Matyu 10

Osep aposel angainsak

(Mak 3.13-19 e Luk 6.12-16)

1Yesus gi ke ila disaipel songotno orwo e kar isak arit ma tikaranga tisapir angelo soulu e tidue osep ka tipaia e tarna lisak sasi tipolou itau blang. 2Ila aposel songotno orwo angainsak langane. Aposel kene ina angaine Saimon ka angaine silang Pita. E ina tovro Andru iye aposel blang. E Jems e Jon ka isak gute Sebedi titno arang. 3E Filip e Bartolomyu e Tomas e Matyu ka oglou iye due takis ke osep. E Jems silang ka iye gute Alfius otno arang e Tadius. 4E Saimon silang ka iye gute ka tisir iye gute Selot ina. Osep Selot ina isak osep ka tiwaiki kantri silang plau isak kovok. E Judas Iskariot ka iye gute ka mase lai Yesus ina.

Yesus pagei ila aposel ma tidue ila bokongon

(Mak 6.7-13 e Luk 9.1-5)

5Yesus pagei aposel songotno orwo tonari e wai ke isak langane. “Umala e umodong mawa ke osep ka isak osep Yuda ina kovok. E umesep ke osep Samaria ina urok armok kovok. 6Umala ke osep Israel ina ka isak langka sipsip ka timina kodong vala. 7Alo ka umelila umanapapra omon langane. ‘Omur ka Ida Tapolngon plaue isuk boto polou.’ 8Umodue osep ka tipaia tipolou itau blang e umodue osep ka timete kodong tipoga titito blang e umodue osep ka paiangan lepra due isak tidong itau blang e umasapir angelo soulu ke osep. Oku ane umodue arit ke ngong adai e umekli ngong ine kovok e ma umakar wan bitna bitna ke osep adai e tikli umu ine kovok blang. 9Umodue e umakalke gol koke silva koke mani kapa kovok. 10E alo ka umelila umakalke lumu kerka koke molo silang koke su koke matu kovok. Langka osep tiboko ke osep leklou io osep leklou tonari ma tikar ngangon ke isak.”

11“Alo ka umopolou ke armok omba koke armok daudeng ume-krim gute ka ila elio isuk isuk itau e umodong kap iye la lama umo-songon armok are. 12Alo ka umesep ke ninu umawai ke osep ka tidong ine langane. ‘Ida Tapolngon ila elio itau ka due aitno lumu epen dong kap umu.’ 13E langka osep ka tidong ke ninu tonari isak osep itau ma lumu pelengon dong kap isak. E langka isak osep itau kovok ma lumu pelengon iding ke umu. 14Langka gute gesa aitno itau ke umu koke lumu pelengon kovok io umosongon ila ninu koke ila armok ari. E alo ka umosongone umasak group ke kopmu. Umodue elio tonari ma umenis isak ke urok elio soulu. 15Ngawai lokono ke umu. Ke oklou ka Ida Tapolngon wade osep ka pula keniye ine armok tonari ila ulesngen ma mole armok orwo Sodom e Gomora urok ules-ngen.”

Elio soulu bitna bitna ma tipolou

(Mak 13.9-13 e Luk 21.12-17)

16“Ngapagei umu ke osep e umodong langka sipsip titno e tidong langka gemle kevena. Aitno lumu mter itau ke wan bitna bitna langka mota aitno mter e ile itau ke wan e umodue elio molil molil langka belis. 17Umaplau umu itau kesua osep ma tidue umu umodong ke osep kaunsil ina amtarsak e ma tiules umu ke urok duningen ina ninu. 18Aitno lumu dagar ke ngong e ke batne langane osep ma tidue umu umevri ke osep ka tiplau omur emkil e osep ka tivri mgo ke omur omur amtarsak. Ma umapalongo urok e osep ka isak osep Yuda ina kovok ke aitno lumu ila dagar. 19E alo ka tidue umu umevri ke osep amtarsak aitno lumu mter pula ke wan ka umawai koke wan ka umodue kovok. Aurou. Alo ari Ida Tapolngon ma kar lumu pelengon ke umu ka ma umawai. 20E Pmomu Ano iye gute ka kar pelengon ke umu ka ma umawai e lokono umu tona umawai ine kovok.”

21“Osep ma tikar inarak saiver e inarak titovro ke osep leklou ma timluk isak timete. Osep sipmarak e titnarak ma tikar titorok ma timete e agau ma tikar sipmarak e titnarak ke osep ma timluk isak timete. 22E ma osep aitno lisak engil lokono ke umu batne aitno lumu dagar ke ngong. E langka aitno lumu dagar la lama wan ka pula keniye yagos ma Ida Tapolngon lua umu. 23Langka osep tidue agegeng ke umu ke armok kene deka umala umosuong ke armok silang. Ngawai dagar ke umu langane. Ma umala ke armok keniye ka tidong ke omur Israel dau kovok e Gute Ka Polou Langka Osep ma polou.”

24E Yesus wai pelengon ano langane. “Osep disaipel urok elio mole urok parerengen ila elio kovok e osep ka isak wokboi nating urok elio mole inarak puda ila elio kovok. 25Langka osep disaipel urok elio eriar langka urok parere-ngen are itau e langka osep ka wokboi nating urok elio eriar langka inarak puda are itau blang. Langka osep tisir ngong Belsebul ma tiwai langane ke umu blang.”#10.25 — Osep tisir Satan angaine silang Belsebul. Belsebul angaine dong ke Matyu 12.24 blang.

Ma osep tidue anit ke Ida Tapolngon

(Luk 12.2-7)

26“Umelim ke osep kovok. Kesua wan keniye ka oku ane kukwop e wan keniye ka iteile ine kovok mase ma tipolou malak. 27Pelengon keniye ka ngawai ke umu ke aivoro ma umawai ine ke oklou e umevri ke ninu tona e umapalongo osep ke pelengon ka ngawai epis epis ine ke umu. 28Umelim ke osep kovok. Tikaranga timter umu ma pampamu lumu timete e dau tikaranga timluk aitno lumu kovok. E umodue anit ke Ida Tapolngon kesua iye karanga due pogle ke osep pampamu lisak e aitno lisak ke omur hel. 29Umeile langane. Ke bilmu osep tidue burong ke monuk daudeng orwo ke toea kene. E dau monuk kene gene ke taklak kovok lama Pmomu aitno itau ke elio are. 30E silang Ida Tapolngon ile opomu elilo sesue tidong ke bara lumu. 31Deka umelim kovok kesua aling aling Ida Tapolngon aitno mter ke umu e umomole monuk daudeng pula pula.”

Itebisi ke Yesus kovok

(Luk 12.8-9)

32“Langka osep tipalongo osep leklou isak lou osep io ma ngawai ke Livou ka dong ke omur heven tididi ngong. 33E langka tiwai tile ngong kovok ke osep leklou io ma ngawai ke Livou ka dong ke omur heven tididi ngong kovok.”

Ma osep aitno lisak la ke Yesus vala

(Luk 12.51-53 e Luk 14.26-27)

34“Aitno lumu mter langane kovok. ‘Yesus me ma iye due osep aitno lisak epen pulu.’ Aurou. Ngame ma ngadue osep timluk pulu. 35Ngame ma ngadue gute e timla ma timluk pulu e apmang e tna ma timluk pulu e apmang e rana apmang ma timluk pulu. 36Ma osep inarak oul lokono isak osep ka tidong ke urok osua.”

37“Langka elio ka osep lana isak ke sipmarak koke titnarak koke titorok arang koke titorok apmang omba mole elio ka isak lana isak ke ngong deka tikaranga tidong lou disaipel kovok. 38E langka tipli tarna lisak e tididi ngong kovok tikaranga tidong lou disaipel kovok. Elio ka tipli tarna lisak ane langka aitno lisak mter urok mosongon ke taklak ane wan omba ke isak kovok. 39E langka tiwaiki urok mosongon dong ke taklak ane ma urok mosongon imina la. E langka tikar urok mosongon ke ngong ma tipado urok mosongon ka lokono.”

Ida Tapolngon ma due elio itau ke osep ka tilua ila osep

(Mak 9.41)

40“Gute gesa ka due umu umesep ke ila ninu due ngong ngasep blang. E gute ka due ngong ngasep ke ila ninu due gute ka pagei ngong ngame iye sep blang. 41Langka gute gesa due gute napaprangan ina sep ke ila ninu kesua iye gute napaprangan ina vala ma iye due wan itau lokono ka gute napaprangan ina ma due. E langka gute gesa due gute itau sep ke ila ninu kesua iye gute itau vala ma iye due wan itau lokono ka gute itau ma due. 42E langka gute gesa kar aki epen ke lou disaipel ka ila wan isuk boto vala ma iye inim kesua batne iye didi ngong lokono ma iye due wan itau lokono.”

Currently Selected:

Matyu 10: ANT

Highlight

Copy