Kufuma 10
10
1Mzuri akambura Musa, Tonga ha Farao: naiosha ngoro yakwe yaemee, na ngoro ya wazoro wakwe, nimawike maluwano ama mangu ghati na ghati yawo: 2Utinde masikioni ha mwa nawako, na mwana wa mwana wako, vila niviketie Misri, na maluwano nimawikie hawo; nesa mutisiwe ti nimi Mzuri. 3Wakatonga Musa na Harun ha Farao, wakambura, Ni huwo eteta Mzuri, Izuwa wa Waebrania, Mtano rini wasua kuinama msongorana wangu? uwashighe wandu wangu wanitumikie. 4Ukasua kuwashigha wandu wangu, yoa, nineete yawo zighe ghati ya mihaka yako: 5Najo jinefinikira wusho wa isanga, mtano mundu teneidima kuliwona isanga: najo jinela mashigajiko mewashighajikie, meoho kutera kwa vua ya mabwe, jinela mti ose umea ngondeni henyu. 6Jineizuja nyumba jako, na nyumba ja wazoro wako, na nyumba ja Wamisri wose, sandu wesimewona wawaweeo, nete wawawee wawo, too weokie masangeni mtano yoo. 7Akagharuka, akafuma hena Farao. Wazoro wa Farao wakamburra, Mtano rini uu hetu mtegho? Washighe wandu wamtumikie Mzuri Izuwa wawo: toumetisiwa ti Misri ya teka? 8Wakahunduwa Musa na Harun hena Farao: akawawurra, Tongeni, mumtumikie Mzuri Izuwa wenyu; niani na niani enetonga? 9Akateta Musa, Na wujana, na waghosi tunetonga, na waana wa kiume na wa kibora, na ng’onji jetu na ng’ombe jetu tunetonga, tuoke na musi mbaha hena Mzuri. 10Akawawurra, Mzuri aoke na unywi, nikiwashigha na wadongo wenyu: yoa, uwiwi wuoho wushoni henyu. 11Si huwo: tongeni, mbabaha, mumtumikie Mzuri, nihuwo mwekundie wenye. Wakakinywa wushoni ha Farao.
12Mzuri akamburra Musa, Uronge mkono wako wanga ya isanga la Misri hena zighe, jikwee wanga ya isanga la Misri, jirela ijani lose la isanga, mose ishighaje vua ya mabwe. 13Akaronga Musa isibo wanga ya isanga la Misri, akaete Mzuri ngungu ya mbai ya kifuma‐zano ghati ya isanga, hemusi puti na kio bagha, mtano ikaoka heyawo, ngungu ya mbai ya kifuma‐zano ikajiete zighe. 14Jikakwea zighe wanga ya isanga lose la Misri, jikatua ghati ya mihaka yose ya Misri; jaemee muno; kuwoka kwakwe tehena zighe sa iji, nete nyuma yajo tejineoka. 15Jikafinikira wusho wa isanga lose, isanga likagerwa kija; jikala mani mose ma isanga, na ndunda jose ja miti ishighaje vua ya mabwe: tekishighajike kindu kimea wanga ya mti, nete mani ma ngondeni, ghati ya isanga lose la Misri. 16Akasara Farao kuwaitanga Musa na Harun; akaghamba. Namtekwia Mzuri Izuwa wenyu na unywi. 17Ingeriaha mnishighie, nakusemba, matekwa mangu kandu aka, mumwombe Mzuri Izuwa wenyu, aniwushijie kifwa iki tiki. 18Akafuma hena Farao, akamuomba Mzuri. 19Mzuri akaigharusha ngungu ya mbai ya kigwa‐zano, ya zinya nyingi, ikajiwushija zigheikajitagha hena ndiwa ya Sham; tayashighajika zighe nete mwe mihakeni ha Misri. 20Akaidindija Mzuri ngoro yakwe Farao, tashigha waana wa Israeli kutonga.
21Mzuri akamburra Musa, Uronge mkono wako wanga, lineoka kija wanga ya isanga la Misri, kija kya kubabatwa. 22Akauronga Musa mkono wakwe wanga; hakaoka kija kibaha ghati ya isanga lose la Misri misi mitatu; 23Tembonie mundu mndwawo, tewukie mundu handu hake, misi mitatu; kake hena waana wa Israeli wose hakaoka kyangaji mararoni hawo. 24Akamwiitanga Farao Musa, akaghamba, Haya, mtumikie Mzuri; ngonji jenu na ng’ombe jenu waikae tiki: wadongowa watonge na unywi. 25Akaghamba Musa, Utuinge mikononi hetu itasi na ndaswa tumng’olie Mzuri Izuwa wetu. 26Mafio metu menetonga kimwe na uswi; touneshighajika mtano mkwa; tung’ole hena kumtumikia Mzuri Izuwa wetu; uswi totutisiwe sandu tunemtumikia Mzuri mtano@ tuneikatufike. 27Akaiosha idindie Mzuri ngoro yakwe Farao, tekundie kuwashigha. 28Farao akamburra, Tongeni kufuma hangu, ureyoa usiniwonewa wusho; musi uneikauniwone wusho unefwa. 29Akaghamba Musa, Kididi wateta, sinekuwonawa wusho.
Currently Selected:
Kufuma 10: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
