YouVersion Logo
Search Icon

Mark 9

9
1Naŋ ni me vava muneira wa, We nun na we vava mun kamiu si, O tuanrasei we tira iake nake tete nam ilo o matea neira gai ilo o marana non God we susurut ma mun o vavakae.
2Naŋ o qoŋ laveatea me paso, i Jesus we lav sea i Peter tana i James ratol John, we mulevag kalo iratol ivune tauwe we eleele, ineira magesera we asau. Naŋ natarapena me sea nan amoa ape nagoratol, 3wa non o siopa me vagovgov raka, we aqaga les tam o snow, tama itagai ituwale tamaira asaasa siopa a marama we ge lai we aqaga tamaine. 4Naŋ me suar ti munratol si a ilo Elia tana Moses, wa irara we varvavava amen Jesus. 5Pa i Peter we valui goro, we vava mun i Jesus wa, Rabi, we wia ras si nina a toga iake; wa nina tape o paito ta tol apena, muniko tuwale, wa mun i Moses tuwale, wa mun i Elia tuwale. 6O manigiu ni gate gilala o sava sin vava, apen ratol we gogolo aneane. 7Naŋ o maligo we taqa ma we malumalu goroa; wa o liŋai me rowolue ma nan o maligo, we vava si, Iloke gina natuk o meratape, tur tiŋqoro ineia. 8Wa gaplot ratol we ateate kelkel, wa gate ilo mulaŋ isei, nava i Jesus magasena amen ratol.
9Naŋ neira we taqtaqel siwo nan o tauwe, wa ni we gatogoro ratol nan wa gaganag lue solsol munsei o gene ŋaŋ ratol me ilo, gai niŋa i Nat tanun me tavaraka kel nanra mate. 10Wa iratol me taur o vavae ilone alo toqaratol, we varsikesike si o sava o tavaraka kel nanra mate. 11Naŋ ratol me varus raka ineia, we vava was, Apesava ira vatvatogo we vava si amon Elia sin mule moai ma? 12Naŋ ni me valuiratol me vava munratol wa, Elia te mule ran moai ma, wa we map mantag kel o savasava ŋaŋ; pa me rave veta tam avea apen i Nat tanun sin roŋovivtig vagaqoqo, wa si a ge tagtageagia? 13Panava na we vava mun kamtol wa, si i Elia me mule veta ma, wa neira me ge veta munia o gene ŋaŋ neira me maros, tama me rave veta ti ape neia.
14Naŋ me niŋa siwo veta sur ira tiŋqoro anana, neira we ilo o sul liwoa wawaliogira, wa ira vatvatogo we varsikesike amaira. 15Wa gaplot o sul nol we iloa, we mamakei aneane apena, wa we valago suria we wievavae neia. 16Naŋ ni me varusira si, Kamiu we varsikesike o sava amaira? 17Naŋ o tuara alo vatitne sul me valui goroa we vet wa, Vatogo, na me lav i natuk ma suriko, o vui luto we gege ineia. 18Pa alo masaoi ni we tauria avea, ti visaragia; wa ti usa, ti gargara ŋiŋiŋ mun naliwona, wa o rurus ti ge neia apena. Wa na me vava munra tiŋqoro anama si neira a vure luea, nava neira gate mana apena. 19Naŋ ni me valuia, ti vet wa si, Awo, taraŋiu nom qerqeret, na te toga amen kamiu gai niŋa aŋaisa? gai niŋa aŋaisa na te roŋo maul apen kamiu? tur lavia ma sur inau. 20Naŋ neira me lavia ma suria; wa alo we iloa o vui me sare worawora gaplotua; wa ni me mas ilo tano, ti lolosa, ti usausa. 21Naŋ ni me varus i tamana wa si, Alo masaoi tama avea iloke me qeteg raka amaia? Naŋ ti vet si, Nan o natmera ran ma. 22Wa vagaqoqo me savragia ilo av si ilo pei sin ge tagea ranua; pa si qe lai tea amaiko, ka piriŋ kamam wa ka lolomagarosa kamam. 23Pa i Jesus me vet munia wa, Sa si qe lai! O savasava ŋaŋ te lai ran munsei qe nomtup. 24Wa gaplot i taman o reremera me awo, me vava mun o surmata si, Nau we nomtup, Lord, ka piriŋ nok o nomqerqeret. 25Naŋ i Jesus we ilo si o sul we valago tuwale apena, wa we ŋorov goro o vui gagavu, ti vava munia wa, Vui luto wa qorowono, na we vatraŋiko, rowolue nan alolona, wa nipea kalo kel mulaŋ ilo lolona. 26Wa me awoawo paso, wa me sare vagaqoqo paso ineia ni qara rowolue. Pa i gene me toga tam o tamate, o manigiu si we qoqo me vet si, Ni me mate veta. 27Nava i Jesus me taur goro napanena we rave kaloa, wa ni me tira raka apena. 28Naŋ ni me kalo pata ilele ima, wa ira tiŋqoro anana me varusia roroŋo wa si, Apesava kamam gate mana lai si a vure luea? 29Naŋ ti vava muneira wa si, O gene ŋaŋ we tamaike gate rowolue lai nava mun o tataro wa o garagara mamasa.
30Naŋ neira me rowolue nan o vatine, wa we mule raveaglue o Galilea; wa ni gate maros si sei tea a gilala apena. 31Ape ni me vatvatogo raka ira tiŋqoro anana me vet muneira wa si, Me ukeg vano i Nat tanun ilo panera tanun ŋaŋ, wa neira te ge mateia; wa me ge mate pasoa, wa alo qoŋ vatoliu ni te tavaraka kel. 32Pa neira me loloqoŋ o vavae ilone, wa we gogolo nan wa varusia apena.
33Naŋ ni me niŋa Kapernaum; wa ineia alele ima veta, wa me varus neira si, Kamiu me varsikesike raka vires kamiu a matesala apesava? 34Pa neira me naenae roroŋo; o manigiu neira me varvar sikesike ti a matesala apensei te liwoa. 35Naŋ ni me pute siwo we log ma ira numei nirua, we vet muneira wa, Si sei qe maros we moai, ni te tagir nan o tanun nol, wa te rowrowovag muneira nol. 36Wa ni me lav o natmera, we vatira ineia alo vatitnara; wa ni me sapaloa we vava muneira wa, 37Isei qe lav vasgot i tuwale nanra natmera ŋaŋ we tamaike alo sasak, ni we lav vasgot inau; wa isei qe lav vasgot inau, ni gate lav vasgot inau, nava i gene me vatraŋ nau ma.
38Naŋ i John me valui goroa, we vet wa, Vatogo, kamam me ilo isei we vure lue o vui we tatas ŋaŋ alo sasama, pa ni gate tataga amenina; wa kamam me ge goroa, ape ni gate tataga amenina. 39Nava i Jesus me vet wa, Turpea ge goroa: ape itagai isei te ge lai o vasasa alo sasak, wa rigrig ni te vava tatas inau. 40O manigiu isei qe tete tavaliu munina, ni we piriŋ nina. 41Ape si sei qe la mamiu o lasa pei alo sasak, si ikamiu anan i Christ, we nun nau we vava mun kamiu, ni tete taur matila non o rusarusai apena. 42Wa isei qe ge tutuag i tuwale nanra mantagai iloke we nomtup nau, we wia raka sage munia si o vat galgalolo liwoa qe toga waliog goro nanenena, wa qe savragia ilo lama. 43Pa si napanema qe ge iniko si ka tutuag, ka sal mot ilone; we wia muniko si ka kalo pata mut ilo esu, nan mun napanema tavalrua we toa siwo ilo Geena, ilo av tete ge mate lai, 44alo masaoi nor o ulo gate paso vunvun aia, wa tete ge mate lai o av. 45Wa si naraŋoma qe ge iniko si ka tutuag, ka sal mot ilone; we wia muniko si ka kalo pata qages ilo esu, nan mun naraŋoma tavalrua we savragiko ilo Geena, ilo av tete ge mate lai, 46alo masaoi nane nor o ulo gate paso vunvun aia, wa tete ge mate lai o av. 47Wa si namatama qe ge iniko si ka tutuag, ka wakele lue; we wia muniko si ka kalo pata matapei taval tuwale ilo marana non God, nan mun o matai tavalrua we savragiko ilo Geena, 48alo masaoi nane nor o ulo gate paso vunvun aia, wa tete ge mate lai o av. 49Ape te tasig o val tanun mun o av, wa te tasig o val gene oloolo mun o nawo. 50We wia ras o nawo; nava si o nawo qe tamtamelea, kam te ge gogona kel mun o sava? Tur kokor o nawo alo ikamiu kel, wa tur togatoga valval kamiu mun o tamata.

Currently Selected:

Mark 9: MOTA

Highlight

Share

Copy

None

Want to have your highlights saved across all your devices? Sign up or sign in