Лукастар 9

Исусо бишалэл пэстирэн апостолонэн тэ роспхэнэн Радосаво Лав

1Исусо стидя екхэтанэ дэшудуен апостолонэн и дя лэнди зор и баримос тэ вытрадэн бэнгэн и тэ састярэн насвалимастар. 2И бишалдя лэн тэ роспхэнэн палав Дэвлэско Тхагаримос и тэ састярэн насвалэн. 3Пхэндя лэнди:

— Нисо на лэнтэ пэса андо дром: ни дэсто, ни траста, ни марно, ни ловэ, ни авэр йида. 4Андэ саво чер тумэ тэ зажан, котэ ашэнпэ и котар жан майдур. 5Сар мануша тумэн на прилэна, тунчи, сар авэна тэ выжан колэ форостар, обмарэн пош тумарэ пэрнэндар, мэк када авэла важ лэнди шпэра.

6Дэшудуй жыле андо дром, пэрэжанас гав гавэстэ, роспхэнэнас Радосаво Лав, и андэ всаворэ тхана састярэнас насвалэн.

Иродо ашунэл палав Исусо

7Дума пала вся када дожыля кав рай тетрархо Иродо. Вов дивосайля, колэстар со екх пхэнэнас: када Иоано жундиля андай мулэ, 8авэр — со када сикадяпэ Илия, ай авэр — со када жундиля андай мулэ екх андай дэлмутно пророко. 9Иродо пхэндя:

— Иоаности мэ отшындэм шэро. А ко тунчи Кадва Мануш, пала саво мэ ашунав?

И вов родэлас тэ дикхэл Исусос.

Исусо чялярэл майбут, сар панч мии манушэн

10Апостолоря рисайле и роспхэндэ Исусости пала вся, со онэ стердэ. Тунчи Вов ля лэн Пэса, и онэ жыле ежэнэ биманушэнго кав форо, саво акхарэлпэ Вифсаида. 11Нэ бут мануша ужангле пала када и жыле палав Исусо. Вов мишто лэн приля, пхэнэлас лэнди палав Дэвлэско Тхагаримос и кадя ж састярэлас колэн, касти када сас трэбуй. 12Вряма жалас кай рят, и дэшудуй поджыле кав Исусо и пхэндэ:

— Отмук манушэн, соб онэ тэ жан андэ пашэ тхана и гава тэ аракхэн, кай тэ ратярэн и тэ хан, колэстар со амэ катэ андэ биманушэнго тхан.

13Исусо пхэндя лэнди:

— Тумэ дэнтэ лэнди тэ хан.

Сытярнэ дивосайле:

— Амэндэ качи панч марнэ и дуй маще. Со амэнди, тэ жас тэ тинас хамос важ всаворэ акала мануш?

14Котэ сас екхэн муршэн варикай панч мии. Исусо пхэндя сытярнэнди:

— Розбэшлярэн манушэн по пандэша.

15Сытярнэ кадя тердэ. Кала всаворэ бэшле, 16Исусо ля панч марнэ и дуй маще, вазгля якха по болыбэн и пхэндя наис палав хамос. Тунчи Вов ля тэ пхагэл марно и мащё и тэ дэл Пэстирэ сытярнэнди, кай кола тэ роздэн манушэнди. 17Всаворэ ханас и чялиле, и стидэ инке котора савэ ашылепэ, андэ дэшудуй барэ трасты.

Пэтро прижанэл Исусос Христоса

18Екхварэс, кала Исусо мангэласпэ Дэвлэс ежэно, найдур Лэстар сас Лэстирэ сытярнэ. Вов пушля лэндар:

— Пала кастэ прилэн Ман мануша?

19Онэ пхэндэ:

— Палав Иоано Болдэмарё, ай авэр — палав Илия, ай авэр пхэнэн, со екх андай дэлмутно пророко жундиля.

20— А тумэ важ касти прилэн Ман? — пушля лэн Исусо.

— Дэвлэско Христосо, — пхэндя Пэтро.

Исусо пхэнэл палав Пэско миримос и кай Вов жундёла

21Нэ Исусо припхэндя лэнди, кай никасти тэ на роспхэнэн пала када. 22Пхэндя:

— Шаво Манушыкано авэла андэ бари грыжа, и Лэс на прилэна пхурэдэра, барэ рашая и сытяримаря Законостирэ. Вов авэла умардо, ай по трито дес жундёла.

23Тунчи Исусо пхэндя лэнди:

— Сар ко камэл тэ жал пала Мандэ, мэк отпхэндёл ежэно пэстар, кажно дес лэл пэско трушул и жал пала Мандэ. 24Кодва, ко камэл тэ фэрисарэл пэско жувимос, хасарэла лэс, а ко хасарэла пэско жувимос важ Манди, кодва фэрисарэла лэс. 25Со за мищимос манушэсти, сар вов лэла всавори люма, а ежэно хасавэла и терэла грыжа пэсти? 26Ко лажала Мандар и Мэрнэ лавэндар, колэстар лажала и Шаво Манушыкано, кала авэла андэ Пэстири слава и андэ слава лэ Дадэстири, и свэнтонэнца ангелонэнца. 27Пхэнав тумэнди чячимос: исин машкар тумэндэ кола, савэ тэрдён катэ, онэ на мэрэна, сар удикхэна о Тхагаримос Дэвлэско.

Исусо дэл дума лэ Моисеёса и Илияса

28Кала прожыля варикай охта деса, сар Исусо пхэндя кала лава, Вов ля Пэтрос, Иоанос и Иаковос и вазгляпэ по плай тэ мангэлпэ Дэвлэс. 29Андэ кодья вряма, сар мангэласпэ, Лэско муй парудиля, Лэстири йида ашыля парни тай свэтосавэлас. 30И акэ, авиле дуй мурш, савэ линэ тэ дэн дума Исусоса, — када сас Моисеё и Илия. 31Онэ авиле андэ бари слава и пхэнэнас, со Лэсти трэбуй тэ жал андо Иерусалимо кай тэ ашавэл кадья люма. 32Пэтро и ко сас лэса засутэ. Но сар просутэпэ, удикхле слава Исусостири и дуен муршэн, савэ тэрдёнас паша Лэстэ. 33Кала мурша линэ тэ жантар, Пэтро пхэндя Исусости:

— Сытяримари! Амэнди катэ фартэ мишто! Амэ стераса трин катуны: екх Тути, екх Моисеёсти и екх Илиясти.

Ежэно на полэлас, со дэлас дума. 34Кала вов дэлас дума, авиля облако пэр лэндэ и онэ попэле талав лэстэ. Сар попэле андо облако, онэ фартэ пэрэдарайле. 35Андав облако пхэндя гласо:

— Када Мэрно Шаво, Мэрно вытидо. Лэс ашунэн!

36Сар гласо на ашыля, онэ удикхле екхэс Исусос. Онэ ашэнас мулком пала кода и андэ кодья вряма никасти на роспхэнэнас, со онэ дикхле.

Исусо састярэл шаворэс найжужэ духостар

37Пэ авэр дес, кала онэ змукэнаспэ пав плай, Исусос ажутярэнас фартэ бут мануша. 38И екх мануш андар лэндэ зацыписайля:

— Сытяримари! Мангав Тут, подикх по мэрно шаво, вов екх мандэ. 39Лэс схутилэл и тасавэл духо, и тунчи шаворо лэл тэ цыписавэл, тэ тиносавэл и тэ мукэл саля. Духо фартэ марэл лэс и тунчи цыра отжал лэстар. 40Мэ манглем Тирэн сытярнэн тэ вытрадэн лэс, но онэ на вытрадэ.

41— Напатимаско и билажавардо родо, — пхэндя Исусо. — Скачи Манди тэ авав тумэнца и тэ тэрписарав тумэн? Ан тирэс шавэс кардэ.

42Кала шаворо инке жалас, бэнг шутя лэс пэ пхув и ля тэ марэл лэс. Но Исусо запхэндя найжужэ духости, састярдя шаворэс и отдя лэстирэ дадэсти. 43Всаворэ дивосайле, саво баро Дэл.

Исусо упалэ пхэнэл палав Пэско миримос

Андэ кодья вряма, сар всаворэ дивосавэнас колэсти, со тердя Исусо, Вов пхэндя Пэстирэ сытярнэнди:

44— Ашунэн мишто, со Мэ тумэнди икхатар пхэнава: Шаво Манушыкано сыго авэла отдино андэ васт манушэндирэ.

45Но онэ на полинэ, со Вов пхэндя. Лэнди када сас затердо, и онэ на полинэ, со сас пхэндо, а тэ пушэн Лэс пала када лав даранас.

Сытярнэ ханпэ, ко лэндар майбаро

46Машкар сытярнэ екхвар сас дума пала кода, ко лэндар майбаро. 47Исусо жангля, со онэ гындонас андэ водя, ля цэкнэс бэятос и тходя паша Пэстэ.

48— Ко важ Мэрно алав прилэл акацавэс бэятос, — пхэндя Исусо, — кодва и Ман прилэл, а ко прилэл Ман, кодва прилэл Колэс, ко Бишалдя Ман. Ко машкар тумэндэ майцэкно всаворэндар, кодва и майбаро.

49Иоано пхэндя Лэсти:

— Сытяримари! Амэ дикхле манушэс, саво Тирэ алавэса вытрадэл бэнгэн. Амэ запхэндэ лэсти, колэстар со вов на пхирэл пала Тутэ екхэтанэ амэнца.

50— На запхэнэн, — пхэндя лэсти Исусо. — Ко на жал пэ тумэндэ, кодва пала тумэндэ.

Самаряноря на прилэн Исусос

51Кала Исусости поджыля вряма тэ ваздэлпэ по болыбэн, Вов ля андэ годи со трэбуй тэ жал андо Иерусалимо. 52Англал Пэстэ Вов бишалдя пэстирэ манушэн, онэ жыле андо екх андай самариятирэ гава тэ пригытон вся. 53Нэ мануша, савэ жувэнас котэ, на прилинэ Лэс, колэстар со Вов жалас андо Иерусалимо. 54Лэстирэ сытярнэ, Иаково тай Иоано, дикхле када и пхэндэ:

— Рай! Камэс, амэ припхэнаса ягати тэ сжал пав болыбэн и всаворэн лэн тэ спхабарэл?

55-56Исусо обрисайля, запхэндя лэнди.#9.55-56 Андэ коисавэ гречески манускрипторя инке исин кацавэ лава: «тай пхэндя: "Тумэ на жанэн, савэ тумэ духостар. Шаво Манушыкано авиля, тэ на хасарэл манушэндирэ водя, а тэ фэрисарэл лэн"». И онэ жыле андэ авэр гав.

Исусо пхэнэл, сави цымин, кай тэ жан пала Лэстэ

57Сар онэ жанас пав дром, екх мануш пхэндя Исусости:

— Мэ жава пала Тутэ андо всаворэ тхана, кай Ту жаса.

58Исусо пхэндя лэсти:

— Кай лисоря исин тхана, кай онэ жувэн, и кай чирикля болыбнастирэ — пэско тхан, а Шавэсти Манушыканэсти най кай шэро тэ тховэл.

59Аврэсти манушэсти Исусо пхэндя:

— Жа пала Мандэ.

Кодва пхэндя:

— Рай, дэ манди майанглал тэ жав и тэ гаравав пэстирэ дадэс.

60— Мэк мулэ ежэнэ гаравэн пэстирэн мулэн, а ту жа и роспхэн пала Тхагаримос Дэвлэско, — пхэндя лэсти Исусо.

61Инке екх мануш пхэндя Лэсти:

— Рай, Мэ жава пала Тутэ! Нэ дэ манди майанглал тэ жав и тэ дикхав пэско йири.

62Исусо пхэндя:

— Ни екх мануш, саво тховэла васт пэско по плуго и обдикхэлпэ палпалэ, на поджал важ Тхагаримос Дэвлэско.

Currently Selected:

Лукастар 9: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб