Mark 11
11
1Naŋ alo neira we rivtag Jerusalem, a Bethphage veta wa a Bethania ape tauwe Olivet, ni we vatraŋ at o tiŋqoro anana pulrua, ti vet mun rara wa, 2Ura mule at ilo vutre vanua we sar taniniga kamurua; wa rigrig kamurua we mule pata ilolona kamurua te ilo suar o nati ass me ligo vataqav veta; isei gate pute ilo tiqa avunana; ura mamasug, wa ura lavia ma. 3Pa si sei qe vava mun kamurua wa si, Apesava kamurua we ge tamaike? ura vava si, I Lord we maros ranua; wa rigrig ni te vatraŋ kelua ma iake. 4Naŋ rara me mule at, wa we ilo suar o nati ass me ligo vataqav ape mateima a varea alo matesala we tawela, wa rara we mamasug. 5Naŋ o tuan ragai we tiratira aia me vet mun rara wa, Kamurua we ge o sava, we mamasug o nati ass? 6Wa irara me vava muneira tama i Jesus me vareg ti munrara apena; wa neira we maukeg mun rara. 7Naŋ rara we lav o nati ass sur Jesus, wa we savrag kalo ivunana nor o siopa ŋaŋ, wa ni me pute avunana. 8Wa we qoqo me lilŋag nor o siopa alo matesala; wa o tuaniu mulaŋ me tara o wotiu alo tantangae ŋaŋ, wa we vear goro o matesala nia. 9Wa irasei we tira moai, tarasei we tataga a tagir we awoawo we vava si, Hosana; tur wievavae i gene we mule ma alo sasan Lord. 10Turwia o marana we mule ma alo sasan i Lord, anon tamanina i David nane; Hosana vawo tuka.
11Naŋ i Jesus me mule pata i Jerusalem, wa ilo vatine we roŋo; wa me ate kelkel paso avune gene ŋaŋ, ape o masao ravrav me wesu veta, ni me rowolue kel i Bethania, tara numei nirua amaia.
12Naŋ a tavala maran, neira me rowolue nan o Bethania, wa ni me maliŋsala; 13wa ni we ilo o fig aras, o naunaui apena, wa ni me mule sin ilo suar wun o sava avunana: nava me niŋa veta apena, ni gate ilo o sava, nava vires naunaui; o manigiu o tau fig tagai tiqa. 14Naŋ i Jesus me valui goro, me vava munia wa, Nipea o tanun a gana o woai naniko aŋaisa ti tuai ti tuai. Wa ira tiŋqoro anana me roŋotag mora.
15Naŋ neira we niŋa Jerusalem; wa i Jesus me mule pata ilo vatine we roŋo, me qeteg vure lue irasei we tuvatuvag wa irasei we wolwol alo vatine we roŋo, wa me wil tapeliŋ o tano som norasei we valvalete, wa o tano putepute ŋaŋ norasei we wolwol qona. 16Wa ni gate ukeg isei sin mule raveaglue o vatine we roŋo vag o tapera. 17Naŋ ni me vatogo raka, ti vet muneira wa si, Gate rave veta si, Te loglog naimak o ima tataro mun o veve sul nol? nava kamiu me ge mun liara vuspal. 18Pa ira vatvatogo tara oloolo liwoa me roŋotag mora, wa me sike raka neira te ge tagea tama avea ineia. Ape neira me gogoloa, o manigiu o sul nol we mamakei lava ape non o vatvatogo. 19Naŋ ti ravrav siwo, wa ni we roworowolue at nan o laqlaqe vanua.
20Naŋ a tavala maran alo neira we mulemule taso, neira me ilo mora o fig ilone me kor veta alo garina kalo ma. 21Naŋ i Peter we lolomaran kel apena we vava munia wa, Rabi, ilo, o fig ko me vivnag ti me kor veta. 22Naŋ i Jesus me valuia ti vet muneira wa, Tur taur momiu o nomtup apen God. 23Ape we nun na we vava mun kamiu si, Valsei qe vet mun o tauwe iloke si, Te sau kalo ko, wa te savragiko ilo lama; wa sin qe tete nomvaruarua alo toqana apena, nava we nomtup si o gene ŋaŋ ni we vet apena te ge ran, o sava tea ni ta vava apena te lai munia. 24O manigiu o ine na we vet mun kamiu wa, O savasava ŋaŋ kamiu te paere alo tataro, tur nomtup si kamiu we taur momiu, wa te lai mun kamiu. 25Wa alo si kam qe tira we tataro, tur nomvitag si o manigiu tea tapena amensei; si i Tamamiu mulaŋ we tavunana a nomvitag napugamiu mun kamiu. 26Nava si kam qe tete nomvitag momiu, i Tamamiu mulaŋ we tavunana tete nomvitag napugamiu.
27Naŋ neira we niŋa mulaŋ i Jerusalem; wa alo ni we mule kelkel alo vatine we roŋo, ira moe oloolo tara vatvatogo, tara tamtamaragai mulaŋ, we mule ma suria, 28we vava munia wa si, Ko we gege tamaike mun o mana ta avea? wa isei me la muniko o mana iloke si ka ge tamaike? 29Pa i Jesus me valui goro we vava muneira wa, Wa inau mulaŋ na te varus mok kamiu o vavae tuwale, wa tur valui goro inau; wa paso nan na te gaganag mun kamiu si na we ge o ike ŋaŋ mun o mana ta avea. 30O vasugroŋo mon John, we ta vunana ma, si ma nan o tanun? Tur valui goro inau. 31Naŋ neira me varvava vires neira, we vet si, Nina ta vava si, Ta vunana ma; ni te varus wa si, Apesa kamiu gate nomtupua? 32Pa si nina ta vava si, Ma nan o tanun — pa neira me gogolo o sul; ape neira nol me nonom apen i John si o prophet ran. 33Naŋ neira me valui, we vet mun Jesus wa, Kamam gate gilala. Wa i Jesus we valui we vet muneira wa, Wa inau mulaŋ, na gate gaganag mun kamiu si mun o mana ta avea nau we gege o ike ŋaŋ.
Currently Selected:
Mark 11: MOTA
Highlight
Share
Copy
Want to have your highlights saved across all your devices? Sign up or sign in
New Testament was published by the British and Foreign Bible Society in 1931.
