Luk 15
15
Ɛbɛɛ njɔ ya atantan
1Ɛwɛmɛ si baɛkia taksi na ba ene a abibi afɛ wɔɔ agba asibi Jisɔs ya ayoghɛ. 2Ka Bafarisi na bekpena ejighi Mosis akpɛn, “Munnu yɔfa akpere ba ene a abibi afɛ afɛnɛ anɛ na mbɔ.”
3Ka Jisɔs atuu mbɔ ɛbɛɛ jifa: 4“Arenasi nnɛ wiwi ka ɛbɔngɔ ɛjɛrɛ akpe njɔ atanarɔn ka yiyi atan. Atamam asighi njɔ atananɛ na noko na ɛnɛ bi ɛnɛghɛ ejonɛnɛghɛ ka mfo ba are amo ama sɛb njɔ yiyi ya atantan tɛtɛ ayiɛ? 5Ka ngara yi ayiɛ, ɛyɛbɛ nete akɔɛ akono ka afangabɔ ɛyɛ 6akru ka etek. Ka abeng atɛ na agbaetek ɛbɛ aba ka nju ɛyɛ ka atɔ mbɔ, ‘Ma ba ɛmɛ ɛyɛbɛ nete nanaa, mmɛ yɛ njɔ ɛyaa ya atanna.’ 7Ntɔ war si ere ɛkanɛkan ntakpa ɛyɛbɛ nete ajɔ ka etek Ɔsɔwɔ yi nne a abibi afɛ wiwi ayanga nekpen ɛga anɛ atananɛ na noko na anɛ ba afɔfɔ arikpɛ sɛb nayanga nani.”
Ɛbɛɛ akpugha eben ya atanna
8Jisɔs atuu ɛbɛɛ jintingi, “Arenasi manka akpe akpugha silba wobo ka yiyi atan. Amɔnɔm ɔmɔnɔ, afɛngɛ nju, asɛb nnɔbɔnnɔbɔ tɛtɛ ayɛ? 9Ka ngara yi ayɛ akpugha ya, abeng atɛ na agbaetek ɛbɛ aba ka nju ɛyɛ ka atɔ mbɔ, ‘Ba yighi nanaa; mmɛ yɛ akpugha ɛyaa ya atanna.’ 10Ɛtama ere ɛkanɛkan, Ntɔ war, Ɔsɔwɔ na baɛnjɛl ɛbɛ ayɛbɛ nete yi nne a abibi afɛ wiwi ayanga nekpen.”
Ɛbɛɛ mmɔ ya atanna
11Ka Jisɔs atuu mbɔ ɛbɛɛ jintingi: “Munnu wiwi ya afɔ abɔannu aba. 12Mmɔ yɔsɛ atɔ nsɔjɛ, ‘Nsɔjaa, kɛm mbanga mbe ɛbaa ka mbe bi okpe.’ Ka nsɛ abanga mbe ɛbɛ akɛ mbɔ.
13“Erika mba arab, mmɔ yɔsɛ akpo mbe ɛbɛ wɔɔ bi akpe, amo ka ndaba mba ɛka ama anɛ akpugha ɛyɛ ka ɛkpasaghamba. 14Ka ngara yi amɛ nɛ akpugha ɛyɛ wɔɔ, nkoro ɔgba aba ka ɛka ji, ka ajɔ ka ɛran. 15Ka amo amane noto akɛ nnɛ ya aru ka ɛka ji. Munnu yɔ atoɛ ka ɛgbɛ ɛjɛ sa ajɔ akɛ akok ɛyɛ ejonɛnɛghɛ. 16Nsɛrɛsi njan ayaɛ ɛtama ɛkɔrɛ si anɛ akab a nte ya akok ajɔ anɛ, ka nnɛ wiwi ariɛ kɛ ejo ja anɛghɛ.
17“Ngara yi amar asarɛ, ka arag, ‘Anɛ wɔɔ ba ane noto akɛ nsɔjaa anɛghɛ ɛsasa, ka mmɛ ndefa mkpɔghɔ njan! 18Mfɛnɛfɛnɛ ka mfo a nsɔjaa ma ntɔɛ si: Ntaa, Mme ne ebibi ka nibri Ɔsɔwɔ na nibri ɛna. 19Kimkpɛ kɔ si mmɔwa; Kɔm nasi nnɛ a noto ɛwa.’ 20Ka atam afɛnɛ ka mfo a nsɛ.
“Sa akpagha are ga daghadagha, nsɛ ayiɛ afɔ ɛkpɔgisi akiɛ; ayab ɛban ama akɔrɔ mmɔwɛ, akɛmmɛ asɔrɛ ka akpɔghɔ#15:20 asɔrɛ ka akpɔghɔ Ka nɛwɛmɛ ba Jus ɛtɔngɔ ɛkagha nnyɔ na nɔkɔrɔ nasi war yɛ ɛkɛ atɛ ɔbɔ. na ɛyɛbɛ nete.
21“Ka mmɔ atɔ nsɔjɛ, ‘Ntaa, mme ne ebibi ka nibri Ɔsɔwɔ na nibri ɛna. Kimkpɛ kɔ si mmɔwa.’
22“Ka nsɛ abeng abɔanju ɛbɛ, ‘Ɛbanɛban! Ma ba na etingi elebe ɛmɛ yɔbɛ. Ɛkaghɛ ɛfɛnɛ ka nnyighibɔ na akpaghata ka ajaa. 23Ma kɔ ntakpa mfɔng yi eyonɛ. Nɔngɔ warr ene eyighi ɛfɛnɛ ɛyɛbɛ nete. 24Ka mmɔwaa yɔ yi nkana sa amɔkpɔ amɛ fɛnɛ ajɔ ka nekpen, atantan ka mmɛ fɛnɛ nyiɛ.’ Ka mbɔ ajam eyighi.
25“Si eyighi emogho kisi, mmɔ wɛ yɔkogho yɔnu ajɔ ka ɛgbɛ. Ngara yi mmɔ yɔ yɔkogho ajɔ afɛnɛ akpere etek, ayog sa akobo ɔsɛ abanna. 26Ka mmɔ yɔkogho abeng mmɔanju wiwi abɔmmɛ ji emogho kisi. 27Mmɔanju akpɛɛ, ‘Mmɔannaja ama ba,’ ‘ka nsɔja amo yon ntakpa mfɔng yi atebsi amɛ fɛnɛ ka etek nnɔbɔnnɔbɔ na ekoro biji.’
28“Mmɔannyɛ yɔkogho sa ayogho asag nete atɛn nanama ka nju. Ka nsɛ aru ka ifi ama agɔrɛ. 29Ka akpɛ nsɛ, ‘Gbɔnter si ka ebe anya, mme ne nto nasi njo nkia, ka noto wa nkagha tɛn. Ka mɔ ɔkagha kɛ ndɔra mbon sɔng nyighi na atɛ baa. 30Ka ngara yi mmɔwa yɔfa ya amɔrɔbɔ akpugha ɛya akɛ asasa afɛnɛ ka etek, oyon mfɔng yi agafang ɔkiɛ!’
31“Nsɛ arag, ‘Mmɔwaa, wɔ ore fa nanaa, ka kpere ejo ji mkpe jija. 32Ka ɛnɔnɔb si warr eyighi ɛyɛbɛ nete atebsi mmɔannaja yɔfa akpɔkpɔ ka amɛ fɛnɛ ajɔ ka nekpen; atantan ka ɛmɛ fɛnɛ ɛyiɛ.’ ”
Currently Selected:
Luk 15: NDD Nta
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
