Yohana 4

Yesu ba̱ a̱mbyring Samariya

1Ba̱nyet Farisa na i bu hok di Yesu a̱ shai ba̱nyet ku tssup a ra̱u Yohana a̱ bo ba̱ yya baptisma. 2(Ma Yesu diccu nu a̱ yin yya baptisma ba. Ba̱pfong nu ba ba̱mba swak bu ba̱hwa mba a̱ yin yya.) 3Ka̱ram ka Yesu na̱n hok a̱mi ni a̱ wwon ka̱byen Yahudiya ka a̱ bvwot a̱ naat Galili. 4Dolet na̱ hyok i ka̱byen Samariya.

5Na̱ bu tat ka̱nkrang ka̱yaan i ka̱byen Samariya ka, ba ka̱ yei Saikar. Ka yin shyi ba̱shishrek bu ka̱byen ka Yakubu na̱ yin nang a̱hwai nu nu Yusufu ni. 6Rijiya Yakubu na yin shyi ka̱ yemi. Yesu na̱ bu rwan bu ka̱cyet ka, a̱ swrang mbeyang rijiya ka, nom a ku ka̱n tat.

7A̱mbyring Samariya a̱ nyyai a̱ ba tok ba̱shekwot i rijiya na. Yesu a̱ hywa da̱ nu, “N nang ba̱shekwot ba n sswa.” 8(Ka̱ram iya ba̱pfong nu ba ba̱ mba swak bu ba̱hwa ba nat san kyangya ka̱yat ka̱nkrang.)

9A̱mbyring a̱ywu a̱ hywa da̱ nu, “Kot! A yet a̱ntyok ba̱nyet Yahuda a ni cong ni n naai ba̱shekwot sswa da̱ nzuk, a byin bvwo n yet a̱mbyring Samariya?” (Ba̱nyet Yahuda ri sswa i ryei a Samariya ba ka̱n sswa ni ba.)

10Yesu a̱ hywa da̱ nu, “A da n bvwo za̱nang Ka̱za i bu bvwo a̱yin nu a̱ na̱ naai ba̱shekwot sswa ba ni, se a brak i ma̱n ku naai ba̱shekwot wwat sucet a ryi na̱ na̱ nang da̱ mba.”

11A̱mbyring a̱ywu a̱ hywa da̱ nu, “Malam, rijiya nanini ryi tsung; a ni shya a̱guga nu ke? A ni shya ba̱shekwot tyei sucet ba ke? 12Yakubu a̱tyyi a̱kwop njit u a̱ yin za nang rijiya na ni. Nnu bu sa̱rei kyang-bvak nu na bu zwa nu ji yin sswa ba̱shekwot rijiya ba ni. A hwa da̱ a ku ra̱u o?”

13Yesu a̱ hywa, “A̱yin nu a̱ sswa ba̱shekwot bani ni a̱ bo ni hok na̱shyi brak; 14ma a̱yin nu a̱ sswa ba̱shekwot ba n ni ku ryi ni a̱ bo byyi hok na̱shyi ba. Ba̱shekwot ba n ni ku ryi ni a̱ ni brak a̱ tyyi nrang ba̱shekwot a ku tyei sucet wityak ni.”

15A̱mbyring a̱ywu a̱ hywa, “Malam, n nang ba̱shekwot iya n ga n bo hok na̱shyi brak ba, n pfwi cong pfwei ba̱shekwot ba.”

16Yesu a̱ hywa da̱ nu, “Da̱ nat si yei a̱ntyok nwan nu yi ba.”

17A̱mbyring a̱ywu a̱ hywa, “N byyi a̱ntyok ba.”

Yesu a̱ hywa, “Ee, a wu hywa ka̱ryong da̱ a byyi a̱ntyok ba. 18A ka̱n yreng ba̱ntyok ba̱pfon, a̱ntyok a̱mba̱kitat u nu a shyi da̱ nu, di na̱ yet a̱ntyok nwan i ka̱ryong ba. A n tyyei ka̱ryong.”

19A̱mbyring a̱ywu a̱ hywa, “Kot! A yet a̱ntyok tyyei ba̱ryat Ka̱za! 20To, ba̱tyyi a̱kwop njit ba kyi Samariya a̱ yin naai Ka̱za ka kyi tazwa dihwan ti ni, ma ba̱nyet Yahuda i hywa di se zi nat Urushalima i si naai Ka̱za ka ka̱ yemi.”

21Yesu a̱ hywa, “Da̱ ryok n na̱ tyyei ka̱ryong. Ka̱ram a̱n shyi a̱ ri bai, a̱yin a̱ bo ni nat naai A̱tyyi nu Urushalima ko tazwa dihwan ka ni ba. 22Nyin ba̱nyet Samariya, yi bvwo a̱yin nu yi tssup i ba, njit zi bvwo, rot sucet a hyok nyyai di ba̱nyet Yahuda. 23Ma ka̱ram a̱ ri bai, ka ka̱n ba ma, ka̱ram ka ba̱nyet ku naai di ka̱ryong ba nin ku naai ka̱yat ntswa bu ka̱ryong ni. Ntaka̱i ba̱nyet iya a̱mi A̱tyyi nu na̱ cat ba ku naai. 24Ka̱za a̱ yet Tswa; rot a̱mi ba̱nyet ba a̱ ni ka̱ naai ni ba ka̱ naai ka̱yat ntswa bu ka̱ryong.”

25A̱mbyring a̱ywu a̱ hywa da̱ nu, “N bvwo Almasihu a̱n shyi a̱ bai, ba ku yei Kristi. Ki a̱ ba a̱ ni za tyyei nkyang ba̱sa̱rei.”

26Yesu a̱ hywa, “Nzuk u n dyat ba̱ nwan ni nzuk n yet nu.”

27Ba̱cicrak ka̱ram iya ba̱pfong Yesu ba ba ma̱n brek a̱ bu yya ka̱hat ba̱gingang ka̱sak ka na̱n dyat ba̱ a̱mbyring u ni. Ma sa̱rei mba a̱yin a̱ krang ba̱ a̱mbyring u, ko a̱ ku zzim kyang a na̱ cat i ba. Da̱ a̱yin na̱ ku zzim a̱ hywa, “A̱nzan a̱n byyi an dyat ba̱ a̱mbyring a̱ni?” ba.

28Wwon a̱mbyring a̱ywu a̱ drok ka̱ssung ka a̱ wwon ka̱nu rijiya ka a̱ brek a̱ nat ka̱yat ka̱nkrang ka a̱ si tyyei ba̱nyet ba a̱ hywa, 29“Yi ba i ryi a̱yin nu a̱ n tyyei sa̱rei nkyang a n ka̱n yya i swat ka̱sa nzuk a ni. Nu a̱mi a̱ yet Kristi nu baa?” 30Ba̱nyet ka̱nkrang ba a̱ gbit a̱ nat cyang Yesu.

31Ba̱nyet ba ba ka̱n ba ba, ba̱pfong nu ba a̱ ku faan a̱ hywa, “Malam, yen za kyangya.”

32Na̱ hywa da̱ mba, “N shyi bu kyangya na yi bvwo ni ba.”

33Ba̱yanyet ka̱yat ba̱pfong ka a̱ nwa ya zzim, “Ka̱ a̱yin a̱ bu breng kyangya a̱ bu ku ryi?”

34Yesu a̱ hywa da̱ mba, “Kyangya nzuk a nkpa yet n tssup kyang a A̱yin nu a̱ n tom ni n bo n tyak pfong a na̱ n dyi n yya ni. 35Yi byyi gan na ryat di hywan naai bvat ba nwa yya yak; nde yi cyang na̱byen na, ka̱sak ka yak a kun kop maai yya na ni. 36A̱yin nu a̱ yya yak a ni a̱ ssang zang nu a̱ bo tung yak sucet wityak, rot a̱mi da̱ a̱yin nu a̱ tup ni da̱ a̱ntyok yya yak u ba ni hok ansham ka̱rek ka̱yring. 37Ku yet ka̱ryong ban hywa, ‘A̱yanyet a̱ tup, a̱yanyet a̱ si yya yak a.’ 38N ya tun yi si yya yak a ka̱bvwa ka yin tup ni ba. Ba̱yanyet a̱mi a̱ yya pfong a, nyin ba ni ya mbvak mpfong mba na.”

39Ba̱nyet Samariya ba̱gingang i ka̱nkrang iya a̱ wrak Yesu ndya mba na rot ka̱sak ka a̱mbyring a̱ywu na̱n hywa, “A̱ n tyyei sa̱rei nkyang a n ka̱n yya i swat ka̱sa nzuk a ni.” 40Rot a̱mi ka̱ram ka ba̱nyet Samariya ba ban tung ni a̱ naai Yesu na̱ yen swrang ba̱ mba. Na̱ yen yya nom hwa ka̱ yemi.

41Ba̱yanyet ba̱gingang a̱ bo ku ryi ndya mba na rot kyang a na̱ yin dyat i. 42Ba hywa da̱ a̱mbyring a̱ywu, “Zi shim naanini ba rot kyang a a za tyyei ni ba ma rot zi ma̱n hok da̱ a̱pfo njit. Zi bu bvwo nu a̱mi a̱ yet A̱ntyok san ka̱sa nu.”

Yesu a̱ creng ka̱won a̱gba̱dang a̱yin

43Yesu na̱ bu tyak nom hwa na a̱ drok a̱ nat ka̱byen Galili. 44Yesu di ka̱nu nu a̱ yin hywa, “A̱ntyok tyyei ba̱ryat Ka̱za a̱ byyi shii i ka̱nkrang nu ba.” 45Yesu na̱ bu si nwa Galili, ba ku gwai ba̱gingang, rot ba̱yanyet a̱ yin shyi Urushalima ka̱ram a̱swa Swrap wwon ka a̱ bo ryi kyang a na̱ yya ka̱ram a̱swa ka ni.

46Yesu a̱ seyak a̱ nat Kana i ka̱byen Galili ka, ka̱bvwa ka na̱ yin brak ba̱shekwot a̱n yya ba̱shekwot a̱nap ni. Ka̱ yemi na̱ sin shya a̱gba̱dang a̱ntyok mpfong gwamnati nyyai Ka̱fa̱rna̱hum, ka̱won nu ka ya pfong ba. 47Ka̱ram ka na̱n hok di Yesu a̱ ka̱n drok nyyai Yahudiya a̱ ba Galili ni na̱ ba a̱ bu naai Yesu na̱ nat ba̱ nu a̱ si ku creng ka̱won ka. Ka̱won ka a̱ yin hwrang a̱ shyi ka̱nu dikwu. 48Yesu a̱ bu hywa da̱ nu, “Ba a̱yin nyin nu a̱ ni wrak ka̱ryong ni ba, se ba ya yya kyang ka̱hat.”

49A̱ntyok a̱ywu a̱ hywa di Yesu, “Sa̱kut, ba ahwa ho ka̱won nzuk ka a̱ bu kwu.”

50Yesu a̱ hywa da̱ nu, “Brek nat! Ka̱won nwan ka a̱ ni kaat.”

A̱ntyok a̱ywu a̱ shim ba̱ryat Yesu ba, a̱ drok a̱ naat ka̱ryi. 51Na̱ shyi a̱zi ryen naat ka̱ryi na, a̱ mon bu ka̱won ka̱ryi a̱gbang nu. Ka hywa da̱ nu, “Ka̱won nwan ka a̱ creng!”

52Na̱ ba̱ zzim ka̱ram ka ka̱won ka ka ku nwa hok ansham a ni. Ba hywa, “Ba̱soza ba a̱ ku ka̱ wwon da̱ni di tswam jring a̱ta̱nom ni.” 53A̱tyyi nu a̱ yring, ba̱cicrak ka̱ram a̱ywu a̱mi Yesu na̱ kun hywa da̱ nu, “Ka̱won nwan ka a̱ ni kaat.” Rot a̱mi nu bu sa̱rei ba̱nyet ka̱ryi nu ba ba wrak ka̱ryong di Yesu.

54A̱nu ni a̱ yin yet a̱mba̱hwa nkyang ka̱hat nu Yesu na̱ yin yya i brek nu na nyyai Yahudiya ba Galili ni.

Currently Selected:

Yohana 4: kaj

Highlight

Copy