Matta 21

Yesu a̱ nwa Urushalima da̱ a̱gwam ni

(Markut 11:1-11; Luka 19:28-40; Yohana 12:12-19)

1Yesu bu na̱won pfong nu na ba bu tat shishrek bu Urushalima, ba nwa Baitafaji shishrek bu dihwan Zeitun. Ka̱ yemi Yesu a̱ tom na̱won pfong na̱hwa nu 2a̱ hywa, “Yi nat ka̱bankrang a̱zanson nyin ka. Yi naat si shya ka̱janki ka sseng bu ka̱won nka ka. Yi na̱ byyik i ba bu n dyi. 3A̱yin nu a̱ krang ba̱ nyin ni yi hywa da̱ a̱ntyok ka̱ryi a̱mi a̱ na̱ cat a̱ ni brek da̱ na ba̱nyying.”

4Ba yi yya a̱mi ku gi ba ba̱cicrak bu ba̱ryat ba a̱ntyok tyyei ba̱ryat Ka̱za na̱ yin hywa ni,

5“Yi tyyei ka̱nkrang Sihiyona:

A̱gwam nwan nu a̱ bai da̱ nwan ba̱nyying.

A̱ yet a̱shushwon a̱yin

a̱ shyi tazwa ka̱won ka̱janki.”

6Rot a̱mi na̱won pfong a a̱ ya ka̱son a̱ si yya kyang a na̱ ba̱ tyyi yya na ni. 7Ba si pyyem ka̱janki ka bu ka̱won ka a̱ ba mi, a̱ bu trung ba̱godo mba ba a̱ krok a̱za̱ ma na̱janki ka, Yesu a̱ wrak ka̱won ka a̱n swrang. 8Ba̱nyet ba̱gingang a̱ trung ba̱godo mba ba a̱ ku trak i a̱zi ryen ka, ba̱yanyet a̱ sam nbvak na̱kon a̱ trak a̱zi ryen ka. 9Ba̱nyet ba a̱ kwak ka̱son ka ni bu ba̱nyet ba a̱ shyi a̱maryim ka ni a̱ nwa a̱ ku tang a̱didyep a̱ yya, “Sucet nwan da̱de, ka̱mbvon Dawuda! A̱ntyok ka̱nu-a̱tan a̱mi a̱yin nu a̱ ba i diyrek A̱gwam njit i. Zi dyep Ka̱za!”

10Yesu na̱ bu nwa ka̱yat Urushalima ka, sa̱rei ba̱nyet ba a̱ tyyi ba̱tai, a̱ zzim a̱ yya, “A̱nyan a̱ yemi?”

11Ba hywa, “Nu a̱mi a̱ yet Yesu a̱ntyok tyyei ba̱ryat Ka̱za nu nyyai Nazarat i ka̱byen Galili ka.”

Yesu a̱ nat i bat Ka̱za

(Markut 11:15-19; Luka 19:45-48; Yohana 2:13-22)

12Yesu a̱ nwa i bat Ka̱za na a̱ si nyying ba̱nyet ba a̱ yin yya za i bat Ka̱za na ni, a̱ yyit tebur ba̱nyet ji a̱ yin ssek krum ji ni, nta̱mak bu ba̱kprok ba̱nyet ba a̱ yin zzap ba̱bva ba ni. 13A̱ hywa da̱ mba, “Ka̱za a̱ jem i ba̱ryat nka ba a̱ hywa, ‘Ba ni yei ka̱ryi nzuk ka ka̱ryi a̱duwa,’ nyin ba ka̱ bvan n yya ka̱bvwa nrang ba̱tang.”

14Ba̱nyet a̱tutwan bu ba̱nyet ta̱ruk nkap a̱ cong da̱ nu i bat Ka̱za na na̱ ba̱ creng. 15Ba̱cecet ba̱gado Ka̱za bu ba̱malam Truwang ba a̱ hok diryen ka̱ram ka ban dyi na̱ yya nkyang ka̱hat na ni, na̱mawon ma na ku dyep a̱ yya, “Sucet nwan da̱de ka̱mbvon Dawuda!”

16Ba̱cecet ba̱gado Ka̱za ba a̱ hywa di Yesu, “A hok kyang a ba ryat i e?”

Yesu a̱ hywa da̱ mba, “N hok. Yi ka̱n twang ka̱sak ka ba̱ryat Ka̱za ba ban hywa, ‘A zzek na̱mawon ba bvwo a̱didyep.’ ”

17Yesu a̱ drok a̱ ba̱ wwon i ka̱nkrang ka a̱ nat Baitanya a̱ si tsswa ka̱ yemi.

Yesu a̱ shyi ka̱kon a̱bvap

(Markut 11:12-14, 20-24)

18Ba wo shyek ka̱ntson tat, a̱ bvwot a̱ naat Urushalima, Yesu a̱ hok cihywat. 19Na̱ ryi ka̱kon a̱bvap a̱mbeyang a̱zi ryen ka a̱ teyak a̱ nat, a̱ si shya ka byyi disum ba se ba̱ a̱pipyyi. Na̱ hywa da̱ nka, “A bu ni byyi sum ba.” Bu i ka̱baram ka̱kon a̱bvap ka a̱ kwot.

20Na̱won pfong nu na a̱ ryi, ka̱wun a̱ ba̱ pyyem. Ba hywa, “Kot! A̱nzan a̱n byyi ka̱kon kani kan kwot ba ahwa a̱mi?”

21Yesu a̱ hywa da̱ mba, “Se yi bvwo, ki yin tyyi rya, ki yi byyi kwak rya ba, yi ni maai yya kyang a n yya ka̱kon a̱bvap ka mi ni. Har ma ki yi hywa di tsok jini, ‘Ya wat si kpa i kei ti,’ a ryi zi nat. 22Ki yin tyyi rya, kozan kyang yi naai a a̱duwa yi ni shya.”

Ba zzim ka̱bvwa ka cet Yesu na kun nyyai ni

(Markut 11:27-33; Luka 20:1-8)

23Yesu a̱ brek a̱ bu nwa ka̱yat bat Ka̱za ka a̱ nwa zzek ba̱nyet ba. Ba̱cecet ba̱gado Ka̱za ba bu ba̱nekwo ba̱nyet Yahuda ba a̱ nyyai a̱ bu ku zzim a̱ hywa, “A̱nzan taka̱i cet an yya nkyang ani? A̱nyan a̱mi a̱ na̱ ryi cet iya?”

24Yesu a̱ hywa da̱ mba, “Nzuk meyang n ma̱ ni ya zzim bu kyang yring. Ki yi n shim mi, n ni ya tyyei taka̱i cet na n nin yya nkyang ani ni. 25Ke Yohana na̱ yin shya cet yya baptisma nu na? A̱ yin shya di Ka̱za ki ba̱nyet?”

Ba nwa a̱cecet bu mba-mba a̱ hywa, “To, a̱nzan zi ni hywa? Ki zi hywa da̱ a̱ yin shya di Ka̱za, na̱ hywa, ‘To, a̱nzan a̱n byyi yin dak ku hok a?’ 26Ki zi ma̱n hywa da̱ a̱ yin shya di ba̱nyet, zi pfong ka̱wun ba̱nyet ka, rot sa̱rei mba ba bvwo Yohana a̱ yin yet a̱ntyok tyyei ba̱ryat Ka̱za.” 27Rot a̱mi ba hywa da̱ nu, “Zi bvwo ba.”

Na̱ hywa da̱ mba, “Nzuk meyang da n ma̱ ni ya tyyei taka̱i cet na n nin yya nkyang ani ni ba.”

Gan tazwa na̱won na̱hwa

28Na̱ bo hywa da̱ mba, “A̱nzan yi hwa? A̱yanyet a̱ yin byyi na̱won na̱hwa. A̱ nat a̱ si hywa da̱ a̱nekwo nu, ‘Ka̱won nzuk, n cat a nat si yya pfong i ka̱byen ba̱lemu nzuk ka.’ 29Ka̱won ka a̱ hywa, ‘N naat ba.’ Ma a̱tyyi nu na̱ drok, ka shei rya nka na a̱ nat a̱ si yya pfong a. 30A̱tyyi nu a̱ nat da̱ a̱tuba a̱yring u a̱ si hywa, ‘Ka̱won nzuk, n cat a nat si yya pfong i ka̱byen ba̱lemu nzuk ka.’ Ka hywa, ‘To, Baba.’ Ma di ka shek ba. 31A̱nyan ka̱yat mba a̱ yya kyang a a̱tyyi nu na̱ cat i?”

Ba hywa, “A̱nekwo nu.”

Yesu a̱ hywa da̱ mba, “Nde yi ryok n ya tyyei, ba̱nyet ssang diga̱ndu ba bu ba̱kan a̱naan a̱ shyi nwai Dityok Ka̱za ti a̱ ya wwon. 32Rot Yohana A̱yya Baptisma a̱ ba a bu ya tyyei ryen na yi ni sook ni, yi rak shim a. Ma ba̱nyet ssang diga̱ndu ba bu ba̱kan-a̱naan ba a̱ shim. Ka̱ram ka yin ba̱ ryi da̱ a̱ssi nyin ba wwat ka̱ryong ni, da̱ nyin ba ma̱n shim ba.”

Ba̱nyet yya haya ka̱byen ba̱lemu

(Markut 12:1-12; Luka 20:9-19)

33Yesu a̱ hywa, “Yi hok nkhang nzaan. A̱yanyet a̱ yin tssup na̱kon a̱lemu a̱ na̱ krang da a̱shyim, a̱ si bo rung ka̱bvwa hywu a̱lemu ka, a̱ bo nok ka̱bvwa tot, wwon a̱ tyyi ka̱byen ka i haya di ba̱keyak ba̱yaan, a̱ si drok a̱ nat ka̱cyet. 34Ka̱ram kpyei a̱lemu ka ka bu yya, na̱ tom ba̱kwwa nu ba̱yaan di ba̱nyet haya ba ba bu san zang nu ji. 35Ba̱nyet haya ba a̱ bu pyyem ba̱kwwa nu ba, a̱ tsot a̱tuba a̱yring, a̱ hywat a̱yring, a̱ mang a̱yring u di kpang. 36Na̱ bo tom ba̱kwwa ba̱yaan nu ba a̱ ra̱u ba̱nying ka̱son ba ni. Ba bu yya ba̱rimi ba̱ mba. 37A̱ngbom u, na̱ tun ka̱won nu a̱ tom, a̱ hywa, ‘N bvwo ba naat a̱ si ka̱ ryi digba̱dang.’ 38Ma ba̱nyet haya ba ba bu ryi ka̱won ka a̱ hywa, ‘To, ka̱won nu ka a̱ yemi a̱ bai. Zi ka̱ hywat, wwon i kok digado nu ti.’ 39Rot a̱mi ba ku pyyem a̱ ku sook a̱ wruk i i ka̱byen a̱lemu ka a̱ si ku hywat.”

40Yesu a̱ hywa, “To, yi hwa di ka̱ a̱ntyok ka̱byen nu a̱ ba, a̱ ni yya ni bu ba̱nyet haya iya?”

41Ba hywa, “A̱ ni hywaai ba̱ka̱tuk ba̱nyet iya a̱ brak ka̱byen ka a̱ tyyi mbvak ba̱nyet ba a̱ ni ku jyet zang nu ji ka̱ram kpyei na̱sum na̱kon na ni.”

42Yesu a̱ hywa da̱ mba, “Yi ka̱n twang i ryi kyang a ba̱ryat Ka̱za ba ban hywa ni baa?

‘Kpang ji ba̱nyet dinok ba rak i

nji a̱mi ba si sak zi yet ka̱gwut ka.

Pfong Ka̱za a̱mi,

ku yet kyang ka̱hat ba̱t a a̱ssi njit.’ ”

43Yesu a̱ bo hywa, “Nkpa n ya tyyei, ba ni san Dityok Ka̱za da̱ nyin a̱ wrak ba̱nyet ba a̱ ni wrak disum ni. [ 44A̱yin nu a̱ kpa tazwa kpang ka ni ni ku cwrya n yya a̱cwwang. A̱yin nu kpang ji zi ku kpa ni ni ku kwang n yya mpyyi.]”

45Ba̱cecet ba̱gado Ka̱za ba bu ba̱nyet Farisa na ba bu hok misalai Yesu ji, a̱ bvwo mba a̱mi na̱ ryat a̱ ba̱ kwot i 46a̱ cat ku pyyem, ma a̱ pfong ka̱wun ka̱tswa ba̱nyet ka, rot ba yin bvwo Yesu a̱ yet a̱ntyok tyyei ba̱ryat Ka̱za.

Currently Selected:

Matta 21: kaj

Highlight

Copy