Luka 19

Yesu bu Za̱kka

1Yesu a̱ nwa Yariko a̱ swrap. 2A̱yanyet a̱n shyi ka̱ yemi a̱ yet a̱kpok ba̱nyet ssang diga̱ndu, ba ku yei Za̱kka. A̱ yin byyi krum ba̱t. 3A̱ yin cat ryi Yesu, ma di na̱ shii ka̱za ba; a̱ maai ku ryi na ba, rot ba̱nyet a̱ yin tung ba̱gingang. 4Na̱ tyyi ncyi a̱ si wrak a̱gba̱dang ka̱kon a̱ ga shya ryi Yesu ka̱ram ka na̱ nin seyak ka̱ yemi ni. 5Yesu na̱ bu si tat ka̱rek ka a̱ yrek a̱ssi nu na a̱ hywa di Za̱kka, “Kyrek ahwa, Za̱kka, dolet n tsswa a̱gbang nwan ka̱pfun.”

6Za̱kka a̱ kyrek ba ahwa a̱ bu ku byyek bu gwai ba̱gingang. 7Sa̱rei ba̱nyet ba ba bu ryi, a̱ nwa kop a̱dyying a̱ hywa, “A̱yin a̱ni a̱ nat ka̱ryi a̱ka̱tuk a̱ntyok kani.”

8Za̱kka a̱ sseng a̱ hywa di A̱gwam Yesu, “A̱ntyok ka̱ryi! N ni tra zwa nzuk ji ba̱ a̱katyyi n wrak ba̱nyet dizot. Ki n ma̱ ka̱n bvuk a̱yin, n ni ku tan a̱tssa a̱naai.”

9Yesu a̱ hywa da̱ nu, “Ka̱pfun sucet ba a̱gbang nwan. Nwan ma a̱ ma̱n yet ka̱mbvon Ibrahim. 10Nzuk Ka̱won A̱neywu n ba cat n bo n san ba̱nyet ba a̱ brik ni.”

A̱yin nu a̱ nat kup dityok ni

(Matta 25:14-30)

11Ba̱nyet ba ba bu shyi i ku pfong a, na̱ bo ryat ba̱ mba a̱za̱n misali rot ba hwa di Dityok Ka̱za ti ba shishrek, rot ka̱ram iya na̱ bvat ba̱cincong a̱ nwa Urushalima. 12Na̱ hywa da̱ mba, “A̱yanyet a̱ yin shyi a̱ yet ka̱won a̱gwam, a̱ drok a̱ naat ka̱nkrang ka̱yaan gba̱gbang a̱ si kup dityok a̱ brek a̱ ba ka̱ryi. 13Na̱ bu naat drok a a̱ yei ba̱kwwa nu ba ba̱ mba swak a̱ ba̱ jyet, koyan zinariya a̱yring. A̱ hywa da̱ mba, ‘Koyan a̱ nat a̱ si bvan a̱ ryi kyang a na̱ nin shya ni se brek nzuk a.’ 14To, ba̱nyet ka̱nkrang nu ba a̱ ku cat ba; rot a̱mi ba tom ba̱pfong ba ku tssup a̱ si tyyei a̱gba̱dang a̱gwam a̱ywu ni di ba cat a̱tuba a̱ni nu a̱ yet a̱gwam mba nu ba.

15“Nu ka̱won a̱gwam ka a̱ si kup dityok ti a̱ brek a̱ ba ka̱ryi. Bu nyyai nu na̱ bu tom a̱ yei ba̱kwwa ba na̱ yin ba̱ ryi krum ji ni, ba ba a̱ ku tyyei kyang a ba brak a̱n shya ni. 16A̱tuba ka̱son nu a̱ hywa da̱ nu, ‘A̱ntyok ka̱ryi, zinariya a̱yring u a n dyi ni n bvan n shya swak.’ 17A̱ntyok ka̱ryi nu a̱ hywa da̱ nu, ‘Sa̱nnu! A yet a̱tsatsak a̱kwwa. Rot a yya ka̱ryong a cincong kyang, n ni na̱ ryi a̱cecet na̱nkrang swak na shyi an bvak nwan.’ 18A̱mba̱hwa nu a̱ nyyai a̱ bu hywa, ‘A̱ntyok ka̱ryi, zinariya a̱yring u a n dyi ni, n bvan n shya a̱pfon.’ 19Na̱ hywa da̱ nu, ‘Nwan meyang ba ni na̱ ryi na̱nkrang na̱pfon na shyi an bvak nwan.’ 20A̱yanyet a̱ nyyai a̱ bu hywa, ‘A̱ntyok ka̱ryi, zinariya nwan nu a̱nu ni. N yin dop an wwang a̱tro n sak. 21N yin pfong ka̱hwa prip rot a bvwa dikwu ba̱t. A na san kyang a yet nwaan ni ba, i kprem ka̱rek ka da̱ nwan n tup ni ba.’ 22Na̱ hywa da̱ nu, ‘A yet a̱ka̱tuk a̱kwwa. Ka̱nu nwan nka a̱ ni na̱ rop. A bvwo ka̱sak ka n nin bvwa dikwu ti ni, n byyi kok kyang a yet nzuuk ni ba, n bo n kprem ka̱rek ka n nin tup ni ba. 23Ku myim se a si tyyi krum nzuk ji ka̱rek a̱bvan, n ga bu za̱ san bu ba̱shekwot.’ 24A̱ hywa di ba̱nyet ba a̱ sseng ka̱rek ka ni ‘Yi san zinariya a̱yring nu nu wrak a̱tuba nu a̱ byyi swak a ni.’ 25Ba hywa da̱ nu, ‘A̱ntyok ka̱ryi! Nu a̱ wa byyi swak a, ka̱ni?’ 26Na̱ hywa, ‘Ryok n ya tyyei, a̱yin nu a̱ byyi ni, nu ba bo nin ku brang i; ma a̱yin nu a̱ sang ni, ka̱bacincong ka na̱ byyi ni ba bo ni ka̱ san a̱ ku wwon. 27A̱wwon ba̱ra̱ndwan nzuk ba a̱ rak n yet a̱gwam mba nu ni, yi ba ba̱ mba kyi, i ba̱ hywaai n cyang.’ ”

Yesu a̱ nwa Urushalima da̱ a̱gwam ni

(Matta 21:1-11; Markut 11:1-11; Yohana 12:12-19)

28Yesu na̱ bu tyak ba̱ryat ba a̱ pyyem ryen a̱ naat Urushalima. 29Na̱ cong a̱ si tat gak na̱nkrang Baitafaji bu Baitanya shishrek bu dihwan ti ban yei Zeitun nu ni, a̱ tom na̱won pfong nu ba̱na na̱hwa, 30a̱ hywa da̱ mba, “Yi nat ka̱bankrang ka a̱ shyi a̱zanson nyin ka ni, yi naat si shya ka̱bajanki ka a̱yin na̱ ka̱n wrak ni ba. Yi ka̱ byyik ba mi kyi. 31Ka̱ a̱yin a̱ si ya zzim, ‘Ho a̱nzan yin byi ka̱bajanki ka?’ yi hywa, ‘Malam a̱mi a̱ ka̱ cat.’ ”

32Ba pyyem ryen a̱ si shya ba̱cicrak bu kyang a Yesu na̱ ba̱ tyyei ni. 33Ba shyi i byi ka̱bajanki ka, ba̱nyet byyi ba a̱ hywa da̱ mba, “Ho a̱nzan yin byi ka̱bajanki ka?”

34Ba hywa, “Malam a̱mi a̱ ka̱ cat.” 35Ba pyyem ka̱bajanki ka a̱ ba mi di Yesu. A̱ kruk ba̱godo mba ba a̱ krok a̱za̱ma ka̱janki ka, a̱ brang Yesu na̱ wrak a̱n swrang. 36Ba kwot ba̱godo mba ba a̱zi ryen ka na̱ shai a̱ swrap.

37Ka̱ram ka na̱ bun ba shishrek bu Urushalima ni, ka̱rek ka ryen na kun kyyep dihwan Zeitun ti ni, a̱gba̱dang ka̱tung ba̱nyet ku tssup ba a̱ nwa gwai Ka̱za a̱ ka̱ dyep di na̱wan ba̱ tazwa rot a̱cecet nkyang u ba ryi ni. 38A̱ hywa, “Ka̱za a̱ wwon a̱gwam u a̱ ba i diyrek A̱tyyi njit ni nda. Tsswa nda shyi Tazwa. Zi dyep Ka̱za.”

39Ba̱nyet Farisa a̱yaan ka̱yat ka̱tswa ka a̱ hywa di Yesu, “Malam, kam na̱won pfong nwan na ba tyyi nyong.”

40Yesu a̱ hywa da̱ mba, “Ryok n ya tyyei: ki ba tyyi nyong, kpang ni yrek na̱wan nji i ryat.”

Yesu a̱ kun Urushalima dizot

41Yesu na̱ bu tat shishrek bu ka̱nkrang Urushalima ka, a̱ ka̱ ryi a̱ nwa ka̱nak 42a̱ hywa da̱ nka, “Nwan i da nbvwo ka̱pfun kyang a nin na̱ ba di tsswa nda ni, ma naanini a ni maai na̱ ryi da̱ a̱ssi nwan ba. 43Ka̱tuk ka̱yaan a̱ bai, ba̱ra̱ndwan nwan a̱ ni na̱ tyong a̱ krang a̱ na̱ hweyak a̱ tyyi ba̱ a̱zi gba̱gbang. 44Ba ni na̱ byyan sa̱rei a̱ hywaai ba̱nyet ba a̱ shyi ka̱yat ka̱nkrang ka ni, ko kpang jring ba ni wwon ka̱bvwa shyi nji ba, rot a ryi bvwong ka̱ram ka Ka̱za kan ba na̱ san ni ba.”

Yesu seyak a̱ nwa ka̱yat bat Ka̱za

(Matta 21:12-17; Markut 11:15-19; Yohana 2:13-22)

45Yesu a̱ seyak a̱ nwa ka̱yat bat Ka̱za a̱ nyying ba̱nyet nza. 46A̱ hywa da̱ mba, “Ba jem ka̱yat ba̱ryat Ka̱za, ‘Ba ni yei ka̱ryi nzuk ka̱rek a̱duwa,’ ma nyin ba ka̱ brak ka yet ka̱bvwa nrang ba̱tang.”

47Yesu a̱ zzek ka̱yat bat Ka̱za ka kozan ka̱tuk. Ba̱cecet ba̱gado Ka̱za ba bu ba̱malam Truwang ba, bu kpikpit ba̱cecet ba̱nyet a a̱ cat ku hywat, 48ma ba bvwo diwat ti ba nin yya ni ba, rot sa̱rei ba̱nyet a̱ yin krok a̱pfo a̱ ku pfong, di ba cat diwan tiyring i ba̱ seyak ba.

Currently Selected:

Luka 19: kaj

Highlight

Copy