Jean 9
9
Jesus ubelusa ebelusi agumaburu yidunga
1Ava Jesus amavioyilanga amalaba mutu agumaburu yidunga. 2Badukitsi bandi bamamuwivula rie: Mulonsi anyi amavaga masumu: dibaala diedidi vo taji andi na nguji andi? Dibandu yi amaburulu yidunga?
3Jesus amabagabusila rie: Budunga buandi bugeruyili mu diambu dimasumu mandi nesi mataji andi vo manguji andi. Aji yidunga yiri mangolu maNsambi molabana. 4Ava wisi ukivu nyanga vengu nyusala bisalu bijandi omansindiga; pisama jiruyi na mutu agorungula usala o tsi pisama. 5Ava nyikivu mu bulongu nyiji yijalala yibulongu.
6Anomana uvosa nana amafuta mateji va tsi na amavaga dirobu na mateji mandi mbana amasinga dirobu dieni mu misu mayidunga. 7Amamusindiga rie: Wenda yesusa misu o yileka yiSiloe (divindugulu diSiloe rie: usindiga).
Yidunga amawenda guna uyesusa misu ava amagabusila amalaba yiri elabi buranga.
8Bambatsi bandi na jogu abamalemujaba ava amavondilanga bamawivula rie: Tsia jandi aguitsivondanga?
9Bamosi bamavosanga rie: Jandi!
Basusu rie: Nesi, tumba ebagunu nandi.
Jaʼ beni amavosa rie: La menu!
10Kabogu bamamuwivula rie: Tsie misu magu matsitiemunina?
11Amabagabusila rie: Dibaala adi benengili Jesus atsivaga dirobu, atsisinga mu misu mami na atsinsindiga rie: Wenda o yileka yiSiloe, susa misu. Nsiwenda na nsimasusa na nyimalaba.
12Bamamuwivula rie: Dibaala dieni agunyi avu? Amabagabusila rie: Ngejabi.
BaJuif abamaba baPharisie uwivula bewivuli yidunga bivu
13Bamabega agumaba yidunga ombu baJuif abamaba baPharisie. 14Kabogu mu yilumbu yitsona Jesus amavayila dirobu na amamutiemusila. 15La dibandu baPharisie bamamuewivulila dibaala nana amalabila. Amabagabusila rie: Jandi atsinsinga dirobu mu misu na nsimasusa na nyimalaba.
16BaPharisie bamosi bamavosa rie: Mutu eni ageruyili ombu Nsambi mu mbari agekelisi tsona.
Basusu bamawivula rie: Tsie muvayitsi masumu orungulila uvaga munongu bimaga bieni? Vamaba dugabu va gari ogu. 17BaPharisie bamamuewivula agumabeluga rie: Ndeʼ tsie guivosili mu adi jandi atsigutiemusila misu. Jandi amabagabusila rie: Aji mubiyitsi!
18BaJuif basamavaga yitu yiri jandi amaleba yidunga na yiri amalaba te na bamanengila taji andi na nguji. 19Bamabawivula rie: Agugu muana enu agu jenu duivosi yiri amaburu yidunga? Kabogu tsie elabili namunyi?
20Taji na nguji bamagabusila rie: Jetu tuijabi yiri aji muana etu na yiri amaburu yidunga 21tumba nana elabili namunyi vo anyi atsimutiemusa adina tugejabi. Muwivulianu, jaʼ beni ana bilima biwelimina uvosa adivu nandi.
22Taji andi na nguji bamawagula nana mu mbari bamaduma baJuif. BaJuif bamatabula diambu kala yiri pa mutu esingi yiri Jesus aji Christ opalusu o Ndagu Nsambi. 23La dibandu taji andi na nguji bamavosila rie: Ana bilima biwelimina, muwivulianu.
24BaPharisie bamamuenengila dibaala adimaba yidunga. Bamamuruma rie: Levati! Jetu tuijabi yiri dibaala dieni aji muvayitsi masumu.
25Amabagabusila rie: Pa jandi aji muvayitsi masumu menu ngedijabi; nyijabi diambu dimosi buandi: nyibetsi yidunga na namunyi nyilabi.
26Bamamuwivula rie: Yi atsiguvaga? Tsie atsigutiemusila? 27Amabagabusila rie: Mbe nyimadutsingula dionyi tumba dugaagulu, dibandu yi duirondili umuedigulu? Jenu wenu duirondi uba badukitsi bandi?
28Bamamusienga na bamavosa rie: Ndeʼ guvu mudukitsi andi! Jetu tuvu badukitsi baMoise. 29Jetu tuijabi yiri Nsambi amavosanga na Moise tumba jandi guna tugejabi ne agu eruyisini.
30Dibaala dieni amabagabusila rie: Ka muna diambu di! Dingensa dugejabi agu eruyisini jandi agumatiemusa? 31Jetu tuijabi yiri Nsambi agegulu bavayitsi bamasumu tumba pa tuimuyitsi ne pa tuivayi duganu duandi tugulunu nandi. 32Ubanda va dibandu tusakagulu yiri mutu amatiemusa mutu agumaburu yidunga. 33Mbe asamaruyila ombu Nsambi mbe asamarungula udivaga.
34Bamamugabusila rie: Ndeʼ gumaburulu mu masumu, dibandu yi guitulonsili? Mbana bamamupalisa o Ndagu Nsambi.
Budunga bubunyunyi
35Jesus amagulu yiri jogu bamamupalisa o Ndagu Nsambi. Amamurasuna na amamuwivula rie: Ndeʼ guivayili Muana Mutu yitu? 36Jandi amawivula rie: Mulonsi, jandi la nyi? Nyirondi umuvayila yitu!
37Jesus amamuwagula rie: Gumamulaba, la jandi oyivosi nagu. 38Jandi amavosa rie: Fumu nyina yitu. Mbana amagudama va gusu andi.
39Mbana Jesus amavosa rie: Nyimaruga o bulongu buebubu uyibutabulila bunsonsi yiri bidungabilabi na jogu abelabi babi bidunga.
40BaPharisie bamosi abamaba nandi banogulu mambu meni bamamuwivula rie: Kabogu guitasi yiri jetu wetu tuji bidunga?
41Jesus amabagabusila rie: Mbe duji bidunga mbe dugaa na mbela tumba duivosi rie: Tuilabi. La dibandu mbela enu jivu nenu te na namunyi.
Currently Selected:
Jean 9: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
