Luke 1
1
Theophilus Nimite Likha
1Bisi manu khan pora kotha aru kaam khan laga khisa joma kori kene likhibo nimite kosis korise, juntu amikhan majot te pura hoise 2jineka pora amikhan laga hathte dise jun khan shuru te nijor suku pora dikhise aru kotha laga noukar khan asele. 3Etu nimite ami etu bisi bhal nisena dikhi ase, bhal pora bisari kene sob kotha aru kaam khan to shuru pora apuni ke hisab-kitab pora likhi ase mohan Theophilus, 4eneka hoile tumi janibo etu bostu laga asol kotha juntu apuni ke sikhai dise.
Baptizma Diya John Jonom Laga Kotha Age Te Kowa
5Aru Herod pora Judea laga raja thaka somoite Abijah laga dol pora Zachariah naam laga ekjon purohit thakise. Tai laga maiki to Aaron laga khandan pora asele aru tai laga naam Elizabeth asele. 6Aru tai duijon Isor usorte bisi bhal thakise, aru Probhu pora ki koi sob kotha to sapha pora mani thake. 7Aru taikhan bacha thaka nai, kelemane Elizabeth to bacha pabole napara maiki thakise, aru tai duijon laga umor bhi bisi hoi jaise.
8Etiya eneka hoise, jitia Zechariah tai Isor usorte tai laga purohit kaam khan kori asele, juntu kaan khan tai laga dol khan pora kore. 9Titia, purohit laga niyom hisab te, taike Isor laga pobitro ghor bhitor te jai kene dhup aru dhona julabole chithi pora basi se#1.9 Exo. 30:7.. 10Jitia dhona juli jaise etu homoi te sob manu khan bahar te prathana kori thakise. 11Titia Probhu laga sorgodoth tai usorte ahise, aru jun jagate dhona julai se etu laga dyna phale khara korise. 12Jitia Zechariah etu dikhise tai bisi chinta hoise aru tai uporte bisi bhoi ahi jaise. 13Hoilebi, sorgodoth koise, “Bhoi na koribi Zechariah, tumi laga prathana huni loise. Tumi laga maiki Elizabeth pora ekjon chokra pabo. Aru tumi tai laga naam John rakhibo. 14Aru tumikhan anond aru bhal lagibo, aru bisi manu khan tai laga jonom te khushi koribo. 15Aru tai Probhu usorte bisi dangor hobo. Tai kitia bhi draikha-ros nakhabole lage#1.15 Nazareth manu toh Isor logote kosom rakhe eku nisa pani eku nakhai., tai ama laga peth te thaka homoi pora he Pobitro Atma pora bhorta hoi jabo#1.15 Eph. 5:18; Jud. 13:4-5,. 16Aru tai Israel laga bacha khan ke Probhu Isor logote wapas anibo. 17Elijah laga atma aru takot pora Probhu laga kaam te tai he age kori kene loijabo. Aru jun dharmikta laga kotha namani kene ase taikhan laga mon ghurai dibo nimite aru baba khan laga mon taikhan laga bacha khan phale ghurai dibole, aru jun Probhu ahibole ase Tai nimite rasta taiyar kori bole#1.17 Mal. 4: 5-6..”
18Zechariah pora sorgodoth ke koise, “Moi etu hobo koi kene kineka janibo? Kelemane moi bura hoise aru moi laga maiki bhi umor bisi hoise.” 19Aru sorgodoth taike jawab dikene koise, “Moi Gabriel ase, jun Isor usorte khara kore. Amike tumi logote kotha kobole pathaise, aru etu bhal khobor to tumike kobole nimite#1.19 Dan. 8:16; 9:21.. 20Aru etu nimite, sob kaam to nohua tak tumi chup thakibo aru kotha ulabo na paribo, kelemane tumi moi laga kotha biswas kora nai, etu sob to tai laga thik homoi te pura hobo.” 21Aru manu khan Zechariah nimite rukhi thakisele, aru taikhan chinta-bhabona korise jitia tai mondoli ghor bhithor te deri korise. 22Kintu jitia tai bahar te ulai ahise tai kotha kobole para nai, titia taikhan bhabise taike Isor pora kiba ekta dikhaise; aru tai manu khan ke ishara pora dikhai di thakise, aru kotha koribo naparikena he thaki jaise. 23Aru etu sob to tai laga sewa kora homoi pura aru khotom hoise, titia tai ghor te jai jaise.
24Aru etu din piche, tai laga maiki Elizabeth bacha bukhi se, aru pans mohina tak tai nije ke lukai kene rakhise, aru koi thakise, 25“Isor ami uporte eneka korise, aru ami uporte Probhu he daya korise, manu usorte sorom nathakibo nimite#1.25 Gen. 30:23..”
Jisu Jonom Laga Kotha Age Te Kowa
26Aru Elizabeth peth te bacha bukha choi mohina huwa homoi te, Isor pora sorgodoth Gabriel ke Galilee, juntu ke Nazareth mate, etu jagate pathaise, 27ekjon kumari mahila logote, jun Joseph koi kene ekjon manu logot shadi kori bole laga kotha milikena asele, aru jun David ghor manu asele; aru etu kumari laga naam Mary asele. 28Aru tai logote ahikena, sorgodoth koise, “Salam tumike, jun uporte Isor laga morom ahise! Probhu tumi logote ase.” 29Aru tai etu kotha khan huni kene chinta hoise aru tai bhabi thakise etu kineka laga salam ase. 30Aru sorgodoth taike koise, “Bhoi na koribi, Mary, tumi to Isor usorte morom paise. 31Aru tumi ekjon chokra bukhi bo, aru Tai laga naam ‘Jisu’ rakhibo#1.31 Isa. 7:14. 32Tai bisi mohan hobo aru Taike Sobse Mohan laga Putro eneka matibo. Aru Probhu Isor taike, tai laga purbo David laga singhason dibo#1.32 2 Sam. 7:12, 16; Eph. 1:8; Dan. 2:44.. 33Aru Tai hodai nimite Jacob laga ghor cholai thakibo, aru Tai laga rajyo kitia bhi khotom nahobo.” 34Aru Mary pora sorgodoth logote koise, “Etu kineka hobo, kelemane moi kun manu ke bhi najane?” 35Aru sorgodoth he taike koise, “Pobitro Atma tumi logote ahibo, aru Sobse Mohan takot pora tumike bondh kori dibo. Etu nimite juntu pobitro bacha jonom hobole ase, Taike Isor laga Putro matibo. 36Aru sabi tumi laga ghor manu Elizabeth bhi tai laga buri umorte chokra pabole ase. Aru tai bacha bukha choi mohina chuli asele, tai junke dusra khan pora bacha bukhibo napara mahila koi thakisele. 37Kelemane Isor nimite eku napara nai#1.37 Mat. 19:26; Jer. 32:27..” 38Aru Mary koise, “Sabi moi Probhu laga ekjon mahila noukar ase. Apuni ki koi ase etu nisena hobole dibi.” Titia sorgodoth jai jaise.
Mary Pora Elizabeth Ke Lok Kori bole Juwa
39Etu huwa pichete, Mary tara-tari kori kene pahar desh te jaise, Judah laga sheher ekta te. 40Aru Zechariah aru Elizabeth laga ghor te ghusi kene salam dise. 41Aru eneka hoise jitia Mary pora Elizabeth ke salam dise, tai laga pet bhitor te bacha thaka to khushi pora hili se, aru Elizabeth to Pobitro Atma pora bhorta hoise. 42Aru tai khushi pora hala kori kene koise; “Sob maiki bhitor te tumi ekjon asirbad thaka ase, aru jun he apuni laga bhitor te ase etu bhi asirbad ase. 43Aru etu moi logote kineka hoise, moi laga Probhu laga ama moi logote ahise. 44Aru sabi, apuni laga salam jitia moi kan pora hunise, moi laga bhitor te bacha thaka to khushi pora hili se. 45Aru etu manu asirbad ase jun to kotha khan purah hobo koi kene biswas korise, juntu kotha to Probhu pora taike koise.”
Stuti Laga Gana Kora
46Titia Mary koise,
“Moi laga jibon Probhu ke mohima kore,
47Aru moi laga Atma khushi kori ase jun Isor he moi laga Tran-korta ase#1.47 1 Sam. 2:1.
48Aru Tai upor pora, sobse mamuli maiki ekjon, tai laga noukar ke saise.
Aru sabi, etiya pora sob manu khan moike asirbad ase kobo#1.48 1 Sam. 1:11; Luke 1:42; Mal. 3:12. .
49Kelemane Mohan Isor pora moi nimite dangor kaam kori dise aru tai laga naam to pobitro ase.
50Aru tai laga morom to etiya pora loi kene aha din tak jun manu taike bhoi kore tai logote ase#1.50 Psa. 103:17..
51Tai laga hath pora bisi dangor kaam korise#1.51 2 Sam. 22:28; Psa. 89:10..
Aru jun manu tai laga monte phutani bhabona kore taikhan ke alag kori diye.
52Aru taikhan bohi kene raj kora jaga pora nichete girai dise#1.52 1 Sam. 2:7; Job 5:11; Psa.113:7-8..
Aru jun chutu hoise eitu khan ke uthaise.
53Aru bhuka thaka khan ke bhal saman pora bhorta kori dise#1.53 1 Sam. 2:5; Psa. 107:9.,
Aru dhun manu khan ke khali kori dise.
54Aru tai laga noukar, Israel ke modot korise, tai laga morom to yaad korise#1.54 Psa. 98:3; Isa. 41:8-9.,
55Aru tai kotha korise moi khan baba laga baba khan ke- Abraham aru tai laga bacha khan logote hodai nimite#1.55 Gen. 22: 17; Mic. 7:20..”
56Aru Mary Elizabeth logote tin mohina tak thakise aru etu pichete tai laga ghor te jai jaise.
Baptizma Diya John Jonom Kora
57Aru Elizabeth nimite bacha pabole laga homoi ahi jaise aru tai ekjon chokra ke jonom dise. 58Tai laga ghor manu aru usorte thaka khan Probhu pora kiman dangor aru morom kaam korise etu dikhi kene tai logote khushi korise.
59Aru bacha ath din hoi thaka homoi te taikhan bacha ke sunnot kori bole anise, aru tai laga baba Zechariah laga naam te rakhibole thakise#1.59 Gen. 17:12; Lev. 12:3.. 60Hoilebi tai laga ama pora koise, “Nohoi. Taike John laga naam pora he matibo.” 61Aru taikhan koise, “Apuni laga ghor manu bhitor te kun bhi etu naam thaka manu nai.” 62Aru taikhan tai laga baba ke hath dikhai kene ki mati bole mon ase etu hudise. 63Tai laga baba pora likhi bole saman mangise aru likhise, koise, “Tai laga naam to John ase.” Titia taikhan sob asurit hoi jaise. 64Aru achanak pora tai laga mukh khuli se aru tai laga jiba to hili se, aru tai Isor ke asirbad dise.
65Sob Judea laga jagate etu laga kotha he koi thakise, aru jiman manu taikhan usorte thakise, taikhan sob bhoi hoise.
66Jun manu etu kotha khan hunise etu sob taikhan nijor laga monte rakhise, aru koi thakise, “Etu bacha kineka hobo?” Kelemane Isor laga hath tai logote asele.
Zechariah Laga Bhabobani
67Titia tai laga baba Zechariah ke Pobitro Atma pora bhorta hoise aru tai koise,
68“Asirbad hobo Probhu, Israel laga Isor,
Kelemane Tai modot kori bole ahise, aru Tai laga manu khan nimite ki bhabise etu purah hoise#1.68 Psa. 111:9; 41:13..
69Aru amikhan nimite Tai laga noukar David laga porial te ekjon mukti laga seing ulai dise#1.69 Psa. 132:17; Jer. 30:9.,
70Jineka tai purana homoi te pobitro bhabobadi laga mukh pora koisele.
71Biya pora mukti pabo aru taikhan laga hath pora amikhan ke bachai lobo#1.71 Psa. 106:10..
72Tai eneka kori kene amikhan baba laga baba khan uporte morom to dikhai dibo.
Aru tai laga ki pobitro vachan dise etu yaad koribo.
73Aru juntu kosom Abraham amikhan baba laga baba khan logote khaise, etu dibo nimite #1.73 Gen. 17:7; Psa. 105:8-9.
74Aru amikhan ke dushman laga hath pora bachai kene ulai luwa nisena amikhan taike bhoi nakori kene tai laga sewa koribo,
75Pobitrota te aru sapha pora taike hodai mohima koribo.
76Aru apuni ke, oh bacha, sob pora dangor bhabobadi matibo kelemane apuni Probhu laga age te jabo aru rasta taiyar koribo#1.76 Mal. 3:1; Isa. 40:3..
77Tai laga manu khan ke poritran laga gyaan dibole, taikhan laga paap pora maph pai ja-a dwara.
78Aru etu sob to purah hobo kelemane amikhan laga Isor to morom aru nomro ase.
Etu nimite uporte thaka ujala bhi amikhan ke modot kori bole ahibo,
79Aru jun andhera te bohi ase aru mora-laga chaya te bohi kene ase taikhan uporte ujala thakibo; amikhan laga theng to shanti laga rasta te bera bole dibo#1.79 Isa. 58:8; 60:1-2; 9:2..”
80Aru bacha to dangor hoise aru atma te takot hoise, aru tai jongol te thakise jitia tak tai nijorke Israel manu usorte ahi dikhai diya nai.
Currently Selected:
Luke 1: ISVNag
Highlight
Share
Copy
Want to have your highlights saved across all your devices? Sign up or sign in
NAG-ISV
Creative Commons License
Indian Standard Version (ISV) - Nagamese (Indian Standard Version (ISV) - Nagamese), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
