Maˍkuˆ 15

Yeˍsuˆ na ang suingˉ Piˉlatˆ kawngˉ sui lae jiˉ

1Saw hta ang daˍ paenˉ laˉ yao yit pa rawˉ hek ang huiˍ uiˍ, awn hoˉ yaˍ mangˍ htiˍ baˍ uiˍ, Camˉ lik ang hkiˍ saˍ laˉ uiˉ nae aˉ muˍ tatˉ naeˉ ang muˉ uiˉ kawngˉ sing cat lang ga jiˉ. Yeˍsuˆ na hpui yao haoˉ nga aengˉ nae ang suingˉ Piˉlatˆ kawngˉ ap lae jiˉ. 2Haeˉ mae beu, ang suingˉ Piˉlatˆ maˇ, Naˇ Yuˉdaˆ changˉ ceuˉ uiˉ beu ang suingˉ mangˉ laˍ nae Yeˍsuˆ na naˉ jiˉ. Yeˍsuˆ mangˉ muiˉ, Nang ciˍ naeˍ lawˉ ang yaˍ yaˇ nae ha biˍ jiˍ. 3Yit pa rawˉ hek ang huiˍ uiˉ aˍ Yeˍsuˆ na htiˍ ceuˍ peunˉ yao htiˍ ceuˍ seuˍ jiˍ. 4Haeˉ mae yao, ang suingˉ Piˉlatˆ maˇ Yeˍsuˆ na ha biˍ jiˍ. Naˇ htiˍ ceuˍ baˍ hkai laˉ laˍ. Nang na aˉ mawk hao ciˍ yao seuˍ laˍ ngaeˇ hu bao nae ha biˍ jiˍ. 5Caˇ, Yeˍsuˆ hkaˍ muiˍ tiˍ htaeˍ nae muiˉ baˍ hkai nae yao ang suingˉ Piˉlatˆ mangˉ manˍ jiˍ.

Yeˍsuˆ nae Baˍraˍbaˆ awˍ lawng

6Ang suingˉ Piˉlatˆ huiˍ maˇ poiˍ naeˍ uiˉ nyamˍ hkeu laˉ beu cu pawk ang liˍ ang kawngˍ ca naeˉ lawˉ ang meungˉ changˉ uiˉ paˉ naeˉ htawngˉ veu lawngˉ nga jiˉ changˉ na htiˍ hu ya poiˉ awkˍ naeˍ. 7Hingˉ nyamˍ veu a cuˉ yaˍ na hpaw saˍ yao changˉ na sae jiˉ uiˉ ang muˉ kawngˉ nae htawngˉ hkaoˉ veu ya lawngˉ yaˍ laeˍ jiˍ. Baˍraˍbaˆ nae maengˉ jiˉ changˉ htiˍ hu ang ca. 8Changˉ ang muˉ uiˉ hkeu lui yao, ha myang jiˉ laˉ mae htawngˉ changˉ uiˉ saˍ laiˍ kanˉ taeng lao nae Piˉlatˆ ang suingˉ huiˍ mangˍ na paˉ jiˉ. 9Ang suingˉ Piˉlatˆ huiˍ mangˍ muiˉ, Nawngˍ saˍ laiˍ Yuˉdaˆ changˉ uiˉ beu ang suingˉ mangˉ na poiˉ lao laˍ nae changˉ uiˉ na naˉ jiˉ. 10Haeˉ mae naˉ jiˉ hingˉ ngaˍ yit pa rawˉ hek ang huiˍ uiˉ aˍ Yeˍsuˆ na baˍ hu loˉ nae hu buinˉ yao ap laˉ jiˉ nae, ang suingˉ Piˉlatˆ maˇ ang bae htaˍ na naˉ jiˉ. 11Hta yao muiˉ, yit pa rawˉ hek ang huiˍ uiˉ aˍ Baˍraˍbaˆ na poiˉ lao nae paˉ buˉ voˍ nae changˉ uiˉ na kaˍ piˍ htaengˍ jiˍ. 12Ang suingˉ Piˉlatˆ huiˍ mangˍ muiˉ, Haeˉ mae baoˉ vaˍ, Yuˉdaˆ changˉ ceuˉ uiˉ beu ang suingˉ nae nawng haoˉ naeˉ mangˉ na aˉ mae ha voˍ nae htiˍ cangˍ naˉ laeˍ jiˍ. 13Yawng muiˉ, Yang na laˍ kang htaˍ veu htaˍ saeˍ vo nae haoˉ jiˉ. 14Ang suingˉ Piˉlatˆ huiˍ mangˍ muiˉ, Baˍ ceuˉ ha yao yang beu baˉ ceuˉ naˍ hokˍ ang si ha jeuˇ nae naˉ yao muiˉ changˉ ang muˉ uiˉ aˍ yang na laˍ kang htaˍ veu htaˍ saeˍ vo nae ya caeˉ haoˉ jiˉ. 15Ang suingˉ Piˉlatˆ huiˍ maˇ changˉ ang muˉ uiˉ na nuing ba buiˍ biˍ siˍ yao, yawng saˍ laiˍ Baˍraˍbaˆ na poiˉ awkˍ laeˍ biˍ jiˍ. Yeˍsuˆ na nawˍ tuiˍ chuik yao laˍ kang htaˍ veu htaˍ kap voˍ nae ap yao piˍ jiˍ.

Luk suikˆ uiˉ Yeˍsuˆ na baˍ saˍ baˍ nyamˍ nae ciˍ bawˍ bawˍ jiˍ

16Haeˉ mae beu, luk suikˆ uiˉ aˍ lumˉ nae haoˉ naeˉ ang suingˉ beu yumˉ hkawngˍ tan veu Yeˍsuˆ na haoˉ nga laengˉ yao luk suikˆ hkaˉ hko laˉ hko na piˉ ca chawnˉ laˉ lang biˍ jiˉ. 17Nae yao, Yeˍsuˆ na hkaˍ lao naeˉ pangˉ nae uiˉ piˉ tum nga jiˉ. Chiˍ kuˍ pangˍ na tiˍ chawngˍ laˍ mae hkotˆ na biˍ yao piˉ chawngˍ jiˍ. 18Yuˉdaˆ changˉ ceuˉ uiˉ beu ang suingˉ, a sak mongˉ bu nae saˍ nyamˉ naeˉ laˉ mae ha yao Yeˍsuˆ na ciˍ bawˍ bawˍ jiˍ. 19Peunˉ na yao, Yeˍsuˆ na ang tuˍ veu saˉ mit pangˉ nae tuiˍ yao, Yeˍsuˆ na hkanˍ hpitˍ jiˍ. Hpaˍ tuˍ laˍ hku nae ang tuˍ mawt kaeˍ kaeˍ jiˍ. 20Haeˉ mae Yeˍsuˆ na ciˍ bawˍ bawˍ peunˍ yao hkaˍ lao naeˉ pangˉ nae hingˉ hae biˍ yao, yang beu hkaˍ lao hingˉ tum nga laeˍ biˍ yao, laˍ kang htaˍ veu htaˍ kap lae naˇ nae suiˍ awkˍ nga aengˉ jiˉ.

Laˍ kang htaˍ veu htaˍ kap jiˉ

21Haeˉ mae beu, Aˍleˍsaˉdaˉ nae Ruˆhpuˆ ang vangˉ, Siˉmunˍ nae maengˉ jiˉ Kuˉreˍneˍ vengˍ changˉ htiˍ hu hyaˉ veu aeˉ yao laˉ laeˍ jiˍ na yawng myangˉ jiˉ. Yawng yang na tekˆ yao Yeˍsuˆ beu laˍ kang hingˉ piˉ paˍ jiˍ. 22Gawˉlaˆgawˆtaˆ nae maengˉ jiˉ hingˉ keung veu yawng Yeˍsuˆ na suiˍ yao laeˍ jiˉ. 23Muˆranˍ keo nga jiˉ makˍ sa pit ang chaˉ Yeˍsuˆ na piˉ tangˉ yao muiˉ Yeˍsuˆ nawˍ baˍ tangˍ. 24Yawng Yeˍsuˆ na laˍ kang htaˍ veu htaˍ kap peunˉ yao, hkaˍ lao hingˉ aˉ mangˉ jeuˉ ya kyaˉ nae ang laiˍ cawk yao peungˍ lang jiˉ. 25Yeˍsuˆ na laˍ kang htaˍ veu hta kap jiˉ hingˉ nyamˍ ngaˍ saw hta kaoˍ naˍ riˍ veu. 26Yuˉdaˆ changˉ uiˉ beu ang suingˉ mangˉ yaˇ nae yang na naˍ hokˍ chiˉ jiˉ uiˉ ang laiˍ taemˉ yao chiˉ jiˉ. 27Hkingˍ con nyiˍ hu yaˉ yetˍ na muiˉ Yeˍsuˆ laˍ maˍ kyaˍ kaˍ seu htiˍ hu nae laˍ saiˍ kyaˍ kaˍ seu htiˍ hu laˍ kang htaˍ veu htaˍ kap yao chiˉ jiˉ. 28Ningˉ mae hpeuˍ jiˍ ningˉ ngaˍ, yang naˍ hokˍ ang si na vaˍ jiˉ caˍ langˉ hkaoˉ veu taemˉ awngˉ naeˉ nae, Camˉ lik ang tangˍ hingˍ puing laˉ kawˉ laˉ naeˉ veu hkeu laˉ jiˉ#Iˉsaˍyaˆ 53:12.. 29Aeˉ laˉ yao hpaiˍ nga cangˉ naeˉ uiˉ muiˉ yawng beu ang tuˍ hingˍ uin yao, Eˉ, Ang buinˉ paˉ kyaˉ cawngˉ ang huiˍ na hpya kangˍ yao sumˍ nuing naiˍ hkaoˍ veu ang chaw taw nae mangˉ. 30Laˍ kang htaˍ veu lung taw luiˍ yao nangˉ nang nae htaiˍ awkˍ laeˍ bao nae Yeˍsuˆ na hpaˉ batˆ yao ciˍ jiˍ. 31Hingˉ uiˉ lawˉ yit pa rawˉ hek ang huiˍ uiˍ muiˉ Camˉ lik ang hkiˍ saˍ laˉ uiˉ muiˉ Yeˍsuˆ na ciˍ bawˍ bawˍ jiˍ. Yaˇ hao na nawˍ ang htaiˍ awkˍ taw yao muiˉ, caˇ, yangˉ yang nae nawˍ baˍ htaiˍ awkˍ laeˍ taw jiˉ maˍ. 32Gu myangˉ nae yumˉ taw hkiˍ naeˍ uiˉ saˍ laiˍ Iˉsaˍreˍlaˆ yawng beu ang suingˉ nae haoˉ naeˉ Yeˍsuˆ Hkrit maˇ ya muiˉ laˍ kang htaˍ veu lungˍ nga luingˉ baoˇ nae htiˍ hu nae htiˍ hu hkai lang ga jiˉ. Yeˍsuˆ kawngˉ htuˍ yaˍ laˉ mae laˍ kang htaˍ veu htaˍ kap yao chiˉ jiˉ yaˉ yetˍ muiˍ Yeˍsuˆ na hpaˉ batˆ yao naˍ hokˍ chiˉ jiˉ.

Yeˍsuˆ ang sak hko jiˉ

33Nuing kawngˉ veu, buingˍ nae lok nuingˉ chaˍ yangˍ vuingˉ vangˉ hko yao miˍ hkiˍ sumˍ sumˍ naˍ riˍ veu tiˍ hkeu haeˉ mae hpeuˍ jiˍ. 34Miˍ hkiˍ sumˍ sumˍ naˍ riˍ veu Yeˍsuˆ maˇ ang tangˍ haenˍ nae, Eˉliˆ, Eˉliˆ, Laˍmaˍsaˍbaˍhkaˍtaˍniˆ nae haoˉ yao ciˍ jiˍ. Hingˉ a tekˆ paeˍ yangˍ maˇ, Ga beu Hpaˍcaoˍ, ga beu Hpaˍcaoˍ, ga na ba ceuˉ ha yao paek can na laˍ naeˇ nae ha siˉ naeˉ yaˇ. 35Ang htang veu cung yao ca jiˉ changˉ htiˍ baˍ uiˍ muiˉ kyaˍ yao, Hu bao. Yaˇ Eˉliˉyaˆ na haoˉ ngangˉ jaˇ nae hkai lang ga jiˉ. 36Haeˉ mae beu, changˉ htiˍ hu maˇ huinˍ na aengˉ yao, makˍ sa pit ang chaˉ ang chenˉ na yuˉ aeˉ jiˉ. Ang chaˉ na chawk naeˉ uiˉ ang tuˉ hingˉ tui yao Yeˍsuˆ na mangˍ nga laeˍ biˍ yao, piˉ tangˉ jiˉ. Eˉliˉyaˆ yang na tawngˍ kaˍ veu yuˉ kla luiˍ naeˉ nae ang lui jiˉ laˍ nae gu hu yaeˉ seuˍ nae yang ciˍ jiˍ. 37Hingˉ nawngˍ veu, Yeˍsuˆ nawˍ ang seng kaˍ haengˍ nae haoˉ nga yao ang sak hko jiˉ. 38Haeˉ mae beu ang buinˉ paˉ kyaˉ cawngˉ ang huiˍ veu ang hpaenˉ yangˍ muiˉ tawngˍ tin veu nae tangˍ yao tawngˍ pawk veu tiˍ hkeu nyiˍ kvak nae chit lakˍ laeˍ jiˍ. 39Yeˍsuˆ ca naeˉ kaˉ seu mae kaˍ hpaw nae cung yao ca jiˉ luk suikˆ aˉ yaˍ ang ca mangˉ muiˉ Yeˍsuˆ aˉ sak hko naeˉ hingˉ na ya myangˉ yao, Ningˉ maˇ Ang suingˉ Hpaˍcaoˍ beu Ang yaˍ maˉ manˉ jaˇ nae yang ciˍ jiˍ. 40Hingˉ keung ang veuˍ veu ca yao hu jiˉ hkaˍ ba yaˍ htiˍ baˍ uiˍ muiˉ ang ca. Yawng hkaoˉ veu Maˍgaˍdaˍlaˆ vengˍ changˍ Maˍriˆ, Yaˍkok ang iˉ nae Yawˉseˍ yawng beu ang muing Maˍriˆ nae Saˍloˍmiˍ yawng muiˉ ta ta ca jiˉ. 41Yawng ngaˍ Gaˍliˉlaeˉ ang meungˉ naiˍ hkaoˍ veu Yeˍsuˆ ca saˍ beu kaˉ nawngˍ veu hkeˍ yao Yeˍsuˆ na po hing jiˉ changˉ uiˉ yaˇ. Hingˉ htaˍ veu muiˉ, Yeˍsuˆ kawngˉ htuˍ yaˍ laˉ mae Yeˍruˆsaˍlaemˍ vengˍ veu hkeˍ laˉ jiˉ hkaˍ ba yaˍ htiˍ baˍ uiˍ muiˉ hingˉ keung veu ca jiˉ.

Yeˍsuˆ na hyang jiˉ

42Yuˉdaˆ changˉ ceuˉ beu vanˍ sin nuing baˍ hkeungˉ beu htiˍ nuing hingˉ ngaˍ, haenˍ hangˉ naeˉ nuing nae yao miˍ hkiˍ sumˍ ang nyamˍ veu hkeu jiˉ. 43Aˉliˉmiˍtaeˉ vengˍ changˍ Yoˉsaep maˇ aˉ yaˍ ang huiˍ laˍ htiˍ ang ca aˉ muˍ tatˉ kyaˉ veu uiˉ changˉ htiˍ hu yaˇ. Changˉ hingˉ maˇ Ang suingˉ Hpaˍcaoˍ beu ang meungˉ hingˉ na hawˍ yao hu naeˉ changˉ yaˇ. Yaˇ nuing ba hatˆ naeˉ hkaoˉ veu hkeu lae yao ang suingˉ Piˉlatˆ huiˍ mangˍ na Yeˍsuˆ beu ang to siˉ jiˉ hingˉ paˉ lae jiˉ. 44Ang suingˉ Piˉlatˆ maˇ Yeˍsuˆ siˉ kuingˉ jaˉ laˍ nae kuitˆ manˍ laeˍ yao luk suikˆ ang huiˍ uiˍ na haoˉ yao Yeˍsuˆ siˉ jiˉ hingˉ ngaˍ uiˉ laˍ baˍ la nae naˉ jiˉ. 45Luk suikˆ ang huiˍ mangˍ kawngˉ Yeˍsuˆ siˉ jiˉ hingˉ lawng na ya bae yao ang to siˉ jiˉ hingˉ Yoˉsaep na piˍ jiˍ. 46Haeˉ mae yao, Yoˉsaep nae changˉ htiˍ baˍ uiˍ muiˉ ang hpaenˉ ang maenˍ yangˍ vuiˉ yao ang to hingˉ na laˍ kang htaˍ veu yuˉ kla lae jiˉ. Ang hpaenˉ hingˉ nae htao yao law ba ang hkawngˉ htawngˉ nga jiˉ hkawngˍ chawˍ hingˉ keung hyang aeˉ jiˉ. Law ba hingˉ na naengˍ yao law ba lawngˍ hkawngˍ hkawngˍ chawˍ ang honˉ hingˉ na hpiˍ saˍ jiˍ. 47Maˍgaˍdaˉlaˆ vengˍ changˍ Maˍriˆ nae Yoˉseˍ beu ang muing Maˍriˆ yawng muiˉ aˉ keung jeuˇ ang to hingˉ na hyang naeˉ nae hu jiˉ.

Currently Selected:

Maˍkuˆ 15: pyy

Highlight

Copy