Kejadian Uram 24
24
Ishak biti ner doyandoka kabdeibmou deyok
24:1-67
1Abraham sirya wisi danmou ura, Er Iya Erebdobnyi biryi utotoa nirya kisal dakoka kareramwe. 2Abraham kuramwe ani, uki tentok tum ara er wa iramnyi ninyi tentok dunyi kibmounyi si Eleazar bisi nabmou. Ara, Abraham wa irmilinkwamwe ati nabmou. Ba, anyi er dam binmou ura, ato ebmou, “Kan taruk ara ni keil deici deiriryarum,” ebmou. 3Ura, anyi er taruk Abraham keil deici deirirbinmou ura, ato ebmou, “Nun Nai Iya Erebdobnyi, im ab tukwe ab kiknibunyi si deici aryi ebkun. Ara, kanci ni mi asi a mutuk Kanaan ni yandoka a kunun mutuk nerabwe asi doboka kamdeirina kum kubkwandim. 4Eda, anaboka ni yala nang asi biminyi ura, ni mi Ishak dobkwande ner doboka yarum,” ebmou. 5Ba, er wa iramunyi biryi ato eboka asibdenmou, “Nai, kan atei kobdoba binyi ura, a ner asi bindoka, ‘Kanaan mutuk binkwanim,’ ebkwaman. Uca, sangkuna a ner aryi, ‘Kanaan bana ara ni li,’ ebkwandur? Ato ebci ura, kan mi Ishak bisi boboka kan atei kobdoba kamdeirirbinkwan kum?” ebmou. 6Uca, Abraham biryi ato ebmou, “Se, ni mi asi tamuboka bobana mem! 7Nun Nai, Er Iya Erebdobnyi, im ab tukwe ab kiknibunyi biryi ni atei ab, ni nai ab, ni du weit yabwe ab dam aryi boboka a mutuk dam kamdeiriryanou. Ani, Er Imtamnyi biryi, ‘Ukubkwankin,’ eboka uram talak ebnou. Ara, ‘Kan ab kan deibdoba ab asi a mutuk karebkwansin,’ ebsou. Ati, kan binkwamarim ara Er Imtamnyi biryi Er uram eryuryangan nang malaikat nang bokeibci ura, kansi milibkingnyi ba, tonkwa binkwamarumca. Ba, ni atei kobdoba o biminyi ura, ni mi ner doyankwamarim. 8Bok, a ner aryi, ‘Ni li, kum binkwanim,’ ebci ura, uram talak a ebmakin dinyi kununa kum kubkwande. Uca, ni mi ara ni atei kobdoba boboka tamurbana kum kubkwamarim,” ebmou. 9Ura, anyi er taruk ara er nai Abraham keil deici deiryanmou. Ura, Abraham biryi a deyok ati, er wa iramunyi bisi, “Ukubdum,” eboka uram talak ebdeibmou.
10Ura, Abraham er wa iramunyi si Eleazar biryi er nai deiriramwe bona ab, bisam unta takubaryi ab, yuk-yuk bona yala amuma buluboka bobmou. Ura, anaboka Mesopotamia mutuk Aram atei bisik kuboka Abraham er nai Nahor minob kam tuba kuramwe talak kuramwe atei binmou. 11Bisik banmou ani, sintam ara sirya akatei binmou. Ura, a weik atei lika umbura wengbana kum kuaburyok, baitam kuboka asi me sumur lokoka kweramya dam bindoka bisam unta bobanmou ara dikdik sebdeibmou. Ba, a talak sintam ara nerabwe me kweryangan talak sirya kubmou. 12Ura, anyi biryi ato eboka Er Iya Erebdobnyi bisi molobmou. “Er Imtamnyi, ni nai Abraham er Nai, arub Kanci nisi, ‘Ukubkwan,’ teneboka yanganman dinyi kunubdeibnurum. Kanci, ni nai Abraham boukwe kimdum to nisi boukwe kibnurum. 13Nai Imtamnyi, nira me kwenunga dam a yandoka tikman. Do talak kuci ura, akatei nerabwe anaboka me kweryangankung. 14Akatei nerabwe me kweryangnyi ura, ner tentok asi ato ebkwaman. ‘Ni me utanmanir ati, kan meyok tatabdonokminyi ba, ni ton yibokwan,’ ebnyi ba, ‘Ur a yibokdum,’ ebniriryi, ni unta bisam ababyi, ‘Nai, kan bisam ababyi me dikeibkwan,’ ebci ner ara Kan mi Ishak dobkwanci ner a kunum sirya wibkwandim. Ato kubdeibniminyi ba, kunubci ura, niryi, ‘Er Imtamnyi biryi ni nai Abraham bisi boukwe kimdum dinyi ni bikwan,’” eboka molobmou. 15Ura, anyi Imtamnyi bisi molonmou uram sengdona kum uca, kam ner tentok urasin teleb ner nun, asi minob anaboka yanmou. A yanmou ner ara Betuel nebnyi si Ribka kuramwe. Ba, Betuel er nai er kwin si ara Nahor ab, Milka ab, sun nang bitinyi aryi deiandeinyi kuramwe. Akiryi Abraham er weit Nahor mi aryi nebnyi me kwen meyok takuboka me kweryanmou. 16A ner ara urasin telebto ner nun neamwe. A ner ara ninyi dona kum kuamnyi, kabir tuba nebloboka kuramwe. A ner Ribka me sirya kweboka atei tam tamurorbau asi, 17anyi cungyandoka a ner dam yanmouci, ato ebmou, “A ner, ni me utanmanir ati, kan me ni ton mitikanun yibokwan,” ebmou. 18Uca, a ner aryi ato ebmou, “Nai, ur a yibokdum,” ebmou. Ura, ola asa er meyok takubmoua asi dobkweteboka, taruk deici deiryanmou ura, anyi bisi me dinibmou ba, yibdobmou. 19Anyi bisi me karebmou ba, sirya yibmou ura, a ner aryi ato ebmou, “Nai, kan bisam unta yabwe ababyi me kweboka karebnyi ba, a nirya boun asa yibdobkwaming,” ebmou. 20Ura, a ner aryi me a kweboka banmou me ara anyi bisam unta yabwe ati, bisam yina karen co sangkol umbura a dikdongobmou. Ura, tubto sumur me longna dam tamuboka me kweryanmou. Ani, sirya kweboka binmou ura, anyi er bisam unta yabwe ati bindoka dikeibmou ba, yibdobmai. 21Ba, anyi bira uram ena kilikoka a tikmouci, er kanyatam aryok ato tenenmou, “Ni ukubkwan,” teneboka yanman dinyi ara, “Er Iya Erebdobnyi biryi kunubdeibkwamanir do? Kum kunubdeibkwamanir do?” tenen kanya teneibde tingmou.
22A bisam unta yabwe me sirya yibmai ba, boubmou ura, anyi biryi keil emas aryi kikniamnyi kweirya ikin tentok kibmanto asi meici kukoka dinatam bobmou aryi doboka a ner urya dongobdeibmou. Tonda, keil emas aryi kikniamnyi kweirya ikin takubaryi bobmou aryi doboka toubna bitinyi dongobdeibmou. Ani, a ner ongobdeibmou. 23Ura, ato ebmou, “Kanda unanyi nebnyi da? Ba, Kan nai si ara unanyi do?” si sibderum. “Ani, kan nai ai ara nun mabdobkwayeb ati, ai lo ton a kubwe do?” eboka asibmou. 24Uca, a ner aryi ato ebmou, “Nira, Betuel nebnyi. Ba, ni nai er nai ab er kwin ab ara Nahor ab, Milka ab sun mi Betuel nebnyi,” ebmou. 25Ani, a ner aryi ton ato ebmou, “Bisam unta yina gandum yabla toto, yuk yina toto, man dikum ababyi lo a kubwe,” ebmou. 26Ato ebmou ba, anyi kutam sunsunukeiboka buryibinmou ura, kisok tukwe dibdongoboka, Er Iya Erebdobnyi bisi si weik ebmou. 27Ura, ato ebmou, “Niryi, Kan Iya Erebdobnyi bisi si weik ereboka kibdobmakin. Nai Imtamnyi, Kanda ni nai Abraham biryi si weik eboka molokururnyi kurum, Kanci, ni nai Abraham bisi tuba-tuba boukwe kimdum. Ukuboka boukwe kimdum to nisi, Kanci ni nai Abraham er du weit kunung atei bobinkwinirim,” eboka si weik ebmou.
28Ba, a ner ara cukaboka er kwin bisi ukubmou to nirya bindoka nukmou. 29-30Ura, a ner Ribka bira er malnyi si Laban kuramwe. Akiryi erci Laban bisi bindoka, “Anyi biryi ukubmanir,” eboka nukmou dinyi ab, ersi urya kibmou dinyi ab, toubna dongobmou dinyi ab Laban biryi asing eibmou. Ura, Laban cukaboka me kwen dam anyi ab er bisam yabwe ab bindoka wekmai dikum yanmou. 31Ura, Laban biryi ato ebmou, “Nai, kanda Er Iya Erebdobnyi biryi kisal dangkururnyi. Ur yangarum atei lika baitam yandoka tikmarima mem. Nun ai dam ara kan man ai babyi, kan bisam unta man dikum babyi lo a kubmar ati, baronkwanim yangarum!” ebmou. 32Ura, anyi ai wengbinmou ura, er bisam unta deici anda keica lobminikmouci, unta yina gandum yabla ab, yuk yina ab karebmou. Ura, me kweboka karebmai ba, anyi ab, er milibmai nang ab sun yan me ilikdobmai ura, ai wengbinmai. 33Sirya ai wengbindoka burbinmai ba, yina er dam deiriryanmai. Uca, anyi biryi ato ebmou, “Ni yina minob kum yiabnyi talak aryi ni uram boyanman uram asi minob ebniryok yina yibkwan,” ebmou. Ba, Laban biryi, “Ur, uram ebminci, yibdum,” ebmou.
34Ura, anyi biryi ato ebmou, “Nira Abraham er wa irmilinanyi yanman. 35Ni nai Abraham bira Er Iya Erebdobnyi biryi kisal dangdurci, utotoa nirya ilinto karerur ba, erda bona bonanyi kurur. Er Iya Erebdobnyi biryi Abraham bisi karerur ba, borur bona yala ara kambing toto, domba toto, sapi toto, unta toto, keledai toto, keil emas toto, keil perak toto ilinto talerur. Ani, er wa il dobde kun nang sal babyi, nerabwe babyi mitik kum kunung. 36Ani, ni nai Abraham bira sirya wisi dau cok, er ner Sara biryi mi sal tentok deibwe. A mi si ara Ishak deibwe. Akiryi ni nai Abraham biryi er mi Ishak biti er boramwe bona nirya karebwe ba, er dinyi kibwe. 37Ani, ni nai Abraham biryi nisi ato ebnou, ‘Kanci ni mi Ishak bisi Kanaan mutuk nerabwe doboka kardeirina mem! 38Eda, ni nai kuramwe atei dam asi ni yala nang asi biminyi ura, ner ton doboka boyaminyi ura, ni mi Ishak bisi kabdeibkwandum,’ ebnou. 39Ba, niryi ni nai Abraham bisi ato ebse, ‘Kan atei kobdoba bindoka a ner asi asirdenyi uca, “Ni li,” ebci ura, una kubkwanun do?’ ebmase. 40Uca, ni nai Abraham biryi ato ebmou, ‘Nira Er Iya Erebdobnyi urasin dam kunun. Ati, Er uram eryuryangan nang malaikat nang kalikmakingnyi ba, binmaminyi ani, ni yala nang atei biminyi ura, ni mi dobkwande ner doboka yankwandim. 41Ba, ni yala ninyi asi binmaminyi ba, ner ton iniboka yaminyi ura, uram talak ebdeibdanmanim dinyi er yuk lobdobkwande. Bok, ner ton kum karebkingnyi ba, yaminyi ura, kanci uram talak ebdeibmanirim dinyi deyok aryi kansi ikin kum kibkwankir,’ ebnou. 42Ani, arub me kwen dam o yandoka Er Iya Erebdobnyi bisi ni kanyatam aryi ato eboka moloabne, ‘Nai Iya Erebdobnyi, ni nai Abraham molokururnyi, Kanci, “Ni ukubkwan,” teneboka yanganmanto kunubdeibnirim,’ eboka moloabne. 43Ani, ton ato tenebne, ‘Ner ton atei aryi anaboka me kweryangaci asi, “Kan meyok aryi me mitikanun ton yibokwan,” ebkwaman,’ tenebmonwe. 44‘U ebnyi uca, a ner aryi, “Ur a yibdobdum,” ebnici ab, “Kan bisam yabwe ababyi me karebkwan,” ebci ner ara, “Er Iya Erebdobnyi biryi ni nai Abraham mi Ishak ner a kunum wibmar,” tenebkwan,’ tenebmonwe. 45Ato eboka Er Imtamnyi bisi kanyatam molobde tikabnuryi, uram dangdona kum uca Ribka atei tam aryi meyok takubdakde lika bublan sakweteboka me kwerbau. Ani, yurbindoka me kwebdobwe ura, atei tam tamuroryangau asi niryi ato ebne, ‘Me ni ton karebnurum!’ ebne. 46Ba, Ribka biryi a meyok ola doboka taruk dam deiriryau ura, ‘Ye, ur a yibdobdum,’ ebnou. Ani, ‘Kan bisam unta yabwe ababyi me dikeibkwaman,’ ebnou. Ba, ni me yibdobne ura, ni bisam yabwe ababyi me dikeibwe ba, yibdobungwe. 47Sirya yibdoboubwe ura, Ribka bisi ato kuboka asibne, ‘Kanda unanyi nebnyi do?’ ebne. Uca, erci, ‘Nira Betuel nebnyi. Ni nai er nai er kwin ab ara Nahor ab Milka ab sun mi Betuel nebnyi,’ ebwe. Ura, ersi kweirya urya dongordeirin toubna dama kiningdeirin kibne. 48Ura, ni kutam ikdongobokabnuryi, ni nai Abraham molorurnyi, Er Iya Erebdobnyi bisi moloboka si weik ebne. Ara, Er Imtamnyi biryi milibmanirci, telebto bisik akwe yanmanaryi ni nai er du weit yabwe asi er mi ner iniryanman. 49Ati, sunci ni nai Abraham bisi boukwe tuba kuransici ura, ni keken dam asi, ‘Nunci ersi boukwe kusurur,’ ebdarur. Ani, ersi boukwe kum kuransici ababyi, ‘Nun boukwe kum kusurur,’ ebdarur. Ato ebmunyi uram kekebnyi ura, niryi, ‘Ato kubkwan,’ tenebkwan,” ebmou.
50Ura, Laban ab Betuel ab aryi ato ebmarei, “A kunubmar dinyi ara Er Iya Erebdobnyi biryi ukubdeibmar ba, kunubmar ati, nunci ato dinyi ara malyito dinyi, ato dinyi ara telebto dinyi kum ebkwamanim. 51Ati, Ribka kan dam a bukmar ner a kunum boboka birum. Ba, Er Iya Erebdobnyi biryi ebdeibwe to kunuboka, a ner bobiminyi ura, kan nai er mi asi kabdeibdur,” ebmarei. 52Ura, Abraham er ai wa irmilinanyi a yanmounyi si Eleazar biryi kekebmouci, kutam sunsunubdongoboka buryibinmou ura, kisok tukwe dibdongoboka Er Iya Erebdobnyi bisi si weik ebmou. 53Ura, anyi biryi telebto ongon aling ab, emas kweirya ab, perak kweirya ab Ribka bisi karebmou. Ani, Ribka er malnyi ab, er kwin ab ababyi dengna weik dinyi karebmou. 54Ura, sun tonkwa kwaning toto me toto yibde bunmai ani, a mabmai.
Mabmai ani, belekuna bukokmai ura, anyi biryi ato ebmou, “Sunsi molobsin, ni nai bisi binkun,” ebmou. 55Uca, Ribka er malnyi ab, er kwin ab aryi ato ebmarei, “Ribka ab kan ab tonkwa binkwandurum ati uki takubaryi a tonkwa kunmabyi ani, birurum,” ebmarei. 56Uca, anyi biryi ato ebmou, “Sunci nisi talerdeirinina mem. Iya Erebdobnyi biryi mundu lobmanir ba, ni, ‘Ukubkwan,’ teneboka yanmonwe dinyi sirya kunubmar ati, nisi talerdeinmanuruma mem. Mundu lobnumunyi ba, ni nai bisi binkwan,” ebmou. 57Ba, sunci ato ebmai, “Ura, Ribka nabkwayeb. Ba, yandoka er ebkwande to nun?” ebmai. 58Ura, Ribka nabmai ba, yanmou ura, ato eboka asibdenmai, “Kanda anyi ab tonkwa binkwandurum do?” eboka asibmai. Uca, Ribka biryi, “Ni teleb, er ab tonkwa baronkwamanim,” ebmou. 59Ura, Ribka bisi, “Ur birum,” eboka mundu lobmai. Ura, Ribka ab er kalingna ner ab ara Abraham ai wa irmilinanyi bisi milibmarei. 60Ura, bana kum kuabyi talak ara Ribka er du ab, er kwin ab, er ai ninyi aryi ato eboka kisal dangna dinyi karebmai. “Ribka, kanda ninyi yubwa-yubwa nang sun kwin kibkwandim! Ani, sun yuk nang mar ordan dam atei asi, kan deibdoba aryi sun mutuk kibde binkwaming,” eboka kisal dangna dinyi karebmai. 61Ura, Ribka ab er wa irmilin nerabwe ab anabmaici, unta deici bukmai ura, Eleazar bisi milibmai ba, tonkwa binmai. Ato kuboka anyi biryi Ribka iniboka binmou.
62Ura, Ribka ab Ishak ner borbinmounyi ab ara Kanaan mutuk barei ura, Ishak bira me anamni si Lahai-Roi dam tam aryi kuboka yini mutuk dam yanmouci, mutuk si Negeb dam yandoka kunmou. 63Ani, a tum sintam ara er yandoka dobmou ai aryi anaboka a mutuk yibindoka diramwe uca, ninyi bisam unta deici bukdanmaici, o yanganmai asi asing eibmou. 64Uca, Ribka erbabyi asing diramwe uca, Ishak o a yandoka tikmou asi asing eibmou. Ura, Ribka bira unta deici bukmou ara sakwetebokmou. 65Ura, Ribka biryi er iniboka banmounyi Eleazar bisi ato ebmou, “Ninyi ton nun banmab tam o yanganmar anyi bira unanyi da?” eboka asibmou. Uca, anyi biryi, “Ni nai, mi Ishak bitiba,” ebmou. Ura, Ribka biryi nerabwe ngang ongoraming kaluna dobtaleboka Ishak urasin libdeibmou. 66Ura, Abraham er wa irmilinanyi biryi Ishak bisi er ukubmou to nirya, “Ukubman-ukubman,” eboka, liliboka nukmou. 67Ura, Ishak biryi Ribka boboka er kwin Sara kuramwe ai bobde bindobmou. Ura, Ishak biryi Ribka sirya er ner kibdobmou. Ato kuboka Ishak biryi Ribka dobmouci, er kwin Sara diamwe ati, “Se,” teneramwe dinyi ara Ribka dobmou uca, er kanyi darabmou.
Currently Selected:
Kejadian Uram 24: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
Kejadian Uram 24
24
Ishak biti ner doyandoka kabdeibmou deyok
24:1-67
1Abraham sirya wisi danmou ura, Er Iya Erebdobnyi biryi utotoa nirya kisal dakoka kareramwe. 2Abraham kuramwe ani, uki tentok tum ara er wa iramnyi ninyi tentok dunyi kibmounyi si Eleazar bisi nabmou. Ara, Abraham wa irmilinkwamwe ati nabmou. Ba, anyi er dam binmou ura, ato ebmou, “Kan taruk ara ni keil deici deiriryarum,” ebmou. 3Ura, anyi er taruk Abraham keil deici deirirbinmou ura, ato ebmou, “Nun Nai Iya Erebdobnyi, im ab tukwe ab kiknibunyi si deici aryi ebkun. Ara, kanci ni mi asi a mutuk Kanaan ni yandoka a kunun mutuk nerabwe asi doboka kamdeirina kum kubkwandim. 4Eda, anaboka ni yala nang asi biminyi ura, ni mi Ishak dobkwande ner doboka yarum,” ebmou. 5Ba, er wa iramunyi biryi ato eboka asibdenmou, “Nai, kan atei kobdoba binyi ura, a ner asi bindoka, ‘Kanaan mutuk binkwanim,’ ebkwaman. Uca, sangkuna a ner aryi, ‘Kanaan bana ara ni li,’ ebkwandur? Ato ebci ura, kan mi Ishak bisi boboka kan atei kobdoba kamdeirirbinkwan kum?” ebmou. 6Uca, Abraham biryi ato ebmou, “Se, ni mi asi tamuboka bobana mem! 7Nun Nai, Er Iya Erebdobnyi, im ab tukwe ab kiknibunyi biryi ni atei ab, ni nai ab, ni du weit yabwe ab dam aryi boboka a mutuk dam kamdeiriryanou. Ani, Er Imtamnyi biryi, ‘Ukubkwankin,’ eboka uram talak ebnou. Ara, ‘Kan ab kan deibdoba ab asi a mutuk karebkwansin,’ ebsou. Ati, kan binkwamarim ara Er Imtamnyi biryi Er uram eryuryangan nang malaikat nang bokeibci ura, kansi milibkingnyi ba, tonkwa binkwamarumca. Ba, ni atei kobdoba o biminyi ura, ni mi ner doyankwamarim. 8Bok, a ner aryi, ‘Ni li, kum binkwanim,’ ebci ura, uram talak a ebmakin dinyi kununa kum kubkwande. Uca, ni mi ara ni atei kobdoba boboka tamurbana kum kubkwamarim,” ebmou. 9Ura, anyi er taruk ara er nai Abraham keil deici deiryanmou. Ura, Abraham biryi a deyok ati, er wa iramunyi bisi, “Ukubdum,” eboka uram talak ebdeibmou.
10Ura, Abraham er wa iramunyi si Eleazar biryi er nai deiriramwe bona ab, bisam unta takubaryi ab, yuk-yuk bona yala amuma buluboka bobmou. Ura, anaboka Mesopotamia mutuk Aram atei bisik kuboka Abraham er nai Nahor minob kam tuba kuramwe talak kuramwe atei binmou. 11Bisik banmou ani, sintam ara sirya akatei binmou. Ura, a weik atei lika umbura wengbana kum kuaburyok, baitam kuboka asi me sumur lokoka kweramya dam bindoka bisam unta bobanmou ara dikdik sebdeibmou. Ba, a talak sintam ara nerabwe me kweryangan talak sirya kubmou. 12Ura, anyi biryi ato eboka Er Iya Erebdobnyi bisi molobmou. “Er Imtamnyi, ni nai Abraham er Nai, arub Kanci nisi, ‘Ukubkwan,’ teneboka yanganman dinyi kunubdeibnurum. Kanci, ni nai Abraham boukwe kimdum to nisi boukwe kibnurum. 13Nai Imtamnyi, nira me kwenunga dam a yandoka tikman. Do talak kuci ura, akatei nerabwe anaboka me kweryangankung. 14Akatei nerabwe me kweryangnyi ura, ner tentok asi ato ebkwaman. ‘Ni me utanmanir ati, kan meyok tatabdonokminyi ba, ni ton yibokwan,’ ebnyi ba, ‘Ur a yibokdum,’ ebniriryi, ni unta bisam ababyi, ‘Nai, kan bisam ababyi me dikeibkwan,’ ebci ner ara Kan mi Ishak dobkwanci ner a kunum sirya wibkwandim. Ato kubdeibniminyi ba, kunubci ura, niryi, ‘Er Imtamnyi biryi ni nai Abraham bisi boukwe kimdum dinyi ni bikwan,’” eboka molobmou. 15Ura, anyi Imtamnyi bisi molonmou uram sengdona kum uca, kam ner tentok urasin teleb ner nun, asi minob anaboka yanmou. A yanmou ner ara Betuel nebnyi si Ribka kuramwe. Ba, Betuel er nai er kwin si ara Nahor ab, Milka ab, sun nang bitinyi aryi deiandeinyi kuramwe. Akiryi Abraham er weit Nahor mi aryi nebnyi me kwen meyok takuboka me kweryanmou. 16A ner ara urasin telebto ner nun neamwe. A ner ara ninyi dona kum kuamnyi, kabir tuba nebloboka kuramwe. A ner Ribka me sirya kweboka atei tam tamurorbau asi, 17anyi cungyandoka a ner dam yanmouci, ato ebmou, “A ner, ni me utanmanir ati, kan me ni ton mitikanun yibokwan,” ebmou. 18Uca, a ner aryi ato ebmou, “Nai, ur a yibokdum,” ebmou. Ura, ola asa er meyok takubmoua asi dobkweteboka, taruk deici deiryanmou ura, anyi bisi me dinibmou ba, yibdobmou. 19Anyi bisi me karebmou ba, sirya yibmou ura, a ner aryi ato ebmou, “Nai, kan bisam unta yabwe ababyi me kweboka karebnyi ba, a nirya boun asa yibdobkwaming,” ebmou. 20Ura, a ner aryi me a kweboka banmou me ara anyi bisam unta yabwe ati, bisam yina karen co sangkol umbura a dikdongobmou. Ura, tubto sumur me longna dam tamuboka me kweryanmou. Ani, sirya kweboka binmou ura, anyi er bisam unta yabwe ati bindoka dikeibmou ba, yibdobmai. 21Ba, anyi bira uram ena kilikoka a tikmouci, er kanyatam aryok ato tenenmou, “Ni ukubkwan,” teneboka yanman dinyi ara, “Er Iya Erebdobnyi biryi kunubdeibkwamanir do? Kum kunubdeibkwamanir do?” tenen kanya teneibde tingmou.
22A bisam unta yabwe me sirya yibmai ba, boubmou ura, anyi biryi keil emas aryi kikniamnyi kweirya ikin tentok kibmanto asi meici kukoka dinatam bobmou aryi doboka a ner urya dongobdeibmou. Tonda, keil emas aryi kikniamnyi kweirya ikin takubaryi bobmou aryi doboka toubna bitinyi dongobdeibmou. Ani, a ner ongobdeibmou. 23Ura, ato ebmou, “Kanda unanyi nebnyi da? Ba, Kan nai si ara unanyi do?” si sibderum. “Ani, kan nai ai ara nun mabdobkwayeb ati, ai lo ton a kubwe do?” eboka asibmou. 24Uca, a ner aryi ato ebmou, “Nira, Betuel nebnyi. Ba, ni nai er nai ab er kwin ab ara Nahor ab, Milka ab sun mi Betuel nebnyi,” ebmou. 25Ani, a ner aryi ton ato ebmou, “Bisam unta yina gandum yabla toto, yuk yina toto, man dikum ababyi lo a kubwe,” ebmou. 26Ato ebmou ba, anyi kutam sunsunukeiboka buryibinmou ura, kisok tukwe dibdongoboka, Er Iya Erebdobnyi bisi si weik ebmou. 27Ura, ato ebmou, “Niryi, Kan Iya Erebdobnyi bisi si weik ereboka kibdobmakin. Nai Imtamnyi, Kanda ni nai Abraham biryi si weik eboka molokururnyi kurum, Kanci, ni nai Abraham bisi tuba-tuba boukwe kimdum. Ukuboka boukwe kimdum to nisi, Kanci ni nai Abraham er du weit kunung atei bobinkwinirim,” eboka si weik ebmou.
28Ba, a ner ara cukaboka er kwin bisi ukubmou to nirya bindoka nukmou. 29-30Ura, a ner Ribka bira er malnyi si Laban kuramwe. Akiryi erci Laban bisi bindoka, “Anyi biryi ukubmanir,” eboka nukmou dinyi ab, ersi urya kibmou dinyi ab, toubna dongobmou dinyi ab Laban biryi asing eibmou. Ura, Laban cukaboka me kwen dam anyi ab er bisam yabwe ab bindoka wekmai dikum yanmou. 31Ura, Laban biryi ato ebmou, “Nai, kanda Er Iya Erebdobnyi biryi kisal dangkururnyi. Ur yangarum atei lika baitam yandoka tikmarima mem. Nun ai dam ara kan man ai babyi, kan bisam unta man dikum babyi lo a kubmar ati, baronkwanim yangarum!” ebmou. 32Ura, anyi ai wengbinmou ura, er bisam unta deici anda keica lobminikmouci, unta yina gandum yabla ab, yuk yina ab karebmou. Ura, me kweboka karebmai ba, anyi ab, er milibmai nang ab sun yan me ilikdobmai ura, ai wengbinmai. 33Sirya ai wengbindoka burbinmai ba, yina er dam deiriryanmai. Uca, anyi biryi ato ebmou, “Ni yina minob kum yiabnyi talak aryi ni uram boyanman uram asi minob ebniryok yina yibkwan,” ebmou. Ba, Laban biryi, “Ur, uram ebminci, yibdum,” ebmou.
34Ura, anyi biryi ato ebmou, “Nira Abraham er wa irmilinanyi yanman. 35Ni nai Abraham bira Er Iya Erebdobnyi biryi kisal dangdurci, utotoa nirya ilinto karerur ba, erda bona bonanyi kurur. Er Iya Erebdobnyi biryi Abraham bisi karerur ba, borur bona yala ara kambing toto, domba toto, sapi toto, unta toto, keledai toto, keil emas toto, keil perak toto ilinto talerur. Ani, er wa il dobde kun nang sal babyi, nerabwe babyi mitik kum kunung. 36Ani, ni nai Abraham bira sirya wisi dau cok, er ner Sara biryi mi sal tentok deibwe. A mi si ara Ishak deibwe. Akiryi ni nai Abraham biryi er mi Ishak biti er boramwe bona nirya karebwe ba, er dinyi kibwe. 37Ani, ni nai Abraham biryi nisi ato ebnou, ‘Kanci ni mi Ishak bisi Kanaan mutuk nerabwe doboka kardeirina mem! 38Eda, ni nai kuramwe atei dam asi ni yala nang asi biminyi ura, ner ton doboka boyaminyi ura, ni mi Ishak bisi kabdeibkwandum,’ ebnou. 39Ba, niryi ni nai Abraham bisi ato ebse, ‘Kan atei kobdoba bindoka a ner asi asirdenyi uca, “Ni li,” ebci ura, una kubkwanun do?’ ebmase. 40Uca, ni nai Abraham biryi ato ebmou, ‘Nira Er Iya Erebdobnyi urasin dam kunun. Ati, Er uram eryuryangan nang malaikat nang kalikmakingnyi ba, binmaminyi ani, ni yala nang atei biminyi ura, ni mi dobkwande ner doboka yankwandim. 41Ba, ni yala ninyi asi binmaminyi ba, ner ton iniboka yaminyi ura, uram talak ebdeibdanmanim dinyi er yuk lobdobkwande. Bok, ner ton kum karebkingnyi ba, yaminyi ura, kanci uram talak ebdeibmanirim dinyi deyok aryi kansi ikin kum kibkwankir,’ ebnou. 42Ani, arub me kwen dam o yandoka Er Iya Erebdobnyi bisi ni kanyatam aryi ato eboka moloabne, ‘Nai Iya Erebdobnyi, ni nai Abraham molokururnyi, Kanci, “Ni ukubkwan,” teneboka yanganmanto kunubdeibnirim,’ eboka moloabne. 43Ani, ton ato tenebne, ‘Ner ton atei aryi anaboka me kweryangaci asi, “Kan meyok aryi me mitikanun ton yibokwan,” ebkwaman,’ tenebmonwe. 44‘U ebnyi uca, a ner aryi, “Ur a yibdobdum,” ebnici ab, “Kan bisam yabwe ababyi me karebkwan,” ebci ner ara, “Er Iya Erebdobnyi biryi ni nai Abraham mi Ishak ner a kunum wibmar,” tenebkwan,’ tenebmonwe. 45Ato eboka Er Imtamnyi bisi kanyatam molobde tikabnuryi, uram dangdona kum uca Ribka atei tam aryi meyok takubdakde lika bublan sakweteboka me kwerbau. Ani, yurbindoka me kwebdobwe ura, atei tam tamuroryangau asi niryi ato ebne, ‘Me ni ton karebnurum!’ ebne. 46Ba, Ribka biryi a meyok ola doboka taruk dam deiriryau ura, ‘Ye, ur a yibdobdum,’ ebnou. Ani, ‘Kan bisam unta yabwe ababyi me dikeibkwaman,’ ebnou. Ba, ni me yibdobne ura, ni bisam yabwe ababyi me dikeibwe ba, yibdobungwe. 47Sirya yibdoboubwe ura, Ribka bisi ato kuboka asibne, ‘Kanda unanyi nebnyi do?’ ebne. Uca, erci, ‘Nira Betuel nebnyi. Ni nai er nai er kwin ab ara Nahor ab Milka ab sun mi Betuel nebnyi,’ ebwe. Ura, ersi kweirya urya dongordeirin toubna dama kiningdeirin kibne. 48Ura, ni kutam ikdongobokabnuryi, ni nai Abraham molorurnyi, Er Iya Erebdobnyi bisi moloboka si weik ebne. Ara, Er Imtamnyi biryi milibmanirci, telebto bisik akwe yanmanaryi ni nai er du weit yabwe asi er mi ner iniryanman. 49Ati, sunci ni nai Abraham bisi boukwe tuba kuransici ura, ni keken dam asi, ‘Nunci ersi boukwe kusurur,’ ebdarur. Ani, ersi boukwe kum kuransici ababyi, ‘Nun boukwe kum kusurur,’ ebdarur. Ato ebmunyi uram kekebnyi ura, niryi, ‘Ato kubkwan,’ tenebkwan,” ebmou.
50Ura, Laban ab Betuel ab aryi ato ebmarei, “A kunubmar dinyi ara Er Iya Erebdobnyi biryi ukubdeibmar ba, kunubmar ati, nunci ato dinyi ara malyito dinyi, ato dinyi ara telebto dinyi kum ebkwamanim. 51Ati, Ribka kan dam a bukmar ner a kunum boboka birum. Ba, Er Iya Erebdobnyi biryi ebdeibwe to kunuboka, a ner bobiminyi ura, kan nai er mi asi kabdeibdur,” ebmarei. 52Ura, Abraham er ai wa irmilinanyi a yanmounyi si Eleazar biryi kekebmouci, kutam sunsunubdongoboka buryibinmou ura, kisok tukwe dibdongoboka Er Iya Erebdobnyi bisi si weik ebmou. 53Ura, anyi biryi telebto ongon aling ab, emas kweirya ab, perak kweirya ab Ribka bisi karebmou. Ani, Ribka er malnyi ab, er kwin ab ababyi dengna weik dinyi karebmou. 54Ura, sun tonkwa kwaning toto me toto yibde bunmai ani, a mabmai.
Mabmai ani, belekuna bukokmai ura, anyi biryi ato ebmou, “Sunsi molobsin, ni nai bisi binkun,” ebmou. 55Uca, Ribka er malnyi ab, er kwin ab aryi ato ebmarei, “Ribka ab kan ab tonkwa binkwandurum ati uki takubaryi a tonkwa kunmabyi ani, birurum,” ebmarei. 56Uca, anyi biryi ato ebmou, “Sunci nisi talerdeirinina mem. Iya Erebdobnyi biryi mundu lobmanir ba, ni, ‘Ukubkwan,’ teneboka yanmonwe dinyi sirya kunubmar ati, nisi talerdeinmanuruma mem. Mundu lobnumunyi ba, ni nai bisi binkwan,” ebmou. 57Ba, sunci ato ebmai, “Ura, Ribka nabkwayeb. Ba, yandoka er ebkwande to nun?” ebmai. 58Ura, Ribka nabmai ba, yanmou ura, ato eboka asibdenmai, “Kanda anyi ab tonkwa binkwandurum do?” eboka asibmai. Uca, Ribka biryi, “Ni teleb, er ab tonkwa baronkwamanim,” ebmou. 59Ura, Ribka bisi, “Ur birum,” eboka mundu lobmai. Ura, Ribka ab er kalingna ner ab ara Abraham ai wa irmilinanyi bisi milibmarei. 60Ura, bana kum kuabyi talak ara Ribka er du ab, er kwin ab, er ai ninyi aryi ato eboka kisal dangna dinyi karebmai. “Ribka, kanda ninyi yubwa-yubwa nang sun kwin kibkwandim! Ani, sun yuk nang mar ordan dam atei asi, kan deibdoba aryi sun mutuk kibde binkwaming,” eboka kisal dangna dinyi karebmai. 61Ura, Ribka ab er wa irmilin nerabwe ab anabmaici, unta deici bukmai ura, Eleazar bisi milibmai ba, tonkwa binmai. Ato kuboka anyi biryi Ribka iniboka binmou.
62Ura, Ribka ab Ishak ner borbinmounyi ab ara Kanaan mutuk barei ura, Ishak bira me anamni si Lahai-Roi dam tam aryi kuboka yini mutuk dam yanmouci, mutuk si Negeb dam yandoka kunmou. 63Ani, a tum sintam ara er yandoka dobmou ai aryi anaboka a mutuk yibindoka diramwe uca, ninyi bisam unta deici bukdanmaici, o yanganmai asi asing eibmou. 64Uca, Ribka erbabyi asing diramwe uca, Ishak o a yandoka tikmou asi asing eibmou. Ura, Ribka bira unta deici bukmou ara sakwetebokmou. 65Ura, Ribka biryi er iniboka banmounyi Eleazar bisi ato ebmou, “Ninyi ton nun banmab tam o yanganmar anyi bira unanyi da?” eboka asibmou. Uca, anyi biryi, “Ni nai, mi Ishak bitiba,” ebmou. Ura, Ribka biryi nerabwe ngang ongoraming kaluna dobtaleboka Ishak urasin libdeibmou. 66Ura, Abraham er wa irmilinanyi biryi Ishak bisi er ukubmou to nirya, “Ukubman-ukubman,” eboka, liliboka nukmou. 67Ura, Ishak biryi Ribka boboka er kwin Sara kuramwe ai bobde bindobmou. Ura, Ishak biryi Ribka sirya er ner kibdobmou. Ato kuboka Ishak biryi Ribka dobmouci, er kwin Sara diamwe ati, “Se,” teneramwe dinyi ara Ribka dobmou uca, er kanyi darabmou.
Currently Selected:
:
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)