Npfong 11
11
Bitut a̱ brek a̱ bu wrak shaida Urushalima
1Ba̱pfong Yesu ba nta̱mak sa̱rei ba̱nyet tssup ba a̱ shyi Yahudiya ni a̱ hok ka̱sak ka nwap nzaan nan san ba̱ryat Ka̱za ni. 2Bitut na̱ bu brek a̱ nat Urushalima, ba̱nyet tssup ba a̱ tyyi rya mba i tyei ncen a ni a̱ si ku yrek. 3A̱ hywa da̱ nu, “Wato, a si nwa ka̱ryi nwap ka ba ka̱ ba̱ tyei ncen ni ba i ya kyangya ba̱ mba.” 4Bitut a̱ si sook nyyai a̱ta̱tyin a̱ ba̱ tyyei sa̱rei kyang a yet i:
5“Ka̱tuk ka̱yaan n shyi i ka̱nkrang Yafa n yya a̱duwa, n dyi kyang i ba̱zzak a̱ta̱nom ku kyrep bai ka̱byen nyyai tazwa da̱ a̱godo ni, ba kpo breng a̱za̱n gre na; i bu sseng ba̱shishrek ba̱ nzuk. 6N cyang ba̱shinshwon n dyi nyam ka̱ryi bu nyam ka̱yit bu nkyang kwang ka̱hwa ka̱byen bu na̱non. 7N hok diwan ti hywa da̱ nzuk, ‘Bitut, ta̱za i hwak ya!’ 8N hywa, ‘Kaai, A̱gwam Ka̱za, a̱shishik nkyang a̱ ka̱n nwa ka̱nu nzuk ba.’ 9N bo hok diwan ti nyyai Tazwa ti hywa da̱ nzuk, ‘Kyang a Ka̱za ka hywa di ku yet a̱zizrak ni, ryok kpo yei a̱shishik ba.’ 10Ba yya a̱mi ba̱ nzuk a̱ bvwa ka̱tat a̱ si kwwat nkyang a sa̱rei a̱ nwa mi tazwa. 11Ka̱ram iya na̱ tom ba̱nyet ba̱tat nyyai Kaisariya ba ba ka̱ryi ka n ni swat ni. 12Tswa Ka̱za n tyyei di n brak n dot n nat ba̱ mba n dyok hwa kyang ba. Ba̱wumbeyang bani ba̱ mba a̱kitat a̱ nyyai Yafa a̱ cong a̱ nat Kaisariya ba̱ nzuk, zi si nwa gbang Kaniliyut. 13Na̱ za tyyei ka̱sak ka na̱n dyi a̱pfong Ka̱za na sseng ka̱yat ka̱ryi nu ka ni. A̱pfong Ka̱za nu a̱ hywa da̱ nu, ‘Tom a̱yin na̱ nat Yafa a̱ si yei a̱yanyet u ban yei Siman Bitut ni. 14A̱ ni ya tyyei ba̱ryat ba a̱ ni ya san sa̱rei nyin ka̱ryi ka ni.’ 15N bu nwa ba̱ryat ba, Tswa Ka̱za i kyrek tazwa mba ka̱sak ka zi yin kyrek a̱za̱ njit nyyai ka̱tsitsrang ka ni. 16N si yring kyang a A̱gwam Ka̱za na̱ yin hywa ni, ‘Yohana a̱ yya baptisma nu nu di ba̱shekwot, ma nyin ba ni ya yya mi di Tswa Ka̱za.’ 17Zi ryi ba̱zizrak Ka̱za a̱ wrak ba̱nyet iya taka̱i za̱nang a ka yin za ryi, ka̱ram ka zi yin wrak Yesu Kristi ndya njit a ni. To, nzuk n yet a̱nyan n ni kwan bu Ka̱za?”
18Ba bu hok ba̱ryat nu ba a̱ pfwi ku byat a a̱ nwa dyep Ka̱za, a̱ hywa, “Ka̱za a̱ ma̱n nyrang nwap nzaan na ryen wwon a̱ka̱tukyya mba nu a̱ shya sucet.”
Ba̱nyet tssup Antakiya
19Ka̱ram ka ban hywat Istifanut ni ba nwa yya di ba̱nyet tssup ba a̱ ba̱ wop ba tyong. Ba̱yanyet a̱ nat i ka̱byen Finikiya bu ka̱ma̱nyyi Kubrut bu ka̱nkrang Antakiya, a̱ tyyei bu ba̱nyet ba a̱ yet ba̱nyet Yahuda ni ka̱sham ba̱ryat Yesu ka. 20Ma ba̱ntyok ba̱yaan ba a̱ yet ba̱nyet tssup ba ni nyyai Kubrut bu Kurane bu si nwa mba na Antakiya ka ba tyyei kpikpit nwap a ka̱sham ba̱ryat tazwa A̱gwam Yesu. 21Cet A̱gwam Yesu ku ba̱ brang, ba̱nyet ba̱gingang a̱ wrak ndya mba a̱ brak a̱ tssup A̱gwam Yesu.
22Nkhang a i nat si kpa a pfwo ba̱nyet tssup a shyi Urushalima ni, ba tun Barnabat na̱ nat Antakiya. 23Na̱ si nwa a̱ ryi za̱nang ji Ka̱za ka ba̱ ryi ni, na̱ gwai a̱ ba̱ ta̱gbak ba tssup A̱gwam Yesu di ka̱ryong sa̱rei bu ndya mba na. 24Barnabat a̱ yin yet a̱tsatsak a̱yin, Tswa Ka̱za i shyi ba̱ nu, da̱ bo byyi ka̱ryong. Ba shya ba̱nyet ba̱gingang ba tssup A̱gwam Yesu.
25Barnabat a̱ drok a̱ nat Tarsut cat Shawulu. 26Na̱ si ku shya a̱ brek ba̱ nu a̱ ba Antakiya, ba bu shyi ka̱rek ka̱yring a̱ swat bu ba̱nyet tssup ba dirya tiyring a̱ zzek ba̱nyet ba̱gingang. Kyi Antakiya a̱mi ba yin yet ka̱son a̱ yei ba̱nyet tssup ba “Krista”.
27Ka̱ram iya ba̱nyet tyyei ba̱ryat Ka̱za ba̱yaan a̱ nyyai Urushalima a̱ nat Antakiya. 28Ba yin yei a̱yanyet a̱yring mba Agabut. Na̱ ta̱za a̱ sseng, Tswa Ka̱za i tyyi na̱ tyyei ba̱nyet ba di ka̱ram a̱ bvat ba̱cincong cihywat i kpa sa̱rei ka̱sa ka. (Cihywat ani yin za i zamani Kalaudiyat A̱gwam Rom.) 29Ba̱nyet tssup ba a̱ shirya, koyan ba̱cicrak bu cet nu, ba tung nkyang a̱ tom ba̱nyet tssup ba a̱ yin shyi ka̱byen Yahudiya ni. 30Ba tung krum ji a̱ tyyi mbvak Barnabat bu Shawulu ba si wrak ba̱nekwo tssup ba Urushalima.
Currently Selected:
Npfong 11: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
