मत्तयाल 14
14
बापतिस्मा हियना योहानुन हव्कंतुर
(मरकुस 6:14-29; लूकाल 9:7-9)
1अद वेलाते गालिल एरियाता राजाल, हेरोद#14:1 हेरोद गालिल एरियाता ई हेरोद राजाल अद्याय मत्तयाल 2:16-18 वचनाल्कुने रासता हेरोद राजाना मर्रि आंदुर. आ हेरोद राजाल येसु पुटतस्के हव्कालय हूळतोर. इनानोर, येसुना बारेमते केंजतोर. 2केंजसि “ई येसु इत्ते बापतिस्मा हियना योहान आंदुर. ओर हातोराव्टेटाल मर्रा तेदतोर. अदुनहाटीं ओर इसंटा अद्बूतामाता कबाह्क कीसंतोर.” इंचि ओना सेवाकुल्कुंक वेहतोर.
3-4बारित्ते हेरोद राजाल ओना तम्मुर पिलिपुना मुत्तो हेरोदियान इरकुंचि मत्तोर अस्के, “नीवा तम्मुना मुत्तोन निमे निहगा इरमळ नियम परकारम बेस आयो,” इंचि योहान हेरोद राजांक वेहचि मत्तोर. अदुनहाटीं हेरोद राजाल योहानुंक बेडीं वाटसि ओन जेलने वाटतोर. 5अस्केटाल हेरोद राजाल योहानुन हव्कालय कोरसेके मत्तोर, गानि लोकुल्क योहानुन पेनदा कबुरतोर इंचि नम्मुंदुर, अदुनहेंके राजाल लोकुल्कुंक वेरियसि योहानुन हव्काकोंदुर.
6गानि हेरोद राजाना पुटता रोजु मत्तस्के अगा हेरोदियाना मिय्यड लोकुल्कुन मुन्ने एगरिसि ओन कूस कीता. 7अस्के राजाल कूस आसि, “निमे बतल तल्कंतिन अद नीकु हींतन” इंचि ओट्टु तिंचि वेहतोर. 8अस्के अद दाना तल्लुर वेहता परकारम, “बापतिस्मा हियना योहानुना तल्ला उंदि गिन्नेते वाटसि नाकु हीम,” इंचि इत्ता.
9इद केंजसि राजांक इरगा दुक्कम वाता. गानि अगा मत्ता अंटोर हेडमितोराहाटीं आनि तित्ता ओट्टुहाटीं, अद तल्कतद दान्क हीम्टु इंचि आदेस हीतोर. 10जेलते मत्ता योहानुन हव्किसि ओना तल्ला कोय्सि तायलय मनकन लोहतोर. 11अस्के योहानुना तल्ला गिन्नेते वाट्सि दान्क हीते अद ओसि दाना यावांक हीता. 12पजा योहानुना सिस्युल्क ओना पीनगुन ओसि बोंदा दोसतुर. होंचि इद पोल्लेतुन येसुंक वेहतुर.
13इद पोल्ले केंजसि येसु डोंगाते उदिस बदो अलग-सलग जेगाते पेय्सि होत्तोर.
येसु हेय्युं वेय्कुना मंदिक गाटो तासतोर
(मरकुस 6:30-44; लूकाल 9:10-17; योहान 6:1-14)
14ओर होतद एरपाट आतारित्ते लोकुल्क ओरा नाहकुनाल ताक्सेक ओना पज्जो पेय्स्तुर. पजा येसु डोंगाताल रेय्तोर अस्के ओन्क अगा वेल्लेने मंदि दिसतुर. अय्ते येसुंक ओरपोर्रो दया वासि, ओरा रोगाल्कुनंता बेस कीतोर.
15पोळ्द होनना वेलाक सिस्युल्क येसुनगा वासि, “मनम सुनसान जेगाते मंतोम, वेलागुडा बागेन आता. पोळ्द अर्राका मुन्नेन ईर दग्गेटा नाह्कुने होंचि ओराहाटीं तिनालय बतलन्ना अस्कुन्निर, ईरकुन लोहा,” इंचि इत्तुर.
16अस्के “ओर्क बेके होनना अव्सरम हिल्ले, मिमेटे ओर्कु बतलन्ना तिनालय हीम्टु,” इंचि येसु इत्तोर. 17अस्के सिस्युल्क “महगा अय्ते सिराप हेय्युं हारिं आनि रोंडु जिम्मां मंतां,” इंचि इत्तुर.
18अस्के, “अय्ते अवुन नहगा पीसवटु,” इंचि येसु इत्तोर. 19अगा मत्ता मंदितुन जाडि पोर्रो उद्दा वेहतोर. हेय्युं हारिं, रोंडु जिम्मां पीसि पोर्रो हूळसि पेनदुक दन्यवाद कीतोर. पजा हारिन तुकडां कीसि आ तुकडन सिस्युल्कुंक हीतोर. सिस्युल्क बारे लोकुल्कुंक हीतुर. 20अस्के ओर अंटोर पीरनिंडा तित्तुर. अंटोर तिननेंके मिगुल्ता हारिना तुकडां ओर जमा कीतुर अय्ते पन्नेंड तट्टां पेय्सतां. 21तित्ता मंदिताल हेय्युं वेय्कु मांडसे मत्तुर, इंका मुर्ताह्क, पिलाल्कुनद अय्ते लेक्के हिल्ले!
येसु एतापोर्रो ताकतोर
(मरकुस 6:45-52; योहान 6:16-21)
22पजा अस्केन येसु अंटोर लोकुल्कुन सार्ला कियाका मुन्नेन ओना सिस्युल्कुन उंदि डोंगाते उपिच्चि ओनकन्ना मुन्नेन सेरवुना हब्बेटा बाजुंक दाटसि होनालय वेहतोर. 23अंटोर लोकुल्कुन सार्ला कीता पजा, येसु वरोरे पारतना कियालय गुट्टापोर्रो होत्तोर. पोळ्द होनिनागानि ओर वरोरे अगा मत्तोर. 24अद वेलाते सिस्युल्कुना डोंगा समुद्रम ओड्डुनाल वेल्लेन लक्कु होंचि मत्ता. अस्के ओर्क एदुर वळि वायालय दल्गताहेंका एता तडांक डोंगा डव्क-डिव्क आयालय दल्गता.
25नर्कटां मूड-नालुं एगनेंके येसु एता पोर्रोटाल ताकसेक ओरहेके वातोर. 26ओर एता पोर्रोटाल ताकसेक वायानद हूळसि, “देय्यम वासंता!” इंचि सिस्युल्क वेरियसि वरगेयालय दल्गुतुर.
27अस्के येसु बिराने ओर्कुन, “ननाने आंदुन, वेरियमट, दैरनेम इर्राट,” इंचि इत्तोर.
28पजा पत्रु येसुन, “सामि, ओक्कला निमेने आयानय्ते नाकुन नीहेके एता पोर्रोटाल ताकसेक वायालय वेहा,” इंचि इत्तोर.
29“अय्ते हीके वा,” इंचि येसु इत्तोर. अस्के पत्रु डोंगाताल रेय्सि एता पोर्रोटाल ताकसेक येसुनहेके होनालय दल्गुतोर. 30गानि वळि वायनद हूळसि, वेरियसि मुळगालय दल्गुतोर. अस्के “सामि, नाकुन पिसागोट्टा,” इंचि मोत्कुत्तोर.
31अस्के बिराना कय हाह्सि येसु ओन पीसि, “अरे तक्को विस्वासमतोना, निमे नापोर्रो अनमानम बारि कीतिन?” इंचि इत्तोर.
32पजा ओर इव्वुर डोंगा एकतस्के, वळि वायमळ आगुता. 33अस्के, “सामि, निमे निजमे पेनदा मर्रिन” इंचि डोंगाते मत्तोर ओना काल्कुनपोर्रो अरतुर.
येसु वेल्लेन बिमारतोर्कुन बेस कींतोर
(मरकुस 6:53-56)
34पजा ओर अद समुद्रम दाटसि गेनेसरेत इनना नाटे वातुर. 35अगाटा लोकुल्क येसुन एरपाट कीसि दग्गेर पट्कुनव अन्नि नाहकुंक कबुर लोहचि बिमार मत्तोर्कुन अंटोर्कुन पीसि वातुर. 36पजा “सिराप नीवा कप्पिडता अंचुन इट्टा हीम,” इंचि विनंति कियुंदुर. बोर-बोर अय्ते ओना अंचुन इट्तुरो, ओर अंटोर पुरागा बेस आतुर.
Currently Selected:
मत्तयाल 14: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
