Matta 18
18
A̱nyan a̱ yet a̱kpok u sa̱rei?
(Markut 9:33-37; Luka 9:46-48)
1Ka̱ram iya na̱won pfong Yesu na a̱ nyyai a̱ ba da̱ nu a̱ bu hywa, “A̱nyan a̱mi a̱ yet a̱kpok u sa̱rei i Dityok Tazwa ti?”
2Yesu a̱ yei ka̱bawon a̱ sak a̱katyyi mba ka 3a̱ hywa, “Se yi bvwo, ki yi shei i ryi di na̱mawon ni ba, yi ni maai i nwa Dityok Tazwa ti ba. 4To, a̱yin nu a̱ yet a̱kpok i Dityok Tazwa ni a̱mi a̱ yet a̱tuba nu a̱ ya breng an kyang ni ba di ka̱bawon kani ni. 5A̱yin nu a̱ ma̱n gwai ka̱bawon da̱ni di ka̱nkani ni i diyrek nzuk, nzuk a̱mi na̱ gwai.”
Kyang a tyei dikpak ni
(Markut 9:42-48; Luka 17:1-2)
6“A̱yin nu a̱ grap ka̱bawon ka̱yring ka̱yat da̱bawon na a̱ ka̱ n dyi ndya mba na ni ka yya a̱ka̱tukyya, a̱yin a̱ywu ku myim ba ku ryak a̱gba̱dang naan a̱ ku yrik a̱ rot i kei ba̱shekwot. 7Kaito ka̱sa nu rot nkyang a tyei ba̱nyet a̱ka̱tukyya ni. Dolet nkyang iya i ba, ma a̱yin nu a̱ cong da̱ na ni a̱ ni sswa ka̱bvung.
8“Ki a ryi bvak nwan ko tak nwan ku ni na̱ tyyi dikpak, se a kpo tyet jing. Goma a wu nwa ka̱ryi sucet bu bvak yring ko tak yring, di ba na̱ yrik a̱ ta an dong a byyi tyak ni ba bu rwam nwan jyem. 9Ki dissi nwan ma̱ ni na̱ tyyi dikpak, ta̱ tun jing. Ku myim a wu nwa ka̱ryi sucet bu dissi tiyring, di ba na̱ yrik a̱ ta ka̱yat ka̱ryi ndong wi tyyai ba̱ a̱jyem a̱ssi.”
Bvon-tsaap ji brik ni
(Luka 15:3-7)
10A̱ bo hywa da̱ mba, “Yi ryok byyai a̱cwwang na̱mawon ani ba. Kozan ka̱ram ba̱pfong Ka̱za mba ba a̱ sseng a̱ta̱ssi A̱tyyi ka Tazwa. [ 11Rot nzuk Ka̱won A̱neywu n ba n ga bu san ba̱nyet ba a̱ brik ni.]
12“Nyin yi ryi ni? Ka̱ a̱yin a̱ byyi bvon-tsaap ba̱ nji ncyi, jring ka̱yat nji i brik hwa? A̱ ni wwon nswak a̱kumbvuyring ba̱ a̱kumbvuyring u a a̱mbeyang ntsok ka a̱ nat cat jring ji brik i baa? 13Ka̱ryong n ya tyyei: Ka̱ a̱ si za̱ shya, rya nu na ni sai bu bvon jring jini ra̱u kpikpit nswak a̱kumbvuyring ba̱ a̱kumbvuyring u wi brik a ni. 14A̱mi A̱tyyi nyin nu Tazwa ka na̱n cat ko a̱yring ka̱yat na̱mawon ka ni a̱ brik ba.”
A̱tuba nu a̱ kpa i ka̱ywap ni
15“Ki a̱wumba nwan a̱ na̱ ywap, a nat si ku shya, ba̱ nyin ba̱ nyin ba̱hwa a ku tyyei ka̱ywap nu ka. Ki a̱ si na̱ hok, a ryi a san a̱wumba nwan nu. 16Ki a̱ rak na̱ hok a, a shya a̱tuba a̱yring ko ba̱nyet ba̱hwa ‘ba ga shya shaida ka̱nu ba̱nyet ba̱hwa ko ba̱tat’ da̱ni di ba̱ryat Ka̱za ba ban hywa ni. 17Ki a̱ bo si rak hok ba̱nyet iya, to, se ba tyyei coc ji sa̱rei. Ki a̱ bo rak hok coc ji, to, ba ku sook da̱ a̱ntyok cyi Ka̱za ko a̱ntyok ssang diga̱ndu ni.”
Kyang a yi rop ni bu kyang a yi byyik ni
18“N ya tyyei ka̱ryong: kyang a yi rop kyi ni ba kpo rop Tazwa, kyang a yi ma̱n byyik kyi ni ba kpo byyik Tazwa.
19“N bo ya tyyei, ki ba̱nyet ba̱hwa nyin a̱ mon ka̱nu a̱ naai kyang, A̱tyyi nzuk u Tazwa ka a̱ ni ya yya da̱ nkpa. 20Rot ka̱ram ka ba̱nyet ba̱hwa ko ba̱tat ban tung i diyrek nzuk ni, n shyi ba̱ mba.”
A̱kwwa nu a̱ sang dizot ni
21Bitut a̱ nyyai a̱ bu hywa di Yesu, “A̱gwam, nkrang ka̱mang a̱wumba nzuk na̱ nin yya hywak n ku tun n wwon? Nkrang a̱tiyring o?”
22Yesu a̱ hywa da̱ nu, “Kai! Kaai, nkrang a̱tiyring ba, ma har nkrang nswak a̱tiyring nkrang a̱tiyring. 23Rot Dityok Tazwa ti ryi di a̱gwam u a̱ yin cat bvwo krum ji shyi an bvak ba̱kwwa nu na ni. 24Na̱ nwa zzim ba̱kwwa bani ba ba ba̱ a̱tuba a̱yaan nu a̱ ku tssup krum ba̱gingang ji sswa cet twang ni. 25Nu a̱kwwa nu di na̱ byyi kyang a na̱ nin tan ni ba, a̱ntyok ka̱ryi nu a̱ tyyi ba ku pyyem, nu bu a̱mbyring u bu na̱won na bu sa̱rei nkyang a na̱ byyi ni a̱ ryap, a̱ ga shya kyang a ba nin tan ta na ni. 26A̱kwwa nu a̱ ta̱gbok ka̱byen a̱ naai a̱ntyok ka̱ryi nu a̱ hywa, ‘N yya hakuri n cat krum ji n na̱ tan sa̱rei.’ 27A̱ntyok ka̱ryi nu a̱ hok dizot nu a̱ ku tun a̱ wwon a̱ bring ta na.
28“A̱kwwa a̱ywu na̱ bu wruk, a̱ si shya a̱kpondang dikwwa nu a̱yaan nu na̱ ku breng krum ba̱cincong ni, a̱ ku tswang a̱ pyyem di na̱ ku tan krum nu ji. 29A̱kwwa a̱ni a̱ ta̱gbok ka̱byen, a̱ ku naai a̱ hywa, ‘N yya hakuri n cat krum ji n na̱ tan.’ 30Na̱ rak, a̱ tyyi ba ku tyyi a jaru a̱n tot ka̱ram ka na̱ nin ku tan ni. 31Kpikpit ba̱kwwa na ba bu ryi a̱mi, a̱ hok rya byyan, a̱ nat a̱ si tyyei a̱ntyok ka̱ryi mba nu kyang a yya ni. 32A̱ntyok ka̱ryi nu a̱ yei a̱kwwa nu a̱ hywa da̱ nu, ‘A yet a̱ka̱tuk a̱kwwa. N bring ta na n na̱ tssup ni rot a n naai. 33A̱nzan a̱ ni na̱ bvwo hok dizot a̱kwwa tini da̱ni da̱ n nin hok dizot nwan ti ni?’ 34A̱ntyok ka̱ryi nu a̱ hok diryen a̱ tyyi ba tyyi a̱kwwa nu a a̱jaru se ka̱ram ka na̱n ku tan krum nu ji ni.”
35Yesu na̱ bu tyak a̱ hywa, “A̱mi meyang A̱tyyi nzuk u Tazwa ka na̱ nin dak bring a̱tuba nu a̱ rak bring a̱wumba nu ka̱yat rya nu ka ni.”
Currently Selected:
Matta 18: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
