Acts 2
2
Pobitro Atma Aha
1Jitia Pentecost din ahise, biswasi khan sob ek jagah te joma hoise. 2Aru achanak ta te awaj ekta sorgo pora ahise, aru taikhan bohi thaka pura ghor to bhorta hoi jaise. 3Titia taikhan age te juli thaka jui nisena ulaise, aru ekjon-ekjon uporte bohi jaise. 4Aru taikhan sob Pobitro Atma pora bhorta hoise aru alag kotha pora kobole shuru hoise, Atma pora taikhan ke dusra bhasa pora kobole sikhai dise.
5Aru Jerusalem te Isor jana Yehudi manu khan thakise, aru akas nichete thaka sob desh pora ahikena ta te thakise. 6Aru jitia etu awaj ulaise, ta te manu khan sob ahi kene asurit lagise kelemane taikhan nijor laga kotha pora koi thaka hunise. 7Titia taikhan sob asurit hoi jaise; aru taikhan koise, “Sabi, etu kotha koi thaka khan Galilee manu khan nohoi naki? 8Tenehoile kineka taikhan laga mukh pora amikhan ki kotha koi kene jonom korise etu kotha koi ase? 9Parthia laga aru Mede aru Elam laga, aru kun Mesopotamia te thake, Judea aru Cappadocia, Pontus aru Asia te, 10Phrygia aru Pamphylia, Egypt aru Cyrene usorte Libya, aru Rome phale jai thaka manu khan, 11aru Yehudi aru proselyte khan, Crete manu khan aru Arab manu khan, taikhan Isor laga dangor aru asurit kaam kora to amikhan laga bhasa pora koi thaka to hunise.” 12Taikhan sob asurit pora bhabona kori kene, aru ekjon-ekjon ke koise, “Etu laga ki motlob ase?” 13Kintu dusra biswasi khan pora sorom khilai kene koise, “Taikhan nisa pani kori kene ase.”
Pentecost Dinte Peter Laga Susamachar
14Kintu Peter egaroh jon logote khara hoi kene jor pora taikhan ke koise, “Judea laga manu khan aru Jerusalem te thaka khan, apnikhan etu jani lobi, aru moi ki koi ase etu bhal kori kene huni lobi. 15Kintu etu manu khan to apuni khan pora bhabona kora nisena nisa pani khai kene thaka nohoi, kelemane etiya phojur nou-baji he ase. 16Kintu etu kotha bhabobadi Joel pora koise:
17‘Eneka hekh dinte hobo, Isor pora koise,
Moi laga Atma sob manu uporte di dibo
Tumikhan laga chokra chukri khan pora bhabobani koribo,
Aru jawan manu khan darshan pabo,
Aru bura manu khan sapna dikhibo.
18Aru Moi laga noukar aru mahila noukar khan uporte
Moi laga Atma di dibo, aru taikhan bhabobani kobo.
19Moi akas
Aru prithibi te asurit kaam dikhai dibo,
Khun aru jui aru dhuwa laga bhap.
20Titia suryo to andhera hoi jabo
Aru chand to khun nisena dikhibo,
Probhu laga dangor mohima din naha age te eitu khan sob hobo.
21Aru jun manu hekh homoi tak Probhu laga naam loi kene thake tai bachi jabo#2.21 Joe. 2.28-32..’
22Israel laga manu khan, etu kotha huni bhi, Nazareth Jisu eneka manu thakise junke Isor pora tumikhan nimite pathai dise dangor aru asurit kaam kori bole nimite, aru etu sob Isor pora Probhu Jisu ke loi kene korise, aru etu sob tumikhan pora dikhise. 23Tai Jisu to, Isor pora kineka age pora bhabona korise aru tai laga gyaan pora, Jisu ke biya manu hathte di dise, aru tumikhan Taike gojal mari kene ekta Cross te morai dise. 24Tai ekjon ase junke Isor mora pora jinda kori dise, mora pora taike chari dise, kelemane Taike mora pora aru bandhi rakhibole para nai. 25Kelemane David Tai nimite koise,
‘Moi Probhu ke hodai moi laga chehera usorte dikhe,
Tai moi laga dyna hathte thake, moi biya rasta te najabo nimite.
26Etu karone, moi laga mon khushi ase aru moi laga jiba pora dhanyavad kore.
Aru, moi laga gaw bhi biswas te jinda thakibo.
27Kelemane Apuni moi laga jibon Hades#2.27 Mora laga desh. te chari nadibo,
Aru Apuni laga Pobitro Jonke puchibo nadibo.
28Apuni moike jibon laga rasta dikhai dise;
Aru apuni laga usorte moike khushi pora bhorta kori dibo#2.28 Psa. 16:8-11. .’
29Bhai khan, moi apuni khan ke etu kobole pari ase ki amikhan laga purush-Baba David pora ki kaam korise, aru tai morise aru taike kobor dise, aru tai laga kobor aji tak amikhan logote ase. 30Etu karone, tai ekjon bhabobadi thakise aru jani thakise Isor tai logote kosom khaise, tai laga khandan pora ekjon ulabo aru uthaikene Tai laga singhason te bohai dibo#2.30 Psa. 132:11.. 31Aru aha dinte ki hobole ase etu sob to dikhi kene, tai Khrista mora pora jinda huwa laga kotha koise,
‘Taike Hades te bhi chari diya nai, aru Tai laga gaw bhi puchi janai#2.31 Psa. 16:10..’
32Jisu ke Isor he jinda kori dise, aru amikhan sob Jisu jee-utha laga gawahi ase. 33Etu nimite Taike Isor laga dyna hathte bohai kene uthai dise aru Baba Isor pora Tai laga Pobitro Atma amikhan uporte di dise, juntu apnikhan dikhi ase aru huni bole pari ase.
34Kelemane David to sorgote uthai loi juwa nai, kintu tai nije koise,
‘Probhu he moi laga Probhu ke koise, “Ami laga dyna hathte bohibi,
35Jitia tak tumi laga dushman khan ke tumi laga theng rakha jaga bonai nadiye#2.35 Psa. 110:1..’”
36Etu karone, Israel te jiman ghor ase etu jani lobi, Isor pora Taike Probhu aru Khrista bonai dise, etu Jisu, junke tumikhan Cross te morai dise.”
37Jitia etu kotha hunise, taikhan monte jokhom paise, aru Peter aru ta te thaka apostle khan ke koise, “Bhai khan, amikhan ki koribo?” 38Titia Peter taikhan ke jowab dise, “Mon ghura bhi, moi koi ase, aru baptizma koribi, sob manu, Jisu Khrista naam pora, nijor laga paap nimite, titia tumikhan Pobitro Atma laga inam pabo. 39Kelemane etu Isor laga kosom apuni aru apuni khan laga bacha khan nimite ase, aru Probhu Isor pora junke matibo, taikhan nimite bhi ase#2.39 Joe. 2:32. .” 40Tai aru bisi kotha pora gawahi dikena taikhan ke samjai se, aru koise, “Nijorke biya manu khan pora bachai rakhibi.” 41Titia taikhan sob huni kene baptizma loise, aru tin hajar jon thaka biswasi khan logote aru bhi ginti kori loise.
Biswasi Khan Majote Sob Saman Eke Bhag Kora
42Aru taikhan apostle khan pora ki sikhai dise etu kotha khan koi jai thakise aru ekjon-ekjon logote girja kori thakise, aru roti bhangai kene prathana te thakise.
43Aru sob logote bhoi ahi jaise, aru apostle khan dwara asurit kaam korise. 44Aru biswasi khan logote mili kene thakise, aru sob kaam mili kene kori thakise. 45Aru taikhan nijor dhun-sampoti aru saman sob bikiri kori kene kunke lage taikhan ke bhag kori dise. 46Aru hodai din ekta bhabona loi kene mondoli te kaam kore, aru ekjon-ekjon logote khushi aru mon sapha pora ghor te roti bhangai kene, 47aru hodai Isor ke dhanyavad kori kene, aru sob logot pora morom paikene thakise. Aru hodai jiman Probhu logot biswas kori loi, taikhan majote ginti hoi thakise.
Currently Selected:
Acts 2: ISVNag
Highlight
Share
Copy
Want to have your highlights saved across all your devices? Sign up or sign in
NAG-ISV
Creative Commons License
Indian Standard Version (ISV) - Nagamese (Indian Standard Version (ISV) - Nagamese), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
