayà kə twâ naa nəniy nə̀,

“Zəkìy kə dzày tsə nə̀, ‘Mə kî twumə bə̀ wè ntwum wam anə sə kiə̀

tə̀ ù kì byay na tsə dzəd yə̂.’

3Wù lìy wìy də̀ a mbvə̀nə̀ kə̀sisi ù bwoʼo bôŋ kìy dzìy tsə nə̀,

‘Ghà byay na tsə dzəd awò Mwe ə̀ Mbyi!

Zəŋi tsə nə̀ loʼo tə̀ ŋgwalə tə tə zû tsitsi awò we ani bwìy.’ ”

4Dzwan ə bù fyi kə a mbvə̀n ə̀ kə̀sisi, nyìə̀ mwi m-à-zə̀, nìʼà bə̀ sòʼò ntwùm ə̀ Kə̀zə̀ nə̀, “Ghà kyemì ŋwô bə̂ anə ayiə ghii àbɛbə yiy, ghà nîy soʼò mwi m-à-zə̀, tə̀ Zə̀kiy nîyzə̂ bɛb təli.” 5Ndə̀mə̀ àghù ə ŋwò bə̀ a bwòʼò Dzùdiyà, nə̀ anə inaʼ i Yèlusalèm ani bù zuw ayiə yə Dzwan dzîy nəniy. Abù ghu dîy dzìy bɛb tə ghu tiy, Dzwan ə nyə̀ ghu nə̀ mwi m-à-zə̀ mìy anə Dzwìy Dzudàn.

6Dzwan kə dzə̀ŋì kəli təndzwu ghu kə zəŋi nəniy anə ŋwù tə nyàm ìlìy yìy ghu tyoŋə nə̀ à də̀ kəkàmêl.#1.6 Ghu kə zəŋə tsə̀ tə̀ndzwu anə ŋwù tə kəkàmêl. Ndzu tə ghà tə̀ kə kwuni dzwàbə̀ tə̀ dzə̀ wày U dzə̀ŋì kəli fəkwə̂ anə isəd, ghu kə zəŋi nəniy anə gùw nyàm. Ufânyiə u we wiy kə də̀ təbe nə̀ zuw tiy. 7U nìʼà yə̀ a ghu nə, “Anə fəkə̀mə̀ wù lìy kì bè ŋwò, ù tsìy fyi nəniy miə. Mə kə̀ ndwâm kwoʼ kpe dzə̂ ani zòʼ tswi, zè màʼà ùbaʼ u təgùw u we. 8Mə gha nyiə̀ nə̀ mwi m-à-zə̀ mìy akwuni bû we ù kì nyìə̀ ghà nə̀ Zwàykə̀zwekiy.”

Yesù ə nìy kə mwi m-à-zə̀, kəli sòʼò ìmwàmkòʼ

(Matìyò 3.13-17; Lukâs 3.2,22)

9Ntsukə tsìy tsə ìn sə̀ki kə ghii, Yesù ə ŋwò tsə anə inaʼ i Nazalèt a mbwòʼ ə̀ Galìlî zù kòʼ tsə Dzwan. Dzwan ə nyə̀ tsə we nə̀ mwi m-à-zə̀ mìy anə dzwì Dzudàn. 10Abù Yesù fyi kwoʼ kə anə dzwî, u kòʼ kə̀vələ kə fwiy tsə, Zwàykə̀zwekiy fyi tswi bə̀ azoŋə̀ we yəə à də̀ kəbubumə. 11Dzə̀ ə foŋ fyi tswi bə̀ anə kəvələ nə̀ “Wò də̌ wa nam ùtsukə̀ wìy, wò zəŋə miə mə ŋgee dyoʼo.”

Satàn ə mwàmkòʼ Yesù

12Zwàykə̀zwekiy dyaŋi nìy zù nə̀ we a mbvə̀nə̀ kə̀sisi. 13U dòʼo awo anə məntsukə mə̀vəm inkyàʼì, nə̀ Satàn mwàmə̀ kòʼò kə we. U də̀ awo anə uzə u nyàm tə mbvən tiy. Tsə̀təndii t-a-zə̀ tǐy bù nìy ìyèmì azoŋə̀ we.

Yesù ə kaʼ tsə fàʼ kə we

(Matìyò 4.12-17; Lukâs 4.14,15)

14Abù ghu kwiy kwee yə̂ nəniy Dzwan a ndàw ntsaʼ, Yesù ə zù a Galìlî kaʼ ani nàʼà ntwùmə̀ ìdzòŋə̀ yìy ì ŋwò bə̂ nəniy â Zə̀kìy, 15dzìy tsə nə̀, “Soŋə fiy mə kpe, Zə̀kìy nyii kaʼ ani saʼ aghee we. Ghà kyèmì ŋwô fyi bə̂ anə bɛb təli, ghà bɛmə ntwùm ìdzòŋə̀ yə̀.”

16Yəə Yesù bwìy tsìy yə̂ nəniy anə iŋgwùŋə iŋwù i Galìlî, u kòʼ tsə aghê àbè, Simùn nə̀ àzə̀ ə̀ we Andùlù, ghu kwi tsi tiy anə təwè. Fàʼ kə ghu kiy kə də tsə̀ ani kwii tə̀tsi, 17Yesù ə dzày yə̀ a ghu nə, “Dzwùmi bə̀ nənìy miə, tə̀ mə ki tyi dê bə̂ ghà nə̀ àyiə yə ghà də ani zəŋi tə̀ aghê dzwumì bə̂ Kə̀zə̀.” 18Ghu dyaŋi nasə tsə wee tə ghu, ŋwò dzwùmì yə̀ Yesù.

19Abù ù dzə̀ soŋ koŋə yə̂ nəniy, u kòʼ tsə aghê liy àbè ghu kə də awizə̂, Dzɛ̂m nə̀ Dzwan, awa Zebedì ghu də nəniy an-a-mfə̀n ghu zwubə̀ wee tiy. 20Yesù ə dyaŋi twoŋə tsə sòʼò ghu. Ghu nasə tsə tè ghu Zebedì an-a-mfə̀n nə̀ àghě kə fàʼà, ŋwò dzwùmì yə̀ we.

Yesù ə dzwùm fyi usîy ùbɛbə wiy azoŋə̀ wù lìy

(Lukâs 4.31-37)

21Yesù nə̀ tsə̀təndii tə we tə ghà tə̀ ìkyàʼì, ghu ŋwò zù a Kàpanùm, abù utsuk u ghě Dzû ù zwaa wiy bû nəniy, u zù a ndàw dzəŋə kə aghě Dzû, kaʼ yə̀ ani tyi dè àyiə 22Adzwə yiy ŋge zwum yə̀ àghù anə yiə yə ù kə tyi dê nəniy ayiə yiy ate, aŋwòə ù kə tyi dè yəə à də̌ wù wə̀ ù kwu nəniy daʼa kə̀soŋə̀ kìy. Ù kə tyiə dè dzə̀ wày yəə à də̀ aghû yə̀ ghu kə tyiə dê nəniy ulâŋ u Musîs wìy.

23Wù lìy wìy awote a ndàw dzəŋə kə ghě Dzû, ù kə kwu nəniy usîy ùbɛbə wiy, u dyaŋi bwoʼ fyi bə̀ kə̀bòŋ nə̀, 24“A Yesù wà ìnaʼ i Nazalèt, wò mə bù ani bù byɛbi màʼà ghə̀d ə̀? Mə kwu ŋwô wù wə̀ wò də nəniy we, wò də̌ wù ùzwe wìy Zə̀kìy twum bə̂.”

25Yesù ə kwà tsə usîy ùbɛbə wə nə̀, “Dòʼò moŋ, fyi ŋwo azoŋə̀ wù wə̀.”

26Usîy ù bɛbə wə màŋ sə̀kì tsə we nə̀ daʼa kiy, dyaŋi fyi ŋwò tsə nə̀ mbòŋ mìy. 27Adzwə ŋge zwum aghee ghà yə̀ àdzə̀m, ghu kàm dyaŋi bəb tsə nə̀ “À yù də̌ ìghaa yiy? À də̀ ityi dè ìfyiə yiy ə̀? Wù wə̀ ba kwu ŋwô daʼa kiy, ù tsày tsə lâŋ kìy â ùsìy ù bɛbə wə u zuw yə̂ â we!”

28Ùzòŋ u Yesù wiy dyaŋi foŋ tsìy yə̀ a mbwòʼ ə̀ Galìlî ìdzə̀m.

Yesù ə zəŋi tsə ndə̀mə̀ àghè àdzaŋə taw kə

(Matìyò 8.14-17; Lukâs 4.38-41)

29Yəə ghu dyaŋi ŋwô tsə a ndàw kə̀dzəŋə, Yesù ə zù nə̀ Dzɛ̂m we nə̀ Dzwan a ndàw Simùn nə̀ Andùlù. 30A də̌ nə̀ nèwìy Simùn dzàŋə̀ anə ukày. Ù kə də̌ nə̀ ùwee wiy. Abù Yesù bù nəniy ghu dzày yə̀ àyiə uwè u ghè wə̀ â we. 31Yesù ə zù kwi tsə ukwe u nèwìy Simùn nìy ŋwò kə we idoŋ, uwe u we wiy mày yə̀. Nèwìy Simùn ə ŋwò dɛ̀m tsə ghu.

32Abù nə̀ ìnyinkwubì tìy, nə̀ inyi i mə nəmə, ghu nìy bə̀ ndə̀mə̀ àghè àdzaŋə yiy akə̀lə̀ Yesù nə̀ à ghù yə̀ nsìy mə̀bɛbə̀ mìy kə də nəniy azoŋə̀ ghu. 33Inàʼ idzə̀m ə lwe bə̀ anə ufə̀b u ndàw Simùn. 34Yesù ə zəŋi taw tsə aghû yə̀ ghu kə dzaŋə̀ nəniy le tə tədzàŋ tə̀dzə̀m, ghu taw kə. U dzwùm fyi tsə sòʼò ndə̀mə̀ nsìy mə̀bɛbə̀ mìy azoŋə̀ àghè. U kə̀ ndwâm bɛmə nə̀ nsìy mə̀bɛbə̀ mə̀ dzày fyi bə̀ ìyiə, aŋwòə ghu kə kwu ŋwô wù wə̀ ù də nəniy we.

Yesù ə nàʼà ntwùm ə̀ Kə̀zə̀ a Galìlî

(Lukâs 4.42-44)

35Abù tswutswu wə, nə̀ zwù kə utsuk kiy, Yesù ə kwu bəd ŋwò kə zù a lòʼo k-a-nù ani zù gwùŋì. 36Simùn we nə̀ aghù yə̀ ù kə bwîy dzəŋə nə̀ ghu, ghu kaʼ tsə ani kaw kyabi tsə̀ Yesù. 37Abù ghu kôʼ tsə nəniy we, ghu dzày yə̀ â we nə̀, “Aghê àdzə̀m ə̀ khu tsə wò.”

38Yesù ə kwuni bə̀lì kə a ghu nə, “Bù nənìy ŋgà zû anə nàʼà tə̀liy tə tə kwulì də nəniy, tə̀ mə naʼà yə̂ soʼò ntwùm ìdzòŋə̀ yə̀ awo, aŋwòə mə fə anə mbyi baa bù ìghe.”

39Yesù ə zù nàʼà tsìy yə̀ ntwùm ə̀ Kə̀zə̀ anə ndaw tə udzəŋə tə aghě Dzû tə̀dzə̀m a bwòʼò Galìlî. Dzwùmə̀ fyiə sòʼò nsìy mə̀bɛbə̀ mìy azoŋə̀ àghù yìy.

Yesù ə zəŋi taw kə wù ùŋkə̀m

(Matìyò 8.1-4; Lukâs 5.12-16)

40A ntsuk fə̀ liy fiy, wè ùŋkə̀m ə bù nyaʼa bə̀ a təŋə̀ Yesù, bwoʼo we nə̀ wokiy, dzày tsə nə̀, “Bəə wò liə nəniy, kə̀lə̀ â wò zəŋi tsə tə̀ mə taw kə.”

41Yesù ə kwoʼ tsə nə̀ mwuli kiy, nìày fyi yə̀ ukwe, mwàm tsə we dzày tsə nə̀ “Mə liə ŋwô nə̀ wò taw kə.” 42Ùŋkə̀m ughà wə̀ ə dyaŋi saŋ tsə, wù ù te wiy taw kə. 43Yesù ə sə̀ŋì kə̀tswuŋi â we, ndyaŋi dzày nə̀ wù ùghà wə̀ zù ŋwò. 44Yesù ə dzày yə̀ sòʼò a we nə, “Kəə wò nì dzìy iyiə yə awò wù lìy, kwuni zu dě yə̀ uwe niə̀ wìy awò wù ùlwaʼà wìy tə̀ ù fwə̀d tsə nə̀ wò mə taw ə̀. Â wò ani dè tsə awò àghè àdzə̀m nə̀ wò mə taw, zǔ sà ufyiə wə lâŋ kə Musîs kìy kə dzây na.”

45Wè te wiy fə̀d ŋwò yə̀ zù kaʼ yə̀ ani nàʼà awò ndə̀mə̀ àghù. U ŋge nàʼà tsə ghii, i kàmə̀ taw awò Yesù ani nyi yə̀ anə inaʼ mgbaaŋ. Yesù ə mùə̀ kə anə ukè, aghê ə kwunə namə fyiə bə̀ kə anə nàʼà tə̀dzə̀m, ani bù kòʼ we.

Currently Selected:

Mâk 1: isu

Highlight

Copy