Lucas 24

Jesús kawarimunqan

Mateo 28.1-10; Marcos 16.1-8; Juan 20.1-10

1Dominguman waraq waraqllañam Jesús pamparanqan kaqman warmikuna ëwayäqan alistayanqan mushkoq aćhakunata apakurkur. [Pëkunawanmi wakin warmikunapis ëwayäqan.] 2Ćhäyänanpaqñam sepultüra tsaparaq rumipis ukläman wititsishqa këkäñaq. 3Sepultüraman yëkurñam Teyta Jesúspa ayanta tariyäqantsu.

4Mantsakashqa këkäyaptinmi ishkaq runakuna chipipikyëkaq ratënishqa lädunkunaćhö yuriskiyäqan. 5Tsë runakunata rikëkurñam mantsakëwan patsaman pillatakïkuyäqan. Tsë runakunañam ñiyäqan: “¿Imanartan wañushqakuna pamparanqanćhö kawëkaq runata ashiykäyanki? 6Manañam këćhöñatsu. ¡Kawarimushqañam! Yarpäyë Galileaćhö këkar ñiyäshunqëkita: 7‘Runapa Tsurinqa#24.7 Runapa Tsurinpaq parlarqa kikinpaqmi Jesús parläqan. utsasapakunapa makinkunaman entregashqam kanqa. Crucificar wañutsiyanqanpikmi kimsa unaqta kawarimunqa’ ñir”.#Lucas 9.22, 44.

8Tsëñam warmikunaqa Jesús ñinqanta yarpaskiyäqan. 9Tsëpik kutiskirñam ćhunka uk (11) apostolkunata y tsëćhö runakunatapis willayäqan rikäyanqanta y wiyayanqanta. 10Tsë warmikunam kayäqan María Magdalena, Juana, Santiagupa maman María y mas warmikunapis. 11Warmikuna tsënö willayaptinpis manakaqkunata parlayanqanta yarparmi criyiyäqantsu. 12Wakin mana criyiyaptinpis Pedroqam Jesústa pampayanqan kaqman cörrilla ëwäqan. Sepultüraman qawëkurñam säbanasllataña rikëkur espantashqa kutëqan.

Emaúsman ëwaqkunata Jesús yuripunqan

Marcos 16.12-13

13Tsë unaqmi Jesúspa ishkaq qatiraqninkuna Emaús markaman ëwëkäyäqan. Emaúsqa Jerusalénpik ishkë höra ëwënöllam käqan. 14Pëkunaqa Jerusalénćhö llapan päsanqankunata parlarmi ëwëkäyäqan. 15Tsënö parlar ëwëkäyaptinmi Jesús yuriskir pëkunawan ëwäqan. 16Pëkunawan ëwëkaptinpis Jesús kanqanta manam reqsiyäqantsu.

17Jesúsñam tapöqan: “¿Imata parlartan ëwëkäyanki?” ñir.

Tsëñam llakishqa shäkuskiyäqan. 18Cleofás shutiyoq kaqñam ñëqan: “Pascuaman shamoq runakunaqa llapanmi musyayan Jerusalénćhö qanyätinkuna ima päsanqantapis. ¿Qamqa manaku musyanki?”

19Jesúsñam tapöqan: “¿Imatan päsashqa?” ñir.

Pëkunañam ñiyäqan: “Nazaret markapik Jesúsmi Teyta Diospa profëtan käqan. Pëmi Diospa poderninwan imëka milagrukunata rurar llapan runakunata Diospa willakïninta willäqan. 20Pëtam mandakoq cürakunawan autoridänintsikkuna Pilatuman entregayäqan crucificar wañutsinanpaq. 21Ñoqakuna yarpäyäqä Roma nacionpa mandunpik pë orqamänantsikpaq kaqtam. Kanan unaqwanqa kimsa unaqñam pëta wañutsinqan. 22Manam tsëpis tsëllatsu. Yanapayämaq warmikunam mana criyiypaqta willakayämushqa. Kanan waraq waraqlla Jesústa pampayanqanman ëwarshi 23ayanta tariyashqatsu. Tsëćhöshi angelkuna yuripuskir: ‘Jesúsqa kawarimushqañam’ ñir willayashqa. Tsëmi kutiskamur willayämashqa. 24Tsëmi wakin kaq discïpulunkunapis pamparanqan kaqman ëwar warmikuna willakuyanqannölla Jesúspa ayanta tariyashqatsu”.

25Jesúsñam ñëqan: “¡Qamkunaqa imaläya ćhukru shonqutan kayanki profëtakuna willakuyanqanta mana criyiyänëkipaq! 26¿Manaku yarpäyanki Cristo wañurraq llapanpaq munëniyoq kananpaq kanqanta?”

27Tsënö ñirmi Moisés qellqanqanpik qallëkur profëtakuna qellqayanqanyaq pëkunata tantiyatsëqan kikinpaq imata ñinqantapis.

28Emaús markaman ćhëkuyaptinñam pëkunapik Jesús päsakoq tuköqan. 29Tsënö päsakïta munaptinmi pëkuna rugar ñiyäqan: “Patsa tutapëkanñam. Këllaćhöña qepäkushun”.

Tsënö ñiyaptinmi markaman yëköqan pëkunawan qepänanpaq.

30Tsëpik mësaman uchïkurñam tantata aptarkur Teyta Diosta agradëciköqan. Tsëpikñam tantata pakiskir pëkunata makyäqan. 31Tsë höram Jesús kanqanta reqsiskiyäqan. Reqsiskiyaptinñam illakaskëqan.

32Tsëmi kikinkuna pura parlar ñiyäqan: “¡Jesús kaptinćhi nänićhö Diospa palabranta parlapämashqa shonquntsikpis ćhupukäqan!” ñir.

33Tsëpik tsinan höram Jerusalénman kutiyäqan. Ćhëkurñam tariyäqan tsëćhö këkaq runakunawan ćhunka uk apostolkuna qorikashqa këkaqta. 34Tsëćhö qorikashqa këkaqkunam ñiyäqan: “¡Rasunpam Teyta Jesús kawarimushqa! ¡Simóntapis yuripushqam!”

35Ñiyaptinñam Emaúspik kuteqkunapis willayäqan nänićhö ima päsanqanta y tantata pakinqan höra Jesústa reqsiyanqanta.

Apostolninkunata Jesús yuripunqan

Mateo 28.16-20; Marcos 16.14-18; Juan 20.19-23

36Tsënö parlëkäyaptinmi pëkunapa ćhöpinćhö Jesús yuriskir ñëqan: “Qamkunaćhö alli kawakï këkutsun” ñir.

37Tsënö yuripuskiptinmi alma kanqanta yarpar alläpa mantsakäyäqan.

38Jesúsñam ñëqan: “¿Imanartan mantsakashqa këkäyanki? ¿Imanartan ñoqa kanqäta criyiyankitsu? 39Makëta ćhakëta rikäyë. ¡Ñoqam kä! ¡Yatayämë! Rikäyämanqëkinöpis manam almatsu kä. Almaqa ëtsannaq y tullunnaqmi”.

40Tsënö ñirninmi makinta y ćhakintapis rikätsëqan. 41Rikar pë kanqanta kushikïkarpis manaraqmi chumaq criyiyäqanraqtsu. Tsëmi Jesús tapöqan: “Mikunäpaq ¿imallapis kanku?” 42Tsënö ñiptinmi kankashqa pescäduta [y abëjapa mishkinta] qarayäqan. 43Ćhaskiskirmi llapanpa ñöpankunaćhö miköqan.

44Mikuskirñam ñëqan: “Moisés qellqanqan leykunaćhö, profëtakuna qellqayanqanćhö y salmukunaćhömi ima päsamänanpaq kaqkuna qellqarëkan. Qamkunawan këkarmi willäqaq qellqarëkanqannölla llapanpis cumplinanpaq kanqanta. Willanqaqnöllam päsamashqa” ñir.

45Tsëpikñam Teyta Diospa palabranta tantiyatsir 46ñëqan: “Diospa palabranćhömi ñiykan Cristo ñakar wañunanpaq kaqta y kimsa unaqta kawarimunanpaq kaqtapis. 47Tsënöllam ñiykan Jerusalénpik qallëkur llapan nacionkunaćhö willakuyänanpaq kanqanta. Pëpa shutinćhö willakurmi runakunata tantiyatsiyanqa utsankunata dëjayaptin perdonashqaña kayänanpaq. 48Llapan ima päsamanqantapis rikashqa karmi willakuyänëkipaq testïgu kayanki. 49Qamkunamanmi ñoqa kaćhamushaq Teytä ariñikunqan Espïritu Santuta. Espïritu Santupik poderta ćhaskiyanqëkiyaq Jerusalénllaćhöraq shuyäyanki”.

Gloriaman Jesús ëwakunqan

Marcos 16.19-20; Hechos 1.9-11

50Tsëpikñam discïpulunkunata Jerusalénpik Betaniaman Jesús pushäqan. Tsëćhöñam makinta pallarkur pëkunata yanapananpaq Teyta Diosta mañaköqan. 51Tsënö mañakïkaptinmi Teyta Dios gloriaman apäqan. 52Tsëćhö discïpulunkuna Jesústa adoraskirmi Jerusalénman kushishqa kutikuyäqan. 53Tsëpikñam Teyta Diosta alabayänanpaq cada unaq templuman qorikäyaq. [Amén.]

Currently Selected:

Lucas 24: qcgPB

Highlight

Copy