मत्तयाल 28
28
येसु जीवाते तेदतोर
(मरकुस 16:1-10; लूकाल 24:1-12; योहान 20:1-10)
1नोमकेम आतारित्ते इंकुंदि रोजु अय्तारम पंग आयनेंके मगदलेनि नाटेना मरियम आनि दाना दंटातद इंकुंदि मरियम, बोंदातुन हूळालय होत्तां.
2अस्के उंदि पेनदा दूता स्वर्गमताल अगा रेयताहाटीं अगा पेद्दा बुकंप आता. पजा आ पेनदा दूता बोंदक अड्डम मत्ता बंडातुन तेंडसि, अदे बंडापोर्रो उद्दुता. 3दाना रूपम पोळ्दुनालेसीं जगा-जगा मेर्सेक मत्ता, दाना अंगि बारे बर्पलेह्का तेल्लगा मत्ता. 4दान हूळसि कावेल कियानोर इरगा वेरियसि, गजा-गजा वनकुसेक, अल्हेने हाताप आतुर.
5अस्के पेनदा दूता इल्हा इत्ता. “वेरियमट, क्रुसुनपोर्रो वेलाड वाट्सि हव्कता येसुन मिमेट पह्कसेक मंतिट, इद नाकु एरपाटे मंता. 6गानि ओर इग्गे हिल्लोर, ओर वेहताप मल्सि जीवाते तेदतोर. वटु, ओना पीनगु इरता जेगातुन हुळाट. 7इंका बिराना होंचि ओना सिस्युल्कुंक, ओर हामुरताल जीवाते तेदतोर, ओर मीकन्ना मुन्नेने गालिल एरियाते होंचेक मंतोर, अगा ओर मीकु दिस्सानुर, इंचि वेहट. बतल अय्ते नना मीकु वेहतन, अदुन मति इर्राट,” इंचि आ मुर्ताह्कुन इत्ता.
8अस्के आ मुर्ताह्क वेर्रेते, वेल्लेन आनंदमते, बोंदातगाटाल जटपेट पेय्सि ओना सिस्युल्कुंक इद कबुर वेहालय विततां. 9अगटाल पेय्सि होननेंके, येसु अवुंक कलियसि अवुन, “बेस पिस्सट,” इंचि इत्तोर. पजा अव ओना दग्गेर होंचि काल्क मोळ्कतां. 10अस्के येसु अवुन, “वेरियमट होंट, नावा तम्मुह्कुंक गालिल एरियाहेके होनालय वेहट, अग्गेन ओर नाकुन हूळंतुर,” इंचि इत्तोर.
कावेल कियानोरा आबद्दम गवाइ
11अव सिस्युल्कुंक वेहालय होंच्चेकेन मत्तां, अच्चोटेन बोंदातगा कावेल कीसेक मत्तोर इच्चुर सिपाइल्क सहरते होत्तुर, होंचि अगा जर्गुतदंता पेद्दा पेर्मालोर्कुंक वेहतुर. 12अस्के ओर यहुदि पेद्दाल्कुंक कलियसि उंदि उपायम कीतुर. सिपाइल्कुंक वेल्लेन कोत्तां हीसि वेहतुर गदा, 13“मोमोट निद्रते मननेंके ओना सिस्युल्क नर्का वासि ओना पीनगुन दोंगातनमते ओतुर, इल्हा लोकुल्कुंक वेहट. 14ई पोल्ले गिंटा राज्यपालना केव्दे अर्रानय्ते मोमोट ओन समत कीसि मीकु पोल्ले वायकुंटा कींतोम,” इंचि इत्तुर. 15अस्के ओर कोत्तां एतसि वेहताप कीतुर, ई पोल्ले यहुदिल्कुना लोप्पो इदवेरादाका इंका इल्हे ताकसेक मंता.
येसु सिस्युल्कुनतोनि वळकांतोर
(मरकुस 16:14-18; लूकाल 24:36-49; योहान 20:19-23; प्रेरितुल्कुना कबाह्क 1:6-8)
16अद आतंका पदाकोंडु मंदि सिस्युल्क गालिल एरियाते येसु वेहता गुट्टापोर्रो होत्तुर. 17अगा येसुन हूळसि ओन मोळ्कतुर. अय्नागानि इच्चुर सिस्युल्कुंक अनमानम मत्ता. 18अस्के येसु ओरा दग्गेर होंचि ओर्कुन इल्हा इत्तोर. “स्वर्गमते आनि बूमिपोर्रोटा अदिकारम अंता नाकु हीसि मंता. 19अदुनहाटीं मिमेट होंचि दुनियाता अन्नि देसेल्कुना लोकुल्कुन सिस्युल्क कीम्टु. ओर्कु बाबाना पोरोलते, मर्रिना पोरोलते आनि पवित्र आत्माता पोरोलते बापतिस्मा हीम्टु. 20नना मीकु हीता आदेस परकारम ओर्कु ताकालय करहट, ई दुनिया मुंळगना आकिर वेलादाका नना बस्केळक मीतोने मनंतन,” इत्तोर.
Currently Selected:
मत्तयाल 28: esg-Deva
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
