Matta 23

Yesu a̱ kam ba̱malam Truwang ba nta̱mak bu ba̱nyet Farisa

(Markut 12:38-39; Luka 11:43, 46; 20:45-46)

1Wwon Yesu a̱ ryat bu ka̱tswa ba̱nyet nta̱mak bu na̱won pfong nu ba, 2“Ba̱nyet Farisa bu ba̱malam Truwang ba a̱mi a̱ maai zzek Truwang Musa ji. 3Rot a̱mi dolet yi ba̱ pfong i bu tssup kozan kyang a ba ya tyyei ni; ma yi ryok yya nkyang a ba yya ni ba, rot kyang a ba zzek ni nkpa a̱mi ba yya ba. 4Mba ba bvwo bu rop a̱gba̱ryet ncot a̱ sak a̱yin ni a̱za̱n gwrang, ma di ba ni cat tyyi ko ka̱ta̱hrung a̱n ku byram ba. 5Kozan kyang ba yya i swat mba na, ba yya ba̱nyet a̱ ga ba̱ ryi. Ba na jyi ndaai mba na a̱ jem zizwa ba̱ryat Ka̱za a̱n tyyi, a̱ bo jyi a̱ccu ba̱tro mba na ba kwang ka̱byen. 6Mba a̱mi a̱ cat a̱tsatsak na̱bvwa ba̱cecet ba̱nyet i na̱bvwa dihywa na, ba̱ a̱cecet na̱bvwa swat u a a̱bat a̱duwa na. 7Ki ba nwa tunga, ba cat ba̱nyet ba a̱ ba̱ byei a̱ yya ‘Malam’. 8Yi ryok shim ba ya yei ‘Malam’ ba, rot sa̱rei nyin yi yet ba̱wumbeyang ba̱yaan, Malam nyin nu a̱ shyi ba̱ a̱yring. 9Da̱ nyin ba ni yei a̱yin ‘A̱tyyi’ i ka̱sa kani ba, rot yi byyi A̱tyyi a̱yring nu a̱mi a̱ shyi nTazwa. 10Di ba ni ya yei ‘A̱ntyok ka̱ryi’ ba, rot A̱ntyok Ka̱ryi nu a̱ shyi ba̱ a̱yring, nnu a̱ yet Kristi nu. 11A̱yin nu a̱ yet a̱gba̱dang nyin nu sa̱rei ni, se na̱ ya yya dikwwa. 12A̱yin nu a̱ cat ya cin ni a̱ ni ya tyyi rat; ma a̱yin nu a̱ ya breng a nkyang ni ba, nu a̱mi a̱ ni shya shii a.”

Yesu a̱ ba̱ kam tazwa raai ba̱nyet

(Markut 12:40; Luka 11:39-42, 44, 52; 20:47)

13“Kaito nyin ba̱malam Truwang ba bu ba̱nyet Farisa, nyin ba̱nyet raai ba̱nyet, yi hweyak Dityok Tazwa ti a a̱ssi ba̱nyet a, nyin ba nwa ba, da̱ nyin ba wwon ba̱nyet ba a̱ kwan nwa na ni a̱ nwa ba.”

[ 14“Kaito nyin ba̱malam Truwang ba bu ba̱nyet Farisa, nyin ba̱nyet raai ba̱nyet, yi bvei ba̱nyring sang ba̱ntyok n cong ba̱ cip na̱sa mba ssang, i si wruk si sseng i nwa a̱jinjing naai Ka̱za, ka̱bvung nyin ka a̱ byyi ka̱rek tyen ba.]

15“Kaito nyin ba̱malam Truwang ba bu ba̱nyet Farisa, nyin ba̱nyet raai ba̱nyet, yi byei a̱yuywu ba̱shekwot cong i na̱byen na̱yaan i gi shya a̱ntyok tssup a̱yring. Ma ki yi shya a̱yin na̱ ya tssup, yi si wi ku tyyi na̱ nwa ka̱ryi ndong ka da̱ nyin ni, ku si ra̱u ka̱sak ka ma na̱ si bun nwa rong a da̱ nyin ni.

16“Kaito nyin ba̱nyet cat kwak ka̱son, da̱ nyin ba cyang ba. Yi zzek di ka̱ a̱yin a̱ shyi di bat Ka̱za, shi-shyi iya ni ku pyyem ba; ma ka̱ a̱yin a̱ shyi di zinariya bat Ka̱za nu, shi-shyi ji ni ku pyyem. 17Ba̱gbyik ba̱bvwon ba̱nyet, a̱nzan nu a̱ wa ra̱u: zinariya nu ki bat Ka̱za na tyyi zinariya nu dizizrak ti ni? 18Yi bu zzek di ka̱ a̱yin a̱ shyi di ka̱bvwa kwot ba̱hyum ka, shi-shyi ji i ku pyyem ba; ma ka̱ a̱yin a̱ shyi di ba̱hyum ba, shi-shyi ji ni ku pyyem. 19Ki yi ryi i bvwong ba? A̱nzan a̱ ra̱u? Ba̱hyum ba? Ki ka̱bvwa kwot ba̱hyum ka a̱ ni tyyi ba̱hyum ba dizizrak ti ni? 20Rot a̱mi ka̱ a̱yin a̱ shyi di ka̱bvwa kwot ba̱hyum ka a̱ shyi a̱nta̱mak bu sa̱rei ba̱hyum ba a̱n shyi ka̱bvwa ka ni. 21Ki a̱ ma̱n shyi di bat Ka̱za na a̱mi, a̱ shyi Ka̱za ka a̱ swat i bat a ni a̱mi. 22Ka̱ a̱yin a̱ ma̱n shyi di Tazwa, a̱ntwam dityok Ka̱za nu a̱mi na̱ shyi a̱nta̱mak ba̱ a̱yin nu a̱n swat ni.

23“Kaito nyin ba̱malam Truwang ba bu ba̱nyet Farisa, ba̱nyet raai ba̱nyet. Ki yi kpyei a̱susum na̱kon da̱ni di a̱ma̱ndrang ko shitaa ko jijok ni, yi na yring i tun a̱nying Ka̱za nu ka̱ ryi, ma nkyang a wu yet a̱cecet u ka̱yat Truwang Ka̱za ka ni, da̱ni di tssup ka̱ryong ni bu pfong dizot na̱baan bu kok tsutswat, yi wu na̱ jik sak zan. Ku myim yi tssup nkyang a̱ngbom a bu nying ka̱tsitsrang a sa̱rei. 24Nyin ba̱gbyik ba̱nyet kwak ka̱son, yi ni yya ni n tun mun ji jing i wu nwrang a̱rakumi?

25“Kaito nyin ba̱malam Truwang ba bu ba̱nyet Farisa, ba̱nyet raai ba̱nyet. Yi na tssu ka̱ma ryei ka i si wu wwon ka̱yat ka bu nkyang a yi cip ssang di ba̱nyet di cet rot cat a̱ccu nyin ni. 26Ba̱gbyik ba̱nyet Farisa, yi tason tssu ka̱yat ryei ka, ka̱ma ka a̱ ma̱ ni tyyi zizrak.

27“Kaito nyin ba̱malam Truwang bu ba̱nyet Farisa, nyin ba̱nyet raai ba̱nyet, yi ryi di a̱byyi na ba ssuk da̱ a̱jijyat ka̱bvan ni, ka̱ta̱sa ka a̱ yet ka̱sham, ma ka̱yat ka a̱ gbang a̱n hywat bu nkup ba̱nyet bu kozan taka̱i a̱shishik kyang. 28Ma nyin meyang, ka̱ a̱yin a̱ ya ryi yi cong na̱ ryi ba̱nyet a̱mi, ma ka̱yat ka a̱ tyyi a̱n hywat bu raai ba̱nyet bu na̱kpot.”

Yesu a̱ ba̱ tyyei ka̱bvung ka a̱ ba̱ bai ni

(Luka 11:47-51)

29“Kaito nyin ba̱malam Truwang ba bu ba̱nyet Farisa, nyin ba̱nyet raai ba̱nyet. Nyin a̱mi na nok a̱byyi ba̱nyet tyyei ba̱ryat Ka̱za na nnyyai a, i jem a̱byyi ba̱nyet nnyyai ba a̱ yin yya a̱tsatsak nkyang u ni, 30i hywa, ‘Zi da yin shyi i nom nnyyai a, se njit ba yin yya nkyang a ba̱tyyi a̱kwop njit ba ba yin yya a̱n hywaai ba̱nyet tyyei ba̱ryat Ka̱za ba ni ba.’ 31Wato, nyin ma yi shim yi yet na̱mbvon ba̱nyet ba a̱ yin hywaai ba̱nyet tyyei ba̱ryat Ka̱za ba ni yemi. 32Nde yi ya ka̱son i zzwang kyang a ba̱tyyi a̱kwop nyin ba ba yin yya a̱ sin sak kpit a ni. 33Ndyik bu na̱won na. Ki yi drok i hywa di yi ni shot rong Ka̱za naa? 34Nkpa n ya tyyei: n ni ya tom di ba̱nyet tyyei ba̱ryat Ka̱za, bu ba̱nyet a̱za̱ncyi bu ba̱malam. Yi ni hywaai ba̱yanyet mba, ba̱yaan yi ba̱ kprak nkusa. Yi ni twang ba̱yaan a̱yo a a̱bat a̱duwa, i nyying ba̱yanyet nwai na̱nkrang na̱yaan wwut. 35Rot a̱mi ba̱sok ba̱nyet sang hywak ba ba hywaai ni nyyai ka̱ram ka ba yin hywat Habila a̱ sang hywak ni bu tat ka̱ram ka ba n hywat Zakariya ka̱won Barakiya ni, a̱tuba nu yi yin hywat a̱katyyi bat Ka̱za ka bu ka̱rek ba̱hyum ka ni, a̱ ni swrang a a̱ccu nyin. 36Ka̱ryong n ya tyyei: ba̱sok ba̱nyet iya sa̱rei a̱ bai a a̱ccu ba̱nyet ka̱pfun na.”

Cat a Yesu na̱ cat Urushalima ni

(Luka 13:34-35)

37“Urushalima, ka̱t Urushalima. Nyin a̱mi hywaai ba̱nyet tyyei ba̱ryat Ka̱za ba. Nyin mang ba̱pfong ba Ka̱za ka ya tssop i ni. Nkrang ka̱mang n ka̱n tyuk ni ya tung n tyyi ka̱rek ka̱yring n ya krung da̱ni di nyon zi nan tung na̱won nji tyyi ka̱yat nhweyak nji ni, ma da̱ nyin ba shim ba. 38Naanini na̱sa nyin a̱ ni rot a̱ hwwei. 39Nyyai ka̱pfun yi bu byyi n dyi ba, se bu nom a yi n hywa di na̱nu nyin, ‘Ka̱za a̱ wwon a̱tuba nu a̱ bai i diyrek A̱gwam ni nda.’ ”

Currently Selected:

Matta 23: kaj

Highlight

Copy