Luka 23

Ba nat bu Yesu a̱ta̱ssi Bilatut

(Matta 27:1-2, 11-14; Markut 15:1-5; Yohana 18:28-38)

1Sa̱rei mba ba drok ka̱ yemi bu Yesu a̱ nat i di Bilatut, 2a̱ bo si nwa ku kyyat ka̱ yemi, a̱ yya, “Zi pyyem a̱yin a̱ni na̱ raai ba̱nyet njit ba, a̱ ba̱ tyyei di ba ryok trang diga̱ndu da̱ A̱gwam Rom nu ba, a̱ tyyei da̱ a̱ yet Kristi, wato a̱ yet a̱gwam.”

3Bilatut a̱ ku zzim, “Nwan yet a̱gwam ba̱nyet Yahuda nu o?” Yesu a̱ hywa, “A hywa ansham!”

4Bilatut a̱ si hywa di ba̱cecet ba̱gado Ka̱za ba bu ka̱tswa ba̱nyet ka, “N shya a̱yin a̱ni bu hywak ba.”

5Ba sseng di cet, a̱ hywa, “A̱yin a̱ni a̱ kat a̱ zzek sa̱rei ka̱byen ba̱nyet Yahuda ka a̱ hwwut ba̱nyet ba a̱ yya jyi, a̱ sook nyyai Galili na̱ ba kyi ba̱nyying.”

Ba nat bu Yesu di Hirudut

6Bilatut na̱ bu hok a̱mi, a̱ zzim, “A̱ntyen a̱ni a̱ yet a̱ntyok Galili e?” 7Na̱ bu hok di Yesu a̱ nyyai i ka̱byen ka Hirudut na̱ breng ni, na̱ tyyi ba nat bu Yesu di Hirudut a̱ yin shyi Urushalima ka ka̱ram iya. 8Hirudut a̱ bu ryi Yesu a̱ hok ansham, rot nyyai gba̱gbang a̱ ka̱n pfong nkhang nu na ma a̱ ka̱n ku shya a̱ ryi ba. A̱ cat a̱ ryi Yesu na̱ yya nkyang ka̱hat. 9Hirudut a̱ zzim Yesu nkyang ba̱gingang, ma Yesu a̱ krang ba. 10Ba̱cecet ba̱gado Ka̱za ba bu ba̱malam Truwang ba a̱ bo seyak a̱ sseng a̱ nwa kyyat Yesu di cet. 11Hirudut bu nsoja nu na i nwa zzang Yesu a̱ ku yya ryihywat. A̱ ku kup ka̱sham a̱tro a̱ ku brek a̱ tom mi di Bilatut. 12Ka̱tuk iya a̱mi Hirudut bu Bilatut ban pyyem dirywai. Nyyai ka ba yin yet ba̱ra̱ndwan ba̱yaan.

Ba yya Yesu shirya dikwu

(Matta 27:15-26; Markut 15:6-15; Yohana 18:39--19:16)

13Bilatut a̱ yei ba̱cecet ba̱gado Ka̱za ba bu ba̱kwak-ka̱son ba bu kpikpit ba̱nyet a ka̱rek ka̱yring 14a̱ hywa da̱ mba, “Yi ba ba̱ a̱yin a̱ni ka̱rek nzuk, da̱ a̱ hwwut ba̱nyet ba rak tssup dityok Rom ti. N dyat ba̱ nu kyi a̱ta̱ssi nyin, n ku shya bu ko kyang yring ka̱yat nkyang ka yin ku breng ni ba. 15Yi ryi Hirudut ma a̱ ku shya bu kyang ba; nkpa na̱n ku yrik a̱ bo ba mi da̱ njit. Kyang n shyi na̱ yya nying na maai i tyyi ban ku hywat ni ba. 16Rot a̱mi n ni tyyi ba ku tsot da̱ a̱yo a̱ ku kaai a̱ wwon na̱ nat.”

[ 17An tada mba ji kozan dihywa Swrap wwon ba na naai ba byyik a̱tuba a̱yring i ba̱nyet ba a̱ shyi a jaru nu ni.] 18Sa̱rei ka̱tswa ba̱nyet ka ba krok nkun a̱ hywa, “Yi ku hywat, i za byyik Barabbat.” 19(Nu Barabbat a̱ yin shyi a jaru rot zwang zaan ba yin kwan ka̱yat ka̱nkrang ka a̱ sin hywat a̱yin.)

20Bilatut a̱ bo ryat ba̱ mba da̱ ni kaai Yesu a̱ wwon. 21Ma ba krok nkun a̱ yya “Ku teyang tazwa ka̱teyang, ku teyang tazwa ka̱teyang!”

22Na̱ bo ba̱ zzim krang a̱mba̱tat, “Ho a̱nzan? A̱nzan a̱mi na̱ yya? Nzuk n ku shya bu hywak a maai ban ku hywat ni ba. Rot a̱mi n ni tyyi ba ku tsot da̱ a̱yo a̱ ku tun na̱ nat.”

23Ba bo kwot nkun a̱ yya, “Ku teyang tazwa ka̱teyang!” Nkun mba na i si sswa cet. 24Rot a̱mi Bilatut a̱ ba̱ yya kyang a ba cat i a̱ yya Yesu shirya dikwu. 25A̱ byyik a̱tuba nu ba cat i, a̱tuba nu ba yin dop rot a̱ yrek zwang ba sin hywat a̱yin ni. A̱ ba̱ ryi Yesu ba yya kyang a ba cat i.

Ba teyang Yesu tazwa ka̱teyang

(Matta 27:32-44; Markut 15:21-32; Yohana 19:17-27)

26Nsoja na n nat bu Yesu; ka̱ram ka ba bun shyi nnaat a ni, a̱ mon bu Siman a̱ntyok Kurane na̱ nyyai i ka̱uye a̱ naat Urushalima nu. Ba ku gwwak a̱ sook ka̱teyang na a̱ ku tyyi na̱ kpo cot a̱ tssup Yesu.

27Ba̱nyet ba̱gingang a̱ ku tssup, nta̱mak bu ba̱nyring ba sak mbvak ka̱hok a̱ kun a̱n tssup. 28Yesu a̱ brak a̱ hywa da̱ mba, “Nyin ba̱nyring Urushalima, yi ryok n kun ba; yi kun a̱ccu nyin bu na̱won nyin. 29Rot ka̱ram a̱ bai, ka̱nying ka yi nin hywa, ‘Ba̱nyet ba a̱ byyi na̱won ni ba a̱ hok ansham, ka̱hwa ka a̱ ka̱n byyi shya ni ba bu dibyyang ti ka̱n tyyi zzwa ni ba a̱ ni hok ansham.’ 30Ka̱ram iya a̱mi ba nin hywa di a̱huhwan, ‘Bvan za kwei,’ a̱ hywa di tsitsok, ‘Za nyat.’ 31Rot ki ba̱nyet ba a̱ n yya nkyang ani a̱pipyyi ka̱kon na ri yet a̱zwong ni, a̱nzan ba ni yya ka̱ram ka nan kwot ni?”

32A̱ bo wruk bu ba̱yanyet ba̱yaan nyyai ajaru nu ba̱ mba ba̱hwa a̱ ni hywat a̱nta̱mak ba̱ nu. Ba yin yet ba̱tang. 33Ba si tat ka̱rek ka ban yei “Nkup diccu” ni, a̱ ku teyang ka̱ yemi tazwa ka̱teyang ka bu ba̱nyet iya ba̱ mba ba̱hwa, a̱yring mbvuk yak, a̱yring mbvuk myin. 34Yesu a̱ hywa, “A̱tyyi, ri ba̱ breng i rya ba, rot ba bvwo kyang a ba yya ni ba.”

A̱ trung ba̱tro nu ba a̱ ya ka a̱n ta gyai. 35Ba̱nyet ba a̱ tung a̱ sseng a̱ cyang, ba̱cecet ba̱nyet Yahuda ba ba ku zzang a̱ yya, “A̱ ssang ba̱yanyet; ryok na̱ san diccu nu zi ryi. Ki nu a̱mi a̱ yet Kristi nu Ka̱za ka tssa ni.”

36Nsoja na meyang i ma̱n ku zzang, a̱ nat a̱ si ba bu a̱yinyyat nkwwa a̱ bu ku tyyi mi, 37a̱ hywa da̱ nu, “Ka̱ nwan a̱mi yet a̱gwam ba̱nyet Yahuda nu, a san diccu nwan zi ryi.” 38Ba jem a̱zi diccu nu ti, “Nnu a̱mi a̱ yet a̱gwam ba̱nyet Yahuda nu.”

39A̱tang a̱yring u a̱ yin shyi ryak a i dikum ti ni a̱ nwa ryat Yesu ryihywat a̱ hywa, “N ni nye nwan yet Kristi nu o? Da̱ san diccu nwan ba̱ njit a̱ra!”

40A̱tang a̱yring u a̱ ku kam, a̱ hywa, “A pfong ka̱wun Ka̱za baa? A bvwo shirya jring zi nwa ba̱ nu baa? 41Shirya njit ji myim bu kyang a zi yya ni, ma a̱yin a̱ni a̱ yya hywak ba.” 42A̱ brak a̱ hywa di Yesu, “Yesu, a bu n yring ka̱ram ka a nwa i Dityok nwan ti ni.”

43Yesu a̱ hywa da̱ nu, “N na̱ tyyei ka̱ryong: ka̱pfun a shyi ba̱ nzuk i ka̱ryi pfwi.”

Dikwu Yesu

(Matta 27:45-56; Markut 15:33-41; Yohana 19:28-30)

44Ka̱ram kani nom ku ka̱n ba a̱katyyi, ka̱bvwa ka a̱ kwwat ryin a̱ tyak ka̱byen ka bu tat tswam tsat. 45Ka̱nu nom ka a̱ ryyik, labule ka̱yat bat Ka̱za na i tra ba̱ a̱katyyi. 46Yesu a̱ yrek diwan nu ti tazwa a̱ yei a̱ hywa, “A̱tyyi, n wwon sso nzuk ji an bvak nwan.” Na̱ bu hywa a̱mi a̱ kwu.

47A̱tuba nu a̱ yin yet a̱gba̱dang nsoja nu na̱ bu ryi kyang a Yesu na̱ yya ni, a̱ dyep Ka̱za, a̱ hywa, “Ka̱ryong a̱mi, a̱yin a̱ni a̱ yet a̱tsatsak a̱yin.”

48Ba̱nyet ba a̱ gbit a̱ nat cyang a ni a̱ si ryi kyang a yya ni a̱ brek bu mbvak mba ka̱hok a̱ kun a̱ naat ka̱ryi. 49Ma ba̱nyet ba a̱ yin ku bvwo ni a̱ sseng ba̱zan a̱ cyang. A̱mi meyang ba̱nyring ba a̱ yin cong ba̱ nu nyyai Galili ka ni.

Ba nyat Yesu

(Matta 27:57-61; Markut 15:42-47; Yohana 19:38-42)

50-51A̱yanyet a̱ yin shyi ka̱yat ba̱cecet ba̱nyet Yahuda ka, ba yin ku yei Yusufu, a̱ yin yet a̱tsatsak a̱yin. A̱ yin shim ba̱ryat mba ba bu kyang a ba yin yya ni ba. A̱ yin yet a̱ntyok Arimatiya i ka̱byen Yahudiya. A̱ yin tot brek Dityok Ka̱za na ba̱t. 52Na̱ nat di Bilatut a̱ si naai kom Yesu na. 53A̱ kpo kyrek a̱ gat da̱ a̱tro nyyak ba̱nyet a̱ si tyyi i dibvong nkpang ti ba ka̱n nyat a̱yin ka̱ram ka̱yaan ni ba. 54Ka̱tuk iya a̱mi ba yin jyi nkyang a̱swa na a̱n tot A̱sa̱ba̱t u.

55Ba̱nyring ba a̱ yin cong bu Yesu nyyai Galili ni a̱ tssup Yusufu a̱ si ryi ryak a bu ka̱sak ka ba yin ku myyi ni. 56A̱ brek a̱ bu cat turare bu ba̱myyi a̱ wo krok an kom nu na. Ka̱tuk A̱sa̱ba̱t ka a̱ wo krang a̱ ba, ba pfwi da̱ni truwang ji zin ba̱ tyyei ni.

Currently Selected:

Luka 23: kaj

Highlight

Copy