APOSTOLO 13
13
1Achi, kwapwile mu Andiakia, mu chikungulwila chize chapwileko, aprofeta ni alongeshi, Mbarnavwe, ni Semone, yoze uli ni jina likwo ngwo, Naijere, ni Luseu Ka-Sairene, ni Manaene, yoze amulelele hamwe ni nguvulu Heronde, ni Saulu. 2Shimbu machivumbika Mwene, nikulitwamina kulia, Spiritu Musandu wambile ngwenyi, Selenu kuli yami haliapwila, Mbarnavwe ni Saulu ha milimo yize hingunaatambikila. 3Hohene, muze te halitwamina kulia, yalemba, yasayika moko jo hali ayo akaye.
4O kashika, se atumiwine kuli Spiritu Musandu, apalumukine ku Selushia; ni kuze endele mu ulungu ku Saipuru. 5Ni muze apwile ku Salamina, ambujolele liji lia Zambi mu masunangonga ja A-Yunda; o apwile ni Yoano nawa ngwe kambaji ko. 6Muze apalikile ndusu mu tungu lieswe ndo ku Pafwo, awanyine umwe mukwa tufutafuta, profeta wa kwonga, Ka-Yunda, jina lienyi Mbar-Yesu; 7iye wapwile hamwe ni nguvulu Sejiu Paulu, mukwa malinjekela. Iye watambikile Mbamavwe ni Saulu, wafupile kwivwa liji lia Zambi. 8Alioze mukwa tufutafuta Elaima (mumu chocho jina lienyi Unalumbunuka) walimikine no, wafupile kukondolola nguvulu ku Ufulielo. 9Alioze Saulu, iye nawa Paulu, kanazala tò ni Spiritu Musandu, wamuhulikilile meso, 10wambile ngwenyi, Yena mwana Ndiapu, wa tò ni kalimbalimba mweswe ni uzazali weswe, mukwa kole ku ululi weswe, kusolo kulitwamina kuhengesa jila ja ululi ja Mwene, nyi? 11Haliapwila, tala, kwoko lia Mwene hali yena lili, kumuopwa kapuputa, ha mwaka kuchi kamona tangwa. Haze hene yaholokelele hali iye mbundu ni milima; iye wendanganyine nikufupa amwe amusongwele ku kwoko. 12Hohene nguvulu, muze amwene chize chapwile, wafulielele, nikulishikishila ha longeso lia Mwene.
13Achi, Paulu ni waze endele nenyi akatukile ku Pafwo, nikwenda mu ulungu ahetele ku Pereje, limbo lia mu Pamafwilia, ni Yoano waahichikile, wahilukile ku Yerusaleme, 14Alioze o, nikupalika ndusu mu Pereje, ahetele ku Andiakia, limbo lia mu Piseteya; o anjilile mu sunangonga ha tangwa lia Sambata, yatwama. 15Kulutwe lia kutanga cha shimbi ni mikanda ya aprofeta, akwa kuyula sunangonga atumine kuli ayo, ngwo, Mandumbu, kachi liji limwe lia kushinjila atu nuli nalio, ambenu. 16Mba Paulu wakatukile, iye nikulahula ni kwoko lienyi, wambile ngwenyi,
A-Izalele, ni yenu nwakwivwa woma wa Zambi, ivwenu: 17Zambi ya atu ano A-Izalele watongwele tulamba twetu, waanangamishine muze atwamine njize mu chifuchi cha Engitu, iye ni kwoko lia kwolola waatwalile haze liacho. 18Ha shimbu ngwe makumi awana a miaka walihumikijine ni ndako jo. 19Muze te hapupa mavungu shimbiali mu chifuchi cha Kanana, waahele chifuchi cho ngwe chihinga, ngwe kulakaji awana a miaka ni makumi atano a miaka. 20Kulutwe lia yino yuma waahele akwa kuyula ndo kuli profeta Samuel. 21Kulutwe lia chino echile mwanangana: Zambi waahele Saulu, mwana Kishi, lunga wa ku vungu lia Mbenjamine, ha shimbu lia makumi awana a miaka. 22Muze te hamuchiza, wasolwele David kuli ayo kupwa mwanangana wo; kuli iye nawa washindakenyene, ngwenyi, Hingunawane David mwana Yese, lunga wa kulita ni mbunge yami, iye kumakalinga upale wami weswe. 23Wa ku munyachi wa yono lunga nikulita ni chilakenyo, Zambi hanasolola kuli A-Izalele, umwe Chilamwina, Yesu. 24Shimbu kandeza, Yoano hatangu ambujolele upapachiso wa kulikonyeka kuli atu eswe a Izalele. 25Ni shimbu Yoano machimanununa jila yenyi, wambile ngwenyi, Kuchi nunashinginyeka, yami iya? Yami hi nguli Kristu ko. Alioze kumeza umwe kunyima yami, yoze haku ja ku molu jenyi chatelele kujitula.
26Mandumbu, ana ja munyachi wa Apalahama, ni waze hakachi kenu akwivwa woma wa Zambi, kuli yetu liji lia ulamwino uno linatumiwa. 27Mumu waze akutwama mu Yerusaleme, ni akwa kuyula jo, se kamusele chinyingi, chipwe kanyingikine maliji ja aprofeta aze akwatanga ha masambata eswe, aamanunwine ha kumuhisa. 28O chipwe kawanyine chitela cha kufwa muli iye, hindu echile Pilatu amushihe. 29Muze te hamanununa yuma yeswe ya kusonewa hali iye, amusunwishine ku mutondo, amusele mu fuka. 30Alioze Zambi wamuhindwishile hakachi ka afu: 31iye wamonekene matangwa anji kuli waze akandukile hamwe nenyi ku Ngalileya, ndo ku Yerusaleme, aze haliapwila anapu yela jenyi kuli atu. 32Mba yetu tunanwambulwila sango lipema lia chilakenyo chize alakenyene kuli tulamba, 33ngwo, Zambi hanachimanununa kuli yetu ana jo, se wasolwele Yesu; ngwe chinasonewa nawa mu Samu liamuchiali ngwo,
Mwanami Yena,
tangwa lino hingunakuseme.
34Alioze se wamuhindwishile hakachi ka afu, haliapwila kechi kahiluklla nawa ku kupola ndo ku miaka ya mutolo, hanahanjika ngwe chino ngwenyi,
Kumakakwaha yiwape yisandu yamwenemwene ya David,
35mumu kanambe nawa mu Samu likwo ngwenyi,
Kuchi katayiza Musandu we kumona kupola.
36Mumu David, muze te halingila chisemuko chenyi mwene ku upale wa Zambi, wayile tulo, amufunjile hamwe ni akako, wamwene kupola: 37alioze yoze amuhindwishile Zambi kamweneko kupola. 38Nyingikenu kashika, mandumbu, kuli yono, tunanwambulwila ukonekeno wa milonga: 39muli yono, mweswe mafuliela masamba ku yuma yize yeswe kunwahashile kusamba ku shimbi ya Mose. 40Kanyamenu kashika, kuchina chize anachihanjika mu mikanda ya aprofeta muchikeza hali yenu ngwo;
41Talenu, yenu akwa kaleleso, komokenu, tokenu;
mumu mungulinga chitanga ha matangwa jenu,
chitanga chize kunuchi kachifuliela nichimwe, kachi umwe manwambulwilacho.
42Shimbu atuhukile mu sunangonga, aliumbile kuli ayo aambulwile maliji ano ha tangwa lia Sambata likwo. 43Muze te akwa sunangonga halimwanga, A-Yunda anji ni akwa kutayiza akuwayila akawile Paulu ni Mbarnavwe, o nikuhanjika kuli ayo, aakunwine kunyongonona mu vumbi lia Zambi.
44Ni ha tangwa lia Sambata likwo limbo lieswe akungulukile, mukwivwa liji lia Zambi, akepe wika asalile. 45Alioze muze A-Yunda amwene mbunga, azalile tò ni ukwa, ahamikine yuma yize ahanjikile Paulu, nikushililika. 46Ni Paulu ni Mbarnavwe ahanjikile ni hamu, ngwo, Chinatambe kuhanjika liji lia Zambi kuli yenu hatangu. Alioze se nunalichinji kuli yenu, ni se nunalipatwila kunwatelele mwono wa mutolo, tunatewulukila kuli akwa mavungu. 47Mumu chocho Mwene watuhele shimbi ngwenyi,
Hingunakusela pangu lia akwa mavungu,
hanga ukapwe ulamwino ndo ku kusula songo lia hashi.
48Shimbu akwa mavungu evwile chino, awahililile, achichimiekene liji lia Mwene: ni waze eswe Zambi waafunjikile ku mwono wa mutolo afulielele. 49Liji lia Mwene liafumanyine ndusu mu chifuchi cheswe. 50Alioze A-Yunda akapwile pichi ja mapwo akwa uwayilo alemu, ni akwa lutwe a mu limbo, o avundwile yihungumiona hali Paulu ni Mbarnavwe, aambilile haze lia manjiza jo. 51Alioze o akukumwine fufuta ku molu jo mukwahisa, ayile ku Ikoniu. 52Tumbaji azalile tò ni uwahililo ni Spiritu Musandu.
Currently Selected:
APOSTOLO 13: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
